उत्पत्ति 7
7
1अले परमप्रभुं नोआयात धयादिल, “छ व छिमि परिवार फुक्क जहाजय् च्वंहुँ। छाय्धाःसा जिं थ्व पुस्ताय् छ हे छम्ह जक धर्मीम्ह मनू खना। 2शुद्धपिं फुक्क पशु भाले-पोथी यानाः न्हय्ज्वः न्हय्ज्वः व अशुद्धपिं पशु छज्वः छज्वः जक यंकि। 3अथे हे फुक्क जातयापिं झंगः नं भाले-पोथी यानाः न्हय्ज्वः न्हय्ज्वः यंकि। थुकथं फुक्क जातयापिं झंगःयात पृथ्वीइ ल्यंकातयेत थुमित म्वाकातयेमाः। 4थनिं न्हय्न्हु लिपा जिं पृथ्वीइ वा वय्के। थ्व वा पिइन्हु व पिइचा तक वइ। जिं दय्कापिं फुक्क प्राणीतय्त पृथ्वीं न्हंकाछ्वये।”
5नोआं परमप्रभुं धाःथें फुक्कं यात।
6पृथ्वीइ खुसिबाः वःबलय् नोआ ६०० दँ दुम्ह खः। 7नोआ, वया कलाः, काय्पिं व भौपिं लखं बचय् जुइत जहाजय् दुहां वन। 8शुद्धपिं व अशुद्धपिं पशु, झंगः, बँय् घिसय् जुयाजुइपिं फुक्कं 9परमेश्वरं धाःथें भाले-पोथी यानाः छज्वः छज्वः नोआलिसें जहाजय् वन। 10न्हय्न्हु दुखुन्हु वा वल।
11पृथ्वीया तःलय् च्वंगु लःया फुक्क धाः बँ तछ्यानाः पिहां वःबलय् नोआ ६०० दँ क्यनाच्वंगु खः। आकाशया लुखात चालावन, 12अले पिइन्हु व पिइचा तक पृथ्वीइ वा वयाच्वन। थ्व फुक्क उगु दँया निगूगु लाया झिंन्हय्न्हुखुन्हुनिसें शुरु जूगु खः।
13उखुन्हु हे नोआ व वया कलाः स्वम्ह काय्पिं शेम, हाम व येपेत व इमि कलाःपिन्त ज्वनाः जहाजय् दुहां वन। 14इपिं लिसें फुक्क जातयापिं पशु, लहीपिं व जंगली फुक्क जातयापिं पशु, पृथ्वीइ घिसय् जुयाजुइपिं प्राणीत व फुक्क जातयापिं झंगः पंक्षी नं दुहां वन। 15सासः ल्हाइपिं फुक्क प्राणीत भाले-पोथी यानाः जहाजय् नोआयाथाय् वल। 16परमेश्वरं नोआयात धयादीथेंयापिं फुक्क प्राणी भाले-पोथी यानाः जहाजय् दुहां वल। अले परमप्रभुं जहाजया खापा तिनादिल।
17पिइन्हु तक वा व खुसिबाः वयाच्वन। अले लः तजाः जुयाः जहाजयात च्वय् च्वय् छ्वल। 18लः तसकं तजाः जुयाः जहाज ल्यहें ल्यहें पुल। 19पृथ्वी स्वयां च्वय् च्वय् थ्यंक लः तजाः जुल, अले ततःजाःगु पहाडत नापं त्वपुल। 20लः तजाः जुयाः पहाडत स्वयाः झिंन्याकु च्वय् थ्यंक थाहां वन। 21पृथ्वीइ च्वंपिं झंगः, छेँय् लहीपिं, जंगलय् च्वनीपिं, बँय् घिसय् जुयाजुइपिं पशु व मनूत, फुक्क प्राणी सित। 22पृथ्वीइ च्वंपिं सासः ल्हाइपिं फुक्क प्राणी सित। 23परमप्रभुं पृथ्वीइ च्वंपिं फुक्क मनू, छेँय् लहीपिं, बँय् घिसय् जुयाजुइपिं प्राणीत व फुक्क झंगःपंक्षी न्हंकादिल। नोआ व नोआलिसे जहाजय् दुपिं प्राणीत जक ल्यन। 24पृथ्वी सच्छि व नेय्न्हु तक लखं जायाच्वन।
Valgt i Øjeblikket:
उत्पत्ति 7: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.