ENtandiika 3
3
Obujeemu bwʼomuntu
1Atyanu ompiri yabbaire mukalabakalaba okukiraku ebisolo byonabyona ebyʼomu kigona, oMusengwa ebiyakolere. Lwabbaire lumo ompiri nʼabuulya omukali ati, “OKibbumba dala yabalagiire okutalyangaku ekineneka kyʼomusaale gwonagwona ogwʼomu musiri gunu?” 2Omukali nʼamwiramu ati, “Twezya okulya ebineneka byʼemisaale gyonagyona egyʼomu musiri gunu, 3okutoolaku ebineneka byʼomusaale oguli aakati wʼomusiri. OKibbumba yatugaine okugulyaku newankubbaire okugukwataku, kaisi titwafa.” 4Ompiri nʼakoba omukali ati, “Okufa timwalifa.” 5OKibbumba yabakobere atyo olwʼokubba yabbaire amaite ati, olunaku olumwaliguliiraku, amaiso gaanywe lugaliiguka. Era nywena mwalibba ngʼoKibbumba okumanyanga ekisa nʼekibbikibbi.
6Awo omukali nʼabona omusaale nago nga guboneka kusani. Nʼabona ngʼebineneka byagwo byezya okubba binoli ino okulya. Era nʼagwegomba olwʼokubba guleetera omuntu amalabuki. Kale nʼanokolaku ebineneka byagwo nʼalyaku, nʼawaaku nʼoibaaye yena nʼalya. 7Awo amaiso gaabwe bombi ni gaiguka, ni beetegeera nga babbaire bwere era ni batunga ebikoola byʼemisaale ni beesiba.
8Awo akanaigulo ako omusaiza nʼomukaliwe, ni bawulira ensindo gya Musengwa ngʼatambula omu musiri nago, ni bamwebisaku omu misaale gyʼomu musiri nago. 9Neye oMusengwa nʼayeta omusaiza ati, “Adamu oli yaina?”
10Omusaiza nʼakoba oKibbumba ati, “Mpuliire ensindo ngʼotambula omu musiri, ni ntya, olwʼokubba mbaire bwere kale ni neebisa.”
11OKibbumba nʼamubuulya ati, “Naani akukobeire ati obbaire bwere? Oliire ekineneka kyʼomusaale ogunakulagiire okutalyaku?”
12Omusaiza nʼamwiramu ati, “Omukali oguwampaire okubbanga aanu na nze, niiye ampaireku ekineneka kyʼomusaale nago, era ni ndya.”
13Awo oMusengwa nʼakoba omukali ati, “Niki ekyo ekyokolere?”
Omukali nʼamwiramu ati, “Ompiri niiye ambeyabbeyere, ni nkirya.”
14Kale oMusengwa nʼakoba ompiri ati, “Atyanu olwʼokubba okolere ekintu ekyo,
Osunire ekiraami omu byayo byonabyona
nʼebisolo byonabyona ebyʼomu kigona!
Weekuusiranga kida
era waalyanga itakali
enaku gyonagyona egyʼobwomibwo.
15Era nateekawo ekinakoolo
akatiwo nʼomukali oyo,
nʼakati wʼeibyaireryo nʼeibyairerye.
Eibyairerye lyatentenanga emitwe gyʼeibyaireryo
nʼeibyaireryo lyaboizanga ebitindiro byʼeibyairerye.”
16OKibbumba nʼakoba omukali iye ati,
“Nakwongera nakimo ino obulumi omu kubyala.
Owewaabbanga obyala waabbanga nʼobulumi.
Weegombanga oibaawo nʼakubba kumpi,
neye era yakufuganga.”
17Kaisi oKibbumba nʼakoba iye omusaiza nga niiye Adamu ati, “Olwʼokubba owulisisirye omukaliwo, nʼolyaku ekineneka kyʼomusaale ogunakulagiire okutalyaku,
Eitakali lisunire ekiraami oku lulwo.
Omu kukalabana mu wasunanga ekyokulya,
enaku gyonagyona egyʼobwomibwo.
18Eitakali lyakumereryanga amawa nʼonamuswata,
era waalyanga bimera byʼomu musiri.
19Omu kukola nʼotuuyaana
mu wasunanga ekyokulya
paka oluwalikanga omwitakali,
olwʼokubba mu wazwire.
Ekyo kityo olwʼokubba bakukolere mwitakali,
era omwitakali mu walikanga.”
20Awo Adamu nʼawa omukaliwe eriina ati, Kaawa. Yamuwaire eriina eryo olwʼokubba yabbaire wʼokubba maaye wʼabantu bonabona.
21Era oMusengwa nʼakolera Adamu nʼoKaawa omukaliwe ebizwalo byʼamadiba, nʼabazwalisya.
22Era oMusengwa nʼakoba ati, “Atyanu omuntu asuukire nga iswe, amaite ekisa nʼekibbikibbi. Era bateekwa okutamwikirirya okunokola nʼalya ekineneka ekyʼomusaale ogwʼobwomi, nʼawangaala emirembe nʼemirembe.” 23Kale oMusengwa nʼamubbinga omu musiri oguli Edeni, okwaba alimenge eitakali omu bamukolere. 24Oluzwanyuma lwʼokubbingamu omuntu, nʼateeka e buzwaisana omu musiri ebibbumbe ebiriku ebiyaya, ebibeeta Bakeruubbi, nʼempiima emesya nga yeebuuba okukuumanga enzira eyaba oku musaale ogwʼobwomi.
Valgt i Øjeblikket:
ENtandiika 3: GWR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2017, Wycliffe BibLe Translators, Inc., All rights reserved.