Aposolo 10
10
Petoro Eŋe Kornilius Wane Matko Arike
1Ŋei mane Sisariya matko geke, eŋetine Kornilius, eŋe Roma kawali ŋei magu (100) eŋane ŋetne. Kawali ŋei magu eya eŋane eŋetene “Italiyan wane kawali ŋei magu.” 2Kornilius eŋe Kaisaleŋo onokaka wane simin kamaike, eya malipka more ewine kitoke, eŋine so dokoine korop eŋe Kaisale wane bango tamge more, eŋetine ma bukeu wake, so eŋe Yuda ŋei aboŋene midaine qesiŋ onmaŋke, ŋo meŋe meŋen yemo Kaisale wano meŋenka mageke.
3Rarap maneo 3 kilok, kepe qoe qoe naso, eyao eŋe kulu kuluwo yale kine kine mane kake, eŋe Kaisale wane aŋeloŋo tingo kaki, ŋei yale sari mat koto saket more olale iwa yale rake, “Kornilius!” 4Pakimo, Kornilius eŋe eŋano pore kalilipka more, kaetkaki siluŋ rake, “Waomne daleo?”
Aŋelo eŋe donine mainge rake, “Kaisaleŋo geŋane masi weku mane ŋei ŋerep wesi aboŋene midaine geu, ge qesiŋ onmaine so kine kine wane qekau, ge mapik onmaine, eya mo Waomŋo ka more meŋen meŋenŋone dere more, siminkaki qesiŋ ganiyake. 5Ge nasomde iwaka ŋei mane bira onnom ari, ŋei mane eŋetine Saimon, ŋo maneine Petoro, eŋe Yopa gemaike, iwa iwenka sarikei wane bira onikene. 6Petoro eŋe Saimon osom solaineŋo kine kine mama eŋane matko kulit gemaike, Saimon eŋe matine yemo kiwet mezeno gemaike.” 7Aŋelo, eŋe yale ra more Kornilius don olatki qoeki arike,
Pakimo Kornilius eŋe ŋei etke etoraki sarikoik, ŋei mane eŋe Kaisale ewine kito more Kornilius wane matino geke, eŋe Kornilius maulukka mageke. Kornilius eŋe ŋei eya so kawali ŋei mane so qelit qeqe ŋei etke edoraki sarikoi. 8Sariu so Kornilius eŋe kine kine wakonge eya wane done edane more mauluke, so Yopa biraongi arikoi.
Petoroŋo Kine Kine Kulu Kuluwo Yale Kake
9Korniliusŋo ŋei biraonge, eŋe ari mage numao pakoi, kepe qaeki, ŋei etke so etke eya eŋe Yopa osino ariuso, kepe deine mo oŋa bango okangi, mo Yopa matko lotkekoi, pakiso naso yewao Petoro eŋe tiri woka mat bakino kutno meŋen kayakane wake. 10Yewa meŋenka more ŋara wane seuke more, qelit qeqe ŋei mane ŋara maulukeyakane olatke. Qelit ŋei eŋe ari ŋara maulukki, so Petoro eŋe kulu kulu yale kine kine mane de kuneŋine kake. 11Petoro eŋe kaki qeli aŋaŋgi, kine kine mane ketke, eya yemo lap lap kakapa suwaine mane yale wakonge, eyamo wazaine etke so etke pise pisiine eya yale waka metki, laplap eya bira qesuŋkaki, kepeo qere dege ket sarike. 12Osom kine mane kine mane, koma, logum, parewa, naŋi zubaine, eya eŋe korop laplap eya wane kotino watke pakoi. 13Ŋei maneŋo Petoro olatke, “Petoro, ge wiye qe nenom!”
14Pakimo, Petoroŋo mainge rake, “Waomne, na maine mi okanikale, Mose eŋe osom kine kine iwa pamami, eya korop qotkoine, Yuda tegoŋo mi nenine rake, sogino na osom yaline mane mi nekole.”
15Ŋei eyaŋo Petoro koso olatke, “Kaisaleŋo kine kine ra sauk okangi libeka okange, ge maine misuk raikene, ‘mi nenine’.
16Laplap eya atak karewe ket wakongiso, koso ikopka qeliwo mainge more waraŋgi kerewake.”
17Waki, so Petoro eŋe dereret urata so dere qeka okane more rake, kulu kulu iwa kele, eya wane kine yemo daleo? Eŋe dereret urata yale ma metkiso, ŋei magu natne Korniliusŋo biraonge, eŋe lotkekoi, eŋe sari lotke more, ra qeson okane rakoi, Simon wane mat, eyamo diyawao metmaike? Eŋe yale ra qesone ari mageso, madetko lotke more yewa okorakoi. 18So eŋe qesone more iwa yale rakoi, “Ŋei mane eŋetine Simon Petoro eŋe iwa kulit gemaike, ŋei eya eŋe iwa metmaike me mida?”
19Ŋo Petoroŋo yemo eŋe kulu kulu kake eya wane kine desiyakane ziyaŋka mat kutno weti metke, naso yewao Asu Koboboine eŋe Petoro olatke, “Detnom, ŋei karewe eŋe qelawa sari ge ziyaŋ ganmami. 20Yale wane ge wiye ketnom, na ŋei eya biraonbe sarimami, eya wane ge aboŋone mauluke more ikop ket eŋerop arinom, ge dereret urata koso misuk maikene, ŋei yewa noŋom biraonbe sarimami.”
21Rakiso, Petoro eŋe ŋei eya eŋano ket ŋei eya edange, “Ŋei iwa ŋine ziyaŋ kamami, yemo na iwa, ŋo ŋine onoka wane sarimami?”
22Yale rakiso, ŋei eya eŋe mainge olatkoi, “Kawali ŋei magu (100) eŋane ŋetne, eŋetine Kornilius, oŋo bira ŋongi sarimaine, oŋo ŋei wele, eŋe Kaisale eŋetine ora mawa kamaike, so Yuda ŋei ŋerep Kornilius ewine kito okanmami. Kaisale wane aŋelo mane oŋo Kornilius olatke, eŋe goŋo don mane daleo ra qelaŋane olatnom desiyakane newan ganmaike.” 23Petoro eŋe don eya dere more, ŋei eya eŋe mat yewao ruwoo eŋerop paikei wane newanonge.
Kepe qaeki, Petoro eŋe aboŋ mauluke more, eŋerop arike, doku tau tau ŋei ŋerep natne, Yopa ŋine eŋe eŋerop weneŋ arikoi. 24Petoro so ŋei magu eya eŋe ari mage numao pakoi, qaekiso kaiwe maneo Petoro eŋe Sisariya matko lotkeke, Kornilius eŋe weŋem sotakkoune so kimakoune natne newan ongi, sari matino Petoro toma kakoi.
25Petoro eŋe matko wayakane okoraki, Korniliusŋo maratka more Petoro wane kino kepo ket rasu more, umi ket kaitne kepe uwakake. 26Ŋo, Petoro eŋe maki wiyeki olatke, “Wiyenom! Na kepe ŋeika.”
27Petoro eŋe Kornilius don olatki, ari mat koto wakoik, ŋei ŋerep loutne lewage more erane toma metkoi. 28Petoro eŋe yale edange, “Ŋidom detlukmami, Yuda ra rokop don togonŋo iwa yale ramaike, Yuda ŋei mane eŋe Yuda tego ŋadino, qelaŋ ŋei, eŋerop maine kulit mi geyake, so Yuda mane eŋe tego eya eŋane osoeno mi ariyake, ŋo na yemo Kaisale oŋom mo sikan nanike, Kaisale wane deino me kaitko, na mi raikale, Kaisale wane zonom me deinane qelaŋanŋo ŋei mane wane sot turuŋ me panaman mane mi mataliki siukeyake, eya midakaka. 29Eya wane na ŋinane don dere mi qile, na ŋinane don boka woka eya dere iwa sarile, eya wane na qeson ŋunmaile, ŋine onokaka wane rau na sarile? Eyaka rau na detpe.”
30Pakimo, Kornilius eŋe mainge iwa yale rake, “Kaiwe karewe bano, naso yewao, 3 kilok na matne koto mere meŋen kawe so, ikopka ŋei mane laplapine qelaŋaninerop eŋe naŋane kaitno okora more, 31nolatke, ‘Kornilius! Kaisaleŋo geŋane meŋe meŋen dere more geŋane masi weku mane kake, 32eya wane ge ŋei mane Yopa bira kanom, eŋe ari Saimon Petoro maratka more, iwa sariyakane olatkep, Petoro eŋe Saimon, osom solaine mama eŋerop metmaike, eŋe matine kiwet osino kulit gemaike’.
33Yale raki, so na ikopka ŋei natne biraonbe sariu mo, ge masi weku mane okane more sarimaine. Naso iwao, ŋene korop Kaisale wane kaitko mere geŋane don desikenane tomamaine. Kaisaleŋo ge kine kine ginge, ge eya korop ra qelaŋannom desikene.”
Petoro Eŋe Kornilius Wane Magu Ra Qelaŋanonge
34Kornilius eŋe yale rakiso, Petoro eŋe kiyeke rake,
“Na iwa mo detlukmaile, Kaisaleŋo ŋei ŋerep korop eŋano masi tego wekuka raki paki detongi, magu weku okanmami. 35Ŋei ŋerep kepe baŋem maguine maguine, eŋe Kaisale ewine kitokeiwo, so koboine ge okanikeiwo, Kaisaleŋo ŋei ŋerep eya eŋane simin kaki qesiŋ oniyake. 36Ŋine don iwa yale eyamo detmami, Kaisaleŋo Israel tego ŋebonge, eŋe kisi maep don iwa yale ra qelaŋange, Yesu Kristo eŋe kepe baŋem ŋinane Suwaine, oŋo ŋebuki, ŋene Kaisale rop wet weku okangone, ŋine eya korop detlukmami.
37Ŋine ŋidom kine kine korop wakonge, eyamo detka waremami, eyamo Israel kepeo Yohaneŋo ŋei ŋerep doku tau-onge, so kisi maep ra qelaŋange, eya wane ŋadino mo korop wakon wareke, Yesuŋo urata eyamo Galili kepeo kiyeke more, maki takotke kepe baŋem rokopke ari wareke, ŋine eyamo korop detlukmami. 38Kaisaleŋo Yesu, Nasaret ŋine Asu Koboboine zonominerop qe watke rokopkake, Yesu eŋe kepe baŋem lolike korop masi weku mane ma more, ŋei ŋerep Ŋei Borikinane asu qotkoinerop eya ma menaŋ onge. Kaisaleŋo Yesurop geke, eya wane, eŋe kine kine maki, eya wakonge, ŋine eya mo korop detlukmami. 39Yesu eŋe kine kine Israel eŋane kepeo so Yerusalem kotino make,
Ŋene eya korop kakone, pakiso eŋe Yesu kibego qeu seukke. 40Ŋo, kaiwe mama karewe kutno Kaisaleŋo eŋe ma wisikaekaki, wiye more ŋei ŋerep eŋano wakonge. 41Ŋei ŋerep korop eŋe mi kakoi, Yesu eŋe seuseuwo ŋine koso wisikae wiyeke, Kaisaleŋo ŋene bira ŋongi, ŋene koso Yesurop weneŋ doku so ŋara nekone.
42So Yesu eŋe ŋene urata don ŋebone more ŋedange, ŋene ŋei ŋerep eŋano kisi maep don iwa yale ra qelaŋanikenane ra ŋedange, Kaisaleŋo Yesu eŋe ŋei ŋerep wisikaune so seuseune kineene ma wanokoniyakane birakake, ŋene don eya ŋei ŋerep edangene. 43Kaisale wane qelit ŋei propet eŋe korop Yesu wane don ra qelaŋangoi, paki, eŋe iwa yale rakoi, ŋei mane eŋe Yesu wane don dere mogat kayakeo, eŋe Kaisaleŋo ŋei eya wane sot turuŋine eya mo korop Yesu wane eŋet malipka maikane, qeliŋka maniyake.”
Ŋei Ŋerep Qelaŋ, Israel Ŋadino, Asu Koboboine Ebonge
44Petoro eŋe kisi maep don ra okoraki, eyaka Asu Koboboineŋo ŋei ŋerep korop Kaisale wane don dere metkoi, eŋane kuteeno ketke. 45-46Yuda tegoo ŋine doku tau taune Petororop weneŋ sarikoi, yewa eŋe detpi don kuneŋine kine mane kine maneoka, Kaisale bakom kito eŋetine ore ma wiyekoi, paki eŋe dereretene qeyauki qise more, iwa yale rakoi, “Kau, Kaisale eŋe qelaŋ ŋei ŋerep Asuine Koboboine ebone more, mainongi eŋane biŋek mo okanmami.”
Pakimo, Petoroŋo iwa yale rake, 47“Ŋei ŋerep tego iwa Asu Koboboine mo mamami, eŋe mo ŋenze rokop okanmami, eya wane mo koso maŋo mane doku taukei wane rawetoniyake?” 48So Petoro eŋe koso ŋei ŋerep yewa eŋe edange, “Ŋine ukude mo iwa Yesu Kristo wane eŋetko doku taukei!” Eŋe doku tauwi qoekiso, eŋe koso eŋerop kaiwe mama natne weneŋ gekei wane ra olatkoi.
Valgt i Øjeblikket:
Aposolo 10: onsNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2012, Wycliffe Bible Translators, Inc. All rights reserved.