Aposolo 8
8
Saulooŋo Doku Tau Tau Magu Ŋabaone More Engu Kito Okane Matalionge
1Stiwen qeu seukke, eya wane doku tau tau magu eŋe Yerusalem osino metkoi, wane naso yewaoka kiyeke ŋabakopene edo zok manerop matali qetali okan ongoi, eya wane doku tau tau magu eŋe korop kaet ket nat nat Yuda so Samariya ari warekoi, pakimo aposolo enŋeneka Yerusalem metkoi. 2Ŋei natne eŋe Waom wane masi koboine mogare gekoi, Waomŋo eŋane detki menaŋge, eya edo Stiwen dukka more, eŋe aro suwaine zok manerop eŋane arokkoi. 3Ŋo Sauloo eŋe doku tau tau magu zok manerop yeka matali oniyakane geke, eŋe mat koto ari waket more, ŋei so ŋerep ebu waraŋ one sari, mulap urumgo bira onmaŋke.
Eŋe Kisi Maep Samariya Yewao Ra Qelaŋangoi
4Doku tau tau magu eŋe ŋaba eŋane kaetongi, kakakone ket mat maneo maneo ari more kisi maep ra qelaŋangoi, 5Pilip eŋe Samariya wane mat mane suwaine yewao ket more, Kristo wane eŋetine ora more, eya wane kisi maep, eya ra qelaŋan onge. 6Ŋei ŋerep loutne manerop eŋe Pilip wane don detkoi paki, eŋe masi tanik togogole maki kakoi, eya detka more, eŋe ketene eŋanoka more metpi edange. 7Ŋei ŋerep loutne manerop eŋe asu qotkoine kotoeno pake, wane asu qotkoine yewa eŋe togoleka aroke more, qeliŋ one saket arikoi. Paki ŋei loutne setene seuseune me kiye meteene qotkoine, eya eŋe korop mo maine menaŋ warekoi. 8Eya wane ŋei ŋerep eŋano bakom suwaine zok manerop mat suwaine yewa eŋano wakonge. 9Ŋei mane mat suwaine yewao metke, eŋetine Simon, eŋe sogino suŋa qare kine kine ma okanmaŋke, eŋe yale okangi, Samariya ŋei ŋerep korop eŋe wet dereret loutne detkoi, yale okangi so Simon eŋe ramaŋke, “Na, nae ŋei suwaine mane.” 10Paki, ŋei ŋerep eŋetenerop, so ŋei ŋerep eŋetene midaine, eŋe korop Simon wane don desikei wane sorin gekoi, eŋe rakoi, “Ŋei yewa eŋe Kaisale wane zonom gorop gemaike, eŋe, ‘zonomine suwaine’,” eŋe yale ramaŋkoi. 11Pakimo, eŋe eŋane don desikei wane sorin gekoi, onoka wane, naso loutne eŋe masi kine mane maki, eŋe kau masi togogole yale okangi, eŋe wet dereret loutne detkoi. 12Ŋo baŋ Pilipŋo kisi maep, Kaisale wane qeli ewe zonom wane kisi maep don eya so Yesu Kristo wane kisi maep, eya ra qelaŋane edangi, eŋe naso yewao malipka more ŋei so ŋerep doku tau warekoi. 13Pakiso, Simon eŋe yaleka malipka more, doku tau more, Pilip korop gekoik, eŋe kaki masi tanik kine kine togogole Pilipŋo maki wakongi, ka more oŋaine qaeki, dereret urata zok manerop make. 14Aposolo eŋe Yerusalemka mere detpi, Samariya eŋe Waom wane don mo mamami, eya dere more, eŋe Petoroŋo Yohane biraotpi, ere eŋano ketkoik. 15Ere ket more, Waomŋo qesiŋongi, Asu Koboboine makei, eya wane meŋen kakoik. 16Eŋe Yesu wane eŋetko doku taukoi, ŋo Asu Koboboineŋo eŋane kuteno mi ket kitoke, 17eya wane ere meteetne kuteno motpik, so eŋe Asu Koboboine korop makoi. 18Simon eŋe otki aposolo etke, ere meteetne kuteno motpik, eŋe Asu Koboboine makoi, eya wane eŋe wesi erano ma sari more rake. 19“Ŋire zonom yewa naŋano weneŋ motpik, pakimo na yale waka metene ŋei mane wane kutino motpe so, eŋe yale waka Asu Koboboine eya, eŋe maine mayake” 20Yale rakimo Petoroŋo olatke, “Waomŋo kine kine eya wet pesek wane ŋebonmaike, eya ge maine wesiŋo mi qolekene, eya midakaka, eya wane wesiŋone eya mo geŋonerop sola gerepko weneŋ ŋisoki rap. 21Geŋane wet dereretŋone eya Waom wane deino koboboine zok mi okanmaike, eya wane ge zonom so urata iwa wane kotino maine mi wakesikene, eya midakaka, 22eya wane ge siluŋ wetŋone mainge more, masi tanikŋone qotkoine eya qelige more ŋadekkanom, paki, ge Waom suwaine meŋen kanom, oŋo maine wet dereret ŋonane bailalaŋ so sot turuŋŋone eya ma biraki ariyake. 23Na yalewa ramaile, onoka wane na ganbe, ge naso baŋem Waom wane zonom iwa maikenane bailalaŋ det maŋkene, eya wane umat suwaine kaukmaine, so dereretŋonane zoma qotkoine eyaŋo borikine ma wakone more walip ganmaike.” 24Pakimo, Simonŋo don iwa yale ra more main geke, “Ŋire siluŋ Waom suwainano naŋane meŋenkauk, eŋe wet Maep okane more qesiŋnangi, ŋire kine kine eya ramamik, eya naŋano koso mi wakoniyake.” 25Pakiso aposolo etke ere Waom Suwainane kisi maep don ŋei ŋerep ra edanbik paki, Waomŋo kine kine erano make, eya wane ra wakone edane more, so ere koso zinge Yerusalem arikoik, ere numao Samariya wane mat loutne eya kisi maep don ra edane arikoik.
Pilipŋo Etiopiya Ŋei Kisi Maep Ra Olatke
26Pakimo, Waom Suwainane aŋeloŋo Pilip iwa yale olatke, “Ge wiye more, kepe nat paromino rai woken arinom, numa yewa Yerusalem yuwane qei Gaza ketmaike.” Numa eya ŋei midaine, yaup togole pamaike. 27-28Eso Pilip eŋe wiye more ari numao Etiopiya ŋei mane kake, ŋei eya eŋe kepe ware ware suwaine mane, eŋe Etiopiya ware ware ŋerep waom Kwin eŋane wesi mat ware ware, eŋe labine mo kitokoi, oŋo Yerusalem sari Kaisale ewine kito more, koso zinge Etiopiya ariyakane numao horsi kare kutno mere more propet Isaiya wane ekap, eya dapore arike. 29Pakimo Asuŋo Pilip olatke, “Ge horsi kare yewa wane osino ari ikop maratkanom.” 30Paki, Pilip eŋe biririke osino ari more detkaki, eŋe propet Isaiya wane ekap dapore metke, eŋe yale okangi, Pilipŋo rake, “Ge don yewa dapore kineine maine detkamaine me mida?” 31Pakimo, ŋei yewa eŋe don iwa yale mainge rake, “Na ŋei maneŋo numa mi ra wakone sikan nangi, na noŋomka eya wane kineine dalino desikale? Ge sanom narop weneŋ horsi kare kutno mette.” 32Waom Wane kibi nat parom dapotke, eya yemo iwa yale weneŋ ramaike,
“Eŋe don mane mi rake, eŋe aŋaine kilipkeki, lama yale qeu seukeyakane ma sarikoi, eŋe lama medeune zoune kitatpi mi arok maŋkei, yale waka ŋei yewa eŋe aŋaine mi aŋaŋge 33Eŋe maket biraka more zok manerop mabaik kakoi, paki eŋe dongo biraka more eŋano don mane koboine mi rakoi, so eŋine tego me dokoine mane maŋo ŋei ŋerewekoune eŋano kisi maep don okangi rap? Midakaka, eya wane eŋe gegeine mau siukke, paki eŋe kepeo gegine eya koso mi geke.” 34Ŋei yewa eŋe ekap eya dapotki qoeki, eŋe Pilip olatke, “Na qeson ganbe, propet eŋe maŋane ra more don yewa rake? Eŋe eŋinane rake, me eŋe ŋei mane wane rake?” 35Eya wane Pilip eŋe ŋei yewa don dapotke, eya wane kine ra wakone olatke, eya wane ŋadino yemo eŋe Kaisale wane kisi maep ra qelaŋane more, Yesu wane kine natne kito olat wareke. 36Eŋe numaka ari mage doku mane yewao ari lotkekoik, paki ŋei yewaŋo rake, “Doku kanom pamaike, ŋo na onokaŋo numane leŋnangi, na peyam doku mi taumaile?” 37Pakimo Pilipŋo rake, “Ŋo ge wetŋoneŋo korop malip kakeneo, eya yemo ge maine taugangale.” Eŋe don mainge rake, “Na Yesu Kristo malip kamaile, eŋe Waom wane medep.” 38Pakimo, eŋe horsi kare ware ware olatki, ma walukkaki okorake, paki Pilip so ware ware ŋei yewa ere dokuwo ket more so Pilipŋo eŋe taukake. 39Pakimo, ere doku qeliŋka more sauk, eyaka ikop Waom suwainane Asuŋo Pilip ma arike, so ŋei ware ware eŋe koso mi kake, eŋe bakom kito more so numaine eyaka mogare arike. 40Ŋo Pilip eŋe Asdot matko lotke more, mat suwaine loutne yewa ari korop Yesu wane kisi maep don ra qelaŋane ari mage ŋado baŋ Sisariya matko ari lotkeke.
Valgt i Øjeblikket:
Aposolo 8: onsNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2012, Wycliffe Bible Translators, Inc. All rights reserved.