Matiu 6

Burchint tumu labaar

1“I daa tuun i toonŋana a niib-n la ki pakiini, kimaan i-i tuun nna, i kan la nyɔɔt i Baa Yennu nba be sanpaapo na boor ni.

2“Li-i tee ki a yaa a tur talasdamm piiniie, fa daa mɔɔntir kaman nan kpinkpannii damm nba tuun biaŋinba Yenjiantu diit ni, nan doi ni, a niib-n la bi toonŋana ki pakib na. Barmɔniie ki n beeri na, bi poŋ gaar bi nyɔɔta. 3Ŋaan li-i tee ki a yaa a pi talasdaanɔe, fan piu, ki daa te ki a yɔɔnimɔŋ gbaa mi li po. 4Tumin woonin ni, ki a Baa Yennu nba laat woonin ni na sa pa-a paanu ni.

Yenmiaru labaar

(Luk 11.2-4)

5“Li-i tee ki a yaa a miar Yennu, fa daa tuun kaman nan kpinkpannii damm na nba tuun biaŋinba na, kimaan bi loon bii see Yenjiantu diit nie, nan sɔnpaataa nba be doi ni, kii mei Yennu a niib-ii laatib. Barmɔniie ki n beeri na, bi poŋ gaar bi nyɔɔta. 6Ŋaan li-i tee ki a yaa a miar Yennue, fan kɔɔ a diiuk ni ki loon a gann, ŋaan miar a Baa Yennu nba be woonin ni maŋ, ki a Baa Yennu nba laat linba ki a tuun woonin ni na sa pa-a paanu ni.

7“Li-i tee ki a mei Yennue, fa daa mantik mei mɔbona nba yab kaman nan boorganu nba mei biaŋinba na; bi dukii nan bi miaru bonchiann paake ki bi pata sa gbat. 8I daa tee kaman nan ŋamm na, kimaan i Baa Yennu mɔŋ poŋ mi linba ki i loon ki i daa ki miarɔ. 9Ya tuu sii mei Yennu biaŋinbae na:

‘Ti Baa Yennu nba be sanpaapo,

ŋaant ki bii baakit a sann;

10ŋaant ki a naan-n baar;

ŋaant ki a loomm-n tun tingbouŋ nna,

kaman nan la tuun Yendɔuŋ ni biaŋinba na.

11Luunt dinna mann.

12Nyikin chab ti toonbiit

kaman nan ta mun nyikit ki chabit binba tuumit biit biaŋinba na.

13A daa te ki ti kɔɔ jinjammii ni,

ŋaan nyinnit bonbiir ni.’

14“Li-i tee ki i nyikit i leeb biit ki chabitibi, i Baa Yennu nba be sanpaapo na mun sa nyik ki chabiiwa; 15ŋaan i-i kii nyikit chabit i leeb biiti, i Baa Yennu mun kan nyik chab i biiti.

Mɔloru labaar

16“Li-i tee ki i yaa i lor mɔiie, ya daa biir i nunii po kaman nan kpinkpannii damm na, kimaan bi tuu biir bi nunii po, a sɔɔ kur-n la ki bann nan bi lor mɔiie. Barmɔniie ki n beeri na, bi poŋ gaar bi nyɔɔta. 17Li-i tee ki a lor mɔbie, fan yibir a numm po ki saat a yut fanu; 18linba nee sa te ki leeb kan bann nan a lor mɔbi, ŋaan a Baa Yennu nba be woonin ni na kuukɔɔe sii mi; ki a Baa Yennu nba laat linba ki a tuun woonin ni ki teenɔ na sa pa-a paanu ni.

Yendɔuŋ ni mɔkint labaar

(Luk 12.33-34)

19“Daa bɔrii a mɔkint tingbouŋ na ni, siaminba ki bonŋmiŋmabit nan tintanii sa biiri; ki nanyukib bia sa kɔɔ ki jami; 20ŋaan bɔr a mɔkint Yendɔuŋ ni, siaminba ki bonŋmiŋmabit nan tintanii kan fit ki biiri, ki nanyukib bia kan fit kɔɔ ki jami; 21siaminba ki a mɔkint be na, a dudukit mun be leŋe.

Gbanant yentu labaar

(Luk 11.34-36)

22“A ninbinae tee a gbanant fitir. Li paak, a ninbina-i ŋani, a gbanant kur po sii yeene; 23ŋaan a ninbina-i kii ŋani, a gbanant kur sii bɔne. Li paak, li-i tee ki yentu nba be a ni na tan bɔni, bunbɔnchiauŋ lannpoe na.

Tingbouŋ na binbeŋ labaar

(Luk 16.13; 12.22-31)

24“Sɔɔ kan fit tun ki tur yomdamm bannlee; u sii nan yenɔ ŋaan kii loon lɔɔ; amii u sii nian yenɔe, ŋaan kii sian lɔɔ na. I kan fit waa Yennu nan likirii biaki.

25“Li paake te ki n beeri, i daa te ki li mukisi i binbeŋ po nan ya sa di linba amii ki nyu linba; ki bia daa te ki li mukisi i gbanant po nan ya sa lia linba. Manfoor ki gar jeetii? ki gbanant mun bia ki gar tiatii? 26Gotir nɔɔnii nba yuuk ki lin na; bi ki buuri; bi bia ki jaan ki wuu suka nan naapaat ni, ŋaan ki i Baa Yennu nba be sanpaapo na dintib. I ki mɔk nyɔɔt ki gar nɔɔnii-ii? 27I ŋmee sa fit fɔkin u manfoor u dudukit nba mukisirɔ na paaki?

28“Bee ki i mukis i mɔŋ liant paaki? Gotir man tipuuk nan li ŋant; ŋaan bi ki tuun ki luu bi mɔŋ puuku, 29ŋaan n beerie, Kpanbar Solomon nba lek din mɔk liantŋana biaŋinba, u din ki mi lia liant ki li ŋan kaman nan tipuut na gbaa. 30Mɔɔt nba be dinna, ŋaan wonn ki bi joo muuwa na, Yennu nba faŋŋitir biaŋinba na, ki u kan gbabin yimmii? Yimm yadakanpɔɔna damm na!

31“Li paak, i daa te ki li mukisi ki i dukii a ‘N sa di bee?’ amii ‘N sa nyu bee?’ amii ‘N sa lia bee?’ 32Binba ki mi Yennu na tuu mukis bi dudukit linba na kur paake; ŋaan i Baa Yennu nba be sanpaapo na set mi nan i loon linba na kura. 33Ŋaant man ki i baka-ii be Yennu naan ni nan yentinu ni labaar, ki u sa jii bona nba na kur ki turi. 34Li paak, daa te ki wonn barii mukisiini, kimaan wonnee sa dukin u mɔŋ po; daar kur mɔk u fara ki li jaŋitɔe.

Valgt i Øjeblikket:

Matiu 6: BIM

Markering

Del

Kopiér