Khuurakikha 6
6
Buumoyaani bwe babaandu
1 #
Yob 1.6; 2.1 Babaandu nga ni beloosela khuuyiimba khu shibala, ni babaana bekhaana baaba nga basaalikha mu bukali, 2basooleli be ba wele baabona nga bakhaana bano bali baamiliwu naabi, kila beekha khu shibala khuuyilaka abo beesi baasiima. 3Kila Umukasya aloma ari, “Ise singene indekhe kumuukha kwase kwe buulamu khuumenya mu baandu biilo ni biilo ta, lwekhuuba nibo bali babaandu buundu. Ari buuleeyi bwe biifukhu by'omuundu kane byoole busa kimiiko shitoondo shitweela ni kamakhumi kabili (120).”
4 #
Bala 13.33
Mu biifukhu ibyo, ni lwanyuma lwayo, aabawo ba Nefilimu khu shibala, babasaalikhana lwanyuma lwe basooleli be ba wele ni bakhaana be babaandu khuuyilana. Kino kyaba kimisaani kye kamaani kye mu biseela ibyo, nga nikyo kili kimisaani kikyamanyikhana naabi.
5 #
Mat 24.37; Luka 17.26; 1 Pet 3.20 Umukasya waabona nga buubi bwe babaandu bwelooseele luukali khu shibala, naluundi nga buli shiindu shoosi sheesi baaba bambaasa mu myoyo kyaabwe, shabatsaka shiibi shonyene buli mbuka. 6Nashiryo Umukasya kumutaambo kwaamuwaamba, weesonesa lwashiina aabuumba umuundu waamura khu shibala. Lwe kumutaambo kumukali ukwo, 7kila aloma ari, “Ari intsya khuhesa babaandu boosi, beesi ise samweene nabuumba naara khu shibala, bawewo. Indi khuutsya khuhesa na bisolo byeene, ni bibyalaamila aasi, ni binywiinywi byoosi. Lwekhuuba ise nisonesa lwashiina nabibuumba.” 8Ne Nowa yenyene niye isi Umukasya ekhoyela.
Luukano lwa Nowa
9 #
2 Pet 2.5
Luno nilwo luukano luluwaamba khu Nowa.
Nowa yenyene niye uwaba umusaani umukwalaafu mu muboolo kweewe khu shibala. Niye aamenyatsaka mu butweela ni Wele. 10Nowa yuno aaba ni basooleli bataru, nga nibo Shemu, Hamu ni Yafesi.
11Wele waabona nga shibala shetsuule naabi buumoyaani, ni bituluungu nga byaasalanila buli aandu oosi khu shibala. 12Wele waalola khu shibala, waabona shetsuule buubi bwonyene, ni byeesi babaandu boosi bakhola nga biibi byonyene.
13Kila Wele alomela Nowa ari, “Ise naakhaliilewo ilala khuuhesa shibala ni babaandu boosi babaashilikho. Lwekhuuba shibala shetsuule buubi bwonyene khulwaabwe. Nashiryo intsya khubahesa nibo atweela ni shibala sheene shoosi. 14Ari iwe ni wiyombekheleyo wamweene likhoŋolo, nga uraambisa tsimbaawo tsindayi tse kuusaala goferi, mukari mwalyo uremo biseenge, ne mukari mweene ni khu ngaaki umaalekho ni patii. 15Khola likhoŋolo lino lyoolese tsimita shitoondo shitweela ni kamakhumi kataru na tsitaru (133) buuleeyi, tsimita kabili na tsibili buubalaayi, ni tsimita likhumi na tsitaru (13) khuuniina mu ngaaki. 16Khu ngaaki khwalyo wombekhekho shisuli, ulekhekho khabaanga khakhoolesa tsi sentimita kamakhumi kane na tsine (44) akari e shisuli ni mu mbafu mwalyo. Kane ulyoombekhe nga uramo tsinuungo tsitaru, urekho kumulyaango mu ndulo. 17Indi khuutsya khusiindikha khuusalasala khwe kameetsi, kamalaatane khu shibala shoosi, kahese buli shiindu shoosi shishiilimo kumuukha kwe buulamu. Buli shiindu shoosi khu shibala shitsya khuhela. 18Ne ise kane ikhole indakaano yase ni nawe, ni nawe uryo ukhenjile mu likhoŋolo atweela n'umukhasi woowo, ni basooleli boowo, atweela ni bakhasi baabwe. 19Iwe uli ni khukhwiinjisa mu likhoŋolo biilamu bibili bibili, shiseetsa ni shikhasi, nio binyale khuuramawo nga bili biilamu atweela ni nawe. 20Bili ni khuuba binywiinywi bibili bibili bya buli saambo, bisolo nabyo bibili bibili nabyo bya buli saambo, ni neebyo bibyalaamila aasi bibili bibili bya buli saambo. Bino byoosi kane bibe ni nawe nio bibe biilamu. 21Naluundi ubuungeyo biilyo bibiliibwa bya buli saambo yoosi, bibyoowo, ni bibyabyo.”
22 #
Heb 11.7
Aryo Nowa waakhola bibiindu byoosi nga Wele n'amulakila.
Valgt i Øjeblikket:
Khuurakikha 6: LPE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Bible in Lumasaaba © Bible Society of Uganda, 2016.