RAPHA HIQWA LAK 1
1
Ra Nai Hiq Phansang Manphan
1Apha shaq shaq na, ümtiikiiwa Shiikeawe raq ra nai hiq phan sangtaq, 2kiitiikaq hiq ka asham min ahü kiimaq shaqmii riito. Sammoktra jü ka amok achhai blun wantlaq kriiraq phanrap wiita lam wantaq kriika ranyaq tang tang raq lam baiqto. Kiimaq Shiikeawe ningkun ka jü thaq na hut wantlii wato. 3Kiijiishe Shiikeawe raq akha aming kuqto, “Ra wü laq,” kiimaq ra wükito. 4Shiikeawe raq kra chhi raüta khoqriiqkhiq riito. Kiijiishe apaiq raq rawüli ka ranyaq mong wa pong niishe rai baiqto. 5Raüta apaiq raq rawüli ka “Ranaiq” nguta mangto. Kiimaq ranyaq nyang ka “Rawa” nguta mangto. Raji ka lea wanto. Kiimaq ra she wü wanto, kriika apha ranaiq riito.
6-7Raütiishe Shiikeawe raq akha aming kuqto, “Alam kaü ashi donglaq. Raüta kham ka tiikho baiqlaq. Raüta pong baba banai niishe rai thülaq,” kiimaq kra kloto. Krai mren Shiikeawe raq alam kaü ashi kra kloto, kiimaq kriiraq atakiq wa kham ka akhu thaq wa kham kiiwa pong na raibaiqto. 8Apaiq raq kra alam kaü ka “Ra” nguta mangto. Raji ka lea wanto kiimaq ra she wü wanto, kriika ranaiq nai ngoja she riito.
9Raütiishe Shiikeawe raq akha aming kuqto, “Ra takiq wa kham ka bashi na riichomlaq, raüta hiq ka midonglaq,” kiimaq kriika dongto. 10Apaiq raq hiq ka “Hiq” nguta mangto. Kiimaq kham adam na riichomtaq kriika apaiq raq, “khamjong” nguta mangto. Kiimaq Shiikeawe raq kra chhi raüta khoqriiqkhiq riito. 11Raütiishe apaiq raq akha aming kuqto, “Hiq raq phanrap pechong wiirü tiidonglaq, awong dong phan kiimaq atsi dong phan thun kra,” kiimaq kriika dongto. 12Kiimaq hiq raq phanrap pechong wiirü tiidongto. Kiimaq Shiikeawe raq kra chhi raüta khoqriiqkhiq riito. 13Raji ka lea wanto. Kiimaq ra she wü wanto, kriika ranaiq tsam ngoja she riito.
14Raütiishe Shiikeawe raq akha aming kuqto, “Ra na walütu thun donglaq. Ranaiq ka rawa wa pong na raibaiq miitu. Kiimaq ümtii'kiiwa ranaiq thun, rawii thun, kiimaq kamasham poi thun klophaho chang akhing kra tiichhike miitu; 15kriithun ka ra na li raüta hiq raikhü na mililiimlaq,” kiimaq kriithun ka dongto. 16Akha Shiikeawe raq rawüli tu ajong anai kloto, rashe kaü ka ranaiq pengti kiimaq jipi kaü ka rawa pengti; kiimaq apaiq raq raiqsaiq thun min kloto. 17Apaiq raq rawülitu thun ka ra na paqto hiqrai khü na liliim miitu, 18ranaiq kra peng miitu kiimaq rawa kra peng miitu, kiimaq rawüli ka ranyaq nyang wa pong na raibaiq miitu. Kiimaq Shiikeawe raq kra chhi raüta khoqriiqkhiq riito. 19Raji ka leawanto kiimaq rashe wü wanto, kriika rablai ngoja she riito.
20Raütiishe Shiikeawe raq akha aming kuqto, “Jü ka phanrap phanrii atra phan riishe mima wanlaq, kiimaq rawang win ka peshap wushi riishe mima wanlaq.” 21Akha Shiikeawe raq khamjong na siti jungrü kong pahea, jü na siti atra phan phanrap phanrii, kiimaq phanrap phanrii wushi phansangto. Kiimaq Shiikeawe kra chhi raüta khoqriiqkhiq riito. 22Apaiq raq tsangshiq thun wiitarü shiimanto, kiimaq jü na siti atra phan thun kiima puchi ronglaq, lanta khamjong ka tiima ronglaq kiimaq apaiq raq wushi thun miimin puchi ronglaq lanta pawan ronglaq nguta ramkuqto. 23Raji ka leawanto kiimaq rashe wüwanto, kriika rabiingi ngoja she riito.
24Raütiishe Shiikeawe raq akha aming kuqto, “Hiq raq atra phanrap phanrii tlotli ngam she tiidonglaq: jam nyamse kiimaq rum ngam, ajong kiimaq aran,” kiimaq kriika ka dongto. 25Krai mren Shiikeawe kriithun wiita phansangto, kiimaq apaiq raq kriithun ka chhiraüta khoqriiqkhiq riito.
26Kiijiishe Shiikeawe raq nguto, “Riita ümchaü ka nashiq raq maiqse thun she phansang rong i; tsangshiq ka nashiq ikha miraq kiimaq nashiq sham sham miraq. Tsangshiq raq ngiq, wushi thun, kiimaq ngamse tlotli, jam nyamse kiimaq rum ngam thun, ajong kiimaq aran phan wiita riim wan miitu arang miho.” 27Krai mren Shiikeawe raq maiqse thun ka phansangto, tsangshiq ka apaiq la apaiq phansangto. Apaiq raq tsangshiq ka maiqwe nai jechak kloto, 28raüta tsangshiq ka shiimanto, kiimaq akha nguto, “Namsetiim pahea hum ronglaq, krai mren namsaü namsetiim ka hiq raikhü na barap binrii na mishonglaq, raüta hiq raikhü ka tsangshiq wokhong na mirümlaq. Ngi raq ümniika ngiq, wushi thun, kiimaq rum nyamse tlotli khuthaq na arang kuq tiikang. 29Ngi raq ümniima phanrap phanrii aphaq asea chang tü atsam kiimaq phanrap phanrii petsi wiq tsam thun tlotli kuqkang she; 30shatmaq tlotli rumnyamse thun miitu kiimaq tlotli wushi phan miitu ka Ngi raq sangphii nai chhijaq nyiipji phan ka tsangshiq raq phaqsea miitu klo kuqkang,” kiimaq kriika ka dongto. 31Raütiishe Shiikeawe raq apaiq raq ümchuwa phansangtaq thun tlotli ka liito, kiimaq apaiq ka kai khoqriiqkhiq riito. Raji ka lea wanto kiimaq rashe wüwanto, kriika ratrok ngoja she riito.
Valgt i Øjeblikket:
RAPHA HIQWA LAK 1: TANGSBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.