Aposolo 3
3
Petoroŋo Ŋei Mane Kine Borikine Maki Menaŋge
1Kaiwe maneo Petoro so Yohane ere kepe zinge (3 kilok) rarapko, meŋe meŋen naso okangi, Bakom Urumgo wakoik. 2Pakimo ŋei mane kine bori worine nagaine kotino ŋine mo yaline wakonge, eŋe naso baŋem ma ari birakau, Bakom Urum wane madetine mane eŋetne “Madet Tasigaine,” yewa met mageke. Metki, ŋei ŋerep eŋe Bakom Urumgo wawa ketket okanbi, eŋe wesi aboŋ manikei wane ra meŋen okan one met maŋke. 3Ŋei yewa eŋe otki, Petoro so Yohane ere Bakom Urumgo wakesikeik wane okanbik, eŋe kine kine natne manikeik wane qeson otke. 4Eso Petoro ŋo Yohane ere deetneŋo qoŋ qoŋ rora papapka okorakoik, pakimo, Petoroŋo olale rake, “Ge deŋone ŋere ŋotnom!” 5Rakiso, ŋei eŋe kine kine mane ninikeik ra more erano deine potke. 6Pakimo, Petoroŋo olale rake, “Na wesi aboŋ mi pa ninmaike, ŋo na kine kine weku ma gemaile, iwa ginikale, yemo Yesu Kristo, Nazaret ŋine, na eŋane eŋetko golatmaile, Ge wiye gesoke arinom.” 7Yale ra olale more, metine wongoka ma qesiŋ kaki wiyeke, pakiso eyaka ŋei yewa wane kiye metine qeluetine eya koropka koliki menage more, togoleki maine wiye okorake. 8Eso eŋe sontake wa more, ket kineŋo gesoke okora more lolike arike, pakiso, eŋe ererop Bakom Urum koto weneŋ ari waket more, Kaisale bakomine kito eŋetine ora mawakake, so batne basi wasine okane more gesoke det okangi menaŋgi wet pese detke. 9Ŋei ŋerep korop eŋe kau Kaisale wane eŋetine ora mawaka bakomine kito more, eyaka numa arike. 10Pakimo, eŋe mo detkakoi, “Ŋei iwa oŋoka Bakom Urum wane ‘Madet Tasigaino’ mere naso baŋem wesi aboŋ wane ra meŋen okane met mageke, oŋo mo iwa menaŋmaike.” Yale ra more oŋaene qaeki, welelepkekoi.
Petoroŋo Bakom Urumgo Kisi Maep Don Edange
11Eso ŋei yewa eŋe Petoro so Yohane erano makatake more malilip otki, ŋei ŋerep eŋe one oŋaene qaeki, korop eŋano ari Bakom Urum kotine mane eŋetne, “Solomon Wane Touŋ,” ora okanmami, yewa ŋei ŋerep magu loutneŋo biririke sari qeturage lewaŋgoi. 12Yale okanbi, Petoro eŋe one more ŋei ŋerep yewa edane rake, “Israel ŋei ŋine onoka wane iwa ka more oŋa ŋine qaemaike, pakimo, ŋine ramami, ŋere ŋetze zonomgo mate, ŋei iwa eŋe menaŋmaike, ŋine yale ramami me? Midakaka! 13Abraham wane Kaisale, Isak wane so Yakop wane Kaisale, eŋe ŋenane sakon qerakopze eŋane Kaisale, oŋo Qelit ŋeiine Yesu wane kibi so zonom qelaŋan ŋei iwa wane kutno ma wakongi, ŋine kamami. Ŋine yemo ŋei yewa qaesikkau paki, ma more ŋaba eŋane meteeno birakakoi. Pakimo, Pailat eŋe loloŋka more birakaki ariyakane raki, ŋine eŋane kaitko qik kakoi. 14Ŋine Kaisale wane ŋei Koboboine so Maine Weku, mane yewa mogare iwenŋonge paki, ŋine eŋe qaisik kakoi so ŋadekkakoi paki, eŋane tungo ŋine Pailat boka olatpi, eŋe ŋei mane yewa, eŋe ŋei mane mo qeki seukki mulap urumgo birakaki metke, yewa seseka more siwotka ŋibonge. 15Pakimo, ŋine Ŋei Maine, gege togon numao iwenŋonge, eŋe gege togon wane Ŋetne, yewa qeu seukke. Ŋo Kaisaleŋo yemo seuseuwo ŋine ma wirik kaki wisikae wiyeke. Pakimo, ŋere ŋetom deseŋo kakote, eya wane eŋane don kisi iwa ra qelaŋanmaite. 16Ŋere yemo Yesu Kristo malipka lukka more, detluk kamaite, eya wane ŋei iwa yemo Yesu wane zonom so eŋane eŋetŋo ŋei matko met met wawetine qoiqoine, iwa zonom mangi togolemaike. Ŋere Yesu Kristo malipka more, eŋe detluk kamaite, eya wane ŋei iwa eŋe Yesu eŋetine detlukkaki, eŋane eŋetinane ra more, mali malipineŋo ŋei ŋerep korop ŋinane deŋino qesiŋka more maki menaŋmaike. 17“Welekatne kimakop, na mo detmaile, ŋine so ŋetne kopŋine ŋine wet qelaŋŋinane mi detluke more, masi yewa Yesu wano okangoi. 18Ŋo siluŋ ŋine yale okanbi mo, mokaka Kaisale eŋe propet koune eŋane weteno don motki, dere ra qelaŋangoi, eya wane rokopko maki, wele wakonge. Paki Kristo eŋe baŋ wikile dere more seukke, wane ŋine don so numa yewa mo Kaisale oŋom rake, rokop okanwarekoi. 19Eya wane ŋine wetŋine maingeu paki dereret ŋine qotkoine, eya matalikei, so wetŋine maingeu, Kaisaleŋo baŋ koso borikine ŋine eya korop sauk wareyake. 20Pakimo, ŋine yale okanbi, Waom eŋe koso zonom musele ŋine maine ma wakone ŋiboniyake, so Yesu eŋe Kristo ŋine, Kaisaleŋo mokaka ma wakonka biraka ŋibonge, eŋe talekaki ŋinano sariki, maine gege wane naso bomile ŋiboniyake. 21Iwa yemo Yesu eŋe qeliwo toma gema geki, Kaisaleŋo yeye kine kine musele korop ma wakon wareyakane nasoine bomileyake, mokaka Kaisaleŋo qelit ŋeikoune koboine, propet eŋane aŋaeno don motki ra qe okangoi, eya wane kop. 22Moseŋo mo iwa yale rake, ‘Waom eŋe ŋinane Kaisale oŋo na biranange, eya wane rokop ŋinŋine keu ŋino ŋine propet mane na yale ma birakaki, Kaisale wane qelit ŋei okane mere more, don kine kine ra ŋidan okaniyake. Yewa ŋine korop dere tewek okan warekei. 23Ŋei mane eŋe propet yewaŋo don rayake, eya dere aŋaine mi tewekeyake, yemo Kaisale wane ŋei ŋerep magu Israel eŋane keuwo ŋine mapokka more, eŋineka bira kayake, paki qeki seukeyake.’ 24So propet Samuel so propet natne wakone ge sarikoi, eŋe, onokaka wakonge, eya iwa ra qelaŋan-warekoi, koropŋo Kaisale wane don rakoi, so ukude naso iwao pamaike 25So ŋine propet gekoi, eŋane gipon boraso me ŋosa ŋabokopene, so Kaisaleŋo sakon qerakopŋine eŋerop tako rakot so ra rokop don ra mot okange, eya wane welakoune ŋine. Kaisaleŋo Abraham gorop tako rakot okane iwa yale olatke, ‘Na geŋane ŋosa ŋabokopŋone mosop onbe, mosop mayakatne yewaŋo kepe baŋem ŋei ŋerep korop rokop onwareyake.’ 26Eso eya wane Kaisale eŋe qelit ŋeiine ma wiye birakaki, mikep ŋinano sari wakonge, ŋibuki ŋine korop weku weku gege mageŋine borikine yewa ŋadek kawareu mauluk ŋune more, mosop ŋuniyakane birakaki sari wakonge.”
Valgt i Øjeblikket:
Aposolo 3: onsNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2012, Wycliffe Bible Translators, Inc. All rights reserved.