Lucas 5

Ma ja ajkx may yajmatsyën

1Jam ënäty ja Jesús tëkok yajpaaty ma tu'uk ja nëë'akëyë nëëpa'ajën Genesaret xyëëwajtyp. Jamts ja mayjyä'äy myiintë mëpaatëp ja Jesús t'atijmujknëtë ko tmëtoow'ita'antë ja Tios ja y'aaw y'ayuk. 2Tääts ja Jesús t'ijxpaty mäjtsk ja kepy nëëwinye'epyë mejypyë'am. Tukwa'ats ënäty, ja ajkxmajtspë tëë ënäty jap pyëtsëmtë, ja tsyääy jam pyujtëp. 3Ënät ja Jesús tuktëjkëy ja kepy nëëwinye'epyë mëti'ipë ja Simón jyä'ä'ajtypyën ets t'ënëmaay ets wäänë tyajnëëkuye'eyëty ma nëëkomën. Tääts nyaaxwe'tsy jap ets tyëjkëy yaj'ijxpëjkpë. 4Ko kyajpxtaay, tääts t'ënëmaay ja Simón:

Jaakyajnëjkx kepy nëëwinye'epyë jap nëëkomjoty, ets mtsaay jap xykyujëpipëty ets ajkx xymyatstëty.

5Tääts ja Simón y'ëtsooy:

Wintsën, tëëjës tu'ktsu'um njajëpiptë, ni tu'ukës nëë jëyujk të nkamatstë. Minës n'ëkkujëpipë jatëkok jä'ä ko mijts jëtu'un m'ënaanp.

6Ko ojts ja tsyääy tkujëpipë, may ja ajkx tmajtstë, je'eyë ja tsaay kyanakë'tsnë. 7Ënät tmëjyäämtë ja ja'ayëty mëti'ipë ënäty jamëtyën wiink kepy nëëwinye'epyëjoty ets pyutëkëtëty. Yë'ë ojts myintë ets ja kepy nëëwinye'epyë mäjtsk tyaj'ujtstë ets jawäänë kyakiiny. 8Ko ja Simón Pedro jëtu'un t'ijxy, ënät ojts nyäkyoxtënaaytyä'äkyë ma ja Jesús ets t'ënëmaay:

Wintsën, winwa'ktutkës, ëjts pokyjyä'äyës.

9Ja Simón Pedro ets ni'ëmukë ja myëku'uktëjk, tsë'këtëp ënäty, jä'ä ko ja ajkx nëkooyë may të tmajtsnëtë. 10Näy tam ënäty ja Santiagë ets ja Juan, Zebedeo myaank, Simón Pedro myëku'uk ets ja Jesús t'ënëmaay ja Simón Pedro:

Këtii mtsë'ëkë, tyam ja'ay mijts matsäämpy wi'ix ja nitsokën tpaatëtyën.

11Ënät ja kepy nëëwinye'epyë ojts tyajnëjkxtë naaxwintë'ëtstum ets tu'kë'ëyë winë t'ëxmajtstaaytyë ets tpatso'ontë ja Jesús.

Ko Jesús tyajtso'oky ja ja'ay mëti'ipë pu'uts pëjkëpën

12Ko ja Jesús ënäty jam yajpaaty ma tu'uk ja kajpnën, ënät jyä'äjty tu'uk ja ye'etyëjk pu'uts pa'am pëjkëp. Ko t'ijxpaty ja Jesús ënätyë nyäkyoxtënaaytyakë Jesús wyintum ets tmënu'kxtäky:

Wintsën, pën mtsojkpy, yajtsokës.

13Ojts ja Jesús tkë'ënixajy ets t'ënëmaay:

Ntsojkpyës ets mtso'okëty, tso'ok.

Je'eyë ja Jesús jëtu'un y'ënaantaay ënätyë ja ja'ay ja pyu'uts nyiwatsë. 14Ojts ja Jesús tyuk'ëne'emyë:

Ka'ap pën xytyuk'ëwaanëty. Nëjkx yë teety wintsën tuk'ix ko tëë mtso'oky ets xytyukmëyoxëty ja Tios ja wyintsë'kën, jëtu'un ja ja'ay nijawëtëty ko tëë mtso'oky.

15Oy jyajëtu'unëty, ni'ikyë yajnimëtyä'äky mëj'äämpy ja Jesús, nimayëty ja ja'ay ye'eymyujktë ets tmëtoow'ita'antë ja Jesús ets tyajktso'okëty ja pya'amëty. 16Kanaak'ok ja Jesús tnikeky ja mayjyä'äy ets ojts nyijkx jam apak itum, jamts ja Tios tja'amyejtsy.

Ko Jesús tyajtso'oky ja kë'ëxujxpë tekyxyujxpë

17Tu'kxëëw tu'ktiempë jyäjty kyëpejty, jam ënäty ja Jesús yaj'ixpëky, tëë ënäty jam nyaaxwäätstë yë fariseë ja'ayëty ets tsajptëkotyëtë yaj'ijxpëjkpëty. Tam yajpaatë ja'ayëty mëti'ipë tso'ontëpën Galilea, Judea ets Jerusalén. Ja Jesús ni'ikyë ja Wintsën ja myëj'ajtën tyaj'ixyë ko ja pa'amja'ay tyajtso'oky. 18Ënät ja ja'ay tkëëyjya'ajtë tu'uk ja pa'amja'ay kë'ëxujxpë tekyxyujxpë ets jap tëkoty tjayajtëkëjantë ets tpëjkta'aka'antë Jesús wyintuuy. 19Nimaa kya'ëwa'atsëty ma tyajtëkëtëty, jä'ä ko janty may ja ja'ay ënätyëty. Tääts tëjkëjxy pyäjtë ets tkukëëytyutë ja tëjk, japts tkutëëynyajxtë ja pa'amja'ay mayjyä'äy akujk Jesús wyintuuy. 20Ko ja Jesús t'ijxy ko mëpëjktëp, tääts t'ënëmaay ja pa'amja'ay:

Mmëku'uk, npokymye'kxyp mijts.

21Ënät ja tsajptëkotyëtë yaj'ijxpëjkpëtëjk ets ja fariseë ja'ayëty wyinmaaytyë: ¿Pën ya'atë ja'ay ko Tios tmëkajpxtëkoy? Yi'iyë Tios maayëp pyokymyä'kxëty.

22Jesús, wa'ats ënäty tnijawë wi'ix myäytyën tyajtën, paaty tyajtëëy:

¿Tii ko jëtu'un mmaytyë mtajtë? 23¿Mëti'ipë ka'ap tsyipëty, koos yë pa'amja'ay nëëmëty: Npokymye'kxyp mijts, ëkë koos nëëmëty: Pëtë'ëk, këëyë'ëk yë maapäjn ets nëjkxë? 24Tyam miits ntuk'ixtëty ko yë naaxwiinyëtë ja'ay yë y'U'unk myëët'ajtyp yë kutujkën yaa naaxwiiny ets ja poky tmä'kxëty.

Tääts ja kë'ëxujxpë tekyxyujxpë t'ënëmaay:

Mijts nëmääpy, pëtë'ëk, këëyë'ëk yë maapäjn ets nëjkx ma mtëjkën.

25Ënätyë ja pa'amja'ay pyëti'ky mayjyä'äy itkujky, ojts tkëëyi'iky ja myaapäjn ma ënäty të kyo'knën ets ojts nyëjkxnë ma tyëjkën, tmëjjaw tjaantyjyawë ja Tios. 26Ets ja ja'ay mëj ixy t'ijxtë, ojts ja Tios näjyëtu'un tmëjjaw tjaantyjawëtë ets y'ënantë:

Mëj winma'any ya'atë ja kënu'kxën tyam të n'ijxëmë.

Ko ja Jesús tmëkajpxtsoy ja Leví

27Ko jëtu'un y'ëkjajty, tääts ja Jesús tëkotm pyëtsiimy ets t'ijxpaty tu'uk ja yajkukëpäjtpë mëti'ipë xyëëwajtypyën Leví. Jam ënäty y'u'unyë ma yajkukëpetyën, ënät ja Jesús t'ënëmaay ja Leví:

Pamiinkës.

28Tääts ja Leví wya'kujkëy ets t'ëxmajtstaay mëti'ipë ënäty myëët'ajtypyën ets tpatso'ony ja Jesús.

29Ok ja Leví tnixëëwtuuny ja Jesús, mëj ojts ja xëëw tnipëjktaakë; jam ma kaaypyäjnën, tam ënäty jyatëtë ja yajkukëpäjtpëtëjkëty mëti'ipë ja Roma myëtuuntëpën, ets ja ja'ayëty wiinkëtypë. 30Tääts ja fariseë ja'ayëty ets ja tsajptëkotyëtë yaj'ijxpëjkpë ojts tuknëëmëtë ja y'ijxpëjkpëtëjk ets t'ënëmaaytyë:

¿Tii ko yë Jesús ets miitsëty xymyëëtkaytyë yë yajkukëpäjtpëtëjk ets pokyjä'äytyëjkëty?

31Ënät ja Jesús y'ëtsooy:

Pën ka'ap tiipa'am tmëët'atën ka'ap yë tsooy tyaj'ëmaaytya'aktë, yë'ë yaj'ëmaaytyaktëp yë tsooy mëti'ipë pëjkëtëpën. 32Ka'apës yë'ëjëty të niminy wa'ats ja'aytyëjk, yë'ëjës të niminy pokyjä'äytyëjk.

Ko ja Jesús tyajtëëwtë tii ko y'ayuu'atë

33Tääts t'ënëmaaytyë ja Jesús:

Yë Juan yë y'ijxpëjkpëtëjkëty ets fariseë y'ijxpëjkpëtëjkëty ayuu'ajtëp ni'ik ets nëkooyë Tios tja'amyäjtsnëtë; e mijts yë m'ijxpëjkpëtëjk xëmë kyäytyë y'uuktë ku'uxyë.

34Ënät ja Jesús y'ëtsooy:

¿Mëpaat jëtää miits xyaj'ayuu'atë ja woypyë witsypë ma ja to'oxytyëjk yajnikay yajkni'uukyë ko ënäty jam yajpaatë mëët ja ye'etyëjk mëti'ipë pëkaanpënë? 35E pyatäämpy ja xëëw po'o ma ja ye'etyëjk yajmënëjkxa'anyën, ko ënäty ja xëëw po'o tpaaty jää nëjkxy y'ayuu'atë.

36Näyjyëtu'un tnimëtyäky ya'atë ijxpät:

Ka'ap pën ja pakwit t'akëyë mëët jemywyit, jä'ä ko yë jemywyit nëëmujkp yë'ë ets ka'ap nyäpyäätyë oy mëët yë tukwit. 37Näy ka'ap ja tsatsym nyëë pën t'atämë ma tuk po'ojën, jä'ä ko yë jempyë tsatsym nyëë nyajtskë'tsëp ja tuk po'o ets ja tsatsym nyëë y'ixtemy ets wyintëkoy ja tuk po'o. 38Paaty ja tsatsym nyëë jempyë jap yaj'atämë ma ja po'o jempyën. 39Näyjyëtu'un ka'ap pën ja tsatsym nyëë jempyë t'uuka'any pën tëë t'uuky ja tukpë, jä'ä ko y'ëna'antë: Yë tukpë xu'kx ni'ik jyawë.

Valgt i Øjeblikket:

Lucas 5: QUETZMIXE

Markering

Del

Kopiér