Jenesii̱s 23
23
Bi̱ tsꞌén kꞌien na̱ Saraa̱
1Úchán ko̱jo kan yito nó kamaá na̱ Saraa̱ nga kisꞌijña nga̱sondie, 2kó ki̱a̱ kꞌien na̱xi̱ńdá Kiriaa̱t-Arba̱, kui xi Ebroo̱n ꞌmí ngotꞌe̱ xi tikón nangi Kanaa̱n. Jaskan ngije Abraa̱n askjandátjé na̱ Saraa̱ nga kisꞌijñaxa̱ꞌya̱, 3kijíchji̱a̱jo xota̱ itita̱ xi síndo kui ngi̱ndiee̱, kó bi̱ katsoó:
4—Kuijín nangii̱ chjiá an, ta̱nga kꞌi̱e̱ tikónjinjnúꞌun, ngo kjo̱a̱nda kuíꞌájnúꞌun, tatíñájnúꞌun ngo ngi̱ndie nínga ka̱ma konijín an chjo̱onna.
5Kó kui xota̱ Ee̱t, bi̱ katsoó Abraa̱n:
6—Ndaꞌyéchiíjne̱ xingá, ngayeje ji̱n yandikónjne̱ ji. Tjanijín ji chjóo̱n nga̱tsjo̱ó xí ꞌniú tsjákjiꞌi ngase xi tikónjne̱, ngojín xi ku̱i̱ꞌíxꞌi̱a̱a̱n nga kjónijín ji chjóo̱n.
7Kósꞌe̱ Abraa̱n jastjíe̱n, kó kamábendikón kui xota̱ Ee̱t, 8nga bi̱ katsoó:
—Tsi ja̱koxi̱ nga ko̱e̱ꞌéndièjnúꞌun nga kꞌi̱e̱ konijín an chjo̱onna kꞌi̱e̱e̱, ngo kjo̱a̱nda míꞌájnúꞌun, ndókjo̱a̱jochiíjnú Efroo̱n ndií Soaa̱r, 9tsi̱ꞌe̱ nga ko̱tíñána ti̱xa̱na̱xi̱ xi tikón Makpela̱, kui xi tikóntꞌa nínga ꞌbítji̱e̱ nii̱, kó bo̱a̱ tꞌínjnúu̱ nga kꞌuichjíi̱ xi kótjín chjií kui ngi̱ndiee̱, tsi̱ꞌe̱ nga kꞌuiéna ngo nga̱tsjo̱ó xí tsa̱ꞌa̱n ka̱ma ngi̱jii̱n nangi xi tsa̱jún.
10Kó nga Efroo̱n ki̱a̱ tikón ngi̱jii̱n xota̱ itita̱ xi síndo ki̱a̱a̱, ꞌniú tsíchji̱a̱ nga bi̱ katsoó Abraa̱n tsi̱ꞌe̱ nga ku̱i̱ntꞌiè ngayeje xota̱xá xí kamátikó kuí ngi̱ndiee̱:
11—Ti̱ꞌinjetakín ji xingá, kotiñájaán kui ti̱xa̱na̱xi̱i̱, ta̱ tsjañaá ko̱jo kui kꞌijñá xi tikóntꞌaa̱, kó kuí xota̱xáná xi chistiko̱ kjo̱a̱a̱ nga ta̱ tsꞌéntsjáñaá, tjanijín ji chjóo̱n ki̱a̱a̱.
12Kósꞌe̱ Abraa̱n ꞌniú kamábendikón kuí xotaa̱, 13kó bi̱ katsoó Efroo̱n ngindyi̱ko̱n ngayeje xotaa̱:
—Ngo kjo̱a̱nda míꞌaá, ndaꞌyéchiíní, an kꞌuichjí án xi kótjín chjií kui kꞌijñaá, kó ꞌniú míꞌaá chjábé ji chjií tꞌanangìi̱, tsi̱ꞌe̱ nga ka̱ma konijín an chjo̱onna ngijee̱.
14Kó Efroo̱n bi̱ katsoó Abraa̱n:
15—Ji xingá, kui tꞌanangii̱ nijón úchán to̱ntiboa chjínií, a to̱n ꞌmíi̱ xi̱ꞌba̱. ¡Tjanijín ji chjóo̱n kui ngi̱ndiee̱!
16-20Kósꞌe̱ Abraa̱n ndakjiꞌi kamaá xi kótjín tsíꞌá Efroo̱n, kó ngindyi̱ko̱n xota̱ Ee̱t íchjií kui nda̱a̱ xi nijón úchán to̱ntiboa xi tsíꞌá, xikó kjiꞌi kjo̱a̱kitii̱ já xí botiñá nii̱. Kó bo̱a̱ tsꞌén nga tsi̱ꞌe̱ Abraa̱n kamá kui tꞌanangii̱ ko̱jo kui ti̱xa̱na̱xi̱i̱, ko̱jo ngayeje yá xí kjiꞌitjié kui tꞌanangii̱. Chistiko̱ kamá ngayeje jáxá ititaa̱.
Ngije kisꞌinda kui nii̱ Abraa̱n ki̱a̱ yínijín na̱ Saraa̱ ki̱a̱ ti̱xa̱na̱xi̱ xi tikón Ebroo̱n, kje̱n kꞌijñá Mamree̱, ki̱a̱ nangi Kanaa̱n.
Valgt i Øjeblikket:
Jenesii̱s 23: MAIX
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014