लूका 22
22
यहूदां येशूयात ज्वंकेत्यंगु
मत्ती २६:१-५; मर्क १४:१-२; यूह ११:४५-५३
1सोडा मतःगु मरि नयेगु नखः न्ह्यःने थ्यंकः वल। थ्व नखःया न्हापांगु दिं छुत्काराया नखः खः।#प्रस १२:१-२७ 2तःधंपिं पुजाहारी व शास्त्रीतय् येशूयात स्यायेगु ग्वःसा ग्वःगु खः। अय्नं मनूत खनाः ग्यानाः इमिसं वय्कःयात सुलाः स्यायेगु ग्वःसा ग्वयाच्वन।
3उबलय् हे झिंनिम्ह चेलात मध्ये छम्ह यहूदा इस्करियोतयाके शैतान दुबित। 4वं तःधंपिं पुजाहारीत व देगःया सिपाइँतय् कप्तानयाथाय् वनाः येशूयात ज्वंका बी फु धकाः धाल। 5इमिसं लय्लय्तायाः वयात धिबा बी धकाः धयाहल। 6यहूदा मानय् जुल। अबलय् निसें वं मनू मदुथाय् लाकाः वय्कःयात इमिगु ल्हातय् ज्वंका छ्वयेत स्वयाच्वन।
छुत्कारायागु नखः हनादीगु
मत्ती २६:१७-२५; मर्क १४:१२-२१; यूह १३:२१-३०
7सोडा मतःगु मरि नयेगु छुत्कारायागु नखःबलय् चीधिकःम्ह भ्याःचा स्यायेगु दिं थ्यंकः वल। 8अय्जूगुलिं येशूं थथे धयाः पत्रुस व यूहन्नायात छ्वयादिल – “हुँ, छुत्काराया नखःया भ्वय् नयेत छिमिसं वनाः भ्वय् ज्वरय् या।”
9इमिसं धाल – “गन वनाः ज्वरय् यायेगु?”
10वय्कलं धयादिल – “न्यँ, शहरय् दुहां वनेवं छिमिसं घलय् लः कया वयाच्वंम्ह छम्ह मनूयात नापलाइ। छिपिं व हे मनूया ल्यूल्यू हुँ। व गन दुहां वनी, अन हे वनाः 11छिमिसं छेँ थुवाःयात धा – ‘छितः गुरुजुं थथे धयाहःगु दु – “जिमि चेलात नाप छुत्काराया नखःया भ्वय् नयेत क्वथा क्यनादिसँ हं।”’ 12अले वं छिमित बांलाकातःगु तःकूगु च्वतय् क्यने यंकी, छिमिसं अन हे ज्वरय् या।” 13अले इपिं वन। वय्कलं इमित गथे धया छ्वयादीगु खः, इमिसं अथे हे लुइकल, अले अन हे छुत्काराया नखःया भ्वय् ज्वरय् यात।
प्रभु भ्वय्
मत्ती २६:२६-३०; मर्क १४:२२-२६; १ कोर ११:२३-२५
14भ्वय् नयेत्यय्काः येशू व प्रेरितत झ्वःलाक फ्यतुनादिल। 15वय्कलं धयादिल – “दुःख सी न्ह्यः जि छिपिंनाप च्वनाः छुत्काराया नखःया भ्वय् नयेगु तसकं इच्छा जुयाच्वंगु खः। 16जिं छिमित धाये – परमेश्वरयागु राज्यय् भ्वय्यागु अर्थ पूमवंतले जिं हानं थ्व भ्वय् नये मखु।”
17अले वय्कलं ख्वला कयाः परमेश्वरयात सुभाय् बियाः धयादिल – “थ्व का, छिपिं सकसिनं इनाः त्वँ। 18जिं छिमित धाये – परमेश्वरयागु राज्य मवतले थ्व दाखमद्य त्वने मखुत।”
19वय्कलं हानं मरि कयाः परमेश्वरयात सुभाय् बियाः कुचा कुचा थलाः इमित थथे धयाः बियादिल – “थ्व मरि न। थ्व छिमित बियागु जिगु म्ह खः। आवंनिसें जितः लुमंकेत थथे यायेगु या।”
20नये धुंकाः अथे हे ख्वला कयाः वय्कलं धयादिल – “थ्व ख्वला छिमिगु निंतिं जिगु हि हाय्कागु परमेश्वरयागु न्हूगु बाचा खः।#यर ३१:३१-३४
21 “तर न्यँ, जितः ज्वंका छ्वइम्ह मनू जि नाप हे फ्यतुनाच्वंगु दु। #
भज ४१:९
22च्वया तः थें मनूया काय् ला सिनावने हे माः। अय्नं वयात ज्वंका छ्वइम्ह मनूयात तसकं धिक्कार दु।” 23अले इपिं थःथवय् थथे धकाः खँ ल्हात – “झीगु पुचलय् अथे याइम्ह मनू सु जुइ?”
सु तःधं?
मत्ती २०:२५-२८; मर्क १०:४२-४५
24इपिं मध्ये दकलय् तःधंम्ह सु जुइ धकाः चेलात कचकच हालाच्वन।#मत्ती १८:१; मर्क ९:३४; लूक ९:४६ 25अले येशूं इमित धयादिल – “थ्व संसारय् शासन याइपिन्सं मनूतय्त ल्हातय् काइ। इमि हाकिमतय्त भिंपिं मनूत धकाः धाइ। 26छिमिसं धाःसा अथे यायेदइ मखु, बरु छिपिं मध्ये सु दकलय् तःधंम्ह खः वं दकलय् चिधंम्ह जुयाः क्यनेमाः। अले छिमि नायः सु खः वं ला झन फुक्कसियां च्यः जुयाः ज्या यायेमाः।#मत्ती २०:२५-२७; मर्क १०:४२-४४#मत्ती २३:११; मर्क ९:३५ 27नयाच्वंम्ह तःधं ला कि वयात नयेगु तये हया च्वंम्ह च्यः तःधं? नयाच्वंम्ह मखु ला, तःधंम्ह? अय्नं जिं छिमित सेवा यानाच्वनागु दु।#यूह १३:१२-१५
28 “जिगु दुःखकष्टय् छिपिं जि नाप च्वनाच्वंगु दु। 29अय्जूगुलिं गथे जिमि बाःनं जितः जुजु यानादिल, जिं नं छिमित अथे हे यानाबी। 30अले छिमिसं जिगु राज्यय् जि नाप च्वनाः नयेत्वने याये खनी। अले हानं सिंहासनय् च्वनाः छिमिसं इस्राएलया झिंनिगू कुलयापिं मनूतय्त न्याय याइ।”#मत्ती १९:२८
पत्रुसं येशूयात म्हमस्यू धकाः धाइ
मत्ती २६:३१-३५; मर्क १४:२७-३१; यूह १३:३६-३८
31 “सिमोन, सिमोन न्यँ, शैतानं छिमित छ्व हाये थें हायेत उजं काये धुंकल। 32अय्नं छंगु विश्वास बमलाना मवनेमा धकाः जिं प्रार्थना यानागु दु। जिथाय् हानं लिहां वये धुंकाः छं थः दाजुकिजापिन्त बल्लाकि।”
33अले वं येशूयात धाल – “प्रभु, झ्यालखानाय् वनेमाःसां, सी हे माःसां जिं छितः त्वःते मखु।”
34वय्कलं धयादिल – “पत्रुस, जिं छन्त धाये – थौं खा हाले न्ह्यः छं जितः स्वकः तक म्हमस्यू धकाः धाइ।”
तरवार, धिबा व म्हिचा
35येशूं चेलातय्त धयादिल – “जिं छिमित धिबा, म्हिचा व लाकां मब्यूसे छ्वयाबलय् छिमित माःगु तरय् जू ला कि मजू?”
इमिसं धाल – “जू।”#मत्ती १०:९-१०; मर्क ६:८-९; लूक ९:३; १०:४
36वय्कलं हानं धयादिल – “आः धाःसा सुयाके धिबा दु, वं व धिबा तयाति, अथे हे म्हिचा नं कयाः ति। अले सुयाके तरवार मदु वं थःगु कोट मिया जूसां तरवार न्या। 37‘वय्कःयात दाखुँतय् ल्याखय् तइ’ धकाः जिगु बारे धर्मशास्त्रय् च्वयातःगु खँ पूवने हे माः। छाय्धाःसा जिगु बारे च्वयातःगु खँ पूवनाच्वंगु दु।”#यशै ५३:१२
38इमिसं धाल – “स्वयादिसँ प्रभु, जिमिके निपु तरवार दु।”
वय्कलं धयादिल – “थुलि दुसा गाः।”
येशूं प्रार्थना यानादीगु
मत्ती २६:३६-४६; मर्क १४:३२-४२
39येशू अनं पिहां झायाः वय्कःयागु बानी दु थें जैतून डाँडाय् थाहां झायादिल। चेलात नं वय्कः नाप ल्यूल्यू वन। 40अन थ्यने धुंकाः वय्कलं इमित धयादिल – “प्रार्थना याना च्वँ, मखुसा छिपिं जाँचय् लाइ।”
41अले वय्कः इमिथासं भचा उज्यां वनाः पुलिं चुयाः प्रार्थना यानादिल। 42“बाः, ज्यूसा थ्व ख्वला जिथासं चीकादिसँ। अय्नं जितः यःथें यानादी मते, छितः यःथें हे यानादिसँ।” 43उबलय् स्वर्गं छम्ह स्वर्गदूतं वयाः वय्कःयात लिधंसा बियाच्वन। 44अले नुगलय् तसकं हीसे च्वनाः नुगः हे ह्वगनि थें च्वंगुलिं वय्कलं झन तसकं मन बियाः प्रार्थना यानादिल। वय्कःयागु चःति हि थें ततःफुति जुयाः बँय् तिकि ननाच्वन।
45प्रार्थना यानादी धुंकाः वय्कः दनाः चेलात दुथाय् झाःबलय् इपिं नुगः मछिंकाः मस्तं द्यनाच्वंगु खनादिल। 46अले वय्कलं धयादिल – “छिपिं छाय् द्यनाच्वनागु? दनाः प्रार्थना या। अले जक दुःखकष्ट जू वःसां छिपिं बल्लाना च्वने फइ।”
येशूयात ज्वंगु
मत्ती २६:४७-५६; मर्क १४:४३-५०; यूह १८:३-११
47वय्कलं नवाना च्वनादीबलय् हे अन छगू हुल मनूत वल। झिंनिम्ह चेलात मध्ये यहूदा धाःम्ह चेला इमिगु न्ह्यः न्ह्यः दु। यहूदां वयाः वय्कःयात चुप्पा नल। 48अले वय्कलं वयात धयादिल – “हे यहूदा, मनूया काय्यात छु छं चुप्पा नयाः ज्वंकेगु ला?”
49चेलातय्सं अन छु जुइत्यंगु खः धकाः सीकाः थथे धाल – “प्रभु, जिमिसं तरवारं पालाबी ला?” 50छम्ह चेलां दकलय् तःधंम्ह पुजाहारीया दासयागु जव न्हाय्पं ध्यनाबिल।
51तर वय्कलं धयादिल – “गात, त्वःताब्यु।” अले वय्कलं वयागु न्हाय्पं थियाः लाय्कादिल।
52अले ज्वंवःपिं तःधंपिं पुजाहारीतय्त, देगःया सिपाइँतय् कप्तानतय्त व थकालिपिन्त धयादिल – “जि छम्हय्सित ज्वनेत थथे तरवार व कथि ज्वनावये माःगु छाय्? छु जि दाखुँ खः ला? 53न्हियान्हिथं छिकपिं नाप देगलय् दुबलय् धाःसा छिकपिन्सं जितः मज्वं। तर थ्व छिकपिनिगु ई खः, अले खिउँया शक्तियागु राज्य खः।”#लूक १९:४७; २१:३७
पत्रुसं येशूयात म्हमस्यू धाःगु
मत्ती २६:५७-५८,६९-७५; मर्क १४:५३-५४,६६-७२; यूह १८:१२-१८,२५-२७
54अले इमिसं येशूयात ज्वनाः दकलय् तःधंम्ह पुजाहारीयागु छेँय् हल। पत्रुस धाःसा तापाकं ल्यूल्यू वनाच्वन। 55अबलय् अन मनूत चुकय् दथुइ मि छ्वय्काः पनाच्वन। पत्रुस नं वनाः इपिं नाप च्वन। 56छम्ह भ्वातिं नं मियागु जलय् वयात खनाः क्वथीक स्वयाः धाल – “थ्व मनू नं व नाप जुइम्ह खः।”
57वं मखु धकाः थथे धाल – “वय्कःयात जिं म्हमस्यू।”
58भचा जाय्काः मेम्ह मनुखं खनाः वयात धाल – “छ नं इपिं नाप जुयाच्वंम्ह खः।”
वं हानं धाल – “जि मखु।”
59अले घौछिति जाय्काः मेम्हय्सिनं थथे धाल – “थ्व मनू येशू नाप जुइम्ह खः, छाय्धाःसा थ्व नं छम्ह गालीली खः।”
60वं हानं धाल – “छिं धयादीगु खँ जिं मस्यू।” वं अथे धयाच्वंबलय् हे खा हाला हाल।
61अले प्रभुं लिफः स्वयाः पत्रुसयात स्वयादिल। वं प्रभुं धयादीगु खँ लुमंकल – “थौं खा हाले न्ह्यः छं जितः स्वकः तक म्हमस्यू धकाः धाइ।” 62अले व अन चुकं पिने वनाः ह्वाँय्ह्वाँय् ख्वल।
येशूयात गिजय् यानाः दाःगु
मत्ती २६:६७-६८; मर्क १४:६५
63पाः च्वनाच्वंपिं मनूतय्सं येशूयात गिजय् यानाः दाल। 64इमिसं वय्कःयागु मिखाय् चिनाः “का धा सा, छन्त दाःम्ह सु खः?” धकाः धाल। 65उकथं हे वय्कःयात बेइज्जत यानाः यःयःथें धाल।
सभाया न्ह्यःने येशू
मत्ती २६:५७-६६; मर्क १४:५५-६५; यूह १८:१९-२४
66सुथय् थकालिपिं, तःधंपिं पुजाहारीत व शास्त्रीत फुक्कं मुन। अले इमिसं येशूयात सभाय् थनाः थथे धाल – 67“छ मुक्ति बीम्ह ख्रीष्ट खः धयागु जूसा जिमित धा।”
वय्कलं धयादिल – “जिं धाःसां छिकपिन्सं विश्वास यानादी मखु। 68अले जिं छुं न्यंसां छिकपिन्सं लिसः बियादी मखु। 69आवंनिसें मनूया काय् शक्ति दुम्ह परमेश्वरयागु जव ल्हाःपाखे च्वनी।”
70अले इपिं फुक्कसिनं धाल – “अय्सा छ परमेश्वरया काय् खः ला?”
वय्कलं धयादिल – “खः धकाः ला छिकपिन्सं हे धयादिल नि।”
71अले इमिसं धाल – “थुलिं अप्वः मेगु साक्षी हे म्वाःल। वयागु हे म्हुतुं झीसं न्यनेधुन।”
Valgt i Øjeblikket:
लूका 22: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
