ATÜTSAR 4
4
Kain thi Abel
1Jüti küsa vü Adam thi Eve masü thsüluo nü atsamoh nü Kain wuo. “Thinü ma nüh, Vüwa küükra vünüh anyi küsü ngurathuoh,” ti küza. 2Jüsevü nga Eve tü Kain anü Abel wuo. Jütiküsa vü Abel thuoüji nyihzhü kühuo sa, thi Kain thuoüji azhuh küürohtsari sa. 3Jüti küsa tsotho vü Kain tü azhih vünüh küpera aviri Vüwa vü kütsü sa nti viru, 4#Ebr 11.4. Thi Abel thuoüji ma nyihzhü vünüh kütsaa pokhuri thi küülietsari viru. Thinü Vüwa nüh Abel thi ma nüh kütsüri vü nolozhetewa, 5Thitü Kain kenüh thuoüji ma thi ma nüh kükhurüri vü mülozhe nüh sam. Jükenüh Kain tü arüshutewa, thi nyiepha kümzawa tü ratewa. 6Vüwa nüh Kain vü, “Noh tü mokenüh arüshuveh lo, thi mokenüh noh nyiepha mümza nüh sam lo? 7Noh nüh zanyo kümhie küsatüla noh tü alomküra küsawanyu nü? Thi noh nüh zanyo kümhie müsa thuoüji kükhiemuo tü amükhie kütuo vü liekehuo wieveh. Ma tü noh kete ngüveh, thitü noh mpa nüh jüma mücha üji mümhie,” ti küza.
8 #
Mat 23.35; Luk 11.51; 1 Jhn 3.12. Kain nüh ma nü Abel vü, “Eh nü, hisü azhuh vü wa nüh rajie,” ti ji. Jüti sanü masü kürü azhuh vü tse ünü Kain tü ma nü Abel vü arüshu taji ma zothem.
9Thinü Vüwa nüh Kain vü, “Kain, noh nü Abel khievü pehveh lo?” ti küna. Thinü Kain nüh, “Hi nü müthsü, hi tü eh nü kühuowa ülo?” ti rületsü.
10 #
Ebr 12.24. Jüti küsa vü Vüwa nüh, “Noh tü mowa sasaveh thuoh lo? Noh nü azüh tü azhih vünüh hi vü zie nü krie vehthuoh nü. 11Noh tü khinyi thuoüji azhih vünüh müzümthuoh, azhihwa tü noh nü azüh noh ke vünüh vi luo nta ma po ka nü pehvehthuoh. 12Noh nüh azhih vü kürohtsa nta wie ketünga azhihwa tü noh vü zanyo küsü nga shizhu tsü nta küsa kükhra küpehwa nyuthuoh, noh tü khonyo phrürie nü teküwari thi azhih vü küpriküzhüri satewa nathuoh,” ti küza.
13Kain nüh Vüwa vü küza, “Eh khuo tü hi nüh müküvüra nyieh vü nüh jim nü. 14Noh nüh nosü azhihwa vünüh hi tü zhejamthuoh, thi hi tü noh tüvü nüh küthim nathuoh; thi hi tü khonyo küphrürieri sanü azhih vü küpriküzhüri satewa nathuoh, jüüta sanü thari nüh hi ngu naveh ünüh jümari nüh hi fethem nathuoh nü,” ti küza.
15Thinü Vüwa nüh ma vü, “Nyu, jüüta küsawa nyu! Thawa nüh Kain fethe naveh ünüh jüma lü vü amüthoh türükeri türü vi naveh,” ti küza. Jüti sanü anyi wuori nüh Kain lü vü ru nü ma fethem üsü ti küsa kenüh athsoshi sa Kain rügi vü thsem. 16Jüsevü Kain tü Vüwa tüvü nüh tewa, thi tewa Eden phahri zhieshu wuovü azhih Nod, mazhünyo, küüpriküzhüzhie ta küji wuo vü rhotewa.
Kain Küshukürari
17Jüti sanü Kain tü ma vüvüh siethsüluo thi ma vüvüh tü atsamoh nü Enok wuo; thi Kain tü anyuji küsü sa, anyuji jüma anyo tü ma tsa Enok anyo vünüh thohtsü. 18Enok vünüh Irad wuo, Irad tü Mehujael apa, Mehujael tü Methushael apa thi Methushael tü Lamek apa. 19Thinü Lamek tü vüvüh künyi vi, ma vüvüh küsüwa nyo thuoüji Ada, thi küpawa nyo thuoüji Zila. 20Ada nüh Jabal wuo, Jabal tü juhthsüzheh lovü kürhori apa, thi ase-ashuh küpehri. 21Thi ma nü anyo thuoüji Jubal, Jubal thuoüji topito kükhu thi pilechu kükhuri apa. 22Zila nüh Tubal Kain wuo; ma tü asahwuo thi amürü vünüh zanyo müküzüküzü küsazhuwa. Tubal Kain tsevüwa tü Nama.
23Lamek nüh ma vüvüh künyi vü; “Ada thi Zila, eh zhü künaluo; eh vüvüh künyi; hi nüh mowa küzaveh ünüh künaluo: nyi küsü nüh hi saküümsamna kenüh hi nüh ma fethem, jüma tü vizari küsü, ma nüh hi küfe kenüh hi nüh ma fethem.
24“Mükütüküzü Kain tü türükeri amüthoh vimthuoüji, thari nüh hi fethe naveh ünüh jümawa vü rürake taküsa türü vi naveh,” ti küza.
Seth thi Enosh
25Thinü Adam tü ma vüvüh siethsüluo le nü ma vüvüh tü atsamoh nü nyimpari küsü wuo, thi ma nyo tü Seth ti thoh, küpakenühnyunü Eve nüh, “Kain nüh Abel fethe küm kenüh ma müthoh vünüh nyimpari küsü hi kütsü le kenüh,” ti küza. 26Seth vü nga atsa nyimpari küsü tsü, ma nyo thuoüji Enosh ti ji. Jüma se vü nüh anyiri tü Vüwa nyo jite.
Valgt i Øjeblikket:
ATÜTSAR 4: POCHBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.