GENESIS 40
40
Iskay presokunapa mosqosqanmanta
1Chaykuna pasaruptinmi Egipto nacionpi reyman vino serviqwan panaderokunapa jefen reyninkupa contranpi faltakururqaku. 2Chaymi Rey Faraonqa iskay serviqninkunapa contranpi otaq vino serviqkunapa jefenpa contranpi hinaspa panaderokunapa jefenpa contranpi piñakururqa. 3Paykunatam Joseypa preso kasqan carcelman churarachirqa, chay carcelqa karqa reyta waqaychaq soldadokunapa capitanninpa wasinpim. 4Joseyman chay presokunata capitan qoykuptinmi Josey servirqa paykunata, unaymi karqaku preso. 5Egipto nacionpi reyman vino serviqmi panaderopiwan carcelpi kachkaspanku iskayninku chay tutalla mosqorurqaku, sapa mosqoypam karqa yachachikuynin. 6Paqarinnintin qawananpaq Josey hamuspanñataqmi paykunata tarirurqa hukmanyasqata. 7Hinaptinmi patronninpa wasinpi kaq presomasinkunata otaq Faraonpa serviqninkunata Josey tapurqa:
—¿Imanasqataq hukmanyasqa kachkankichik? —nispa.
8Chaymi paykuna nirqaku:
—Mosqorunikum hinaptinmi mana pipas kanchu imam ninan niwaqniyku —nispa.
Hinaptinmi Josey nirqa paykunata:
—Willawaychik, Diosmi qosunkichik mosqoynikichikpa imam ninantaqa —nispa.
9Chaymi vino serviqkunapa jefen willakurqa mosqoyninta Joseyman:
—Ñoqam mosqoyniypi rikurqani uvas sacha ñawpaqniypi kachkaqta. 10Chay uvas sacham kasqa kimsa kallmayoq, ikllimuspam sisamuchkasqa hinaptinmi uvaspa rurun poqorusqa. 11Hinaptinmi Faraonpa copan makiypi kachkasqa chaymi uvaskunata Faraonpa copanman qapispay copata payman haywasqani.
12Hinaptinmi Josey nirqa:
—Kaymi mosqoynikipa imam ninanqa: Kimsa kallmakunam kimsa punchaw. 13Kimsa punchawmantam Faraon pusachisunki hinaspam puestoykiman kutiykachisunki chaymi Faraonman servinki copata imaynam ñawpaqta qosqaykiman hina. 14Chayna allinpi kaspaykiqa amamá qonqaruwankichu, ama hina kaspaykimá Rey Faraonta niykapuwanki kay carcelmanta horqowananpaq. 15Hebreo casta runakunapa kasqan lawmantam ñoqataqa suwamuwarqaku. Mana imamantataqmi kay carcelmanpas churaruwanku —nispa.
16Panaderokunapa jefenpas vino serviqman mosqoyninpa imam ninanta willaykuptinmi Joseyta nirqa:
—Ñoqañataqmi kaynata mosqorurqani: Umaypim apachkasqani yuraq tanta apana patanasqa kimsa balayta. 17Alton kaq balaypim kachkasqa Faraonpaq tukuy rikchaq miskillaña tantakuna hinaptinmi chay apasqay balaymanta alton pawaq animalkuna mikuchkasqa.
18Chaymi Josey nirqa:
—Kaymi mosqoynikipa imam ninanqa: Kimsan balaykunam kimsa punchaw. 19Kimsa punchawmantam Faraon pusachisunki hinaspam kunkaykimanta sachaman warkuchisunki chaymi alton pawaq animalkuna aychaykita mikunqa —nispa.
20Kimsa punchawmantam Faraon santonpi convidota rurarqa llapallan serviqninkunapaq hinaspam horqochimurqa carcelmanta vino serviqkunapa jefenta chaynataq panaderokunapa jefentapas. 21Vino serviq jefetam kutiykachirqa puestonman chaymi Faraonman vinota servirqa. 22Panaderokunapa jefentañataqmi warkurachirqa Joseypa nisqanman hina. 23Vino serviqkunapa jefenñataqmi mana yuyarqachu Joseymanta, aswanqa qonqarurqam.
Valgt i Øjeblikket:
GENESIS 40: QUEAYA87
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind