Génesis 19
19
Tios tyajkutëkoy yë Sodomë ets Gomorra kajpn
1Tsu'ujënëp ënätynyë ko ojts nimäjtsk jya'të yë tsajpjotmëpë kukäjpxy jam Sodomë. Jam ënäty yë Lot ma kajpn yajnitëkën, ma ja'ay may yajpaatën. Ko ojts yë t'ixy ja tsajpjotmëtë kukäjpxy ënät ojts tjëjpye'eyi'iky. Tä nyäkyoxtënaaytyakë ets nyaaxkooy. 2Tä t'ënëmaay:
Mëku'ukëty tuntë mëyajtën nmënu'kxtaktëp yam ets mjamtëty maas yë ntëjkën, jam yë tsuu xyajnaxtëty ets mkë'ëpuj mtekpyujtëty, jopynyëm tsojk jatëkok mtu'upëktëty.
Ënät ojts y'ëtsowtë:
Ka'ap, Tios kyujuyëp ko jëtu'un mja'ëna'any, jëtu'unyë ëëts yë tsuu muum nyajnaxa'antë muum tu'ujoty.
3Yë Lot ni'ikyë y'ënaan'ëtë'ëtsy ets ja ja'ay wyë'ëmtëty, ënätnëm ojts tkupëktë ets tpanëjkxtë ja Lot ma ja tyëjkën. Ko ojts jya'të, ënät yë Lot tyaj'o'oyëy ja a'ux, ojts tyaj'oyë tsajpkääky jëtu'unyë tsäk ka'apë tsyooymyëëtëtyën ets y'a'ux'ajtë ja'ajtakpëty.
4Ka'anëm ënäty myanaxtënëm, ko ja Sodomë ja'ayëty ojts ja Lot yë tyëjk tyajnaatujktaayëtë, jënu'un yë mutsk'ëna'këty ets mëjja'aytyëjk. 5Ënät tyëjkëtyë yaxpë jojkpë. Yë Lot yajmëkajpxp, jëtu'un y'ëna'antë:
¿Ma ënät ja ja'ayëty mëti'ipë të xyaja'ajtä'äkyën ma mtëjkën? Yajpëtsëm nmëëtko'knëjantëpës yam.
6Ënät yë Lot tnipëtsëëmy ja ja'ayëty. Tä yë tyëjk tyaj'ëtujky jëxkë'p'äämpy, 7tä t'ënëmaay:
Mëku'ukëty tuntë mëyajtën këtii jëtu'un yë ëxëëk winma'any xypyaatë ets tëkatsy winë xytyuntëty. 8Ëjts nmëët'ajtypyës mäjtsk yë nnëëxës, mëti'ipë ka'ap yë ye'etyëjk tmëëttsëënëtënëm, oyës nyajpëtsëmëty ets xy'ixtëty wi'ix xytyuntë. Këtiipë wi'ix xytyuntëty yë ye'etyëjkëty mëti'ipës xynyimiinp xynyija'ajtëpën.
9E yë'ëjëty tä ojts y'ëtsowtë:
Mijts ëkjëwa'akmës, ka'ap tjëkyepy tu'uk yë jaaypyo'kxyjyä'äy xy'ënä'ämtëtyës. Paaty tyam ni'ikwäänë o'ktëy, ënät yam ntuntëty, këtiinëm tääpë ye'etyëjkëty mëti'ipë të xyajja'ajtä'äkyën.
Ënät ojts ja Lot ëxëëk tuntë, ojts ja tyëjk aaw t'awa'kpäjtëtë ets tjakujëpijpnaxantë. 10E ja tsajpjotmëtë kukäjpxy mëti'ipë ënäty të jyajta'aktën ojts nixajwootstë ja Lot jap tëkotsyow ets ja tëjk'aaw tyaj'ëtujktë. 11Tu'kë'ëyë ojts wyë'ëmta'atë ja ja'ayëty wiints jënu'un yë mëj ëna'këty ets mutsk ëna'këty, ojts y'ënu'kxëtyääynyëtë ko tjajanty'ixtaaynyëtë ja tëjk'aaw. 12Ënät ja ja'ajtakpëty t'ënëmaaytyë ja Lot:
¿Wi'ix jaakjää mijts yë mjëëky mëku'ukë? Ënëmaaytya'a yë mmaank ets mnëëx, yë mmë't ets tu'kë'ëyë mëti'ipë mëët'ajtypyën yaa kajpnjoty, mëpëtsëëmta'a ets mënëjkx jëkäm. 13Jä'ä ko tyamës ya'atë kajpn nyajkutëkoya'antë. May oy yë tsyip y'äkë të nyipäjtnëtë yë ja'ayëty mëti'ipë yaa ijtëpën jam Tios wyintum. E paatyës të nyajkäxtë ma ya'atë kajpnën ets nyajkutëkoytyëtyës.
14Ënät ojts ja Lot tninëjkxy ja nimäjtskpë ja myë't, yë'ë mëti'ipë ënäty pëkantëpën mëët ja nyëëx ets t'ënëmaay:
Pëtë'ëktë ets kä'äktë ma ya'atë kajpnën, jä'ä ko yajkutëkoyäämpy yë Wintsën ya'atë kajpn tyam.
Yë myë'tëty ninu'un ojts tkamëjpëjkta'aktë ja Lot ja y'aaw y'ayuk. 15Tim xëënyënëp ënätynyë ko yë tsajpjotmëtë kukäjpxy t'ënëmaaytyë ja Lot:
Pëtë'ëkoj tim poj'am ets tso'onkojtë timtyämyë mëët yë mto'oxytyëjk ets nimäjtskpë yë mnëëx. Ënät jëtu'un pën këtii m'ooka'any, ko ënäty ëëtsëty nyajkutëkoytyë yë kajpn.
16E yë Lot jaakpoxp ënäty, paaty myajtsë kyë'ëkëjxm yë tsajpjotmëtë kukäjpxy. Jä'ä ko yë Wintsën myëët'ajtyp ënäty yë pa'ëyo'owën najts'ëyo'owën ma yë'ëjën. Ënät ojts näjyëtu'un yë tyo'oxytyëjk ets nimäjtskpë nyëëx yajmatstë kyë'ëkëjxy ets pyëtsëëmtë jam kajpnjotm ets tsyoktë. 17Ko ënäty tëë yë kajpn tukpëtsëëmtaaynyëtë, ënät ojts yë tsajpjotmëtë kukäjpxy y'ëna'antë:
Pe'tym pëyë'ëktë ets näyyajtso'okëtë, këtii mnäjyë'ixëtëty ets këtii mwa'ak'awëtëty. Nëjkx kopkkëjxm, pën myajtso'okäämpy yë mjuukyajtën.
18Ënät yë Lot y'ëtsooy:
Ka'ap, Wintsën, tun mëyajtën. 19Miitsëty mëjmëyajtën të xytyuntë koos yë njuukyajtën të xyajtsokëtë. Ëjts ka'apës njëkyepy nëjkxëty kopkkëjxm, jä'ä ko tsojkës yë ëyo'on muum xynyajtspaatëty etsës n'ëk'o'knëty 20Tsyääyë winkon tu'uk yë mutsk kajpn ma tjëkyepyën nkäktso'okëtyës, käjxkës jää wä'änës jam n'ëknëjkxy ets jëtu'unës yë njuukyajtën tsyo'okëty, mutsk ja kajpn, ka'ap nëkooyë myëjëty.
21Ënät ojts tu'uk y'ëtsoy ets y'ënäny:
Tëëjës yam nmëtoy mëti'ipë të xy'amëtoyën, ka'apës nyajkutëkoyä'äny yë kajpn mëti'ipë mnikäjpxypën. 22Oy mnëjkxëty, nëjkx jam, tim nëjkx jëtu'un tyämyë jä'ä ko ka'apës mëpaat tii ntuny pën ka'ap jam mja'tynyëm ma tääpë kajpnën.
Paaty jëtu'un ojts ja kajpn yajxëëwmo'oy Zoar.
23Ko ojts xyiinytyä'äky, Lot tëë ënäty nyajja'anë jam Zoar. 24Tä yë Tios tyajjëëntu'uy atsë'ëk ajawë jam Sodomë ets Gomorra. 25Yajkutëkooytyääy tu'kë'ëyë mëti'ipë ënäty jam tsënaaytyëpën ets tyajkëjxtaay winëjaty mëti'ipë jam yä'kp päjtpën joyjyotm. 26Yë tyo'oxytyëjk yë Lot mëti'ipë ënäty ëx'ok miinpën ojts nyäjyë'ixyë ets ojts jëtu'un wyi'imy kaanpotsyën.
27Komjëpom jopyëp ojts yë Abraham nyijkxy jam ma ja naaxjotmën ma ënäty mëët ja Tios të kyäjpxy të myëtyä'äkyën. 28Ënät ojts jam nyas'ixë Sodomë ets Gomorra ets ma pya'ajën nyuxën ets t'ijxy ko jam yë jëënjok pyëti'iky ijxtëm jeexyë tsijtkjoty yë jëën tyoyën. 29Jëtu'un ojts kyutëkooytyä'äy yë Sodomë ets Gomorra kajpn ets mëët yë pya'a nyux ma ënäty yë Lot të jyuuky'ätyën, e ojts yë Abraham yajja'amyetsy, paaty jëtu'un ojts yë Lot yajjuuty ëyo'onjoty.
Ma ojts tsyo'onë'ëky tsyo'onta'aktën yë Moab ja'ayëty ets Amón ja'ayëty
30Yë Lot natsë'këp ënäty jam ma tsyënaaytyaknpëjktën ma ja it naaxwiinyëtë txëëwatyën Zoar. Paaty ojts nyijkxy mëët ja nimäjtskpë ja nyëëx jam. Jëtu'un ojts nitëkëëk wyë'ëmtë tsënääpyë ma tu'uk ja aankën. 31Tëkok ojts ja nyëëx ja mëjpë t'ënëëmë ja y'uty:
Ëk'ix mijts wa'ats xynyijawë ko nteety'ajtëm tëë myëjja'ayënë, e yaa ma ya'atë it naaxwiinyëtën ka'ap yaa pën ye'etyëjk mpatmëty mëti'ipë jeexyë mëët mpëjkëm n'ukëmë jëtu'un ijxtëm yajtu'unën'atyën. 32Paaty tyam tsojk nteety'ajtëm n'a'ukëmë ets myu'ukëtëty, tääts ka'ap t'ixëty ets tjawëty ko nmëëtko'knä'ämyëty, e jëtu'unts yë'ë xyaj'u'unkpatmëty.
33Jä'ä koots ojts ja tyeety t'a'uukëtë, ja mëjpë jä'ä ojts ëka'any mëët myä'äy ja tyeety. Ja tyeety ka'ap ojts tjawë wi'ix ja nyëëx ja mëjpë pyuki'tëyë ets wi'ix ojts nyaki'tutkojënë. 34Komjëpom ja mëjpë t'ënëmaay ja y'uty:
Ëk'ix ya'atë tsu'um të nyäxyën ëjts mëët yë nteety'ajtëm të nma'ayës e ëwään koots jatëkok yë nteety'ajtëm n'a'ukëmëty, tääts mijts näjyëtu'un xymyëëtko'knëty. Jëtu'unts nimäjtsk yë y'u'unk nyajmëxu'un'ajtëmëty.
35Jä'ä tsu'um ojts ja tyeety jatëkok t'a'uukëtë ets ojts tyajmuktëkoyëtë, ënät ja mutskpë nyäkyo'kë mëët ja tyeety. Ja tyeety ka'ap tja'awëy wi'ix ojts tpuki'itë ets wi'ix ojts tpuki'tutkojnëpë. 36Jëtu'un ojts wyë'ëmtë u'unk mëët ja nimäjtskpë ja nyëëx ja Lot, mëët ko ojts mya'atë mëët ja tyeetyëty. 37Ja mëjpë ja nyëëx ojts tu'uk ja y'u'unk tyajmëxu'unk'aty mëti'ipë xyëëwmooyën Moab, mëti'ipë ojts ja y'u'unk y'ëna'k yajtijtën Moab ja'ayëty. 38E ja mutskpë ja nyëëx ojts näjyëtu'un tyajja'ty ja y'u'unk myääy mëti'ipë tyijën Benami. Yë'ë jëtu'un ojts ja y'u'unk y'ëna'k txëëwatë Amón ja'ayëty.
Valgt i Øjeblikket:
Génesis 19: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process