Génesis 7
7
Jatun musphay para
1Chaymanta Tata Diosqa Noeta nerqa: Qan, chantá aylluyki ima jatun barcoman yaykuy, imajtinchus noqa rikuni mita masiykikunamanta qanlla munasqayman jina purisqaykita. 2Qanqa tukuy llimphupaj qhawasqa uywakunamanta#7.2 Llimphupaj qhawasqa uywata: Noé llimphupaj qhawasqa uywata astawan barcoman apaykunan karqa, Diosman uywa ñak'asqata jaywajtin, ama askamalla tukukunanpaj. Lv 11; Dt 14.3-21. qanchis chinata, qanchis orqotawan barcoman qhatiykunki. Mana llimphupaj qhawasqa kajkunamantarí, uj chinatawan, uj orqollatawan qhatiykunki. 3Jinallataj phawajkunamantapis qanchista yanantinkama apaykunki. Ajinata ruwanki chaykuna kay pachamanta ama chinkanankupaj. 4Noqataj qanchis p'unchaymantawan tawa chunka p'unchayta, tawa chunka tutatawan parachimusaj. Ajinata kay pachamanta tukuy kawsashaj ruwasqayta chinkachisaj, nispa.
5Chantá Noeqa tukuy imata Tata Diospa kamachisqanman jina ruwarqa. 6Musphay para yaku kay pachata p'ampaykorqa chaypacha, Noeqa 600 watayoj kasharqa. 7Noetaj jatun musphay paramanta ayqekunankupaj jatun barcoman yaykorqa churinkunawan, warminwan, chantá ñojch'ankunawan ima. 8Jinallataj llimphupaj qhawasqa animalkuna, mana llimphupaj qhawasqa animalkuna, phawajkuna, qhatatakuspa purej animalkunapis yaykullarqankutaj. 9Diospa nisqanman jina, animalkunamanta uj chinawan, uj orqowan, iskaymanta iskay Noewan khuska barcoman yaykorqanku. 10Qanchis p'unchayninmantaj musphay para yaku kay pachata p'ampayta qallarerqa.
11Noé 600 watayoj kashajtin, iskay kaj killamanta chunka qanchisniyoj p'unchayta, jallp'aj sonqonmanta yaku t'ojyamorqa. Jinallataj janajmanta tukuy yakupis p'uñumanta jina musphayta jich'akamorqa. 12Chaypachaqa jallp'a patata paraqa tawa chunka p'unchayta, tawa chunka tutatawan pararqa.
13Maypachachus parayta qallarerqa, chay kikin p'unchayta Noé, chantá churinkuna Sem, Cam, Jafetwan ima jatun barcoman yaykorqanku. Jinallataj Noéj warmin, kinsantin ñojch'ankuna ima yaykullarqankutaj. 14Paykunawan khuska yaykullarqankutaj tukuy imaymana rijch'aj k'ita animalkuna, wasi uywakuna, qhatatakuspa purej animalkuna, tukuy imaymana phawajkuna ima. 15Tukuy imaymana animalkunaqa iskaymanta iskay jatun barcoman Noewan khuska yaykorqanku. 16Noeman Dios kamachisqanman jina, sapa animalmanta chinawan orqowan yaykorqanku. Chaymantataj Tata Diosqa jatun barcoj punkunta wisq'aykorqa.
17Chantá jatun musphay paraqa tawa chunka p'unchayta pararqa. Yakutaj manchayta wiñarqa, jinataj jatun barcota maypichus kasqanmanta tuytuchispa, oqharerqa. 18Yakoqa astawan astawan kay pachaman junt'aykorqa, jatun barcotajrí yaku patapi tuytorqa. 19Yakoqa manchayta wiñaspa, kay pachapi tukuy jatuchaj orqokunata p'ampaykorqa. 20Orqokunata p'ampasqanmantapis, yakoqa qanchis metrotawan jinaraj wasaykorqa. 21Ajinata kay pachapi tukuy kawsayniyoj wañorqanku: Phawajkuna, uywakuna, k'ita animalkuna, jallp'a patata qhatatakuspa purejkuna, jinataj tukuy runakuna ima. 22Ajinamanta kay pachapi tukuy samaspa kawsajkuna wañorqanku.#2 P 3.6. 23Chaywanpis Noé, chantá jatun barcopi kajkuna imalla kawsarqanku. Jatun barcoman mana yaykojkunarí, tukuyninku wañorqanku: Runakuna, uywakuna, phawajkuna, qhatatakuspa purejkuna ima. 24Chay yakutaj kay pachata 150 p'unchayta p'ampaykorqa.
Valgt i Øjeblikket:
Génesis 7: DQPC
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Revisión Biblia Quechua Boliviano © Sociedad Bíblica Boliviana, 2017.