LUKE 23
23
Jisu ta Pilat Kuunga Anthlen
(Met 27:1–2,11–14; Mak 15:1–5; Jon 18:28–38)
1 #
Met 27:1–2; Mak 15:1; Jon 18:28 Cheva anmah naamte in inthloua, Jisu ta Pilat kuunga anphurhpei. 2#Luk 20:25Amahta maraal mathlaak mathronna anson, “Mahmii in inih jaatboomta amahnoh lamma inhea amseh, che Keisaar tinga roithaang malan athing, chela ataksaak in keiva Khrista kurung angta ason.” 3#Met 27:11–12; Mak 15:2–3; Jon 18:29–38; Luk 22:70Mahchunna Pilat in amahta arui, “Nangi Judi ei kurung cheme?” Chunna Jisu in amahkuunga amsang, “Nangin nisonre peio.” 4#Luk 23:14,22,41; Met 27:24; Jon 19:4,6; Noon 13:28Che Pilat in akthloi thiimpu leh miitam ankuunga asonei, “Mahmii i keiin amraal jakhatkho tuuknoh ang khame.” 5Chuta anmah in tranga tak a anson, “Amah in miita akrok, Kalili nata maiphah a che Judia apumte luunga miita matheih a hou amsuuk.”
Jisu ta Herot kuunga Amithlah
6Pilat in mahchuta atheih in, mahmii i Kalili na mii meta aruiei. 7Chunna Jisu vah Herot in apaalna athlanga am miita Pilat in arom inva, mahlaia Herot atakkho Jerusalem a amtaningva, Jisu ta amahkuunga amthlahpei. 8#Luk 9:9; Noon 4:27–28Herot in Jisu ta amuhlai khalmo aroomthoksa, alamva amah in Jisu ta amuhjana khalmo sootsa, jarelna tihva amah athlou rella atheihpei, che Jisu in salungkhouna daang atlohta amuhja a am. 9#Mak 15:5Nga tloh a Jisu ta trong khalmo arui; chuta amah in masangnohsa. 10Akthloi thiimpu mahche ringjih lulok eiin amahta khalmo malaal a lonna ngirei. 11#Mak 15:17–19; Jon 19:2–3Che Herot in amah raalmiisoh Jisu ta mananga aminuihpei; mahchuche amahta annaal puunreia maliinga, Pilat kuunga amilengpei. 12Mahlaital achunna Herot leh Pilat vah inkhatveia ruul veisei, alamva matsah avah khatleh khat jekna veia ammei.
Jisu ta Thatnatu Rai Amithlak
(Met 27:15–26; Mak 15:6–15; Jon 18:39—19:16)
13Cheva Pilat in akthloi thiimpuei, thloupuuiei, mahche mii eita ongjoua, 14#Luk 23:4,22,41anmahta asonei, “Miita amahnoh lamma akchingmii nantihche keikuunga nanthlenpei; keiin amahta nanmaikunga minna suia kianche, anve, nannih in mahmii ita lonna trongchou i keiva amah amaraal tuuknoh ang; 15Herot inkho amah amaraal tuuknoh, chunna amahta inihkuunga amthlahlapei. Anve, amahta thatnatu matikcha amaraal jakhatkho amnoh. 16#Luk 23:22; Jon 19:12–14Alamchunna amahta kikchaakche kamthlahtu.” 17Khuldoon ujou hoongna aknia Pilat in anmah turel mii inkhatta amthlahtu tla.
18 #
Met 27:20–23; Mak 15:11–14; Noon 3:13–14; Jon 18:38–40; 19:14–15 Chuta annaamte in khalek veia ongjousei, “Mahmii i that a, kannih turella Barabbas ta mathlahro.” 19Amah khuuboomma hou amsuuk che mii athatrelna simma inthunning. 20Pilat in Jisu ta amthlahja hanga ankuunga veikhatla asonei; 21chuta anmah in ong onga “Amahta mathluro, amahta mathluro!” ta onga ansonpei. 22Che amah in veithum tihpi ankuunga asonei, “Jarelname, amah in jaknang thranohthlou atlohpeime? Amahta thatnatu matikcha maraal jakhatkho keiin tuuknoh ang khame; alamchunna amahta kikchaakche kamthlahtu.” 23#Met 27:26; Mak 15:15Chuta anmah in tranga tak a, rool inkaanga onga amahta imthlutupot ta annihpei. Anmah anhouin achekpei. 24Cheva anmah in annih nujuih a Jisu ta thatnatu ajapei. 25Anmah in annih nujuih a trong amsuuk khatkho miithat rella simma anthun miita amthlahpei; chuta anmah in amidon nujuih a antlohnatu Jisu ta ankuunga amlanpei.
Jisu ta Amithlu
(Met 27:32–44; Mak 15:21–32; Jon 19:17–27)
26 #
Met 27:32; Mak 15:21; Jon 19:17 Cheva nga tloh a anmah in Jisu ta anphurhlai, Sairini na mii khat akming Simon khuuboom nata akthleng amahkuunga thingkharhta amiphurhpei, che amahta Jisu aknua amisehpei. 27Miitam in amah aknuta anjuih, anmah ankaar a kumei arouin amahturel anlukhe beenga sinthruuiei. 28#Luk 21:23–24; 19:41–44Chuta Jisu in anmahta inheia asonei, “Jerusalem asakumei eio, keiturel trapnohve, chuta nannih nantakturel khatkho nansaturel trapve. 29Alamva anve, ‘Nao akpoknoh khung mahche naophomma nao amnohluung khatkho naochuh am innohluung eikha doiphah veisei!’ ta ansonna aknikha thlengsa. 30#Mad 6:16Mahchuche muulpiita, ‘Muul nannih in kantakchunga tlave’; che rapthingta, ‘Rapthing nannih in kannihta kanibahve’ ta anmah in son amithron usa. 31Alamva thing an emlai mainang ita tlohseile, achaarlaiva khavei ume?”
32Amaraal am aktlei mii innihkho Jisu soh thatjounatu anphurhpei. 33#Met 27:33–44; Mak 15:22–32; Jon 19:17–24Kangruh Amun antihkhanna anmah in anthlenglai, ohkhanna Jisu ta amithlupei, che anmaraal am innihta inkhat in amah akchangtonga mahche inkhat in akveitonga amithlupei. 34#Noon 7:60Mahchunna Jisu in ason, “Pa o, anmahta ip eiro; alamva anmah in jangthlouta kantlohme antak in romnoh ei.” Che amah puunreita ankaar a insemnatu reipak chaang in ansei. 35#Luk 4:23Ohkhanna akngir in anna ammei; chuta Judi akchingei in amahta manuih a anson, “Amah in mii aktleiva akalpa; mahmii i Ringpu in achar Khrista chu veile atak anroua inkalso!” 36#Mak 15:23Raalmii inkho thlenga ngangli tui akthuurta amahkuunga malanna, 37amahta anson, “Nangin Judi kurung chele, nikroua inkalro!” 38Amah akangchunga, “Mah i Judi ei Kurung” ta injih a am.
39Thingkharh a anthoi anmaraal am ankaarna inkhat in Jisu ta manuih a ason, “Nangva Khrista noh cheme? Nikroua inkalro che kannihkho kanikalro khame!” 40Chuta aktlei inkhat in amahta saalla ason, “Nangin Ringpu ta trihnoh cheme, nangva niphahtuphu nimaraal talta niphahpei ta romnoh cheme? 41#Luk 23:4,14,22Inihva iphahtuphu taksa, alamva inihva itlohkhaanta matikcha a iphahpei, chuta amah kupa ivah chimnoh jakhatkho tlohnoh.” 42Chunna amah in Jisu ta ason, “Jisu, nang kurung huunna a nithlenglai keita kantheihrono.” 43#2 Kor 12:3; Mad 2:7Mahchun Jisu in akuunga ason, “Tak a keiin nikuunga kisonche, mi in nangta keisoh inruuia Paradais a amjou ume.”
Jisu in Thi
(Met 27:45–56; Mak 15:33–41; Jon 19:28–30)
44 #
Met 27:45–56; Mak 15:33–41; Jon 19:25–30 Mahchu ipek pung kurukvak tlasa, che ram apumte pungku phah a inthimsa, 45#Hib 9:8; 10:19kini in anthimlai; mathruunna thlaam a anjaarpuun innih suuk a inthritsa. 46Cheva Jisu in rool inkaanga onga ason, “Pa o, kei kikli nikut a kamsil peiche!” Mahchuta asonche akphuk achena veisa. 47Pek raalmii reija akpu in mah aksuuk chuta amuh in, amah in Ringpu ta mapaak a ason, “Tak a amahvah amaraal amnoh miirea!” 48Mah aksuuk khata an annatu anboom mii naamte in, ohkhata anmuh in, anlukhe beeng beenga an inna inlengsei. 49#Luk 8:1–3; 23:55–56; 24:10Amahta akrom annaamte in che Kalili nata amah aknujuih kumei ei in saraalla ngirra aksuuk khata anna amsei.
Jisu ta Anphuum
(Met 27:57–61; Mak 15:42–47; Jon 19:38–42)
50 #
Met 27:57–61; Mak 15:42–47; Jon 19:38–42; Noon 13:29 Ipek Judia ah Arimathia khuupiina akming Joseph an ong mii khat am. Amahva jama ankaarna inkhat, kthramii che akchimlamseh mii, 51amahva anmah in amidonta che antloh thlouta jathlaang thlaang miinoh, mahche amahva Ringpu vah kurung huunna loungaak a am mii. 52Amah kupa in Pilat kuunga seh a Jisu aruungta anih. 53Chunna Jisu aruungta mathrumma innaal pitlangpuun inkhat a aklepche, tukhatkho anlousih nohna lungppiita viit a anseem rusuunna asihpei. 54Mahkha thlouraang antlohni akni veisa, che sabat amthronni tumnasa. 55Kalili nata Jisu aknujuih a akthleng kumei in Joseph ta juih a rusuunta che Jisu aruungta khatloh a ansihme ta a an; 56#Mak 16:1Cheva anmah in inlenga amrimtui pootleh inteina thao thlouraang antlohpei.
Mahche trongthuun in ason nujuih a sabat nia anmah in inngaisei.
Valgt i Øjeblikket:
LUKE 23: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
