Baɗitari 3
3
Baɗitər Ndla Ar Mda
1Pwapu an mwaɓi na ɗəɗu ta shang akwa nca mwaɓiyayeri na akwa mtaku tə MTHLAKU na Hyel namta. Antə pwapu ni pəla aka mwala ni, “Hyel ku pəla ala giri abbər giri aɗiya səm kəlara yar nfwa na akwa gadina ni wa ya?”
2Antə mwala ni pəla, “Yeru ata mzhi səm yar nfwayeri na akwa gadina ni. 3Amma Hyel pəla yeru aɗiya səm yar nfwa na ata ɗəffa gadina ni wa, wala ka yeru tsəkwar wa, ta yeru asə mta.”
4Amma pwapu ni pəla aka mwala ni abbər, “Aɗi jiri wa, giri aɗi ata mtə wa. 5Kamnyar Hyel asənda abbər ma sakatə giri ku səm yar nfu ngəni, nca giri ata kəlardzi, antə giri ata ndzi tsu apa Hyel, antə giri ata səndə su na ɓɗaku ka su na ɗimi.”
6Sakatə mwala ni wuta abbər yar nfu ni ku hara ɓɗaku kamnyar ka mdə səma, tsuwa tsa ɓɗaku aka nca, tsuwa tsa su tə mda abara kamnyar namtə mda ka mdə ndzi ɗəɗu, antə tsa nthləi yar nfu ni ka ɓɗa. Antə tsa na aka salngkiɗa tsuwa, antə tsa ɓɗa. 7Təkəma təng nca ɗa kəlardzi, tə da nggaɓəla abbər da dura. Antə da ɓəltsə thlali kamnda ka nduɓhə ɗa, ka hartə bwakəma ɗa kəgari. 8Sakatə pci ku mtathlidzi ka mnya tahaku antə da nggatə kuraka MTHLAKU na Hyel akwa mwa akwa gadina ni. Antə sal ni ka mwalankiɗa ku ɗuwamtadzi akwa nca nfwayeri na akwa gadina ni, ta MTHLAKU na Hyel awutə ɗa. 9Amma MTHLAKU na Hyel ku kəga sal ni ka pəla, “Ga ama ri?”
10Antə tsa pəla, “I nggatə kuraka ga akwa gadina ni, antə I thlivəra, kamnyar tə I dura. Antə I ɗuwamta kərna.”
11Antə MTHLAKU na Hyel pəla, “Wan pəla ala ga abbər gə dura nə ri? Nənga ga ku səm yar nfwa natə I tsawa ala ga abbər ga aɗiya səm wa nda ri?”
12Antə sal ni pəla, “Mwala tə gə vədza ali ni an səntə ali yar nfu ni, antə I ku ɓɗa.”
13Antə MTHLAKU na Hyel pəla aka mwala ni abbər, “Ngəni man tə gə hara nə ri?” Antə mwala ni pəla, “Pwapu ni an pwaktəmta ra, antə I ku ɓɗa.”
14Antə MTHLAKU na Hyel pəla aka pwapu ni abbər,
“Kamnyar tə ga ku hara su ngəni,
“Ga ata ndzi shushuwari,
akwa nca shanga mwaɓiyayeri ar kəi
ka shanga mwaɓiyayeri ar mtaku.
Ga ata ndəkər dza ga ma ga ata mwa,
bərbər antə ga ata kwasari
akwa shanga ndzəndziyir mpika ga.
15I ata vu dawakur akwa daɓwa ga ka mwala ni,
ka akwa daɓwa durərni ka durər nga.
Tsa ata hadləmta kəra ga
antə ga ata kal ni ata matədukwari.”
16Antə tsa pəla aka mwala ni,
“I ata vu ka gə ɗar bwani akwa sakatə gə ka hur,
tsuwa akwa bwani antə ga ata yaɓəla maɗa' nga.
Wala apani
shanga mwaɓər nga ata ndzi kamnyar salər nga,
antə tsa ata hara kuthlikur ata kəra ga.”
17Antə Hyel pəla aka mdə sal ni,
“Təng tə ga ku psi thləm aka mwalankiri
har tə ga ku səm yar nfwa
natə I tsawa ala ga abbər ga aɗiya səm wa ni,
kamnyar ngəni di ata ndzi shushuwari kamnyar nga.
Ka vəi gərgər antə ga ata tsuhwa
kamnyar wutə susəma ata
akwa shanga ndzəndziyir mpika ga.
18Di ata ptsantə mtəhərayeri zumzum,
kəga kusarayeri na ana ngkatə kələr sur faku,
amma akəla su ptsəptsa na akwa mtaku
antə ga ata wutə susəmər nga.
19Ga ata kəthlər ka fa vəi gərgər kambəla gə wutə susəma,
har ka vədza aka vir tə ga ata ngka akwa di,
kamnyar akwa tsa antə gə səɓəla.
Kamnyar ga an bərbər
antə ga ata jaktə ngka ka ndzi bərbər.”
20Antə Adam ku vətə thləm aka mwalankiɗa abbər, Hauwa, kamnyar tə tsa an mama' shanga mji. 21Antə MTHLAKU na Hyel ku namtə ləptayeri ar kəsəm mwaɓi aka Adam ka mwalankiɗa, ka hadza ala ɗa.
Mdə Ku Kədləɓəla Adam Ka Hauwa
22Antə MTHLAKU na Hyel pəla, “Nggədza kulini mdə ku ndzi apa pal akwa nca mburu, atar səndə su na ɓɗaku ka na ɗimi. Antə kulini mda aɗiya zhar ni ka tsa ha tsiyari ka tsa nthləi yar nfur mpikə ni ka səma, ka ndzi ka mpika ba saka madi wa.” 23Apani antə MTHLAKU na Hyel ku kədləɓəla ni kazhar Gadinar Eden, ka tsa hara kəthlər ar tsuhwa ata di, su tə mdə nam ni kəgari. 24Antə tsa ku kədləɓəla mdə ni. Antə abwar raghəi ka Gadinar Eden ni, tsa pwi kerubayeri ka tsuwa katsakar ar kyanggyara u'u na akwa shinardzi akwa kəlara bwa kamnyar ngkatə mji anu lakur mwari adzə nfur mpikə ni.
Valgt i Øjeblikket:
Baɗitari 3: KNB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.