LUKE 5
5
Jisu in Matsahrem Aroi Aongna
(Met 4:18–22; Mak 1:16–20)
1 #
Met 13:1,2; 4:18–22; Mak 1:16–20; 3:9,10; 4:1; Jon 1:40–42; 21:1–19 Miitam in Ringpu trong anrungeihnatu Jisu ta anlompei, amah in Kenesaret tuiiram apaalla ngirra amsa. 2Amah in tuiiram apaalla muli innih am amuh, chuta ngaman in muulnata trumma anmah torota chaamma ammei. 3#Met 13:1–2; Mak 4:1Amah in muli innih kaarna inkhat mah chuvah Simon vaa mulikha tuiipaal nata ste heithourota ason, chunna Jisu in inbok a muli asuungnata miitam amtheih ei. 4Amah in trong anngeihsoh Simon ta ason, “Nga nisuurnatu nang torokha athuukna a deenro.” 5#Luk 8:24,45; 9:33,49; 17:13; Jon 21:3Mahchunna Simon in amsang, “Akpu, kannih in khulouhthlang ngaman insuullung, chuta jakhatkho mannohsung, chuta nangin nison nujuih a keiin dentang.” 6#Jon 21:6Chunna anmah in ohchunna andeen in, ngapoong inkhat anbahpei; mahcunna anmah toro inthritsa. 7Muli aktleia anmahsoh nga akmanjou in thlenga majoomnatu ankut jaap a an ong. Chunna anmah in thlenga muli innih sipkenga nga anthun in tuiisuunga inphuumsamsei. 8Chunna Simon Pitar in mahchuta amuh in akehkungah intolh a ason, “Akpu, kei kuungnata sehrosa, alamva keiva alehchel miiang.” 9Alamva anmah in anman ngakhanna amahkho che amahsoh inruuia annaamtea salungkhousei. 10Simon soh inruuia Jebedi asa kupa Jems mahche John inkho salungkhousei. Mahchunna Jisu in Simon ta ason, “Intrinohro, ipeknata mathronna nangin mii aksuur vei uche.” 11Cheva anmah in tuiipaalla muli innihta an ilche, anaamte mathlah a Jisu aknuta anjuihpei.
Jisu in Kupakhat Amthrat
(Met 8:1–4; Mak 1:40–45)
12 #
Met 8:1–4; Mak 1:40–45; Luk 17:11–19 Chunna nga tloh a Jisu in khuuboom inkhat a a amlai, reichi in amlom kupakhat in Jisu ta amuh a akhup a antolhche angen, “Akpu o, nangin nija veile, keita namseeng chektung.” 13Cheva Jisu in akut jamma amahta palla ason, “Keiin kijapei, nangin seeng veirosa.” Kak hang achunna reichi in amahta amahpei. 14Mahchunna Jisu in amahta akchet tronga ason, “Tukhat ningkho sonnohro; chuta seh a thiimpu ta mamuhro, nang nitakta amseeng rella seh a Moses in trongthuun amlan nujuih a ankuunga sakhi aveinatu inkatphu inkhat katro.” 15#Luk 4:14,37; Met 9:26Chuta Jisu rella trong ral ralla amphorh chuche arungai leh annatna mathratnatu miitam pul pulla thlengei. 16#Luk 3:21; 6:12; 9:18,28; 11:1Chuta amah atakva rapriltonga inpella angen.
Jisu in Apangnem thi Mii khat Amthrat
(Met 9:1–8; Mak 2:1–12)
17 #
Met 9:1–8; Mak 2:1–12; Jon 5:1–9 #
Met 15:1; Mak 5:30; Luk 6:19 Nikhatnia Jisu in miita amtheih laia Kalili na, Judia na mahche khuu khuunata khatkho Jerusalem nata anthleng in Pharisi leh trongsuur lulok in akuunga inbok a amsei; akna mathratnatu Akpu vaa tuui amahkuunga am. 18Mahche anve, apangnem thia akna miikhatta raanga matolh a anthlen, amahta Jisu amaikuunga sihnatu ansuul, 19chuta mii tammalla amahta asuunga hongpinatu upai amnohsa; chunna anmah in innbunga kalseia, innbungta keak a raangsoh Jisu amaikuung talla anthlakpei. 20#Luk 7:48–49Anmah in amilotta amuh in asonei, “Kupa nang nilehta ki ip peiche.” 21Mahchunna lulok khatkho Pharisi in arat arat a madonna anson, “Ringpu ta usitnoh a aktrong mii i tume? Ringpu noh a tunang in aleh ip achekme?” 22Chunna anmah in arat arat a amidonchuta aromma ankuunga amsangei, “Nanrilla nga tloh a namidonkha jarelname? 23‘Nang nilehta ki ip peiche’ ta sonle chunohleh ‘Inthoua sehro’ ta sonni jaknangin aklaime?” 24Chunna miivaa Asa kupa in tukleiram a aleh ipnatu amtik amta nanromnatu Jisu in apangnem thimiita ason, “Keiin nangta kisonche, inthouro, raangkha choia nang inna inlengrosa.” 25Mahche amah in kak hanga anmaikuung nata anthohche raangta choia Ringpu ta mapaak a inna inlengsa. 26Chuuna annaam salungkhousei mahche Ringpu ta amipaakpei, khatkho antak a intri suukseia antihpei, “Inih in alehluung thlouta mi in imuhpei.”
Jisu in Levi ta Aong
(Met 9:9–13; Mak 2:13–17)
27 #
Met 9:9–13; Mak 2:13–17 Mah naamte i aknua Jisu in inthruh a roi anthraina phrangki thlaamma anbok Levi an ong roithrai miikhatta amuh a akuunga ason, “Keita keijuihro.” 28Chunna amah in anaamte mathlahkir a anthohche Jisu aknuta ajuihpei.
29Chunna Levi in Jisu turella inna buh adoonnatu amchaang; chunna amah in buh saakpinau anbokpijou roithrai khatkho aktlei mii khalmo tammei. 30#Luk 15:1–2Mahche Pharisi leh anmah Ringjih lulok eiin Jisu aroi anchunga arat rat a inso a ankuunga asonpei, “Nannih in roithrai leh alehchel miisoh jarella nansaak nan iinjoume?” 31Mahchunna Jisu in ankuunga amsangei, “Aruung thramii turelva daktar kananoh, chuta akna mii tingva kana; 32#1 Tim 1:15keiin akchimlamseh miita ak ong thlengnoh ang, chuta alehchel mii in ril anthlengnatu ak ong thlengang.”
Buhel Relna Anrui
(Met 9:14–17; Mak 2:18–22)
33 #
Met 9:14–17; Mak 2:18–22; Luk 7:18; 11:1; Jon 3:25–26 Chunna anmah in Jisu ta anson, “John aroi in injomma buh anhel, Pharisi inkho mahchunanga antloh, chuta nang niroi inva ansaak an iinning.” 34Mahchunna Jisu in ankuunga amsangei, “Changri in aruul apaisoh a amjoulai anmahta buh mahel achekume? 35#Luk 9:22; 17:22Churella mainangjim akni thlengtu, che changrita ankuungnata aphurhche aknua anmah in buh anhel umang.” 36Chela Jisu in ankuunga pandam tloh a asonei, “Tukhat inkho akthrapuun akir anthritna a, amlui puunna louphohnoh ei; phoh eileva akthrata inthrittu, mahche akthar akirkhakho amluisoh asak inchunnohtu. 37Tukhat inkho amlui savun thonga akthar ngangli tuii louthaal noh ei, thaal eileva ngangli tuii aktharkha savun thongta amphuuktu, atuiikho intahtu; che savun thongkho maangtu. 38Chuta akthar savun thoonga anthaaltu tlasa. 39Mahche ngangli tuii amlui an iinche tukhat inkho akthar dinoh ei, alamva amlui in tui aral.”
Valgt i Øjeblikket:
LUKE 5: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
