Hechos 3
3
Myakna dub xa lá yoo gan isea
1Leꞌa dub wizh leꞌa Pedr nsea Juan nchaꞌa sa nde niꞌi ten Dios pa gor nkea uyon uzhe, gor na ndaꞌyadiꞌizhno be men Dios. 2Leꞌa sa wa nsob dub xabgiꞌi lá yoo gan isea zha ngolta xa. Itea wizh ndaꞌulaꞌa be ltsaꞌa xa xa dub sa nyote be men len tale ten niꞌi ten Dios, sa nsaleaꞌ Puert Chul, ndontsa inab xa med ndoꞌ be men. 3Leꞌa gor na uniꞌí xa Pedr no Juan nchaꞌyote sa wa, cha unab xa dub med ndoꞌ bexa. 4Weꞌe leꞌa Pedr no Juan mwiꞌi ndoꞌ xa, cha ndab Pedr:
—Bwiꞌi ndoꞌ besa.
5Leꞌa xa wa list usob, ndanbeꞌe xa gol ncho xtaꞌan usaꞌa bexa wa ndoꞌ xa. 6Ná leꞌa Pedr cha ndab:
—Leꞌa naꞌ lá nsén med plata ni med oro, parea leꞌa ta ndap naꞌ usa naꞌ ndoꞌ lu. Leꞌa juers ten leaꞌ Jesucristo xa Nazaret, leꞌa naꞌ gáp ndoꞌ lu gosoꞌ, cha usea.
7Weꞌe leꞌa Pedr cha usen yaꞌa xa lad gaꞌal, cha uxisoꞌ Pedr xa. Bi leꞌa gor wa leꞌa be xoꞌo xa no be gendats xa cha mgeasoꞌbe. 8Leꞌa xabgiꞌi wa cha uxax ngwasoꞌ gaꞌal, cha utsinla nsea xa. Cha no xa uyoꞌono bexa wa tale ten niꞌi ten Dios, nkesea xa no ndasagaꞌal xa, ndab xa leꞌa Dios uzheꞌeb dub Dios juert. 9Leꞌa itea be men uniꞌí nsea xa, no nsaꞌa xa xno ndoꞌ Dios. 10Weꞌe mgondoꞌ bexa leꞌa xa wa leꞌa xa li usob nab med toꞌo Puert Chul ten niꞌi ten Dios, cha uzheꞌeb ngwanseana bexa ta na li myakna xa wa.
Pedr mbidiꞌizh sa nsaleaꞌ Corredor Salomón
11Leꞌa xa li myakna wa lá nlaꞌapa Pedr no Juan. Weꞌe leꞌa itea be men na ndanseana cha utoꞌo karrel gast sa nsoꞌ Pedr no Juan sa nsaleaꞌ Corredor Salomón. 12Leꞌa gor uniꞌí Pedr ta wa, cha ndab xa ndoꞌ be men:
—Bego xa Israel, ¿xtaꞌan ndanseana bega ta ndee zha? ¿No xtaꞌan nwiꞌi bega ndoꞌ besa ndanbeꞌe bega juers ten besa myakna xa ndee zha? 13Leꞌa Dios ten Abraham no Isaac no Jacob, xa na leꞌa nak Dios ten iteata be usan gox polta ten beuna, leꞌa xa wa leꞌa mbin mas gaꞌap ngobsoꞌ xin xa Jesús. Leꞌa Jesús wa xa na li myun bega cuent ndoꞌ yaꞌa bexa naktiꞌin, cha gor na ndiꞌizh ulaꞌa Pilat xa leꞌa bega lá kaꞌab. 14Leꞌa Jesús nak xa na mti Dios no sbeꞌen be ta nlad Dios ndun xa. Parea leꞌa bega mxee ladna xa, cha ndi unab bega ulaꞌa Pilat dub xa ndut men. 15Leꞌa bego mbit xa nsaꞌa gealnaban ndoꞌ be men, ná leꞌa Dios mxiste xa ndoꞌ gealgut lak uniꞌí besa‑yá. 16Leꞌa xabgiꞌi ndee ngeꞌ ladna juers ten leaꞌ Jesús wa, ta weꞌe myakna xa. Leꞌa ta na ngeꞌ ladna xa Jesús leꞌa mbin gan dubtsa neꞌeka myakna xa ndoꞌ gaꞌal itea bego.
17’Bego nak beuna xa Israel, leꞌa bego no bexa nibeꞌe ten bega mbit Jesús, parea leꞌa naꞌ uní leꞌa bega ni lá iniꞌí ton xa wa. 18Ná leꞌa Dios li mlaꞌa mbin bega lak ndab bexa mbidiꞌizh sakndoꞌ Dios tiemp polta, ndab bexa leꞌa Cristo nsabndoꞌ iniꞌí sian gealkweaꞌ. 19Nat blaꞌa bega be ta ugap nak bega, cha byach bega wats Dios, ndontsa utsuꞌu xa be ke ten bega. Weꞌe yoo xa wats bega gakno xa bega, 20no utuꞌubgal xa Jesucristo ndoꞌ bega lak ndabka Dios. 21Nat leꞌa Jesús nsabndoꞌka ncho gibeꞌa, gast gal gor na utechaꞌaw Dios itea be taꞌa ndoꞌ gizhliyo, lakka mbidiꞌizh bexa sakndoꞌ Dios tiemp polta. 22Lak ndab Moisés ndoꞌ be usan gox polta ten beuna: “Leꞌa Dios Xa Nibeꞌe ten beuna uti dub xa gudiꞌizh diꞌizh ten xa lat be ltsaꞌa bega, lak mti xa naꞌ. Blaꞌach bego itea ta gab xa wa ndoꞌ bega. 23Leꞌa tal ton lá ulaꞌach ta gab xa wa, leꞌa bexa wa yá naꞌantapa gak xmen Dios.”
24’Leꞌa Samuel no iteata bexa mbidiꞌizh sakndoꞌ Dios tsoꞌo wa, mbidiꞌizh bexa cuent ten be ta ncho be wizh nat ndee wa. 25Leꞌa ta ndab bexa polta usaꞌa Dios wa, leꞌa ta wa nsaꞌa Dios ndoꞌ bega nat. No usaꞌa Dios ndoꞌ bega lak ndab Dios gor na mbin Dios dub trat no be usan gox polta ten beuna, ndab Dios ndoꞌ Abraham: “Leꞌa naꞌ guntiꞌin dub xa ras ten lu, ndontsa wen yoo be men itea be nacion nde ndoꞌ gizhliyo.” 26Leꞌa gor na mxiste Dios xin na ndoꞌ gealgut, leꞌa Dios mtuꞌub xa ned lak ndoꞌ beuna xa Israel, ndontsa gakno xa beuna no ulaꞌa beuna be ta ugap nak beuna.
Valgt i Øjeblikket:
Hechos 3: zpt
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.