TAUNET 1
1
Yaetap Parak ak Ng'wony
1Eng' taunet, ko ki toi Kamuktaindet koyai kipsengwet ak ng'wony. 2Ki ma komi kiy ng'wony ak ki ma kotinyei itoon age tugul. Ki mi mesundeito paragutap rireet ak ki wendoti Kabuusetap Kamuktaindet eng' paragutap peek. 3#2Kor 4.6 Komwa Kamuktaindet kole, “Ingolapkeiit” ak ki lapkeiit. 4Kogeer anyun Kamuktaindet lapkeiyet kole myee, koobeesyo lapkeiyet ak mesundeito. 5Ki kuure Kamuktaindet lapkeiyet Peet ak koguure mesundeito Kemoi. Koimen ak koeech, peetuut ne tai.
6 # 2Pet 3.5 Komwa Kamuktaindet kole, “Ingobiit soet eng' kwenutap peek, si koobeesyo pei ak pei!” 7Koyai Kamuktaindet soet si kobesyee peek che mi kurereetap soet ak che mi paragutap soet. Ak kiyaak ko uu nooto. 8Koguure Kamuktaindet soet parak, Kipsengwet. Koimen ak koeech, peetuut ne po aeng'.
9Komwa Kamuktaindet kole, “Ingoyumjigei peek komosta agenge che mi kurereetap kipsengwet, ak ingotook ng'wonyut ne ma mi pei.” Ak kiyaak ko uu nooto. 10Koguure Kamuktaindet emet ne ma mi pei, Ng'wony, ak koguure peek che kagoyumgei, Nyanjosyek. Ki keer anyun Kamuktaindet kole myee. 11Komwa Kamuktaindet kole, “Ingobiityo tugun eng' ng'wony: keetin alak tugul che po timiin che yiei kesui, ak che po logoi che tinyei kesui ko uu kergeindonywa”, ak kiyaak ko uu nooto. 12Ki piityo anyun tuguuk eng' ng'wony, keetiik alak tugul che po timiin che yiei kesweek ko uu kergeindonywa, ak che yiei logoek che tinyei kesweekwak ko uu kergeindonywa. Ak ki keer Kamuktaindet kole myee. 13Koimen ak koeech, peetuut ne po somok.
14Komwa Kamuktaindet kole, “Ingobiit tuguuk che iluu eng' soetap kipsengwet, si kobiit koobeesyo peet ak kemoi, si koek chooto kaboorunoik che po peetuusyek, arawek ak kenyiisyek, 15ingoek chooto che iluu eng' soetap kipsengwet si kobiit koluuchi ng'wony.” Ak kiyaak ko uu nooto. 16Koyai Kamuktaindet tuguuk aeng' che eecheen che iluu, si kobiit koboi ne oo peet, ak koboi ne ming'in kemoi. Ki yai kecheik ak icheek. 17Konde Kamuktaindet chooto soetap kipsengwet si kobiit koluuchi ng'wony, 18si koboi peet ak kemoi ak koobeesyo lapkeiyet ak mesundeito. Ki keer Kamuktaindet kole myee. 19Koimen ak koeech, peetuut ne po ang'wan.
20Komwa Kamuktaindet kole, “Ingochang'a ak koek ng'iisyat tuguuk che saptos eng' peek, ak ingotirirenso toriitik eng' paragutap ng'wony ak eng' soet parak.” 21Ki toi Kamuktaindet koyai njireenik che eecheen ak kiy age tugul ne sabei ne wendote peek ko uu kergeindonywa, ak toriit alak tugul che tinyei kebebaik ko uu kergeindonywa. Ak ki keer Kamuktaindet kole myee. 22Ki iberuur anyun icheek koleenji, “Oiiye ak otesage onyi peegap nyanjosyek, ak ingotesagis toriitik eng' ng'wony.” 23Koimen ak koeech, peetuut ne po muut.
24Komwa Kamuktaindet kole, “Ingobiit eng' ng'wony tuguuk che saptos ko uu kergeindonywa: kiyagiik, tyong'ik che ichuutegei ng'wony ak tyong'ik alak che po ng'wony ko uu kergeindonywa.” Ak kiyaak ko uu nooto. 25Ki yai anyun Kamuktaindet tyong'ik che po ng'wony ko uu kergeindonywa; kiyagiik ko uu kergeindonywa ak tyong'ik tugul che ichuutegei ng'wony ko uu kergeindonywa. Ak ki keer Kamuktaindet kole myee. 26#1Kor 11.7 Yeityo komwa Kamuktaindet kole, “Ongeyai chiito eng' itoondanyo, ko uu kergeindanyo. Ingoboi icheek njireenik che mi nyanjosyek, toriitik che mi soet parak, kiyagiik, ng'wony komugul ak tyong'ik tugul che ichuutegei ng'wony.”
27 # Mat 19.4; Mar 10.6 #Tau 5.1-2 Ki toi anyun Kamuktaindet koyai chiito eng' itoondonyi,
ki toi koyai chiito eng' itoondap Kamuktaindet;
ki toi koyai muren ak tye.
28Ki iberuur `Kamuktaindet icheek ak koleenji, “Oiiye ak otesage si onyi ng'wony ak obou; olaitorane njireenik che po nyanjosyek, toriitik che po parak ak kiy age tugul ne sabei ne wendote ng'wony.” 29Yeityo komwa Kamuktaindet kole, “Ogeero, kaagoonok keetiik alak tugul che po timiin che tinyei kesweek che mi paragutap ng'wony ak keet age tugul ne tinyei logoekyik kesweek, koek amitwogikwok. 30Kaagoochi anyun keetiik alak tugul che nyaliileen koek amitwogigap tyony age tugul ne po ng'wony, toriitik alak tugul che po parak, ak kiy age tugul ne ichuutegei ng'wony ne tinyei kabuusetap saboondo.” Ak kiyaak ko uu nooto. 31Ki keer anyun Kamuktaindet tuguuk tugul che kiga koyai kole myachen miising'. Koimen ak koeech, peetuut ne po lo.
Valgt i Øjeblikket:
TAUNET 1: KAPR
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©Bible Society of Kenya, 2019