Matiyo 26

Yanagdumdum yang mga Pangoo Magpatay kang Isa

(Mark. 14:1-2; Luk. 22:1-2; Yah. 11:45-53)

1Pagkatapos ni Isa mag-indo sang kariko ninyan, yagalaong yan sang mga inindowan nan, 2“Kyatigaman mayo na dowang allaw dakoman aw madatung da yang Pakaradyaan ng Paglabay. #26:2 Sang Pakaradyaan ng Paglabay kyadumduman ng mga Yahodi yang paglowas ng Tohan sang mga kaompowan nilan adto sang bangsa ng Misir sidtong wakto na yalabayan ng malaikat yang mga baay nilan. Tanawa sa Kitab Tawrat, Pagpanaw 12:1-3, 12-17. Sinyan na wakto adakupun da ako na Anak ng Manosiya untak ilansang adto sa kros.”

3Na, sarta yagalaong si Isa ninyan, yanagkatipon yang mga pangoo ng mga imam aw yang mga pangoo ng mga Yahodi adto sang baay ni Kayapas na yan yang Dakowa na Imam. 4Yanagbaaw-baaw silan daw monono yang pagdakup nilan kang Isa na di akatigaman ng mga otaw aw monono yang pagpatay kanan. 5Yagalaong silan, “Di gaid natun yani inangun sang wakto ng pakaradyaan kay basin magakasamok yang mga otaw.”

Yabowan si Isa ng Paballo

(Mark. 14:3-9; Yah. 12:1-8)

6Ansinyan sarta adto sang longsod ng Bitani sang Isa, kyomadto silan sang baay ni Simon, yang otaw na sanglaun singaon. 7Nang yanagkan silan, aon dyomatung na bobay na yagadaa ng tagbi na lasakanan na ininang ng bato na alabastro na yamapono ng paballo na labi na mahalaga. Ansinyan dyomood yan kang Isa aw obowi nan ng paballo yang oo nan.

8Pagkita sinyan ng mga inindowan ni Isa, yadaman silan aw yagalaong silan, “Kanogon ninyan na paballo! 9Madyaw pa aw byarigya inyan ng dakowa na kantidad aw yang alin i-atag adto sang mga miskinan.”

10Na, kyatigaman ni Isa daw ono yang pyagabaawan nilan, agaw yagalaong yan kanilan, “Nanga pyagakasamok mayo yani na bobay? Madyaw yang ininang nan kanak. 11Kay yang mga miskinan abay mayo kaupud, awgaid ako, di ako magapabilin adi kamayo. 12Yabowan nan ako ng paballo untak andamun nan yang kanak lawas sang kanak paglubung. 13Sa bunna-bunna na ipaglaong ko kamayo na maskin wain adi sining donya ipayapat yang Madyaw na Gogodanun, amagogod oman yani na ininang nan silbi tadumanan kanan.”

Yasogot si Yodas sang Pagtraydor kang Isa

(Mark. 14:10-11; Luk. 22:3-6)

14Pagkatapos sinyan, si Yodas Iskariyot na sambok sang sampoo aw dowa na sahabat ni Isa, kyomadto yan sang mga pangoo ng mga imam 15aw yagalaong yan kanilan, “Pila yang i-atag mayo kanak kong ipagtraydor ko kamayo si Isa?” Na, yabayadan dayon nilan yan ng 30 ka bok na sapi na pilak. 16Aw sikun sinyan yagapanganap da si Yodas ng madyaw na wakto na ipadakup kanilan si Isa.

Yang Maori na Kandori ni Isa upud sang mga Inindowan nan

(Mark. 14:12-21; Luk. 22:7-13; Yah. 13:21-30)

17Ansinyan pagdatung ng pukas na allaw ng Pakaradyaan ng Pan na way Labadora, #26:17 Yang Pakaradyaan ng Pan na way Labadora na tyawag oman ng Pakaradyaan ng Paglabay pitong allaw. Sang pukas na allaw sinyan kyadumduman ng mga Yahodi yang paglowas ng Tohan sang mga kaompowan nilan adto sang bangsa ng Misir sidtong wakto na yalabayan ng malaikat yang mga baay nilan. Tanawa sa Kitab Tawrat, Pagpanaw 12. dyomood kang Isa yang mga inindowan nan aw yaga-osip silan, “Wain yang karim mo na andamun nami yang kanatun pagkan para sang Pakaradyaan ng Paglabay?”

18Tyomobag si Isa, “Kadto kamo sang syodad aw paglaonga mayo yang otaw na makita mayo ansan na ‘Yagalaong yang kanami goro na masaid da yang wakto na pyagakahanda kanan ng Tohan. Magakandori da yan ansan sang kammo baay para sang Pakaradyaan ng Paglabay upud sang mga inindowan nan.’ ” 19Ansinyan tyoman da ng mga inindowan yang sogo kanilan ni Isa aw pyaga-andam da nilan yang pagkan para sang kandori.

20Pagkagabi sinyan yamingkod si Isa sang lamisa upud sang sampoo aw dowa na mga sahabat nan. 21Sarta yanagpangan silan, yagalaong si Isa, “Sa bunna-bunna na ipaglaong ko kamayo na aon sangka otaw kamayo na magatraydor kanak.”

22Na, labi da yang karido nilan aw yang matag-isa kanilan yaga-osip kanan, “Kay Dato, ako ba yang pyagalaong mo?”

23Tyomobag si Isa, “Yang sangka otaw kamayo na yagadarit ng pan sang ladya upud kanak, yan yang magatraydor kanak. 24Amatay ako na Anak ng Manosiya mag-onawa ng yakasorat sang Kitab. Awgaid kallat ng otaw na magatraydor kanak. Madyaw pa kong wa yan akaotaw.”

25Ansinyan yaga-osip kanan si Yodas na yan yang magatraydor kanan, “Kay Goro, ako ba yang pyagalaong mo?”

Tyomobag si Isa, “Na, pyagalaong da mo.”

Yang Kandori na Ya-inang ng Tadumanan kang Isa

(Mark. 14:22-26; Luk. 22:14-23; 1 Kor. 11:23-25)

26Adon, sarta yanagpangan pa silan, kyomamang si Isa ng pan aw yamanginsokor sang Tohan. Pagkatapos, pyagapisang-pisang nan yang pan aw atagan sang mga inindowan nan aw laong nan, “Dawata mayo yani aw kana mayo kay yani yang kanak lawas.”

27Ansinyan kyomamang yan ng inumanan aw pagkatapos manginsokor sang Tohan yatag nan kanilan aw laong nan, “Inuma mayo yani, obos mayo. 28Kay yani yang kanak dogo na yaga-atag ng kasigorowan sang pyagapasadan na ininang ng Tohan sang manosiya. Maboos yang kanak dogo untak ma-ampon yang madaig na mga otaw sikun sang mga dosa nilan. 29Ipaglaong ko kamayo na sikun adon di da ako minum nining tumuk ng grips taman sang wakto na minum da ako ng bago na inmanun upud kamayo adto sang pyagdatowan ng kanak Ama.”

30Pagkatapos sinyan, yanagkanta silan ng pagpoji adto sang Tohan aw kyomadto da silan sang Butay ng Jayton.

Pyagatagna ni Isa na Magalaong si Pitros na wa yan Akilaa kanan

(Mark. 14:27-31; Luk. 22:31-34; Yah. 13:36-38)

31Ansinyan yagalaong si Isa sang mga inindowan nan, “Adon na gabi magadaagan yang kariko mayo sabap kanak aw mabiya kamo kanak. Kay aon yakasorat sang Kitab na yagalaong,

“ ‘Ipapatay ng Tohan yang magbabantayay ng mga karniro,

aw ansinyan magakanat-kanat da yang mga karniro.’ #26:31 Yani na ayatan yakasorat sa Kitab Tawrat, Nabi Sakariyas 13:7.

32Awgaid,” laong ni Isa, “pagkatapos ko mabowi oman ama-ona ako kamayo adto sa Jalil.”

33Ansinyan yagalaong si Pitros kang Isa, “Maskin abiyaan kaw ng kariko nilan, awgaid ako, di ako mabiya kammo.”

34Yagalaong kanan si Isa, “Sa bunna-bunna na ipaglaong ko kammo na sang di pa magatagaok yang laboyo adon na gabi, makatoo kaw maglaong na wa kaw akilaa kanak.”

35Awgaid yagalaong oman si Pitros, “Di ako magalaong na wa ta kaw akilaa maskin pa apatayun ako upud kammo.” Na, maynan oman yang pyaglaongan ng kadaigan na mga inindowan.

Yagadowaa si Isa adto sa Gitsimani

(Mark. 14:32-42; Luk. 22:39-46)

36Ansinyan kyomadto si Isa aw yang mga inindowan nan sang sambok na tanumanan na tyawag ng Gitsimani. #26:36 Yang tanumanan ng Gitsimani masaid sang Butay ng Jayton. Pagdatung nilan ansan, yagalaong si Isa sang mga inindowan nan, “Pag-ingkod kamo ansini sarta magadowaa ako adto sang onaan.” 37Tapos, pyaga-agad nan si Pitros aw yang dowangka otaw na mga anak ni Sibidi. Ansinyan yamarido da yang ginawa ni Isa aw mabugat yang pangatayan nan. 38Laong nan kanilan, “Labi da yang karido ng ginawa ko na maynang amatay da ako. Ansini da gaid kamo aw ayaw kamo pagkatoog. Pagbantay kamo upud kanak.”

39Ansinyan kyomadto si Isa sang onaan aw syomojod yan sang lopa kay magadowaa. Laong nan, “O kay Ama, aw mapakay, ayaw pagtogoti na amagi ako sini na madatung na kasikotan. Awgaid dili ng karim ko yang amatoman kondi yang karim mo.”

40Ansinyan byomarik yan adto sang toongka otaw na mga inindowan nan aw yadatungan nan silan na yamangkatoog. Pyokaw nan silan aw yagalaong yan kang Pitros, “Nanga, wa kamo pakabantay upud kanak na maskin sangka oras da gaid? 41Pagbantay aw pagdowaa kamo untak di kamo madaa ng sasat. Sa suud ng pangatayan mayo karim mayo magpangagad sang Tohan, awgaid sabap ng maomay yang lawas mayo madari kamo madaa ng sasat.”

42Ansinyan pyomanaw da oman si Isa aw yagadowaa da oman yan. Laong nan, “O kay Ama, kong kinaanglan na amagi ako sini na kasikotan, yang karim mo yang amatoman.”

43Pagkatapos, byomarik da oman yan sang mga inindowan nan aw kinita nan na yamangkatoog da oman silan kay labi da yang katodtod nilan. 44Ansinyan pyomanaw da oman yan aw yagadowaa yan ng ikatoo na maynan oman yang pyaglaongan nan. 45Pagkatapos magdowaa, byomarik da oman yan sang mga inindowan nan aw yagalaong yan kanilan, “Yabay pa gaid kamo matoog aw magpatana? Osto da kay dyomatung da yang wakto na adakupun ako na Anak ng Manosiya ng baradosa na mga otaw. 46Unda, bangon da kamo kay mapanaw da kita. Idi da yang otaw na magatraydor kanak.”

Yang Pagdakup kang Isa

(Mark. 14:43-50; Luk. 22:47-53; Yah. 18:3-12)

47Nang yagalaong pa si Isa, dyomatung si Yodas na sambok sang sampoo aw dowa na mga sahabat. Madaig yang mga otaw na yaga-upud kanan na aon daa na mga lodyo aw mga bobonal. Syogo silan ng mga pangoo ng mga imam aw yang mga pangoo ng mga Yahodi. 48Na, pyagalaong silan dadaan ni Yodas na yan yang magatraydor kang Isa daw ono yang inangun nan silbi tanda kanilan. Laong nan, “Yang otaw na aukan ko, yan yang pyaga-anap mayo. Dakupa da mayo.” 49Agaw pagdatung ni Yodas, dyomood dayon yan kang Isa aw maglaong, “Assalamo alaykom, kay Goro.” Aw yaukan nan si Isa.

50Yagalaong kanan si Isa, “Kay lagi, inanga da yang kyakanian mo.”

Ansinyan dyomood kang Isa yang kadaigan na mga otaw aw dakupa nilan. 51Na, isa sang mga kaupudanan ni Isa yagagabot ng lodyo aw tibasa nan yang sogowanun ng Dakowa na Imam aw ya-otod yang sangkilid na taringa nan. 52Yagalaong kanan si Isa, “Barikan yang lodyo mo sang tagob kay yang magagamit ng lodyo, lodyo oman yang makamatay kanan. 53Wa mo kadi akatigami na makapangayo ako ng tabang sang kanak Ama aw ansinyan apadaan nan ako ng libo-libo na mga malaikat? 54Awgaid kong inangun ko yan, monono da yang pagtoman sang yakasorat sang Kitab na yagalaong na dait ma-inang yang kariko nini?”

55Ansinyan yagalaong si Isa sang mga otaw, “Ono, tolisan ba ako na kinaanglan kamo magdaa ng lodyo aw bobonal sang pagdakup mayo kanak? Matag allaw adto ako maga-ingkod sang Baay ng Tohan aw yaga-indo, awgaid wa mayo ako adakupa. 56Awgaid yamaitabo yang kariko nini untak matoman yang syorat ng mga nabi sang Kitab.” Ansinyan yagabiya kanan yang kariko ng mga inindowan nan aw yanagdaagan silan.

Si Isa sa atobangan ng Makagwas na Hokomanan ng mga Yahodi

(Mark. 14:53-65; Luk. 22:54-55, 66-71; Yah. 18:13-14, 19-24)

57Pagkatapos sinyan dyaa si Isa nidtong mga otaw na yagadakup kanan adto sang baay ni Kayapas na yan yang Dakowa na Imam. Yanagkatipon ansan yang mga magiindoway ng Hokoman aw yang mga pangoo ng mga Yahodi. 58Na, si Pitros, yasonod yan kang Isa awgaid sang mawat-awat gaid taman sang pamanag ng baay ng Dakowa na Imam. Ansinyan syomuud yan sang pamanag aw yamingkod upud sang mga gowardya untak katigaman nan daw ono yang akatamanan ni Isa.

59Yang mga pangoo ng mga imam aw yang kariko ng mga opisyales sang Hokomanan ng mga Yahodi, yagapanganap silan ng ebidensya na maskin dili ng bunna untak ma-akosar aw mapatay nilan si Isa. 60Awgaid way kinita nilan na dosa maskin madaig yang kyomaon kanilan aw yagalaong ng dili ng bunna makapantag kanan.

Awgaid sang orian aon dowangka otaw 61na yagalaong, “Yani na otaw yagalaong na mapakay nan gubaun yang Baay ng Tohan aw apa-indugun oman nan sa suud ng toong allaw.”

62Ansinyan yamindug yang Dakowa na Imam aw yagalaong yan kang Isa, “Ono yang ikatobag mo sini na mga otaw na yagasombong kammo?” 63Awgaid wa atobag si Isa.

Ansinyan yagalaong kanan yang Dakowa na Imam, “Paglaonga kami sa atobangan ng bowi na Tohan daw ikaw ba yang Almasi na Anak ng Tohan.”

64Tyomobag kanan si Isa, “Pyagalaong da mo. Awgaid ipaglaong ko sang kariko mayo na sang madatung na mga allaw makita mayo ako na Anak ng Manosiya na yaga-ingkod apit sang karinto ng Tohan na Labi na Mabarakat. Aw makita oman mayo na mabarik ako adi sang donya sikun sang langit na pyagalibotan ng gabon.”

65Pagdungug sinyan ng Dakowa na Imam, lyasi nan yang kanan dagom sabap sang kadaman nan aw laong nan, “Astaga! Yagalaong yan na mag-onawa kono yan sang Tohan! Di da kita kinaanglan ng kadaigan pa na saksi. Dyungug da mayo adon yang kanan pyaglaongan na mag-onawa kono yan sang Tohan! 66Na, ono da yang hokom mayo?”

Tyomobag yang kariko ng mga pangoo aw laong nilan, “Yakadosa yan aw dait yan patayun.”

67Ansinyan tyobadan nilan yang parangay ni Isa aw sontoka nilan. Aon oman kadaigan na yagasampal kanan 68aw yagalaong silan, “Kong ikaw yang Almasi, paglaonga kami daw sino yang yagasampal kammo!”

Yagalaong si Pitros na wa yan Akilaa kang Isa

(Mark. 14:66-72; Luk. 22:56-62; Yah. 8:15-18, 25-27)

69Ansinyan sarta yaga-ingkod si Pitros adto sang pamanag, dyomood kanan yang sambok na sogowanun na bobay aw yagalaong yan, “Ikaw inagad oman ni Isa na taga Jalil.”

70Awgaid yagadili sinyan si Pitros sa atobangan ng kariko ng mga otaw aw laong nan, “Wa ako akatigam daw ono yang pyagalaong mo.”

71Pagkatapos kyomadto yan sang powertaan ng pamanag aw yakakita kanan yang sambok oman na sogowanun na bobay aw yagalaong yan sang mga otaw na yaga-indug, “Yani na otaw, inagad ni Isa na taga Nasarit.”

72Awgaid yagadili oman si Pitros. Yagasapa yan aw laong nan, “Wa ako akilaa sinyan na otaw!”

73Pagkatugun-tugun sinyan dyomood kanan yang mga otaw na yaga-indug ansan aw laong nilan, “Bunna sagaw na kaupudanan kaw nilan kay makilaa sang tono ng kammo pyaglaongan na ikaw taga Jalil.”

74Ansinyan yagasapa oman si Pitros aw laong nan, “Asiksaun ako ng Tohan kong di ako maglaong ng bunna. Wa ako akilaa sinyan na otaw!”

Na, sinyan na wakto yagatagaok yang laboyo. 75Ansinyan kyadumduman ni Pitros yang pyagalaong kanan ni Isa na laong nan, “Sang di pa magatagaok yang laboyo, makatoo kaw maglaong na wa kaw akilaa kanak.” Na, lyomogwa da si Pitros aw bali na pagtiyao nan.

Valgt i Øjeblikket:

Matiyo 26: KI

Markering

Del

Kopiér