Wambeela 3
3
Othega wowambeela
1Wewule wahikala nyowa, ela yaali yooxaga waakwaranya aneenyama aatene a mukokolani, alene Nabwiya Mulugu yaapaddusiliiye. Yahimukohaga mwihiyana, wiira: <<Mulugu ohuwoga wi kamujege dhoovaha dha mithanko dhaatedhene dha mmuddani mu?>>#3.1 Sathana ahiiwariha mwiili wa nyowa wi awoge ni mwihiyana. Oliye di mmohi mwa angero yasasanyiwe ni Mulugu wi emulabege. Mbwenye oliye ahivaanya omwiiwelela Mulugu vano ahivokedhiwa elabo ya vati. Moone Ovuhulela 12.4-12. Vano Sathana onowaweeha athu aatene wi ehimwiiwelelege Mulugu teto. Oliye ahimuleketha Eva vano ononilekethave nlabo ni nlabo. Moone AEfeso 2.2. 2Mwihiyana ahaakulaga, wiira: <<Nnorumeedhihiwa oja dhoovaha dha mithanko dha mmuddani. 3Mbwenye Mulugu ohuwoga wi nihijege dhoovaha dha muthanko oli vaari va mudda. Nahiddave yoovahaya nnokwa>>.
4Nyowa yahimwaakulaga, wiira: <<Naari! Nyo kamunakwa. 5Sowi Mulugu ohunona wi mwajave dhoovaha dhiwa, meento eenyu enadha efuguwe, vano munonege yootakala ni yapama wona Mulugu>>.
6Mwihiyana ahoonaga wi yoovaha ya muthanko ole yaali yoodhiva ni yapama vowoona, ni yoofuneya yoodhiiha tthottho. Ahithukulaga, oja; omvahawo mamune, oja. 7Mudhidhi olene, meento eewa yahifuguwaga, wambeela woona wi yaali madave. Yahaagumanihaga mataakuru anamutaambwi wi yaande wiikuneelana.
8Vevale nduwa nigarugunuwe,#3.8 Nduwa nigarugunuwe Mu ewogelo ya eHeberi wora ya pevo ya nlabo. Nabwiya Mulugu eddeeddaga mmuddani, veewiligiiwa mulobwana ni mwihiyanaaye, yahithawaga odhowa wiipita mmithankoni dhaali mmuddani mule. 9Nabwiya Mulugu ahimwiithanaga mulobwana, omukoha, wiira: <<Oli wuuvi?>>#3.9 Oli wuuvi? Yookoha ela kinatapulela wihina Mulugu kaanonilege waali Adamu.
10Mulobwana ahaakulaga, wiira: <<Giiwile ndhu mweeddaga mmuddani; gowoova, gihithawa wiipita vowi gili madave>>.
11 Nabwiya Mulugu ahimukohaga, wiira: <<Wuwaaddele wi oli madave baani? Ohuja yoovaha ya muthanko ole gowaaddeliimi wi kuje?>>
12Mulobwana ahaakulaga, wiira: <<Mwihiyana ola mugivahiliinyu wi akalege ni miyo, digivahile yoovaha ya muthanko ole, gija>>.
13 Nabwiya Mulugu ahimukohaga mwihiyana, wiira: <<Wiirile ddi?>> Mwihiyana ahaakulaga, wiira: <<Nyowa siginyengethe, gija>>.#3.12-13 Adamu ahikoodda orumeedhela yoothega yaaye, amwiinkedhaga mwihiyanaaye wi deerilena, vano mwihiyana ahiinkedha nyowa. Malabo a peeno nnowiirana emohive: neerana yoothega nnawiinkedha amohi yoothega yeehu. Soorusa orumeedhela dhoothega. Mudhidhi waatene nnosayela okoodda kuulupa ya dhowiira dheehu dhabure.
14Vevale Nabwiya Mulugu ahiiraga:
<<We nyowa, mwaha wa ela yiiriliiwe:
Wa aneenyama aatene,
oofuwiwa ni a mukokolani, ohuulumeleleya.
Oneeddege mowiiburula,
onaajege theya egumi yaawo yaatene.
15Weevo ni mwihiyana ginoodha guwiiddaniheni,
anamabaliwelamo aawo ni anamabaliwelamo aaye;
mwihima a mwihiyana onoodha ooporose muru,
vano weevo onoodha omporose epothokoro>>.#3.15 Mwihima a mwihiyana onoodha ooporose muru. Mulugu onororomeliha wi namabaliwelamo mmohi a Eva eere omugonjiha Sathana. Yesu Kirixtu daali namabaliwelamoya. Vavenyihiwiiye muukwani ahimugonjiha Sathana. Kanimoovegeni, niroromelege kopolo dha Yesu.
16Mulugu ahiwogaga wa mwihiyana, wiira:
<<Ginoodha geenjedhedhe goyi warubalela,
vano nlabo noobala naawo, oneerege woona ovoreya.
Oneerege ofuna omulamula mamuno,
mbwenye oliye dineere oolamulelege>>.#3.16 Oneerege…oolamulelege Naari wi: Onamfunesege mamuno, mbwenye oliye oneerege wuulamula.
17Vano wa Adamu wiira:
<<Vowi ohumwiiwelela mwihiyanaawo,
oja yoovaha eyene galamuleliimi wi kuje:
Theya ehuulumeleleya mwaha wa we.
Oneerege woona goyi wafunaga okalana dhooja
egumi yaawo yaatene.
18Theya enaavahege miinga ni marula,
weevo onaajege dhoovaha dha mmiddani.
19Egumi yaawo yaatene wafunaga oja,
oneerege okuma nikurumela
ofiyedha owelela otheyani,
vowi mwa theya poobiwiiwe.
Ebaribareene weevo oli nthubi,
onoodha owelele okale nthubi>>.
20Vano mulobwana ahimuthwa mwihiyanaaye ndina na Eva#3.20 Eva enatapulela egumi. vowi ola daakale mma a athu aatene. 21Veva Nabwiya Mulugu ahaasasanyedhela guwo dha makupa a aneenyama, waawariha Adamu ni mwihiyanaaye.
22Ndala, Nabwiya Mulugu ahiiraga: <<Muthu ola onakala wona hiyo, ononona yapama ni yootakala. Onafuna odhowa ohapa dhoovaha dha muthanko wa egumi ole wi aje akalena egumi okala ni okala!>> 23Mwa ela Nabwiya Mulugu ahimvenyihamo muthu mmuddani wa Eddeni wi alimege theya vevo vakumiliiye. 24Nabwiya agamwiigarile muthu, ahihela dhoopaddusiwa dha odhulu dha mompelo#3.24 Dhoopaddusiwa dha odhulu dha mompelo mu ewogelo ya eHeberi enatapulela akeerubi. Dhaali musawo wa angero. epaddi ya wewo onakuma nduwa wa mudda ole Eddeni wi yang'anelege dila enaya omuthankoni wa egumi. Ahihelavo supaadda na munddo naapeelela vevale.
Valgt i Øjeblikket:
Wambeela 3: tke
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.