GENESIS 34
34
Jacobpa churin Dina abusasqa kasqanmanta
1Jacobpa churin Leapa wawan Dinam lloqsirqa chay llaqtapi sipaskuna qawaq. 2Dinata Hamorpa churin Siquem qawaykuspanmi engañowan abusaruspan penqayman churarurqa. Hamorqa karqa chay lawpi kamachikuq Hiv casta runam. 3Aswanqa Jacobpa churin Dinatam kuyarurqa Siquem hinaspam kuyakuyllawanña rimapayarqa. 4Chaymi Siquemqa taytan Hamorta rimapayarqa:
—Yaykupakuy kay sipaswan casarakunaypaq —nispa.
5Ichaqa Jacobmi yacharurqa churin Dinata Siquem penqayman churarusqanmanta. Aswanqa qari churinkuna campopi animalkunawan kaptinmi Jacobqa upallalla karqa paykuna hamunankama. 6Chaymi Siquempa taytan Hamor rirqa Jacobman yaykupakuq.
7Jacobpa churinkunañataqmi yacharuspanku hamurqaku campomanta. (Jacobpa huknin sutinmi Israel.) Jacobpa warmi churinwan Siquem loco hina puñurusqanmanta llakikuruspankum anchata piñakururqaku paykuna ukupiqa chayqa mana haykapipas rurana kasqanrayku. 8Chaymi Hamor paykunawan rimarqa kaynata:
—Churiy Siquenmi llumpayta kuyarun panikichikta, ama hina kaspayá ama harkakuychikchu churiywan casarakunanta. 9Ñoqaykuwantaq aylluta ruraspayá warmi churikichikkunatapas casarachiychik ñoqaykumanta kaqkunawan, qamkunapas warmi churiykuwanyá casarakuychik. 10Ñoqaykuwanñayá *f**yachakuychik, allpaqa kanqam chaypi yachanaykichikpaq chaynataq negocio ruranaykichikpaqpas. Hapikuychikyá chay allpata qamkunapaqña kananpaq —nispa.
11Siquemqa nirqataqmi Dinapa taytantawan turinkunata:
—Ama hina kaspaykichikyá casarachiwaychik hinaptinqa qosqaykichikmi imapas mañawasqaykichikta. 12Ñoqapa parteymanta ima regalokunataña mañakuptikichikpas qosqaykichikmi. Kay sipaswanyá casarachiwaychik —nispa.
13Ichaqa paninku Dinata Siquem penqayman churasqanmantam taytan Hamortawan engañollawan Jacobpa churinkuna 14nirqaku:
—Ñoqaykuqa penqay kasqanraykum paniykutaqa mana qoymankuchu qari kaynin mana señalasqa runakunamanqa. 15Ichaqa aceptaymankumá ñoqayku hina qamkunamanta llapan qarikuna señalasqa kaptikichikqa. 16Chayraqmi casarakuwaqchik warmi churiykuwanqa, ñoqaykupas chayraqmi casaraymanku warmi churikichikkunata. Chaynapim qamkunawan *f**yachaspa huk castallaña kasunchik. 17Mana señalakuyta munaspa mana kasuwaptikikum ichaqa paniyku sipasta pusarikuspa pasakusaqku —nispa.
18Chay rimasqankum Hamorpa churin Siquempaq allin rikchakapurqa. 19Jacobpa churin Dinata kuyarusqanraykum Siquemqa chay nisqanta apurawaman rurarqa. Siquemqa karqa taytanpa familianpi llapallanmanta allin respetasqam. 20Chaymi Hamorqa churin Siquempiwan rirqaku llaqtankupa zaguannin punkupi huñunakuyman hinaspam rimarqaku llaqtankupi runakunawan kaynata:
21—Kay runakunaqa amistadninchikmi, chaynaqa kay allpanchikpi *f**yachaspayá negociata rurachunku. Kay allpaqa hatunmi, paykunapaqpas haypanqam. Ñoqanchikmi warmi churinkunata casarasunchik, paykunapas casaranqam warmi churinchikkunata. 22Ichaqa munasqankuman hina ñoqanchikwan yachanankupaqmi paykuna hina llapanchik qarikuna señalachikusun chaynapi huk castallaña kananchikpaq. 23Lliw kapuqninkupas chaynataq tukuy animalninkupas ñoqanchikpaqmi kanqa. Ichaqa paykunawanyá conveninakuykusun ñoqanchikwan *f**yachanankupaq —nispa.
24Chaymi llaqtapi kallpayoq llapallan qarikuna kasukurqa Hamorpa hinaspa churin Sequempa nisqanta, llapallankum qari kayninkupa qarachanta kuchuchikurqaku. 25Aswanqa kimsa punchawña hatun nanayllawanña kachkaptinkum Dinapa turinkuna, Simeonwan Leviy otaq Jacobpa churinkuna sapakama espadankuta hapispa yaykurqaku llaqtaman hinaspam wañurachirqaku llapallan runakunata mana defiendekuy atichkaqta. 26Hamortapas espadawanmi churin Sequemtawan wañurachirqaku hinaspam Dinata Siquempa wasinmanta horqoruspa kutichirqaku. 27Jacobpa wakin churinkunapas paninku penqayman churasqa kasqanmantam chay wañuchisqanku runakunapa kasqanman rispanku saquearqaku llaqtata. 28Qechurqakum ovejakunata, vacakunata hinaspa asnokunata. Apakurqakum llaqtapi llapa ima kaqkunatapas chaynataq campopi kaqkunatapas. 29Apakurqakumá tukuy imankutapas, llapallan wawakunatapas, warminkutapas chaynataq wasikunapi tukuy kaqkunatapas. 30Chaymi Simeontawan Leviyta Jacob nirqa:
—Kay llaqtapi *f**yachaq Canaan casta runakunawan hinaspa Ferez casta runakunawanmi cheqninarachiwankichik hinaspam penqayman churaruwankichik, as runalla kachkaptinchikqa atacaruwaspanchikchá wañurachiwasun, wañurachinqakutaqchá wasinchikpi llapallan kaqkunatapas —nispa.
31Chaymi paykunañataq nirqaku:
—¿Chuchumikata hinachu paniykuta ruranan karqa? —nispanku.
Valgt i Øjeblikket:
GENESIS 34: QUEAYA87
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind