Matiu 8

Yisa nba din te ki gbaatir paak biaŋinba

(Mak 1.40-45; Luk 5.12-16)

1Yisa nba din tan nyii kunkonn maŋ paak ki sik yoonba, ki niib bonchiann waa u poor po. 2Ki gbaatsɔɔ baar ki tan gbaan u tɔɔnn ni ki yeen a “N Yomdaanɔ, a sa fit ki te ki n ŋaauk na-n gbenn. A kan sakii?”

3Ki Yisa tant u nuu ŋaan siiu ki yetɔ a “N saka. A ŋaauk maŋ-n gbenn!” Li taakpaak ni ki u ŋaauk na set gbenn. 4Ŋaan ki Yisa kpaanɔ a “I mi ki a bet sɔɔ barii na, ŋaan i saa Yennu mantɔɔ boor ki jii a mɔŋ ki wannɔ, ki bia mann marouŋ ki tur Yennu kaman nan u sɔkinii Moses nba din senn ki jiin gbaata tebu po na, a sɔɔ kur-n bann nan a ŋaauk maŋ set gbenna.”

Rom tiŋ lanjimanba yudaanɔ labaar

(Luk 7.1-10)

5Yisa nba din kɔɔ Kapenaum yoonba ki Rom tiŋ lanjimanba yudaansɔɔ chetɔ sɔnu ni ki barimɔ ki yeen a 6“N Yomdaanɔ, n toontunsɔɔe yiar; u gbanant kpowa, ki li mukisɔ bonchiann, ki u dɔɔ diiuk ni.”

7Ki Yisa betɔ a “N sa saan ki saa te wun paak.”

8Ki u jiin a “N Yomdaanɔ, daa bakint a mɔŋ ki baati; kimaan n ki ŋan nan fan baar kɔɔ n ŋaak ni; ŋaan pakin mɔbonne, ki n toontunnɔ na-n la laafia. 9Kimaan n mɔk binba garin ki yenin, ki n mun dia lanjimanba ki yemm, ki fit tian yenɔ paak ‘Baat,’ ki u baat; ki tian lɔɔ paak ‘I saa,’ ki u saa; ki bia te ki n daabir tuun ma loon biaŋinba.”

10Yisa nba din gbat linba na, ki li yaar ŋaan litɔ; ki u jiant got niib nba waa u poor po na ki betib a “Barmɔniie ki n beeri na, n daa ki mi la sɔɔ ki u teenin yada na booru yimm Israel teeb niwa gbaa. 11N beerie, niib bonchiann tan sa nyi yendo po nan yenbaa po, ki ŋamm nan Abraham, nan Aisak, nan Jakɔb tan sa lakin ki kar ki di jeet Yennu naan ni; 12ŋaan ki yimm nba tee naan maŋ ni niib na, bin jii-i ki lu-i nanyer po, bunbɔnn ni; leŋ maŋe ki i tan sii fabin mɔn ki junt i nyana.” 13Ki Yisa din ŋmant ki yet lanjimanba yudaanɔ maŋ a “I kun! Fa teen yada biaŋinba na, lin tun nnee ki tura.” Ki u toontunnɔ na set din paak li yoo na.

Biaŋinba ki Yisa din te ki baatib bonchiann la laafia

(Mak 1.29-34; Luk 4.38-41)

14Tɔn, ki Yisa din saan kɔɔ Piita ŋaak ni ki la ki Piita dianpook dɔɔ yiar gbanantouŋ. 15Ki Yisa sii u nuu; ki u gbanantouŋ na gbenn, ki u fiir ki teemm saauŋ.

16Li daar maŋ dajouk, ki bi din jii niib bonchiann nba ki narinbiit be bi ni na, ki baar namm Yisa boor ni; ki u lek pak mɔbonn ki nyinn narinbiit na; ki bia tur binba yiar na kura laafia. 17Wa din tuun biaŋinba na, u tuun kaman nan Yennu sɔkinii Aisaya nba din pak na a “U mɔŋ mɔŋ gaar ti gbanantouŋ nan ti yiarbooru booru ki jii yaat.”

Binba loon Yisa weiu labaar

(Luk 9.57-62)

18Yisa nba din la ki niburchiauŋ tan lintɔ yoonba, ki u yet u poorpoweiteeb a bin fiir ki bin poot mɔkgbeŋŋir pootir na po. 19Ki Yennu sennu wanntɔsɔɔ din baar ki tan yetɔ a “Wanntɔɔ, n sa weia siaminba kur po ki a saa.”

20Ki Yisa yetɔ a “Lunlona mɔk fɔrii, ki nɔɔnii mun bia mɔk tiat, ŋaan min nisaarik Bik ki mɔk dundɔɔnboori.”

21Tɔn, ki u poorpoweiteeb yenɔ mun tan yetɔ a “N Yomdaanɔ, ŋaant ki n saan ki saa pii n baa sinsinna.”

22Ki Yisa jiin betɔ a “I waan, ŋaan nyik ki kpeemm-ii pii bi kpeenleeb.”

Wouŋ nan nyun nba sak Yisa mɔb biaŋinba

(Mak 4.35-41; Luk 8.22-25)

23Yisa nba din kɔɔ burgbetir ni yoonba, ki u poorpoweiteeb mun wei ki kɔɔ. 24Ki wounpaaruk din fikit ki da mɔkgbeŋŋir maŋ ni, ki nyunpana din pir ki kɔɔ burgbetir na ni ki tan yaa lin gbee; ŋaan ki Yisa dɔɔ ki gɔɔnt. 25Ki u poorpoweiteeb din baar ki fiinɔ, ki betɔ a “Ti Yomdaanɔ, tinntit, ki nyun sa dit.”

26Ki Yisa yetib a “Yimm yadakanpɔɔna damm, bee ki i tiin jaŋmaanii?” ŋaan fiir ki tian wouŋ nan nyunpana na paak a bin ŋmin, ki bi set ŋmin soonna.

27Ki li yaar ŋaan litib, ki bi ji boi bi leeb a “Nirɔ na tee niboor bee? ki wouŋ nan nyunpana saak u mɔb gbaa.”

Yisa nba din tur jab bannlee nba ki narinbiit be bi ni na laafia

(Mak 5.1-20; Luk 8.26-39)

28Yisa nba din poot Galilee mɔkgbeŋŋir na, ki u kɔɔ Gerasa tiŋ ni. Ki jab bannlee, binba gbee nan narinbiit na din nyii kaat ni ki chetɔ; bi din mɔk jaŋmaanii hei, ki sɔɔ ki fit gaar ba be siami. 29Ki bi din yikin sanpaapowa ki yeen a “Fin Yennu Bija, timm nan fin, nlee mantiki? A baar nna a a tan dinnit fara-aa? ŋaan ki li yoo na daa ki baari.”

30Tɔn, ki doorii bonchiann din see kpiŋ po nnawa, ki di, ki ki fɔk nammi. 31Ki narinbiit maŋ din barin Yisa bonchiann ki yetɔ a “Li-i tee ki a nyinnitie, fan chabit ki tin saan ki saa kɔɔ doorii na ni.” 32Ki Yisa betib a “I saa man.” Ki bi nyii jab maŋ ni, ki saan ki saa kɔɔ doorii na ni; ki doorii na kur din tin birrr, ki sik jɔɔr na paak ki saa baa mɔkgbeŋŋir na ni ki dii nyun.

33Ki binba guu doorii maŋ fiir ki chiar ki saan doo ni, ki saa mɔɔnt linba kur teen maŋ, nan biaŋinba ki narinbiit nyii waatib na ni. 34Ki doo na niib kura din bite ki saan ki saa took Yisa; ba din lau yoonba, ki bi piin ki barimɔ a wun nyi bi tiŋ ni.

Valgt i Øjeblikket:

Matiu 8: BIM

Markering

Del

Kopiér