LUKE 2
2
Jisu in Apokna
(Met 1:18–25)
1 #
Luk 3:1
Lai achunna nga tloh suuksa tukleiram apumte miipok tenveta Akastas Keisaar tingna jathang thlengsa. 2Kurini in Siria vaa rampuui aveilai miipokteen i matsahremsa. 3Mahche mii naamtein anmah anmah ankhuboomma anming amijihnatu mii naamte in sehsei. 4#Luk 1:27Mahche Joseph kho Kalili vaa Najareth khuuboom nata Judia vaa Bethlehem antih Devit khuuboom phah a hangsa, alamva amahvah Devit sakhei che innsuungvei. 5Amahsoh trong amiromche nao anpooi Meri soh inruuia ming amijihnatu sehsa, 6mah khanna an amlai, nao apoknatu anising tangsa. 7Che amah in matsahrem asa kupa inkhat apokpei, mahche naota puunna thlomma siilthlai saakna bukuunga amtolhpei, alamva miitlungna inna anmahtu aphom amnohsa.
Sadamkem Khatkho Ringroiei
8Cheva ram achunna Sadamkem arouin raprilla rik a anmah Sadamlomta khulouh a anngaak. 9#Luk 1:11; Noon 5:19Mahche Akpu vaa ringroi inkhat in anmaikunga indangsa, che Akpu vaa paarthra in anmahta inhiilla amvaar in intrisei. 10Cheva ringroi in ankuunga asonei, “Iintrinohve, alamva anve miinaamtetu veia khalmo roomthokna athra trong keiin nankuunga kithlenchou; 11#Jon 4:42; Noon 5:31; Met 16:16; Noon 2:36alamva mi in Devit vaa khuuboomma nannihtu Nanikal Akpu poksa amahvah Khrista Akpu sa. 12Mahche nannih turel daangva maisa, dalduh a anthlom naokhat siilthlai saakna bukuunga intlolh a am nantuuktu.” 13Mahche ngasuuksa, ringroi ruul in Ringpu mapaak a anson. 14#Luk 19:38; 3:22“Inkaangrem veia Ringpu ta paar mathrat, che thaleichunga Akpu ta mapel miikaar aleh oi am veisa!”
15Mahche nga intlohsa, ringroi in anmah kuungnata ringramma ankalsoh sadamkem in khatleh khat insonsei, “Inih in ipek Bethlehem a seh a Akpu in inikuunga inimrom aksuuk trongi seh a anrei.” 16Cheva anmah in inthademma seh a Meri leh Joseph che siilthlai saakna bukuunga amitolh naochukho antuukpei. 17Cheva anmah in ohchuta anmuhlai, naorella ansonkha ankuunga anson trongsoh inkeih a amirompei; 18Mahche sadamkem in anson trongta aktheih in salungkhousei. 19#Luk 2:51Chuta Meri in arilsuunga aratrat madonna anson naamte i arilsuunga asih. 20Mahche sadamkem ankuunga ansonta aktheih mahche akmuh naamtein inlengseia mahchurel Ringpu ta paar amithrat che amipaak.
Jisu Thlathlou
21 #
Luk 1:31,59; Met 1:25 Cheva avun tannatu akni nirit atangin, nao anpooinoh maa a anu akpoomsuung amlai ringroi in akming atholnanga amah akming Jisu an ongpei.
Jisu ta Mathruunna Thlaamma Ankat
22Mahche Moses trongsuur nujuih a anmah in amiseeng natu lai athlengin, amahta Akpu kuunga doonnatu Jerusalem a anthlenpei. 23(Akpu trongsuura injih nanga, “Naopoom amhoong matsah akpok kupa relta Akpu kuunga Akseengta in ongtu.”) 24Mahche Akpu trongsuur in ason nujuih a “Rapril ukthru inkhat nohle khuinu ate innih” inkatphu veia doonnatu. 25#Luk 2:38; 23:51Mahche anve, akming Simeon mii khat Jerusalem a louam, amahvah Israel vaa akthra aktlanta loungaak akchimlamseh mahche Ringpu ta chet a amdon mii, mahche Li Akseeng in amahchunga am. 26Che amah in Akpu Khrista ta amuhnoh miil akthi muhnohtung ta Li Akseeng apaalla amahkuunga amdangpei. 27Chunna Li in atak a chuunga amah in Ringpu mathruunna thlaamma luutsa; che trongsuurva kastam nujuih a Akpu turel tlohja atlohnatu anu apa in nao Jisu ta anhonpei. 28Amah in Jisu ta akutbaanga konna Ringpu ta mapaak a ason, 29“Akpu nangin nison nujuih a ipek nang roijuihta leh oi veia namthlah, 30#Luk 3:6Akpu nang chaanringkha kimit in kimuhpei, 31alamva mii naamte anmaikuunga mahkha nangin thlouraang nitlohpei. 32#Noon 13:47; 26:23Jental ankuunga madangna turel akvaar mahche Akpu amii Israel jaatturel paarthra veisa.” 33Jisu anu apa in amahturel asontrongta antheih in salungkhousei; 34Mahche Semeon in anmahta doi malanna anu Meri ta ason, “Anro, naoi Israel ankaarna aktam in atlaakna arilta mahche anthohna turel, inruuia akjanoh daang aveinatu asihpei 35(mahche chemseiin nangtalva li a naksuntu), che mii aktam anrilla amidon naamteta amdangna turelnasa.” 36#Noon 21:9; 1 Tim 5:9Aser jatihna Phanuel va asakumei Anna an ong ringraan kumei inkhat am, amah in amsalsoh kum sirih apaalche 37kum sopritlei manli chang trulmeinu kumei veisa. Amah in suun jaan buhella ngenna mathruunna thlaam mathlahnoh. 38Che mah pungtal chunna amah in thlenga Ringpu ta ampaak, mahche Jerusalem ta thloknatu ngaak a louam anaamtinga Akpu rella trongei.
Najareth ah Inleng
39 #
Met 2:23
Mahche Akpu trongsuur nujuih a thlou anaamte amipaangche anmah in Kalili ankhuuboom Najareth ah inlengsei. 40Mahchuche naoin inrolla trangkho trangsa, che lousingkho sipsa; Ringpu malungsikho achunga amsa.
Jisu Naoin Mathruunna Thlaamma
41Ipekva Jisu anu apa in kum kumtu veia laalna buhdoon turel Jerusalem a seh ei. 42Mahche Jisu in kum somleinih aphah in buhdoonna kastam nujuih a anmah in hangsei. 43Cheva buhdoonchu acheche anmah in inlengsei, Jisu vah Jerusalem a inmahsa. Anu apa in mahchu romnoh ei. 44Chuta Jisu vah ansehpijou aruul ankaar a jaota amidonna anmah in nikhat suuntla lam sehsei, cheva anmah uhnao leh ansehpi ankaar a amahta jon jonna amsei. 45Chuta amahta antuuknoh inva jonna Jerusalem phah a inlengsei. 46Cheva nithum aknua anmah in Jisu ta Ringpu mathruunna thlaam asuuunga lulok ei antrongta rungaia ankaar a trong ruia inbok a am antuukpei. 47Mahche arungai anamte in Jisu in atheih asing mahche anruita amsang naamte chunna salungkhousei. 48#Mak 3:31–35Cheva amahta anmuh in salungkhou seia anuin ason, “Kisa o, nangin kannihta nga nantloh ungi jarelname? Anro nipa leh keiin kanril lah a nangta kanjonche.” 49Mahchunna ankuunga asonei, “Nannih in keita nanjon angi jarelname? Keiva Pa inna amtupot talsang ta nannih in romnoh choume?” 50Amah in ankuunga asonna trongkha loutheinohsei. 51#Luk 2:19Chunna anmahsoh inruuia Najareth ah inlengsei, cheva anmah in ansonta amjuihpei; anu inva anson naamte i arilsuunga chet a asih.
52 #
Luk 1:80; 2:40 Che Jisu in ruunga mahche lousinga ahanral, mahche mii rilvol leh Ringpu malungsi atak am.
Valgt i Øjeblikket:
LUKE 2: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
