लूका 9
9
झिंनिम्हय्सित भिंगु खँ न्यंके छ्वयादीगु
मत्ती १०:५-१५; मर्क ६:७-१३
1छन्हु येशूं झिंनिम्ह चेलातय्त थःथाय् सःताः इमित भूततय्त ख्यानाः छ्वयेगु व उसाँय् मदुपिन्त लाय्काबीगु शक्ति व अधिकार बियादिल। 2अले वय्कलं परमेश्वरयागु राज्ययागु खँ न्यंकेत व ल्वय् लाय्काबीत इमित छ्वयादिल। 3वय्कलं इमित धयादिल – “लँय् छिमिसं छुं हे ज्वनावने मते। तुतां, म्हिचा, नसा, धिबा व हिला वसः नं यंके मते। 4न्ह्याम्हय्सिगु छेँय् बाय् च्वंसां छिपिं मेथाय् वने मत्यंतले व हे छेँय् च्वँ। 5सुनानं छिमित दुमकाःसा, भिंगु खँ मन्यंसा छिमिसं इमित लज्या चाय्केत पालि च्वंगु धू तकं थाथा यानाः व थाय् त्वःता हुँ।”#लूक १०:४-११; प्रे १३:५१
6अनंलि गांगामय् वनाः इमिसं भिंगु खँ न्यंकाः मनूतय्गु ल्वय् लाय्काबीगु यात।
जुजु हेरोद अलमलय् लाःगु
मत्ती १४:१-१२; मर्क ६:१४-२९
7गालीलयाम्ह शासक हेरोद येशूयागु खँ न्यनाः अलमलय् लात, छाय्धाःसा गुलिं गुलिंसिनं ला बप्तिस्मा बीम्ह यूहन्ना म्वानावःगु धकाः नं धयाजुल। 8गुलिसिनं एलिया वःगु धकाः धाल। गुलिसिनं ला न्हापायापिं अगमवक्तात मध्ये सुं छम्ह म्वानावःगु जुइमाः धकाः नं धाल।#मत्ती १६:१४; मर्क ८:२८; लूक ९:१९
9अले हेरोदं धाल – “यूहन्नायागु छ्यं ला जिं ध्यंके धुन। थ्व सु मनू जुल, गुम्हय्सिगु बारे जिं थुलिमछि खँ न्यनाच्वना?” अले हेरोदं वय्कःयात तसकं स्वयेमास्ति वय्कल।
न्याद्वः मनूतय्त नकादीगु
मत्ती १४:१३-२१; मर्क ६:३०-४४; यूह ६:५-१३
10प्रेरिततय्सं लिहां वयाः इमिसं यानावःगु ज्याखँ फुक्क येशूयात कन। अले इमित ब्वनाः वय्कः सुनानं मसीक बेथसेदा शहरय् झाल। 11थ्व खँ सीकाः ग्वाः ग्वाः हे मनूत वय्कःया ल्यूल्यू वन। वय्कलं इमित लसकुस यानादिल। अले इमित परमेश्वरयागु राज्यया खँ कनादिल। ल्वय् लाय्के माःपिन्त नं लाय्कादिल।
12बहनी जुइत्यंगुलिं झिंनिम्ह चेलातय्सं वय्कःयाथाय् वयाः थथे धाल – “थन ला छुं हे मदु। आः थ्व मनूतय्त थनं छ्वयादिसँ। अले लिक्क लिक्क लाःगु गांगामय् वनाः नयेगु व बाय् च्वनेगु याइ।”
13वय्कलं धयादिल – “इमित छिमिसं हे नकि।”
अले इमिसं धाल – “जिमिके ला न्यापा मरि व निम्ह न्या जक दु। थुलिमछिसित नकेत ला न्याः हे वनेमानि का।” 14अन मिजंत जक हे न्याद्वः दु।
वय्कलं चेलातय्त धयादिल – “नेय्म्ह नेय्म्ह यानाः इमित झ्वःलाक फ्यतुकि।” 15इमिसं वय्कलं धयादी थें मनूतय्त फ्यतुकल। 16वय्कलं व न्यापा मरि व निम्ह न्या कयाः परमेश्वरयात सुभाय् बियाः कुचा थलाः मनूतय्त इनाब्यु धकाः चेलातय्त बियादिल। 17अले इमिसं यतले नल। इनाः ल्यं दुगु कुचाकाचा जक हे झिंनिगः दाला जाय्क दु।
येशू मुक्ति बीम्ह ख्रीष्ट खः
मत्ती १६:१३-२०; मर्क ८:२७-२९
18छन्हु येशू याकःचा प्रार्थना यानाच्वंबलय् चेलात वल। अले वय्कलं इमिके न्यनादिल – “मनूतय्सं जितः सु धकाः धयाजुल?”
19इमिसं धाल – “गुलिसिनं बप्तिस्मा बीम्ह यूहन्ना धाइगु, अले गुलिंसिनं एलिया धाइगु, गुलिंसिनं ला न्हापायापिं अगमवक्तात मध्ये सुं छम्ह म्वानावःगु जुइ धकाः धाइगु।”#मत्ती १४:१-२; मर्क ६:१४-१५; लूक ९:७-८
20अले वय्कलं इमित धयादिल – “छिमिसं जितः सु खः धयाच्वना लय्?”
पत्रुसं लिसः बिल – “छि परमेश्वरयाम्ह मुक्ति बीम्ह ख्रीष्ट खः।”#यूह ६:६८-६९
21वय्कलं थ्व खँ सुयातं कने मते धकाः कडा आज्ञा बियादिल। 22हानं धयादिल – “मनूया काय्नं यक्व हे दुःख सी मानि। थकालिपिं, तःधंपिं पुजाहारीत, व शास्त्रीतय्सं वयात मानय् याइ मखु, बरु वयात स्याइ, स्वन्हु लिपा व हानं म्वाना वइ।”
गथे यानाः येशूया चेला जुइगु
मत्ती १६:२४-२८; मर्क ८:३४-३८
23येशूं फुक्कसितं धयादिल – “जि नाप वयेगु जूसा छिपिं सुनानं थःगु खँय् छुं हे च्यूताः तये मते। अले थःगु क्रूस थःम्हं हे क्वबिया सीत तकं लिमच्युसे जिगु ल्यूल्यू वा।#मत्ती १०:३८; लूक १४:२७ 24थःगु प्राण बचय् यायेत जक स्वइम्ह मनू नाश जुयावनी। सुनां जिगु निंतिं थःगु प्राण पाइ व बचय् जुइ।#मत्ती १०:३९; लूक १७:३३; यूह १२:२५ 25सारा संसार हे ल्हातय् दयाः नं व मनू सिनावन धाःसा वयात छु दइ? वं हानं थःगु प्राण छुकिं लिफ्याना काइ? 26सुनां जि खनाः व जिगु खँ न्यनाः ख्वाः फस्वय्की मनूया काय्नं स्वर्गदूततलिसे झःझः धाय्क परमेश्वर बाःनं छ्वया हइबलय् व खनाः नं ख्वाः फस्वय्की। 27जिं छिमित धात्थें धाये – परमेश्वरयागु राज्य मखंतले थन दुपिं मध्ये गुम्हं गुम्हं ला सी तकं मखुनि।”
येशूयागु रूप ह्यूगु
मत्ती १७:१-८; मर्क ९:२-८
28अथे धयादीगु च्यान्हु दय्काः पत्रुस, यूहन्ना व याकूबयात ब्वनाः येशू पर्वतया च्वय् प्रार्थना याः झाल। 29प्रार्थना यानाच्वनादीबलय् वय्कःयागु ख्वाः तसकं थिनावल, अले वय्कलं पुनातःगु वसः नं तसकं यचुसे त्वइसे च्वना वल। 30अबलय् मोशा व एलिया, थुपिं निम्ह वय्कः नाप खँ ल्हानाच्वन। 31इपिं नं स्वर्गयागु जलं तसकं झल झल थीक खने दयाच्वन। यरूशलेमय् येशू गथे जुयाः सी माली धकाः इपिं वय्कः नाप खँ ल्हानाच्वंगु खः।
32अबलय् पत्रुस व व नाप दुपिं फुक्कं मस्तं न्ह्यः वय्काच्वन। न्ह्यलं चाःबलय् इमिसं वय्कः झल्ल थिनाच्वंगु व वय्कः नाप मेपिं निम्ह मनूतय्त नं खन। 33इपिं वय्कः नाप बाया वनेत्यंबलय् लाक्क पत्रुसं वय्कःयात धाल – “गुरुजु, झीपिं थन हे च्वने दत धाःसा गुलि बांलाइ। जिमिसं स्वंगू बल्चा दय्के ला? छगू छितः, छगू मोशायात व मेगु छगू एलियायात।” पत्रुसं व धाये थ्व धाये मसियाः अथे धाःगु खः। 34वं अथे जक छु धाये लात सुपाँय् वयाः इमित त्वपुल। सुपाँचं अथे त्वपू वःगु खनाः इपिं ग्यात।
35अले सुपाँचं थथे धकाः न्ववाना हल – “थ्व जिं ल्यया तयाम्ह जिम्ह काय् खः, थ्वयागु खँ न्यँ।”#२ पत्र १:१७-१८ #यशै ४२:१; मत्ती ३:१७; १२:१८; मर्क १:११; लूक ३:२२ 36अनंलि इमिसं अन येशू याकःचा जक खन। इमिसं थ्व खँ सुयातं मकंसे थथःगु नुगलय् तया तल।
भूत दुब्यूम्ह मचायात लाय्कादीगु
मत्ती १७:१४-१८; मर्क ९:१४-२७
37कन्हय् खुन्हु वय्कःपिं पर्वतं क्वहां झाःबलय् मनूत वय्कःयात नापलाः वल। 38हुलं छम्ह मनू चिल्लाय्दनाः हाला हल – “गुरुजु, जिमि काय्यात छकः स्वयादिसँ। जि थ्व हे छम्ह जक काय् दु। 39झाःझाः थ्वयात भूतआत्मां त्वपू वइगु, अले थ्व चिल्लाय् दनाः चत्ताः वाःवनिगु। अले म्हुतुं ई बुल्ल बुल्ल वय्काहइगु। तसकं घाःपाः मजुतले भूतं थ्वयात त्वःती हे मखु। 40जिं छिकपिनि चेलातय्त भूतआत्मायात पितिना बियादिसँ धकाः धयां इमिसं पितिनाछ्वये मफुत।”
41अले वय्कलं चेलातय्त धयादिल – “छिमिसं गथे जक विश्वास याये मफुगु? जि छिपिंनाप ग्वःन्हु हे च्वनी धकाः? जिं छिमिगु निंतिं गुलि जक दुःख सह यानाच्वनेगु?” अले वय्कलं व मनूयात धयादिल। “छिमि काय्यात थन हजि।”
42मचायात हहं हे भूतं वयात कसाः यानाः छ्वावात। अले वय्कलं भूतआत्मायात हक्कादिल। थुकथं मचायात लाय्काः वया अबुयात लःल्हानादिल। 43अन च्वंपिं फुक्क परमेश्वरयागु तःधंगु शक्ति खनाः अजू चाल।
येशूं हानं थः सीगु खँ कनादीगु
मत्ती १७:२२-२३; मर्क ९:३०-३२
वय्कलं यानादीगु ज्या खनाः मनूत अजू चाया च्वंबलय् हे वय्कलं चेलातय्त धयादिल – 44“जिगु थ्व खँ बांलाक न्यना ति। मनूया काय्यात ज्वनाः मनूतय्गु ल्हातय् लःल्हाइगु ई वइन।” 45वय्कलं अथे धयादीगु इमिसं थुइके मफुत। थुइके मफयेमा धकाः हे थ्व खँ त्वपुयातःगु खः। अय्नं इमिसं वय्कःयाके थ्व खँ न्यनेत ग्यात।
दकलय् तःधंम्ह सु?
मत्ती १८:१-५; मर्क ९:३३-३७
46चेलातय् थःपिं मध्ये सु दकलय् तःधं धकाः खँ जुल।#लूक २२:२४ 47इमिगु मनय् च्वंगु खँ सीकाः येशूं छम्ह मचायात हयाः थःगु लिक्क फ्यतुकाः 48इमित धयादिल – “सुनां जिगु नामय् थज्याःम्ह मचायात दुकाइ, वं जितः हे दुकाःगु ति ग्यनी। अथे हे सुनां जितः दुकाइ, जितः छ्वया हयादीम्हय्सित हे दुकाःगु ति ग्यनी। अय्जूगुलिं छिपिं मध्ये सु दकलय् चिधंम्ह खः, व हे दकलय् तःधंम्ह खः।”#मत्ती १०:४०; लूक १०:१६; यूह १३:२०
सु झी शत्रु मखु व झीम्ह हे मनू खः
मर्क ९:३८-४०
49यूहन्नां येशूयात धाल – “गुरुजु, जिमिसं छिगु नामं भूत ख्यानाः च्वंम्ह छम्ह मनूयात खना। जिमिसं वयात अथे याये मते धकाः धया, छाय्धाःसा व झीपिंलिसे जुयाच्वंम्ह मखु।”
50थ्व खँ न्यनाः वय्कलं वयात लिसः बियादिल – “सु झी शत्रु मखु व झीम्ह हे मनू खः, उकिं वयात पने मते।”
51स्वर्गय् वनेगु ई त्यःगुलिं येशू यरूशलेमपाखे वनेगु क्वःछिनादिल। 52वय्कलं थःपिं स्वयाः न्ह्यः हे सुं मनूतय्त छ्वयादिल। इमिसं सामरीतय्गु गामय् वनाः वय्कःपिन्त थाय्बाय् माल। 53वय्कःपिं यरूशलेमय् वनेत वःपिं धकाः स्यूगुलिं सामरीतय्सं वय्कःपिन्त बाय् मब्यू। 54थ्व खनाः याकूब व यूहन्नां वय्कःयात धाल – “प्रभु, जिमिसं स्वर्गं मि गाय्काः थुमित भस्म यानाबी ला?”#२ राज १:९-१६ 55वय्कलं इमित ब्वःबियादिल। 56अले वय्कःपिं मेगु हे गामय् झाल।
येशूया चेला जुइपिं मनूत
मत्ती ८:१९-२२
57वय्कःपिं लँय् झाया च्वंबलय् छम्ह मनुखं वयाः येशूयात थथे धाल – “गुरुजु, छि गन गन झाइ, जि नं ल्यूल्यू वये।”
58वय्कलं धयादिल – “ध्वंतय् च्वनेत प्वाः दु, झंगःतय् च्वनेत स्वँ दु, मनूया काय्या धाःसा छ्यं दिकेत नं थाय् मदु।”
59वय्कलं मेम्ह मनूयात धयादिल – “जि नाप वा।”
वं थथे धाल – “प्रभु, जितः जिमि अबुयागु सीम्ह निं थुने बियादिसँ।”
60अले वय्कलं लिसः बियादिल – “सीम्हयात सीम्हय्सिनं हे थुनी। छ वनाः परमेश्वरयागु राज्ययागु खँ न्यंकाब्यु।”
61मेम्ह मनुखं धाल – “प्रभु, जि नं छिनाप वये। छेँय् छकः वनाः छेँय् च्वंपिन्त ‘वने’ धया वये।”#१ राज १९:२०
62वय्कलं वयात धयादिल – “हलो जोतय् यायां लिफः स्वया च्वनीम्ह मनू परमेश्वरया राज्ययागु ज्या यायेत मल्वः।”
Valgt i Øjeblikket:
लूका 9: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
