मर्कूस 8
8
प्यद्वः मनूतय्त नकादीगु
मत्ती १५:३२-३९
1उबलय् हानं ग्वाः ग्वाः मनूत मुनाच्वन। थुमिके नयेगु छुं हे मदुगुलिं येशूं थः चेलातय्त सःताः धयादिल – 2“थ्व मनूत खनाः जितः माया वं। थुपिं जि नाप च्वनाच्वंगु स्वन्हु दय् धुंकल। नयेगु नं छुं हे मदु। 3जिं थुमित अथें खालि प्वाथं छेँ हुँ धाल धाःसा ला थुपिं लँय् हे मुर्छ्या जुइ, छाय्धाःसा गुलि मनूत ला तापाकंनिसें वःपिं दु।”
4चेलातय्सं धाल – “थथे सुं मदुथाय् थुलिमछि मनूतय्त सुनां गथे यानाः नके फइ?”
5अले वय्कलं न्यनादिल – “छिमिके ग्वःपाः मरि दु?”
इमिसं धाल – “न्हय्पाः।”
6वय्कलं इमित फ्यतुकादिल। अले मरि कयाः परमेश्वरयात सुभाय् बियाः कुचा थलाः चेलातय्त मनूतय्त इनाब्यु धकाः बियादिल। अले इमिसं यंकाः इनाबिल। 7इमिके चिचीधिकःपिं न्या नं भचा दुगुलिं वय्कलं व नं कयाः परमेश्वरयात सुभाय् बियाः चेलातय्त इंके बियादिल।
8इमिसं यतले नल। अले इनाः ल्यं दुगु मरि हे न्हय्गः दाला जायेक दु। 9अन प्यद्वः ति मनूत दु। अले वय्कलं इमित बिदा बियाः छ्वल। 10वय्कः अनं थः चेलात नाप नांचाय् च्वनाः दलमनुथा जिल्लाय् झाल।
अजू चायापुगु चिं क्यनेगु इनाप
मत्ती १६:१-१२
11फरिसीत वयाः वय्कः नाप खँ ल्हाः वल। इमिसं वय्कःयात जाँचय् यायेत स्वर्गं छगू चिं हजि धकाः फ्वन।#मत्ती १२:३८; लूक ११:१६
12वय्कलं झसुकाः तयाः धयादिल – “छाय् थौंकन्हय्यापिं मनूतय्सं चिं माला जुइगु? जिं छिमित धात्थें धाये – थज्याःपिं मनूतय्त छुं हे चिं क्यनी मखु।”#मत्ती १२:३९; लूक ११:२९ 13इमित अन हे त्वःताः वय्कः नांचाय् च्वनाः पारिइ झाल।
14उबलय् इमिसं मरि यंके ल्वःमन। इमिके नांचाय् छपा हे जक मरि दु। 15वय्कलं इमित ख्याच्वः बियाः धयादिल – “बांलाक होश या, हेरोद व फरिसीतय्गु सोडापाखें बचय् जुयाच्वँ।”#लूक १२:१
16“झीके मरि मदुगुलिं वय्कलं थथे धयादीगु खः?” धकाः चेलात थःथवय् खँ ल्हात। 17थ्व खँ सीकाः वय्कलं इमित धयादिल – “छिपिं छाय् मरि मदु धकाः हालाच्वनागु? छिमिसं आः तक नं थुइके मफुनि ला? छिमिगु नुगः अज्ज नं छाःनि ला? 18मिखा दयाः नं छिमिसं मखं ला? न्हाय्पं दयाः नं छिमिसं मताः ला? थुलि याकनं हे ल्वःमने धुंकल ला?#यर ५:२१; इज १२:२; मर्क ४:१२ 19न्याद्वः मनूतय्त नकेत जिं न्यापा मरि छिमित इनाबीत बियाबलय्, ग्वःगः दाला ल्यं दत?”
इमिसं धाल – “झिंनिगः दाला।”
20“प्यद्वः मनूतय्त नकेत जिं न्हय्पाः मरि छिमित इनाबीत बियाबलय् ग्वःगः दाला ल्यं दत?”
इमिसं धाल – “न्हय्गः दाला।”
21अले वय्कलं धयादिल – “आः नं मथूनि ला?”
छम्ह कांयात लाय्कादीगु
22अनं वय्कःपिं बेथसेदाय् थ्यंकः झाल। मनूतय्सं छम्ह कांम्ह मनूयात हयाः वयात थियादिसँ धकाः वय्कःयात बिन्ति यात। 23वय्कलं कांम्हय्सित ल्हाः ज्वनाः गामं पिने यंकादिल। अले वयागु मिखाय् ई तयाः ल्हातं थियाः धयादिल – “छं छुं खं ला?”
24कांम्हं च्वय् थस्वयाः धाल – “जिं मनू ला खना अथेसां इपिं सिमा थें न्यासि वनाच्वंगु खना।”
25वय्कलं हानं वयागु मिखाय् ल्हाः तयादिल। अले ला वं बांलाक हे स्वये फत, फुक्कं यचुक खनेदत। 26वय्कलं धयादिल – “सरासर छेँ हुँ, गामय् दुहां वने मते।”
पत्रुसं वय्कःयात ख्रीष्ट खः धाःगु
मत्ती १६:१३-२०; लूक ९:१८-२१
27अनं येशू चेलातनापं कैसरिया फिलिप्पी धाःगु जिल्लाय् झाल। लँय् वय्कलं चेलातय्त थथे धकाः न्यनादिल – “मनूतय्सं जितः सु धकाः धयाजुल?”
28इमिसं धाल – “गुलिसिनं बप्तिस्मा बीम्ह यूहन्ना धाइगु,” गुलिसिनं “एलिया धाइगु, अले गुलिसिनं मेम्ह हे अगमवक्ता जुइ धकाः धाइगु।”#मर्क ६:१४-१५; लूक ९:७-८
29अले वय्कलं न्यनादिल – “छिमिसं जितः सु धकाः धयाच्वना लय्?”
पत्रुसं लिसः बिल – “छि मुक्ति बीम्ह ख्रीष्ट खः।”#यूह ६:६८-६९
30अले वय्कलं थ्व खँ सुयातं कने मते धकाः आज्ञा बियादिल।
थः सीगु खँ कनादीगु
मत्ती १६:२१-२३; लूक ९:२२
31अबलय् निसें येशूं चेलातय्त ध्वाथुइक धयादिल – “मनूया काय्नं यक्व हे दुःख सी मानि। थकालिपिं, तःधंपिं पुजाहारीत व शास्त्रीतय्सं वयात मानय् याइ मखु, बरु इमिसं वयात स्याइ। स्वन्हु लिपा व हानं म्वाना वइ।” 32वय्कलं थ्व ध्वाथुइक धयादिल। अले पत्रुसं वय्कःयात छखे यंकाः थथे धयादी मते धकाः ब्वःबिल।
33वय्कलं फनक्क फहिलाः चेलातय्त स्वयाः पत्रुसयात थथे धकाः हक्कादिल – “शैतान, छ जिगु न्ह्यःने च्वने मते, छाय्धाःसा छं ला परमेश्वरयागु खँय् मखु, बरु मनूतय्गु खँय् जक ध्यान तयाच्वन।”
गथे यानाः येशूया चेला जुइगु
मत्ती १६:२४-२८; लूक ९:२३-२७
34अले वय्कलं थः चेलातय्त व अन च्वंपिं मनूतय्तनापं सःताः थथे धयादिल – “जि नाप वयेगु जूसा छिपिं सुनानं थःगु खँय् छुं हे च्यूताः काये मते। अले थःगु क्रूस थःम्हं हे क्वबिया सीत तकं लिमच्युसे जिगु ल्यूल्यू वा।#मत्ती १०:३८; लूक १४:२७ 35थःगु प्राण बचय् यायेत जक स्वइम्ह मनू नाश जुयावनी। सुनां जिगु निंतिं व भिंगु खँयागु निंतिं थःगु प्राण पाइ व बचय् जुइ।#मत्ती १०:३९; लूक १७:३३; यूह १२:२५ 36सारा संसार हे ल्हातय् दयाः नं व मनू सिनावन धाःसा वयात छु दइ? 37वं हानं थःगु प्राण छुकिं लिफ्याना काइ? 38थ्व पापी व मभिंगु संसारय् सुनां जि व जिगु खँ न्यनाः ख्वाः फस्वय्की मनूया काय्नं स्वर्गदूतत नाप झःझः धाय्क परमेश्वर बाःनं छ्वया हइबलय् व खनाः लज्या चाइ।”
Valgt i Øjeblikket:
मर्कूस 8: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
