Juan 10

Kupixyny këwent'ajtpë mëët ja kyupixyny

1Ënät ja Jesús y'ënäny:

Tëy miits nëëmëtë, pën ka'ap tyëkën ma ja kemy aawën, mä'tspë ënäty ets tu'u'ëtujkpë. 2E pën tëjkëp ma ja kemy aawën, jä'ä ja kupixyny këwënt'ajtpë. 3Ja kemy kyëwent'ajtpë yë'ë ja kemy yaj'ëwatsyp, ja kupixyny këwent'ajtpë xëëwpety tmëkäjpxy ja kyupixyny, e ja kyupixyny nän yo'kmëtoowëp; ets tyajpëtsëmy jap kemyjoty. 4Ko tyajpëtsëëmta'ay tääts twinye'ey; paye'eyëp jä'ä kupixyny jä'ä ko yo'kmëtoyë. 5E ja mëti'ipë ka'ap t'ixy'atën ka'ap tpanëjkxtë, ni'ikyë tkukä'äktë jä'ä ko ka'ap tyo'kmëtowtë.

6Jëtu'un ja Jesús ojts tpëjktä'äky ja ijxpäjtën, je'eyëp ko yë'ëjëty ka'ap twinmëtoowtë mëti'ipë jyanimëtyakën.

Jëtu'un ja Jesús ijxtëm ja oypyë kupixyny këwent'ajtpën

7Ënät ja Jesús ojts y'ënëmaaykyojënëtëpë:

Tëy miits nëëmëtë, ëjts jëtu'un ijxtëm ja kemy aawën ma ja kupixyny nyaxtën. 8Mëti'ipë të myintën jëyëjp ets ok ëjts, toonpë mä'tspë jä'äjëty; ets ja kupixyny kä'äp të tyunëtë këwentë. 9Ëjts jëtu'un ijxtëm ja kemy aawën. Pën tëjkëp ma ëjtsën yë'ë nitso'okaanp. Jëtu'un nyaxa'any ijxtëm ja kupixyny tyëkëtën pyëtsëmtën ets jap jyi'kxypyaatë.

10Yë mä'tspë, yi'iyë nyimiimpy ets myäätsa'any, yaj'ooka'any ets yajkutëkoyä'äny. Ëjts yë'ëjës të niminy ets ja ja'ay jyuuky'atëty akujk jotkujk. 11Ëjts jëtu'un ijxtëm ja oypyë kupixyny këwent'ajtpën. Ja oypyë kupixyny këwent'ajtpë kyu'o'këp ja kyupixyny; 12e mëti'ipë nyituunpyën yi'iyë myëju'uny, ko t'ixy myiny ja pa'uk tääts t'ëxmatsy ja kupixyny ets kye'eky, jä'ä ko ka'ap ja kupixyny tjä'äjëty. Tääts ja pa'uk tpajëtijtä'äky ja kupixyny ets t'awojpwä'kxy. 13Tääpë ja'ay paaty kye'eky jä'ä ko yi'iyë myëju'uny nyituunpy, ka'ap ja kupixyny tmëmay tmëtajy.

14Ëjts jëtu'un oypyë kupixyny këwent'ajtpë. Jëtu'un ijxtëm xy'ixy'ätyës ja nTeetyës nän jëtu'unës n'ixy'äty ja nTeetyës; jëtu'un n'ixy'ätyës ja nkupixynyës ets yë'ëjëty nän jëtu'unës xy'ixy'atë. Ëjts nyäjkpyës ja njuukyajtën maas ja nkupixynyën. 15Ëjts jëtu'un oypyë kupixyny këwent'ajtpë. Jëtu'un ijxtëmës ja Tios Teety xy'ixy'ätyën nän jëtu'unës ëjts yë'ë n'ixy'äty. Nku'o'këpës ja nkupixyny. 16Tääs ja kupixyny wiinkpë nmëëtëty mëti'ipë ijtëpën ma wiinkpë kemyën; nyajminäämpyës ja näjyëtu'un yaa. Xymyëmëtowantëpës yë'ëjëty ets tu'ukyë y'ita'antë yaa ma tu'ukpë ja kupixyny këwent'ajtpën.

17Xytsyojkpës ja nteety, jä'ä koos nyäky ja njuukyajtën ets jatëkok n'ëxajëja'anyës. 18Ka'ap pën xypyëjkës ja juukyajtën, koos nyäky nkë'ëmtsojkënës jëtu'un. Nmëët'ajtypyës ja kutujkën etsës nyakëty etsës n'ëxajëty jatëkok. Jëtu'unës ja nTeety të xymyo'oy ja ënä'ämën.

19Ko ja jutiis ja'ayëty ojts tmëtowtë mëti'ipë ja Jesús kyäjpxypën ënät ojts ka'ap tu'knax myäytyë tyajtë. 20May ja ja'ay mëti'ipë ënantëpën:

¿Tii ko yë'ë xymyëpëka'antë? Ku'oypyë myëët'ajtyp, ja'akyupoj yë'ë.

21Näy tam mëti'ipë ënantëpën:

Ka'ap pën jëtu'un kyäjpxy pën ku'oypyë myëët'ajtyp. ¿Wä'än jëtää tjëkyepy tu'uk ja ku'oypyë tyaj'ijxë'ëkëty ja ja'ay wiintspë?

Ko jutiis ja'ayëty ka'ap tmëpëktë ja Jesús

22Potm'ajtp ënäty ko ojts ja mëjtsajptëjk tnixëëwtuntë jam Jerusalén. 23Jam ënäty ja Jesús yajpaaty ma ja mëjtsajptëjk wiinën ma txëëwatyën Salomón Tyëjkwiin. 24Ënät ja Jesús ojts ja jutiis ja'ayëty nyapikëty ets yajtëëwë:

¿Xëmë jëtu'un ëëts ka'ap nijawëtëty pën mijts mKristë? Tuk'ëwa'anëtëkës etsës nijawëtëty.

25Tä ja Jesús y'ëtsooy:

Tëë miits njatuk'ëwaanëtë je'eyëp ko ka'ap xymyëpëktë. Ja mëj'ajtën mëti'ipës ntuunpyën mëëtës ja nTeety ja kyutujkën, yë'ë ja tëyajtën yäjkpy ma ëjtsën, 26e miitsëty ka'ap xymyëpëktë, jä'ä ko ka'ap nkupixyny'atë. 27Yë nkupixynyës xyo'kmëtoowtëpës yë'ëjëty, etsës xypaye'eytyë. 28Ëjts nmooytyëp ja juukyajtën xëmëkyëjxmëpë, nijëna'a kyakutëkoytyëty ets ni pën xykyapëjkëtyës. 29Mëti'ipës ja nTeety të xymye'eyën ni'ik myëjëty këtiinëm tii, ets ka'ap pën myäyëtëty pyëjkëtëty. 30Tios Teety ets ëjts, tu'ukyë ëëtsëty.

31Ënät ja jutiis ja'ayëty jatëkok tkoonë'ktë ja tsaa ets tjaka'atsantë ja Jesús, 32e ja Jesús jëtu'un y'ënëmaayëtë:

May ja mëj'ajtën të ntunyës ma miitsëtyën mëët ja nteetyës ja kyutujkën. ¿E tiis ko xykyuka'atsa'antë?

33Tääts ja jutiis ja'ayëty y'ëtsoowtë:

Ka'ap yë'ëjëty myajtukuka'atsa'any ko tii oy xytyuny, yë'ë myajtukuka'atsaanp ko ja Tios xymyëkajpxtëkoy. Mja'ayts mijts ets Tios mnätyijyë.

34Ënät ja Jesús y'ëtsoowëtë:

Ma miits ja m'ënä'ämën mkutujkën xymyëët'atën jëtu'un jap kyëxja'ayëty: Jëtu'unës n'ënany ko miits mtios'atë. 35Yajnija'ap ko ka'ap tjëkyepy ja Tios ja y'aaw y'ayuk këxja'aypyë yajninaxëty; ets ja Tios, nän tios ojts tijy ja ja'ayëty mëti'ipë ja y'aaw y'ayuk tyukmëtoowën. 36E pën ëjts tëëjës ja Tios xykyënu'kxy ets yë'ëjës të xykyexy yaa naaxwiiny, ¿tii ko m'ëna'antë ko Tios nmëtëkoyës koos nätyijyë ko yë'ë xy'u'unkëtyës? 37Pën ka'apës yë'ë ntuny mëti'ipë ja nTeetyës tyuunpyën, ka'apës xymyëpëktëty. 38E pën ntuunpyës mëti'ipë yë Teetyës tyuunpyën, oy ja n'ayukës xykyamëpëktëty, yë'ë mëpëktë mëti'ipës ntuunpyën ets xynyijawëtëty ko ja Tios Teety tu'ukyë y'ity mëët ëjts ets ëjts mëët yë'ë.

39Tääts ojts tjamatsa'antë jatëkok, je'eyëp ko ojts ja Jesús ye'eytyëkoy.

40Ënät ja Jesús ojts nyëjkxkojnëpë jam xëëwpëtsëmy nëë'awinm ma ja Jordán mëjnëëjën, ma ja Juan ijty yajnëëpetyën. 41May ja ja'ay ojts nyinëjkxyë ets y'ëna'antë:

Oy ja Juan Yajnëëpäjtpë ojts tkatuny ja mëj'ajtën, tu'kë'ëyë mëti'ipë nyikajpxën mëët ya'atë ye'etyëjk tëë y'atëëwta'ay.

42May ja ja'ay tmëpëjktë ja Jesús ma tääpë itjotmën.

Valgt i Øjeblikket:

Juan 10: QUETZMIXE

Markering

Del

Kopiér