Aposolo 4
4
Petoro So Yohane Epu Lukotkoi
1Petoro so Yohane ere ŋei ŋerep don yeka edane okorauk, pris so Bakom Urum wane tebe ŋei ware wareene so Sadusi ŋei eŋe erano sarikoi. 2Eŋe sot osi osi okangoi, yemo onoka wane mida, Petoro so Yohane ere ŋei ŋerep kisi maep edane more Yesu eŋe seuseuwo ŋine wisikae wiyeke, eya wane kine, so ŋei seuseune eŋe baŋ ge mage korop wisikae wiye warekei, eya wane kine korop ra qelaŋane edan warekoik, eya wane eŋe erane detpi borike. 3Pakiso eŋe epu lukore more, dongo biraotkoi, ŋo kepe mo qoekane mulap urumgo bira otpi pauk, kepe qaeke. 4Ŋo Petoroŋo kisi maep don edangi detkoi, eŋano ŋine ŋei ŋerep loutneŋo don yewa detluke malipka warekoi, ŋei ŋerep yewa eŋane zaleene 5 tausen.
Petoro So Yohane Kaunsol Eŋane Kaiteno Don Rakoik
5Kepe qaeki, Yuda ŋei wawaine, ŋei ŋetne, so ra rokop don wane kine dereret ŋei, eŋe Yerusalem lewaŋgoi. 6Pris suwaine eŋetene Anas so Kaiyapas, Yohane so Alekzander, so natne Pris Suwaine eŋane magu, eŋe weneŋ korop lewaŋgoi. 7Paki rau, aposolo etke ere epu ari kaiteno biraotpi okorauk, so qeson ore rakoi, “Ŋire ma zonomgo kine kine yewa okanmamik? So ma eŋetko masi yewa mamamik?” 8Pakiso, Petoro eŋe Asu Koboboineŋo kotino watkeki edane rake, “Yuda ŋei wawaine, so ŋei ŋetnekopze korop rawe detpi, 9Ŋere ŋei mane kine boriworine iwa qesiŋka more mate menagike, eya wane ŋine iwa ŋere qeson ŋotmami, ŋei yewa eŋe daleo okane menage numa gegeine wakonike, ŋine eya wane kine desikei wane zok pidiŋ-ŋotmami. 10Eya wane yemo rawe ŋine so Israel magu korop detwareu, ŋei iwa ŋinane kait ŋino okoramaike, yemo Yesu Kristo Nazaret matko ŋine, eŋe ŋido kibeŋ qabego qeu seukke, pakimo, Kaisaleŋo ma wirik kaki, wisikae wiyeke, eŋane eŋetinane zonomŋo maki menagike. 11Yesu eŋe weku, mokaka Dawitŋo Yesu wane ra more Kaisale wane ekapko iwa yale qeke,
‘Mat mama ŋei ŋine Yesu eŋe bosiŋ qotkoine ra qikkau, eyaŋo qeinge more bosiŋ togogole okange okoramaike.’
12Qesi qesiŋ yemo eŋano weku paki kamaine, kepe baŋem eya ŋine Kaisaleŋo eŋet kuneŋine mane mi ma wakone sikan-ŋonmaike, oŋo koso ŋebuyakane. Kisi maep don yemo ŋeiwo mi pamaike, me ŋei mane wane eŋetko lipaŋka more mena menaŋ eyamo kepeo mi pamaike.”
Ŋei Don Teweke More Waom Don Qeli Qeliŋ Yemo Mi Pamaike
13Kaunsol eŋe otpi, Petoro so Yohane ere ŋei yauwine, ere kibi urumgo mi gekoik ŋo kaet etne midaine don togoleka ra qelaŋane edanbik, eŋe dere more ze qokonge, so ere Yesurop mo weneŋ gekoi, yewa eŋe mo detluk otkoi. 14So ŋei solaine mauk menaŋgi, numa gegeine wakonge, eŋe mo yewa ererop okoraki kakoi, ŋo siluŋ eya wane don turuŋine mainge etanikei wane numa zuwaŋgoi. 15Zuwage more, Petoro so Yohane ra otpi, ere Kaunsol urum qelige qeinat ketpik so eŋe enŋeneka don urata suwaine zok auye more rakoi, 16“Ŋene ŋei etke iwa daleo okan osikene? Ere masi kine mane memik, eya wane don kisiineŋo mo Yerusalem ariki, ŋei ŋerep koropŋo detwaremami, eya ŋene maine mi motkekene. 17Ŋo ge mage don yewaŋo suwa ŋei ŋerep eŋano yau yaup ariyakane, ŋene togoleka ra togole otŋem ere koso ŋei ŋerep natne Yesu wane eŋet mane mi ra qelaŋane edane arikeik.” 18Eŋe yale rau paki, koso etorau, ere urum koto wauk, eŋe Yesu wane don kisi mane mi ra qelaŋane edanikeik wane, so eŋet yewa ŋei ŋerep natne koso mi kito edanikeik wane ra togole otkoi. 19Ŋo Petoro so Yohane eto yemo mainge edane rakoik, “Ŋine ŋidom ra detpi, ŋere ŋinane don tewekete paki, Waom wane don qeligete Waomŋo detki menageyake me? 20Iwa yale wane, ŋere kine kine mayakatne mo wakongi, deseŋo kakote, so ketseŋo det warekote, yewa ma waluke ma gege eyamo mi okanikete.” 21Paki, Kaunsol eŋe don togoleka etane more bira otpi arikoik, iwa yale wane, ŋei ŋerep eŋe masi wakonge, Waom bakomine kitokoi, eya wane etkukei wane numaine zuwage more qeliŋgoi 22Ŋei kine borikine Petoro ŋo Yohane eto mauk menaŋge, eŋe komaine mo 40 yuwange.
Ŋei Ŋerep Mali Malip Korop Eŋe Togolekei Wane Waom Meŋenkakoi
23Petoro ŋo Yohane ere zinge kimakopetne eŋano ari more pris suwaine so ŋei ŋetne edo donba etangoi, yewa wane don kisi korop edan warekoik. 24Pakiso, eŋe detwareu qoeki, wetene qeturage more, iwa yale rau paki, Waom meŋenkakoi, “O Waom, ge qeli so kepe so kiwet so yeye kine kine eya wane kotino pamaike, korop ma wakon warekone! 25Goŋo Asu Koboboine tale kanom oŋo ŋaboze Dawit, geŋane qelit ŋei, eŋane wetino don motki, iwa yale rake,
‘Qelaŋ ŋei eŋe onoka wane koto gerep zok okane gekoi, ŋei ŋerep eŋe onoka wane wet yau yaup motkoi? 26Kepe baŋem ŋei waom eŋe mo aboŋene makoi, ware ware eŋe mo wekuwoka qeturaŋgoi, Waom so Mesiyaine ŋaba osikei wane.’
27Welekatne, Herot so Potius Pailat ere mo mat suwaine yewao qelaŋ ŋei so Israel ŋei ŋerep eŋerop qeturage more, Yesu geŋane qelit ŋei koboboine, ge Mesiya bira kakone, eŋe ŋaba kakei wane lewaŋgoi. 28Eŋe qeturage lewaŋgoi, yemo ge mokaka geŋone zonomŋonane so wetŋonane don togonŋone ra togole motkone, wele ŋado wakoniyakane, yewa korop ma wakon wareke. 29O Waom, iwa yemo ge eŋane qom suwa don gereunerop ramami, yewa dere ma papap kaikene, paki, qelit medewekopŋone ŋene qesiŋ ŋonnom togole more, don kisiŋone kaet midaine ra qelaŋanikene. 30Okanŋem, ge meteŋone ma wiye more, zoma ŋei ŋerep ebunom menaŋgei, so masi kine kine togole korop qelit ŋeiŋone koboboine, Yesu wane eŋetko ma warekene.” 31Yale ra meŋenkau qoeki, matpa lewage metkoi, yewa qiseke, pakiso, Asu Koboboineŋo ket more korop qe watone rokop ongi, Waom wane don kisi yewa kaet midaine togole more ra qelaŋane arikoi.
Doku Tau Tau Magu Eŋe Wet Weku Okane Gekoi
32Doku tau tau magu mali malip korop eŋe wetene so dereretene wekuku motpi paki gekoi, maneŋo kine kineine mane eya wane iwa nae bonepne yale mi ramaŋke, midakaka, eŋe yeye kine kineene bonep bonep yewa korop qeturaŋene pa ebongi, ma poke amanagu okane gekoi. 33Pakimo, aposolo eŋe Waom Yesu seuseuwo ŋine wisikae wiyeke, eya wane don kisiine zonom gorop ra qelaŋane ariu, enŋene don so dereretene eya manerop suwa ariki paki, Waomŋo doku tau tau magu yewa eŋane zok manerop siminkaki, qesiŋone more mauluk one mosoponge. 34Eŋane keuweno ŋine ŋei maneŋo aboŋ kine kineine midaine ma zuwaŋ mane mi okane geke. Ŋei natne kepe saiyenerop me matenerop, eŋe ŋei natne sunonbi, edo eya wane lewine wesi ebon okangoi. 35Pakimo, eŋe wesi yewa mainge ma sari aposolo ebon okangoi, eso aposolo edo wesi yewa mage more ŋei ŋerep yeye kine kine mane wane zuwaŋgoi, yewa ma poke qesiŋone gekoi. 36Eso ŋei mane geke, eŋetine Yosep, aposolo eŋe Barnabas oramaŋkoi, ŋenze dongo, “Ŋei wetze ma togole,” eŋe Lewi, Yuda wane magu maneo ŋine, Saiprus Siyao wakonge, 37eŋe kepeine sisine nat ŋei mane mangi, oŋo lewine wesi mangiso, wesi yewa koropka mainge ma sari aposolo ebonge.
Valgt i Øjeblikket:
Aposolo 4: onsNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2012, Wycliffe Bible Translators, Inc. All rights reserved.