LUKE 7
7
Rome na Phrangki Amah Roijuihta Jisu in Amthrat
(Met 8:5–13)
1 #
Met 8:5–10,13; Jon 4:46–53 Amah in mii kuungah trong asonche aknua Kaparnaum a luutsa. 2Ipek raalmii reijapuuivaa roijuih inkhat in kna a thisamma am, amah roijuih in amah akputa khalmo klua aktlohmii. 3Amah in Jisu ta atheih in Judi ei anparuulta amahkuunga mathlah a amah roijuihta thlenga amthratnatu atirh ei. 4Amah in Jisu kuunga anthlengche amahta inruruh a ason, “Mahmii matikcha mii turel thlou nitloh in thratu, 5#Noon 10:2alamva amah in inih jatihta arilvol, che inih sinakokta iniseem.” 6Chunna Jisu in anmahsoh sehjousa. Chuta Jisu in inn khasoh khalmo anlahnolai raalmii reijapuui in amah aruulkhatta mathlah a Jisu kuunga amson, “Akpu, nitakta malahnohro, alamva Akpu in keiinna nithlengsam i keiva matik chanoh ang; 7alamchunna keitalkho nikuunga thleng matik chanoh angta kamdon. Chuta trongruta son paningro, chunna kei roijuih in thratu. 8Alamva keiluungkho akchek amneh khatvaa athlanga ammiiang, kei kithlanga raalmii ammei; in khat kuunga ‘Sehro’ ta kison in seh; mahche in khat kuunga ‘Varo’ ta kison in va, mahche ‘Mah i tlohro’ ta kison in atloh. 9Mahchuta Jisu in atheih in salungkhousa, che amah aknu akjuih miitamta inheia asonei, ‘Keiin nankuunga kitihchou, Israel ankaar a oinang mii khatkho tuuknoh ang.’ 10Amah in amthlah mii in innkhanna anlenglai amah roijuihva thra a louamsa.”
Trulmeinu Asa Kupata Jisu in Amring
11 #
Mak 5:21–24,35–43; Jon 11:1–44 Mahchu aknua Nain kuuboomma amah in sehsa, che amah aroi leh miitam in amasoh inruuia sehsei. 12Amah in khuboomvaa kolol anailai, anve, akthi miikhatta anpuih. Mah chuvah anu trulmeinu in apok asa kupa khalekruning, khuuboomna miitam in trulmeinusoh inruuia seh ei. 13#Luk 7:19; 10:1; 11:39; 12:42; 13:15; 17:5–6; 18:6; 19:8; 22:61; 24:3Akpu in trulmeinu chuta amuh in, arilvol hanga akuunga ason, “Trapnohro.” 14Che amah in innaia avache ukuta apalpei, ukuta akpuui in ngirra amsei. Chunna amah in ason, “Intlango, keiin nikuunga kisonche, inthlouro.” 15Cheva akthi mii in inthousa, mahche trongkho amthronpei. Cheva intlangsa chuta anukuunga amlanpei. 16#Luk 7:39; 24:19; Met 21:11; Jon 6:14Miinaam in intri suuksei; che anmah in Ringpu ta paar mathrat a ason, “Akliin ringraan inkhat ikaar a inthruhsa!” che “Ringpu in amah amiita thlenga a anpei!” 17Amahrella antong trongi Judia apumtea mahche mahvella inhiilla am ramboom anaamtea inthek a sehsa.
Aklup John tingna Trong Akraanei
(Met 11:2–19)
18 #
Met 11:2–19
Mah naamte i John aroi in akuunga ansonpei. 19Mahchunna John in aroi innihta onga Akpu kuunga mathlah a amsonei, “Akthleng samkha nang sacheme, chunoh a kannih in aktleita kan an umangme?” 20Mahche mii in Akpu kuunga anthlenglai anmah in anson, “Tui aklup John in kannihta nikuunga kanimthlah a kanimruiung, ‘Akthleng samkha nang sacheme, chunoh a kannih in aktleita kan an umangme?’ ” 21#Met 4:23; Mak 3:10Mah pungtal achunna Jisu in akna aksa jikcha, rii natna jikcha mahche thranoh li in luut jikchata amthratei, che amah in mitcho jikcha muh amphah ei. 22#Luk 4:18–19Chunna Jisu in ankuunga amsangei, “Nannih in nantheih khatkho nanmuh anaamtekha John kuunga seh a sonve: mitcho in anmit muh anphahpei, kehtlik in seh anchekpei, reichi kop in tlengsei, amkuur akpang eiin antheihpei, akthita amringei, aran anriing ankuunga akthra trongta raanna rungaia theih amphahpei. 23Tunangkhat keita keivatnohmii khavah doiphah veisa.”
24John vaa trongraan ei in anlengnua, John relna miitam kuunga Jisu in son amthronpei: “Nannih in raprilla jangta ak an sehchoume? Thli in aklok raphaltame? 25Chuche nannih in jangta nan annatu sehchoume? Anneem puun aksilh miikhattame? Anve, khalmo thra inliinga puunrei silh a tlanna akpaal anmahvah kurung kool a amsei. 26Churella nannih in jangta ak an sehchoume? Ringraan inkhattame? Oi, keiin nankuunga kisonpeichou, amahvaa ringraan inkhatchung akralsa. 27#Mak 1:2Mah i amah turella injihsa, ‘Anve kei trongraanta nanmaikuunga kamthlah, amah in nannih nanmaa a nanlam amchaangtu.’ 28Keiin nankuunga kisonchou kumei in anpokaar a John ta ralla anrol tukhatkho amnoh; chulata Ringpu vaa kurung huuunna avah andihrem amah in inrolrem veitu.” 29#Met 21:32; Luk 3:12(Mahchuta aktheih mii naamte khatkho roithraiei in aklup John phah a Ringpu ta amichimpei; 30Chuta Pharisi mahche ukil ei invah aklup John kha phah a anmah atak turella Ringpu in amdonkha indahsei.)
31“Chunna mah ringnatluun na mii ita keiin jaknangsoh kamlak ume, che anmah in khonang seime? 32Anmahva keithiilla inbok a khatleh khat ong nao khanangsei, kannih in nannih turella pasi kantumta, nannih in laamnoh sachou; kannih in tinta kantlohta, nannih in trapnoh sachou. 33#Luk 1:15Alamva aklup John in tolkho saanoh a, ngangli tuiikho iinnoh a thlengsa; nannih in ‘Amahta khousaar amrui’ ta nanson. 34#Luk 5:29; 15:1–2; 7:36–50Miivaa Asa kupa in saa iinna thlengsa; che nannih in nanson, ‘Anve, avonpii liin mahche tuiibuh ak iin, roithrai mii mahche alehchel miivaa anpai.’ 35Chuta amah asa ei in lousingta amichimpei.”
Jisu in Pharisi Simon Inna
36 #
Met 26:6–13; Mak 14:3–9; Luk 11:37; 14:1; Jon 12:1–8 Pharisi ankaarna inkhat in Jisu ta buh asaakpinatu ason, amah in Pharisi inna seh a tebor a inboksa. 37#Met 26:7; Mak 14:3; Jon 12:3Cheva anve, khuuboomna alehchel kumei inkhat in Pharisi inna Jisu in buh asaaknatu inbok a amsa ta aromma, amah in inteina thao inthaal lungbeel inkhat athlenpei. 38Jisu akehkuung aknungtong angirhche trap a, akthlia Jisu akehta machor amthronpei, mahchuta amah asamma anuulpei, che Jisu akehta machoh a, thao ateipei. 39#Luk 7:16; 24:19; Met 21:11; Jon 6:14Mahchun Jisu ta akouh Pharisi in ohchuta amuhlai arilsuunga amidonpei, “Mahmii inta ringraan inkhat veile, amahta akpal i tume, amah kumei i alehchel mii ta arom uta.” 40Mahchunna Jisu in akuunga amsang, “Simon, keiin nangkuunga jangmekhat kisontu am.” Chunna amah in amsang, “Lulok, mahchu jangsme?” 41“Tunangkhat baobeh ampu mii khatnata baobeh akpu mii innih ammei; mii inkhat in dinari reija ranga intoolsa, che aktleikhat in sopnga intoolsa. 42#Met 18:25Anmah in ansiincheknoh khanna ammah innihta a ip ei. Pek tunang jaknangmii khata amah in ralla aringvol ume?” 43#Luk 10:28Simon in amsang, “Keiin kamdonva, amahta ak ip khata thloia amah in aringvoltu.” Jisu in akuunga ason, “Nangin chimma pichaar nitlohpei.” 44Mahchunna Jisu in kumeitonga inheia Simon ta ason, “Amah kumei i nimuhme? Keiin nang inna luutsang, kikeh chaamnatu tuii kamlannohche, chuta amah kumei in akthlia kikeh machor a asam in keinuulpei. 45Nangin keita kimchoh nohche, chuta onna kiluutnata amah in kikeh machoh inngainoh. 46Ngang in kikanga thao keiteinohche, chuta amah inva kikeh a thao keiteiang. 47Churella keiin nangta kisonche, keiin amahvaa aleh jikchata ki ippei; alamva amah in keita khalmo aril kamvollang. Aleh steta in ip mii khanna steta aril involning.” 48#Met 9:2; Mak 2:5; Luk 5:20Mahche Jisu in kumeita ason, “Nang nileh anaamte ki ip peiche.” 49Chunna Jisu soh saaknatu inbokpijou mii in anmahseeng ankaar a trong amithronpei, “Alehchel mii rounakho ip akchek amah i tunang meio?” 50#Met 9:22; Mak 5:34; Luk 8:48Mahche Jisu in kumeita ason, “Nangin namlotrella nangta nakkalpei; leh oia sehrosa.”
Valgt i Øjeblikket:
LUKE 7: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
