Màtéwò 13

Yèésù mú àtsòko-kã̀, tsí ń kpòwe fú ɔ̀nyà ŋa

(Mákò 4:1-9; Lúkà 8:4-8)

1Yèésù ǹɖe ńlé nɔ́dzɔ́#ɛ́ ké, tsí lɔ káà dzokó nétíɖò tsítsédzú tɛ̀ŋgɛ̀lɛ̀ɛ̀-kã̀ si, 2tsí ɔ̀nyà ŋa tsɛ́ kì, tsí wáa sú wérí‐ɛ̀ si kpìtìì, tsí ó tédzú ǹɖe lɔ káà wɔ̀ nɔ́kɔ̃̀-odzómi-kã̀ dzokó, tsí èrò#ɛ́ kpó ɖóro si nétí-oɖò#ɛ́. 3Ó kpòwe ŋa, tsí ń wíìnyɛ̀ ti nára-iŋɛ́ kpíkpɔ̀ fú ŋa. Ó fɔ̀ fú ŋa ní: Ó ɖi nɔ́dzɔ́-kã̀, tsí àtsòko-kã̀ ǹɖe, tsí lɔ nóko kó lɔ káà gbɛ̃ iŋɛ́. 4Kíbí ó tó#ɛ́, ó wà nyàá kã́ wérí nóko#ɛ́. Kíbí ó wà nyàá kã́ bɛ́ɛ̀#ɛ́, ɔma-dzídzɛ kã̀ŋa lɔ káà dzì nódzú-ɔ̀nà, tsí ɛyɛ ŋa wáa se ŋá dzɛ tsàmtsàm. 5Ɔ̀kã̀ ŋa gbo lɔ káà dzì ńlɛ̀-òkúta, ńbí ilɛ̀ kò kpɔ̀ si#ɛ́. Kò kpɛ̃́ gé#ɛ́, à wù, iŋɛ́ yèé tse#ɛ́, ilɛ̀-ibɛ̀ kò kpɔ̀ fú ŋa. 6Tsí odzúùrɔ̃̀ tsí, tsí dzoná ŋa, tsí à kú, iŋɛ́ yèé tse#ɛ́, à kò ta ogùgù. 7Ɔ̀kã̀ ŋa gbo lɔ káà dzì nágúgú, tsí à wù, tsí agúgú ŋa#á gbo wù, tsí ɖonùgbó, tsí fà mú ŋa, tsí kpa ŋá. 8Ɔ̀kã̀ ŋa gbo lɔ káà dzì ńlɛ̀-ire, tsí à wù, tsí so. Òkpì kã̀ŋa so ɔma ɔgɔ́ɔrú, tsí òkpì kã̀ŋa gbo so ɔma ɔgɔ́ɔta, tsí òkpì kã̀ŋa gbo so ɔma ɔgbã̀wó. 9Ńbɛ̀ɛ́, ɛnɛ yèé nɛ́ etí-ìgbɔ̃́ɔ̃̀rã̀#á, kó máa ń tsoɖi.

Kí tse tsí Yèésù kpòwe ŋa, tsí wà ń wíìnyɛ̀ fú ɔ̀nyà ŋa?

(Mákò 4:10-12; Lúkà 8:9-10)

10Ɔmatsɛ́-Yèésù† ŋa sɔ́ tìmá‐ɛ̀, tsí wà bèrèé ní: Kí tse tsí ó wà kpòwe ŋa, tsí wà ń wíìnyɛ̀ fú ɔ̀nyà ŋa ná?

11Tsí Yèésù dzɔ́ŋù fú ŋa ní: Iŋɛ́ yèé tse#ɛ́, Ɔ̀ɖáyé tsí ɔ̀nà fú àŋa òŋu ní ká ma afɔ̀-inɔ́ yèé ŋa wà#á ti nára-kíbí nákó dzoyè gbà#á. Kò tsí ɔ̀nà fú ɛnɛ-àtíbɔ̀ ŋa òŋu. 12Ó ɖi, ɛnɛ yèé nɛ́#ɛ́, à nákó fúu máa, tsí nákó tsɔ̀ɔ́ kũ̀, tsí ɛnɛ yèé kò nɛ́#ɛ́, oɖé tsígíɖí yèé gìɖì ó nɛ́#ɛ́, à nákó gbàá nɔ́wɔ́‐ɛ̀. 13Àtsùgbée bɛ́ɛ̀ ní òŋu wà kpòwe ŋa, tsí wà ń wíìnyɛ̀ fú ŋa#á. Iŋɛ́ yèé tse#ɛ́, à wà wòrã náàrìmáa rírã, tsí à wà gbɔ̃́ɔ̃̀rã̀ náàrìmáa gbɔ́ iŋɛ́-kã̀. Ó ɖi, à kò wà gbɔ́ iŋɛ́-kã̀ títí ká gbɔ́ òkpì‐ɛ̀. 14Tsí afɔ̀ yèé Yèsáyà† agbáfɔ̀-Ɔ̀ɖáyé fɔ̀† fɔ̀ si#ɛ́ ɖì ńǹtá-ŋa. Ɔ̀ɖáyé ní:

“È nákó mú etí-ŋɛ́ ŋa gbɔ̃́ɔ̃̀rã̀ rere tó bɛ́ɛ̀. Ó ɖi, afɔ̀ kàkó yé ŋɛ́.

Tsí è nákó mú odzú-ŋɛ́ ŋa gbo wòrã rere tó bɛ́ɛ̀.

Ó ɖi, è kàkó rí iŋɛ́-kã̀ kpókpó mà.

15Iŋɛ́ yèé tse#ɛ́, ifɛ̀ɛ́nɔ́ tã́ ɖí ɔma-Ìsàràyɛ́lì ŋa,

àtóoríi ká máa wà gbɔ́ òkpì-afɔ̀-Ɔ̀ɖáyé.

Tsí à ɖi etí, àtsùgbée ká máa wà rɛ̃tígbè‐ɛ̀.

Tsí à ɖi odzú, àtsùgbée ká máa wà rírã.

À tse bɛ́ɛ̀, àtsùgbée ká máa nyí lɔ ńɖɔ̀‐ɛ̀,

tsí kó bɔ ŋá.”#13:15 Ìwé-Yèsáyà 6:9-10 (Ésaïe 6:9-10)

16Ó ɖi àŋa òŋu, à wɛ éwo-ire, iŋɛ́ yèé tse#ɛ́, odzú-ŋà ŋa wà rírã, tsí etí-ŋà ŋa gbo wà gbɔ̃́ɔ̃̀rã̀. 17Òŋu wà wí òtítɔ́ fú ŋa ní fee, agbáfɔ̀-Ɔ̀ɖáyé fɔ̀ kpíkpɔ̀ òŋu atsòtítɔ́-Ɔ̀ɖáyé ŋa kpíkpɔ̀ gbé dzɔ̀ɔ́ dzɔ̀ɔ́, tsí à wò ní àŋa má rí iŋɛ́ yèé à wà rí báàyí#ɛ́, tsí à kò nyáa ríi. À wò ní àŋa má gbɔ́ iŋɛ́ yèé à wà gbɔ́#ɛ́, tsí à kò nyáa gbɔ́ɔ.

Yèésù wà nya òkpì-òwe yèé ó kpa ti nára-àtsòko-kã̀#á

(Mákò 4:13-20; Lúkà 8:11-15)

18Tsí Yèésù wà fɔ̀ fú ɔmatsɛ́‐ɛ̀ ŋa ní àŋa òŋu ká rɛ̃tígbè òkpì-òwe yèé òŋu kpa fú ŋa ti nára-àtsòko-kã̀#á. 19Ɔ̀nyà kpó yèé náa wà gbɔ́ ikɔ̀ ɖíɖɔ̃̀ ti nára-kíbí Ɔ̀ɖáyé nákó dzoyè gbà#á, tsí kà gbɔ́ òkpì‐ɛ̀#ɛ́, ó dzɛ́ odzú-ɔ̀nà ńbí ɔma-dzídzɛ ŋa lɔ káà dzì#ɛ́. Ètsù† náa wá, tsí kpàkpàtì afɔ̀ yèé ɛnɛ#ɛ́ gbà si ńǹsérè si#ɛ́. 20Ɔ̀nyà kã̀ŋa gbo dzɛ́ ilɛ̀-òkúta ńbí ɔma dzídzɛ ŋa lɔ káà dzì#ɛ́. À náa gbɔ́ afɔ̀-Ɔ̀ɖáyé#ɛ́, tsí à náa gbàá òŋu ayè títɛ́ gbòkã́. 21Ó ɖi, afɔ̀#ɛ́ kà lara wɔ̀ fú ŋa, tsí à náa gbàgbɔ́ fú ìwèrè-kã̀ gé ni. Bí à waà kpotsèéré nàmí bí à waà tsoró bá ŋa náàtsùgbée kíbí à gba afɔ̀-Ɔ̀ɖáyé gbɔ́#ɛ́, à náa kɛ́ ikɔ̀ ɖíɖɔ̃̀#ɛ́ taánù gbòkã́. 22Tsí ɔ̀nyà kã̀ŋa gbo dzɛ́ agúgú ńbí ɔma-dzídzɛ ŋa lɔ káà dzì#ɛ́. À gbɔ́ afɔ̀-Ɔ̀ɖáyé#ɛ́. Ó ɖi, ìsérè-iŋɛ́-ayé ŋa òŋu kíbí owó náa rúnɛ, tsí à náa wà wòó nódzú-ìkpã́#á, iŋɛ́ méèdzì nyɛ̀ŋɛ̀ ŋa náa ɖɔ́kpɔ fú afɔ̀-Ɔ̀ɖáyé yèé à mú si néwo#ɛ́, tsí kà nyáa so èso-kã̀ kpókpó ńnɔ́-ayé-ŋa. 23Tsí ɔ̀nyà kã̀ŋa gbo dzɛ́ ilɛ̀-ire ńbí ɔma-dzídzɛ kã̀ŋa gbo lɔ káà dzì#ɛ́. À gbɔ́ afɔ̀-Ɔ̀ɖáyé, tsí à gbɔ́ òkpì‐ɛ̀, tsí à wà kíbí ɔma-dzídzɛ náa wù bɛ́#ɛ́, tsí à náa so. Ɔ̀kã̀ ŋa náa so ɔma ɔgɔ́ɔrú, tsí ɔ̀kã̀ ŋa gbo náa so ɔma ɔgɔ́ɔta, tsí ɔ̀kã̀ ŋa gbo náa so ɔma ɔgbã̀wó.

Yèésù mú bɛ́bɛ, tsí ń kpòwe fú ɔ̀nyà ŋa

24Yèésù kpòwe-òmírɛ̃̀-kã̀ fú ŋa ró, tsí wà fɔ̀ ní: Ká rí kíbí Ɔ̀ɖáyé wà dzoyè gbà#á gé! Ó wà kíbí oko-kã̀ yèé ɔ̀nyà-kã̀ lɔ káà gbɛ̃ ìmɔ́rĩ̀#13:24 Ńǹlú-Ìsàràyɛ́lì, à kà tsoko-ìmɔ́rĩ̀ náàsòkò nyɛ̀ŋɛ̀. Ó ɖi à náa tsoko-iŋɛ́-kã̀. À náa kpe iŋɛ́#ɛ́ ńfãrãsé ní bèléè. À náa lɔ bèléè#ɛ́, tsí náa ɖi ɔkà-kpɔ̃́nɔ́. si ńnɛ̀#ɛ́. 25Tsí ó wáa ɖi nóoru-kã̀, ńǹwèrè yèé ɔ̀nyà kpó sɔ̃rũ lɔ si#ɛ́, tsí ɔ̀tɛ̀-olóko#ɛ́ wáa lɔ káà gbɛ̃ bɛ́bɛ si náàŋírĩ-ìmɔ́rĩ̀#ɛ́, tsí lɔ. 26Ìmɔ́rĩ̀#ɛ́ òŋu bɛ́bɛ#ɛ́ dzɔ́ wù. Ńǹwèrè yèé ìmɔ́rĩ̀#ɛ́ wà so#ɛ́, à rí bɛ́bɛ#ɛ́ mà, 27tsí àtsìtsɛ́-olóko#ɛ́ ŋa lɔ ńɖɔ̀‐ɛ̀, tsí bèrèé ní: Ɔ̀gá! Ìmɔ́rĩ̀ ní ò gbɛ̃̀ si nóko‐ɛ̀#ɛ́ nɔ̀! Tsí ńbisí bɛ́bɛ ti? 28Tsí ó dzɔ́ŋù fú ŋa ní ɔ̀tɛ̀-òŋu-kã̀ ní tse bɛ́ɛ̀#ɛ́. Tsí àtsìtsɛ́‐ɛ̀ ŋa wà bèrèé ró ní: Ó wò ní àŋa kó lɔ káà tuú ǹɖeè? 29Tsí ó dzɔ́ŋù fú ŋa ní: Òò, iŋɛ́ yèé tse#ɛ́, òŋu wà sá ní ká máa tse àtsùgbé-bɛ́bɛ, tsí tu ìmɔ́rĩ̀ gbo má ŋa. 30Ó ɖi, ká kɔ àŋa méèdzì méèdzì#ɛ́ kpó dzɔ̀ɔ́, tsí ká ɖonùgbó náàdzɔ́ títí ìwèrè-ká kpaɖí dzídzɛ kó tó. Tsí ńǹwèrè yèé à wà kpaɖí dzídzɛ#ɛ́, òŋu nákó fɔ̀ fú akpaɖí‐ɛ̀ ŋa ní ká tu bɛ́bɛ ǹɖe tã́ná, tsí ká ɖìí kpìmkpìm, tsí tãná gú ŋa, tsí ká kpaɖí ìmɔ́rĩ̀#ɛ́ ɖà náàká fú òŋu.

Yèésù wà kpòwe ti nára-oyè-Ɔ̀ɖáyé

(Mákò 4:30-33; Lúkà 13:18-19)

31Yèésù kpòwe-òmírɛ̃̀ fú ŋa, tsí wà fɔ̀ ní: Kíbí Ɔ̀ɖáyé wà dzoyè gbà#á, à nákó nyáa ń sàwé-ɔma dzídzɛ-kã̀ bɛ́. À náa kpèé ní mùtáɖì. Tsí ɔ̀nyà-kã̀ kɛ́ɛ, tsí gbɛ̃̀ɛ̃́ si nóko‐ɛ̀. 32Ɔma dzídzɛ-kã̀ kpókpó kò tse tsígíɖí tóo. Ó ɖi, kíbí ó sì wù#ɛ́, egi-iŋɛ́-ɔbɛ̀-kã̀ kpókpó kà ga tóo. Tsí ó ɖi egi títí ɛyɛ ŋa náa wáa kɔ́lé si nákpá‐ɛ̀ ŋa.

33Yèésù kpòwe-òmírɛ̃̀ fú ŋa ró, tsí fɔ̀ ní: Kíbí Ɔ̀ɖáyé wà dzoyè gbà#á, òŋu kó kpòwe-kã̀, tsí ń ɖíreé fú ŋa ró. Ó wà kíbí ɔ̀tsɛ̃̀-kpɔ̃́nɔ́ bɛ́ ni. Tsí ɔnɔbɛ̃̀ɛ̃-kã̀ kɛ́ɛ, tsí ń kpo ɔkà-kpɔ̃́nɔ́ àwò mɛ́ɛta títí ó kɛ́ kpó wùdzèè.

34Yèésù kpòwe ŋa, tsí ń wíìnyɛ̀ ɔ̀kã̀lɔ́ɔ̀kã̀ kpó fú èrò#ɛ́. Kò wíìnyɛ̀-kã̀ fú ŋa náàrì kpòwe. 35Ó wíìnyɛ̀ bɛ́ɛ̀ náàtsùgbé-afɔ̀ yèé Ɔ̀ɖáyé fɔ̀ si gbà ńǹtá-agbáfɔ̀-Ɔ̀ɖáyé fɔ̀†#ɛ́ kó tsɛ ni. Ó ní:

“Màa tsí arũ, tsí kpòwe ŋa fú ŋa,

màa dzíkɔ̀-afɔ̀-inɔ́ yèé ŋa ɖúkù si títí ńǹɖònɖálɛ̀-ayé ɛ́ fú ŋa.”#13:35 Ìwé-Orĩ ŋa 78:2 (Psaumes 78:2)

Yèésù wà nya òkpì-òwe yèé ó kpa ti nára-bɛ́bɛ#ɛ́

36Yèésù ǹɖe ńɖi-èrò#ɛ́, tsí lɔ ńlé. Tsí ɔmatsɛ́‐ɛ̀ ŋa sɔ́ tìmá‐ɛ̀, tsí wà fɔ̀ fúu ní kó nya òkpì-òwe yèé ó kpa ti nára-bɛ́bɛ yèé wà nóko#ɛ́ fú àŋa ɖé.

37Tsí Yèésù dzɔ́ŋù fú ŋa ní: Ɛnɛ yèé kɛ́ ìmɔ́rĩ̀, tsí ń gbɛ̃̀ nóko#ɛ́ dzɛ́ òŋu, Ɛnɛ yèé ɔ̀nyà bí#ɛ́†. 38Tsí oko#ɛ́ dzɛ́ ayé gbaŋgba#á. Tsí ìmɔ́rĩ̀#ɛ́ gbo dzɛ́ ɛnɛ yèé ŋa Ɔ̀ɖáyé dzoyè si ńǹtá-ŋa si#ɛ́, tsí bɛ́bɛ#ɛ́ gbo dzɛ́ ɛnɛ yèé ŋa dzɛ́ ti Ètsù†#ɛ́. 39Tsí ɔ̀tɛ̀-òŋu yèé gbɛ̃̀ɛ̃́#ɛ́ ní dzɛ́ Ètsù#ɛ́. Tsí dzídzɛ#ɛ́ kpíkpaɖí gbo dzɛ́ ìtã̀ntã́-ayé#ɛ́. Tsí akpaɖí‐ɛ̀ ŋa ní dzɛ́ adzítsɛ́-ɔ̀rɔ̃† ŋa#á. 40Tsí ńǹrɔ́-kíbí à nákó kpaɖí bɛ́bɛ ŋa#á kpó ɖà ńná, tsí dzoná ŋa#á, bɛ́ɛ̀ ké ní nákó dzɛ́ ńǹtã̀ntã́-ayé#ɛ́ gbo#ɛ́ ńnɛ̀ɛ́. 41Òŋu, Ɛnɛ yèé ɔ̀nyà bí#ɛ́ nákó bɛ adzítsɛ́-ɔ̀rɔ̃-òŋu ŋa wá, tsí à nákó nya ɛnɛ yèé ŋa kpó wà sɔ́ ɛnɛ àtíbɔ̀ ŋa si náàbi#ɛ́ òŋu ɛnɛ yèé ŋa wà tse íbàɖí#ɛ́ ǹɖe nóyè‐ɛ̀, 42tsí kɛ́ ŋa sɔ lɔ ńná lákṹ-kã̀. Ńbɛ̀ ní à nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á. 43Ó ɖi, ɛnɛ yèé wà tse òtítɔ́-Ɔ̀ɖáyé ŋa#á nákó wà kɔ nyɛ̀nyɛ̀nyɛ̀ kíbí odzúùrɔ̃̀ bɛ́ nóyè-Boba-ŋa. Ńbɛ̀ɛ́, ɛnɛ yèé nɛ́ etí-ìgbɔ̃́ɔ̃̀rã̀#á, kó máa ń tsoɖi.

Yèésù mú iŋɛ́ ɛ̀fɛ́ kã̀ŋa, tsí wà ń kpòwe fú ɔ̀nyà ŋa

44Yèésù fɔ̀ fú ɔmatsɛ́‐ɛ̀ ŋa ró ní: Kíbí Ɔ̀ɖáyé nákó dzoyè gbà#á wà kíbí iŋɛ́-ɛ̀fɛ́-kã̀ yèé à ń ɖúkù si nóko-kã̀, tsí ɔ̀nyà-kã̀ lɔ káà dzá ńǹtá‐ɛ̀#ɛ́ ni. Tsí òŋu gbo sɛ̃̀ ɖúkùú. Tsí kíbí ayè wà tɛ́ɛ#ɛ́, ó lɔ káà ta iŋɛ́‐ɛ̀ ŋa kpó, tsí wáa ra oko#ɛ́.

45Yèésù fɔ̀ fú ɔmatsɛ́‐ɛ̀ ŋa ró ní: Kíbí Ɔ̀ɖáyé nákó dzoyè gbà#á tɔ́ wà kíbí atsòwò lákṹ-kã̀ yèé wà wo ɔma-lɛ̀kɛ̀ yèé fɛ́ ŋa#á, tsí kó rà#á ni. 46Tsí kíbí ó lɔ káà rí ɔ̀kã̀ yèé fɛ́ tó bɛ́ɛ̀#ɛ́, ó lɔ káà ta iŋɛ́ yèé wà nɔ́wɔ́‐ɛ̀ ŋa#á kpó, tsí wáa ràá.

Yèésù mú ɔ̀ɖɔ̀ɔ́, tsí ń kpòwe fú ɔ̀nyà ŋa

47Yèésù fɔ̀ gbo ró ní: Kíbí Ɔ̀ɖáyé nákó dzoyè gbà#á tɔ́ wà kíbí ɔ̀ɖɔ̀ɔ́-kã̀ yèé à wà ɖà si nóɖò#ɛ́. Ɔ̀ɖɔ̀ɔ́#ɛ́ náa mú ɛdzã-ìrɔ́ ɔ̀kã̀lɔ́ɔ̀kã̀ kpó. 48Tsí bí ɛdzã kɔ̃́ɔ̃ ná, aɖàɖɔ̀ɔ́ ŋa náa fàá wá náàtàkè, tsí à náa dzokó, tsí tsã ɛdzã yèé à náa dzɛ ŋa#á ɖà nágbã̀ ŋa, tsí à náa mú yèé à kà dzɛ ŋa#á ɖànu. 49Bɛ́ɛ̀ ké ní nákó dzɛ́ ńǹtã̀ntã́-ayé#ɛ́ gbo ńnɛ̀ɛ́. Adzítsɛ́-ɔ̀rɔ̃† ŋa nákó wá, tsí tsã ɔ̀nyà íbàɖí ŋa ǹɖe náàŋírĩ-atsòtítɔ́-Ɔ̀ɖáyé ŋa, 50tsí kɛ́ ŋa sɔ lɔ ńná lákṹ-kã̀. Ńbɛ̀ ní à nákó wà sɔkṹ, tsí bínɔ́ si tó bɛ́ɛ̀, tsí wà dzara kpàkpàkpà#á.

51Ńbɛ̀ɛ́, Yèésù wà bèrè ŋá ní: À gbɔ́ òkpì-òwe ŋa#á kpóò? Tsí à dzɔ́ŋù fúu ní: Ɛ̃ɛ̃! 52Tsí ó fɔ̀ fú ŋa ró ní: Ńnɛ̀ ní akɔ́nɛ nɛ́kpa-Ɔ̀ɖáyé† kpó yèé gba ɛ̀kɔ́ ti nára-kíbí Ɔ̀ɖáyé nákó dzoyè gbà#á wà kíbí onùgbó-kpàtá-kã̀#á. Tsí onùgbó#ɛ́ wà kpɔ iŋɛ́ titɔ̃ òŋu iŋɛ́ hóhó fùɖá ti ńnɔ́-iŋɛ́-ɛ̀fɛ́‐ɛ̀ ŋa.

Ɛnɛ-ìlú-Nàsàrɛ́tì ŋa kò gba Yèésù gbɔ́

(Mákò 6:1-6; Lúkà 4:14-30)

53Kíbí Yèésù kpòwe nyɛ̀ŋɛ̀ ŋa tã́#á, ó ǹɖe bɛ̀, 54tsí lɔ ńǹlú‐ɛ̀#13:54 Ìlú-Nàsàrɛ́tì ni.. Kíbí ó lɔ káà tó#ɛ́, ó wà tsɛ̀kɔ́ fú ɛnɛ-ìlú‐ɛ̀ ŋa ńnɔ́-ilé-ìkpàɖé-ɔma-Ìyúɖà ŋa†. Tsí ó mù ŋá tó bɛ́ɛ̀, títí à náa wà bèrè ní: Nɛ̀ɛ́ fúu ńfɛ̀ɛ́nɔ́, tsí fúu ńkpá gbo ní kó wà tse iŋɛ́-àwùsì yèé ŋa náà? 55Kò tsi ɔma-agbɛ̃́gi ńnɛ̀ɛ́ɛ̀? Tsí kò tsi Màríyà† gbo ní dzɛ́ ìná‐ɛ̀#ɛ́ɛ̀? Tsí ìnàbí‐ɛ̀ ɔnɔkɛ̃̀ɛ̃ ŋa gbo ní dzɛ́ Yàkúbù òŋu Yòsɛ́fù† gbo, Sìmɔ́nì gbo má nára-Yúɖà gbo#ɛ́ nɔ̀! 56Tsí ìnàbí‐ɛ̀ ɔnɔbɛ̃̀ɛ̃ ŋa gbo kpó wà bá àŋa si bí nɔ̀! Tsí ńbisí ó tare iŋɛ́ nyɛ̀ŋɛ̀ ŋa kpó ti ńǹkɛ̀ɛ́ ná?

57Tsí Yèésù ɖi òkúta-àkɔ̀sɛ̀ fú ŋa. Tsí ó fɔ̀ fú ŋa ní: Bí agbáfɔ̀-Ɔ̀ɖáyé fɔ̀†-kã̀ tó ńǹɖì ɔ̀kã̀lɔ́ɔ̀kã̀ náa nɛ́ àrísá. Ó ɖi, ńǹlú‐ɛ̀ òŋu ńkpàtá‐ɛ̀ gé ní à kà nɛ́ àrísá fúu ɛ́. 58Ó ɖi, Yèésù kò nyáa tse iŋɛ́-àwùsì kpíkpɔ̀ bɛ̀, iŋɛ́ yèé tse#ɛ́, à kò gbàá gbɔ́.

Valgt i Øjeblikket:

Màtéwò 13: ngl

Markering

Del

Kopiér