Lucas 15

Kupixyny këwent'ajtpë nyi''ijxpät

Mt 18:10-14

1Ni'ëmukë ja yajkukëpäjtpëtëjkëty ets ja pokyjä'äytyëjkëty nimiintë ja Jesús ets tmëtoow'ita'antë mëti'ipë nyimëtyäkpyën. 2Paaty ja fariseë ja'ayëty ets ja tsajptëkotyëtë yaj'ijxpëjkpë wiink ijty t'ixtë ets y'ëna'antë:

Ya'atë Jesús aakyë'ë pokyjä'äytyëjk mëët ye'eymyuky nyajxmuky ets tmëëtkay tmëët'uuky.

3Ënät ja Jesús nimëtyaktso'ony ya'atë ijxpäjtën:

4Pën myëët'ajtyp nimëko'px yë tsajppax ets tu'uk pyutëkoy, ¿këtii jëtää t'ëxmatsy ja majkta'px majkmokx majktaxkpë jam kamjotm ets nëjkx t'ixta'ay ja mëti'ipë tëkoy'ijtpën koonëm tpaatyë? 5Ko tpaaty, akujk jotkujk nyäjyawëty, ets kyejkykyëjxm tpëjktä'äky, 6ets ko jyä'ty ma tyëjkën ënät twoowmuky ja jyiiky myëku'uk mëti'ipë mëët nyämyäyën ets nëëmë: Mëëtxoontaktëkës, tëëjës ja ntsajppax npaaty mëti'ipë të y'ëktëkoy'ijtpën. 7Tëyës n'ëna'any ko näjyëtu'un jam tsajpjotm xyoonta'aktë ko tu'uk ja pokyjyä'äy jyotwinpity këtiinëm ja nimajkta'px majkpë ja wa'ats ja'ayëty mëti'ipë ka'ap tyajmëyatën jyootwinpitëty.

Ja nyi''ijxpät ko meeny tyëkoy

8N'ëkpëjktakmëty tu'uk ja to'oxytyëjk mëti'ipë myëët'ajtypyën majk ja meenywyä'kxy ets tu'uk pyutëkoyëty, ¿ka'ap jëtää ja jyëën tyajmëjëty ets tyëkëty päätë'kpë tyëkoty koonëm tpaatëtyë? 9Ko tpaaty ënät ja myëku'uktëjk, myëjëën myëtëjk tuk'ëwa'anëtyä'äy ets t'ënëëmë: Mëëtxoontaktëkës, jä'ä ko tëëjës ja nmeeny npaaty mëti'ipë të tyëkoy'ityën. 10Jëtu'un miits nëëmëtë ko näjyëtu'un ja Tios ja y'anklës xyoonta'aktë ko tu'uk ja pokyjyä'äy jyootwimpity.

Ja nyi''ijxpät ma tu'uk ja u'unkteety nyiwinpityën ja myaank

11Näyjyëtu'un y'ënäny ja Jesús:

Tu'uk ja ja'ay, nimäjtsk ja myaank. 12Tääts ja myaank mutskpë y'ënëmaayë: Tatë, mooykyës ja nkuma'ayën mëti'ipës xypyaat'ajtpën. Tääts ja u'unkteety ojts tyajkwä'kxy ja näykyumayë ets tkumaay ja y'u'unk y'ëna'k. 13Naam yajkumaaytyääpy ënäty ja mutskpë ets ënätyë to'ktaay winë. Tääts ojts nyijkx jëkäm najëtijtpë. Jamts ja myeeny tyajtuuntaay mëti'ipë ënäty myëët'ajtypyën ko kyë'ëm winma'any tyajtuuny. 14Ko ja myeeny tyajtuuntaay, tääts ja yuu tsyo'ontäky jam ma ja kajpnën ets ja yuu pyätë. 15Ënät ja tuunk t'amëtooy ma tu'uk ja kukajpnën. Ets ja ja'ay kyäjxë kamjotm ëtsëm këwent'ajtpë. 16Nëkooyë yuu'o'kënë ets tjë'kxanë ja ëtsëm jë'kxy. 17Tä ojts myäy tyäjy ets y'ënäny: Ma ja nteetyës ja tyëjkën, ku'uxyë ja tuunpë jam kyäytyë y'uuktë ets natëjkëp winë, tyamts ëjts yaa nyuu'ookaanpë. 18¿Tii koos nkanëjkxy maas ja nteety ja tyëjkën?, etsës nëëmëty: Tatë, tëëjës nmëtëkoy ja Tios ets mijts. 19Ka'apës tyam xy'ëknitëjkënë xytyijëtyës m'u'unk, yajtuunkës ijxtëm yë mtuunpë xyajtunyën. 20Ënät tyu'utëjkëy ets ojts nyijkx ma ja tyeety ja tyëjkën.

Jëkämnëm ënäty myiny ko ja tyeety y'ijxpatë, tääts pëyi'ikyë nyitso'onë ets pya'ëyoowë ets myënäänë ets tsyu'kxë. 21Ënät t'ënëmaay ja tyeety: Tatë, tëëjës nmëtëkoy ja Tios ets mijts, ka'apës tyam xy'ëknitëjkënë xytyijëtyës m'u'unk. 22Ënät ja u'unkteety t'ënëmaay ja tyuunpëtëjk: Tsojk nëjkx ja oypyë wit xyajtsoontë ets xytyukxoxtëty, pëjktakëtë kyë'ëjiits ets kyë'ëk. 23Nëjkx ja tsajpkaa tu'uk xyajtsoontë ni'kxpë ets xyaj'ooktëty. Tsojk nka'ayëm n'ukëm ets nxëëwtu'unëmë. 24Yë'ë ko ya'atë n'u'unkës, jëtu'un tpaaty ijxtëm jeexyë të y'o'knën ets tyam jëtu'un ijxtëm jeexyë jatëkok të jyuukpyikyën; jëtu'un tpaaty ijxtëm jeexyë të tyëkoy'ityën e tyam ijxtëm jeexyë të yajpaatyën. Tääts ja xëëw tsyo'ontäky.

25E ja myëj maank, jam ënäty kyamjotm. Ko wyimpijty ma ja tyëjkën, ënät tmëtoowpaty ko ja ja'ay xyu'uxtë wyoptë, y'ätstë pyëktë. 26Tääts tyaxëy tu'uk ja tuunpë ets tyajtëëy tii ënäty jam tuunëp jatëp. 27Tääts ja tuunpë ojts tyuk'ëwa'anxëty: Tëë ja m'uty jyä'ty. Tëë mteety tyaj'ooky tu'uk yë tsajpkaani'kxpë, jä'ä ko të jyä'ty yë m'uty oy mëk. 28Tääts ja kä'äxkopk jyoot'anpëjky, ka'ap tyëkëjany tyëkoty. Ënät ja tyeety ojts pyëtsimy ets y'ënëmaayë mëktä'äky ets tyëkëty tëkoty. 29Jëtu'un t'ëtsooy ja tyeety: Mnija'ap ko kanaak jëmëjt mijts të nmëtuny ets xëmë të nmëmëtoy; mijts nitiijës të xykyamo'oy, oy jeexyë yë'ë'ajty tsajppax ets ja nxëëw jeexyë ntunyës mëët ja nmëku'uktëjkës. 30E ko ya'atë m'u'unk të jyä'ty, mëti'ipë mmeeny të tyajkëxyën mëët ja ku'into'oxytyëjkëty, myaj'o'këp yë tsajpkaani'kxpë.

31Tääts ja u'unkteety y'ënäny: U'unk maay, mijts xëmë myajpaaty mëët ëjts e yë pëjktä'äky mëti'ipës jää nmëët'ajtypyën aakmijts yë mjä'ä. 32Tyam, kopkpëky ntu'unmëty yë xëëw, tsojk ntukxoontakëmë. Jä'ä ko ya'atë n'u'unkës, jëtu'un tpaaty ijxtëm jeexyë të y'o'knën; e tyam, tëë jyuukpyiky; jëtu'un tpaaty ijxtëm jeexyë të tyëkoy'ityën e tyam tëë yajpaaty.

Valgt i Øjeblikket:

Lucas 15: QUETZMIXE

Markering

Del

Kopiér