लूका 2
2
येशू बूगु
मत्ती १:१८-२५
1अबलय् लाक्क रोमी महाराजा कैसर अगस्टसं संसारय् न्यंक जनगणना का धकाः उजं बिल। 2सिरियाय् कुरेनियस धाःम्ह बडा-हाकिम जुयाच्वंबलय् न्हापां जनगणना काःगु थ्व हे खः। 3अय्जूगुलिं फुक्क मनूत इमि थथःगु गामय् व शहरय् वनाः नां च्वकः वन। 4योसेफ जुजु दाऊदया सन्तान जूगुलिं नासरत शहरं जुजु दाऊद बूगु बेथलेहेम गामय् वन। 5वं थःलिसे ब्याहा यायेत क्वःछिना तये धुंकूम्ह मरियमयात नं ब्वनायंकल। वया प्वाथय् दु।
6इपिं अन दुबलय् हे वयात मचाबुइगु ब्यथा जुल। 7वं दकलय् न्हापांम्ह काय् बुइकल। च्वनेत गनं हे थाय् मदुगुलिं इमिसं मचायात इचां भुनाः फैतय्त नकिगु थलय् थ्यनातल।
फैजवाःत व स्वर्गदूतत
8चान्हय् अनं लिक्क लाःगु ख्यलय् फैजवाःत फैचात पिवाः च्वनाच्वन। 9अबलय् हे प्रभुया छम्ह दूत इमिथाय् खनेदय्कः वल। प्रभुयागु जः अन छचाःखेलं न्यन। इपिं फुक्कं ग्यानाः थरथर खात। 10अले स्वर्गदूतं इमित धाल – “ग्याये म्वाः। जिगु खँ न्यँ, जि छिमित लसतायागु छगू तःधंगु भिंगु खँ कं वयागु खः। थ्व भिंगु खँ फुक्क मनूतय्त खः। 11जुजु दाऊद बूगु गामय् छिमि छम्ह मुक्तिदाता नकतिनि हे बूगु दु। वय्कः हे ख्रीष्ट प्रभु खः। 12मचायात म्हसीकेगु चिं थ्व खः – वय्कःयात इचां भुनाः फैतय्त नकिगु थलय् थ्यनातःगु दु।”
13अबलय् लाक्क हे छक्कलं मेपिं स्वर्गदूततय्गु छपुचः खनेदत। इपिं फुक्कसिनं थथे धकाः म्ये हालाः परमेश्वरयागु जयजय यात –
14“स्वर्गय् च्वनादीम्ह परमेश्वर
तःधं जुइमा।
अले परमेश्वरयात यःपिं मनूतय्त पृथ्वीइ च्वनाच्वंसां
शान्ति दयेमा।”
15स्वर्गदूतत अनं स्वर्गय् वने धुंकाः फैजवाःतय्सं थथे खँ ल्हात – “नु, झी बेथलेहेमय् वनाः प्रभुं धयादीगु खँ स्वये।”
16अले इपिं हथाय् पथासं वन। अन इमिसं मरियम, योसेफ व फैतय्त नकिगु थलय् थ्यनातःम्ह मचायात खन। 17थ्व खनाः इमिसं स्वर्गदूतं कंगु खँ मचाया मां बौयात कन। 18फैजवाःतय्गु खँ न्यनाः फुक्कं अजू चाल। 19मरियमं धाःसा थ्व खँ मनं मनं बिचाः यानाः नुगलय्सं तया तल। 20स्वर्गदूततय्सं धाःथें स्वये व न्यने दुगुलिं फैजवाःत परमेश्वरयात जयजय यानाः लय्तातां लिहां वन।
येशूयात यरूशलेमयागु देगलय् छाये यंकूगु
21बूगु च्यान्हु दय्काः मचायागु म्हय् चिं तय्कल। अले वय्कःयागु नां येशू तल। थ्व नां प्वाथय् दये न्ह्यः हे स्वर्गदूतं तःगु खः।#लेवी १२:३; लूक १:३१
22मोशां च्वया तः थें बूगु पिइन्हु दय्काः मचाबू ब्यंके त्यःबलय् इमिसं वय्कःयात छायेत यरूशलेमयागु देगलय् यंकल।#लेवी १२:६-८ 23दकलय् न्हापालाक बूम्ह काय्मचा परमप्रभुया निंतिं पवित्र जुइ धकाः व्यवस्थाय् च्वयातःगु दु।#प्रस १३:२,१२ 24मचाबू ब्यंकीबलय् छज्वः सुकुभत्तु जूसां निम्ह मचापिं बखुंचात जूसां बलि बियाः परमप्रभुयात छायेमाः धकाः परमप्रभुयागु सफुलिइ च्वया तः थें इमिसं नं छाये यन।
25अबलय् यरूशलेमय् शिमियोन धाःम्ह छम्ह मनू दु। थ्व मनू तसकं धर्मीम्ह व परमेश्वरया भक्त खः। व इस्राएलीतय्गु उद्धार जुइगु दिं स्वयेत पियाच्वंम्ह खः। पवित्र आत्मा वयाके च्वनादीगु दु। 26अय्जूगुलिं परमेश्वरं बी धकाः धयातःम्ह मुक्ति बीम्ह ख्रीष्ट झाया मदितले छ सी मखुनि धकाः पवित्र आत्मां वयात धयातःगु दु। 27पवित्र आत्मां वयात देगलय् यन। अबलय् हे मचा येशूयात वया मांबौपिन्सं व्यवस्थाय् च्वया तः थें यायेत देगलय् हल। 28शिमियोनं मचायात बुयाः परमेश्वरयात सुभाय् बियाः थथे धाल –
29“परमप्रभु, छिं धयादीगु थ्व हे खँ
थौं जिगु मिखां स्वयेदत।
आः जि याउँक सिना वंसां जिल।
30जिं थःगु हे मिखां थौं छिं संसारय् च्वंपिन्त बियादीम्ह
मुक्तिदातायात खने धुन।
31छिं फुक्क मनूतय्गु निंतिं थथे
यानादीगु खः।
32यहूदीमखुपिन्त नं लँ क्यनीम्ह
वय्कः मुक्तिदाता व जः खः।
उकिं वय्कः मुक्तिदाता झायादीगुलिं
मनूतय्सं झी इस्राएलीतय्त तःधंकी।”#यशै ४२:६; ४९:६; ५२:१०
33शिमियोनं थुकथं मचायागु खँ धाःगुलिं मचाया मांबौ छक्क जुल। 34अले शिमियोनं इमित आशिष बियाः मचाया मांयात थथे धाल – “इस्राएलय् च्वंपिं यक्व मनूतय्त भिंकेत नं स्यंकेत नं परमेश्वरं ल्ययादीम्ह मचा थ्व हे खः। थ्व मचा परमेश्वरयागु चिं जूगुलिं यक्वसिनं थ्वयागु विरोध याइ। 35थुकिं यक्व मनूतय्गु नुगःया बिचाः पिहां वइ। अले च्वामुगु तरवारं थें दुःखं छंगु नुगलय् झ्वाबी।”
36अबलय् अन हन्ना धाःम्ह अगमवादिनी मिसा छम्ह दु। व आशेर कुलयाम्ह फनुएल धाःम्ह मनूया म्ह्याय् खः। ब्याहा यानाः वया भाःतनाप न्हय्दँ तक जक ह्वने खन। आः ला व बुरी जुइ धुंकल। 37व चयप्यदँ दुबलय् तक भाःत मदय्कः हे च्वन। वं यक्व हे अपसं च्वनाः प्रार्थना यानाः परमेश्वरया सेवा यानाच्वंगु दु। 38मचा येशू देगलय् दनिबलय् हे हन्नां नापलाः वयाः परमेश्वरयात सुभाय् बिल। अले यरूशलेमय् च्वंपिनिगु उद्धार जुइतिनि धकाः पिया च्वंपिन्त व मचायागु खँ कन।
नासरतय् लिहां वःगु
39व्यवस्थाय् च्वया तः थें फुक्कं याये सिधय्काः योसेफ व मरियम गालीलय् लाःगु थःगु हे गां नासरतय् लिहां वल।#मत्ती २:२३ 40मचा तःधिकः जुयावल। बुद्धिं नं जायावल, अले परमेश्वरं नं वय्कःयात आशिष बियादीगु दु।
मचा येशू देगलय् त्वःफ्यूगु
41येशूया मांबौ दँय्दसं यरूशलेमय् छुत्काराया नखः हनेत वं।#प्रस १२:१-२७; व्य १६:१-८ 42वय्कः झिंनिदँ दुबलय् नं इपिं नखः मानय् यायेत यरूशलेमय् वन। 43नखः सिधय्काः इपिं छेँ लिहां वन। मचाम्ह येशू जक यरूशलेमय् तुं च्वन। वय्कःया मांबौपिन्सं थ्व खँ मस्यू। 44वय्कः पासापिंनापं वयाच्वंगु दइ धकाः इपिं न्हिच्छि वनाच्वन। बहनी थःथितिपिं व पासापिनिगु पुचलय् वय्कःयात माला स्वत।
45वय्कःयात लुइके मफुगुलिं इपिं हानं यरूशलेमय् तुं माः वन। 46स्वन्हु दय्काः इमिसं वय्कःयात देगलय् गुरुपिंनापं फ्यतुनाः इमिगु खँ न्यँन्यं, न्ह्यसः यानाच्वंगु खन। 47अन च्वंपिं फुक्क वय्कःयागु बुद्धि व लिसः न्यनाः छक्क जुयाच्वन।
48थुकथं वय्कःयात अन खनाः मांबौपिं निम्हं छक्क जुल। अले मांम्हं थथे धाल – “पुता, छं छाय् थथे यानागु? छं बाः व जिं छन्त गुलि माले धुन। जिमि ला म्हय् जिउ हे मन्त का।”
49अले वय्कलं धयादिल – “छिकपिन्सं जितः माला मदीसां ज्यूगु खः नि। जि जिम्ह बाःयागु छेँय् च्वनेमाः धकाः छिकपिन्सं मस्यू ला?” 50वय्कलं धयादीगु खँ इमिसं मथुल।
51अथेसां वय्कः इपिं नाप तुं नासरतय् लिहां झाल। अन वय्कः मांबौनं धाःथें च्वनादिल। वय्कःया मामं थ्व खँ मनय्सं तयातल।
52वय्कः मनूतय्गु व परमेश्वरयागु दया मायां झन झन तःधिकः जुयाः बुद्धिं जायावल।#१ शमू २:२६; हितो ३:४
Valgt i Øjeblikket:
लूका 2: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
