Hechos 2
2
Xteꞌe ulen Espíritu ten Dios
1Ngol wizh Pentecostés dub ujest ten bexa judio, leꞌa itea be xmen Jesús mzhealbe len dub niꞌi. 2Ngol gor mbiꞌín bexa dub ruid ulen gibeꞌa cuent dub mbi siꞌil, cha uyoꞌo‑yá idub len niꞌi sa ndebe bexa. 3Weꞌe cha mlundoꞌ ta cuent bealꞌ, ulaꞌ‑yá gek kadga dub bexa. 4Cha uyoꞌo Espíritu ten Dios len ladoꞌo bexa. Cha usaxan bexa ndadiꞌizh bexa stubga diꞌizh, laktsa msaꞌa Espíritu ten Dios níꞌi bexa‑yá.
5Leꞌa zha wa leꞌa Jerusalén ndencho kwaꞌad bexa judio ndankea Dios, bexa ulen itea lad ndoꞌ gizhliyo. 6Leꞌa gor na mgen ruid siꞌil wa, cha mzhealbe kwaꞌadpa bexa sa wa. Ni lá iniꞌí bexa xteꞌe gun bexa gor na ndoꞌón bexa leꞌa bexa nde len niꞌi wa ndadiꞌizh be diꞌizh ten kadga dub be men wa. 7Ngwatenaꞌ bexa no ngwanseana bexa, ndab bexa ndoꞌ ltsaꞌa xa:
—Bwiꞌi bego, ¿naꞌanpa bexa Galilea itea bexa lndeꞌe ndadiꞌizh ndee zha? 8¿Tixa ndoꞌón beuna ndadiꞌizh bexa diꞌizh ten kadga dub beuna zhaga? 9Leꞌa sa ndee nde men utoꞌo Partia no Media no Elam no Mesopotamia no Judea no Capadocia no Ponto no Asia 10no Frigia no Panfilia no Egipto no be gezh nde mas sitxá ndoꞌ Cirene ten Africa. No ncho bexa Roma sa ndee, ncho xa wa bexa judio no ncho bexa wa tiꞌi mbingea ladna Dios ten beuna xa judio. 11No ncho bexa utoꞌo Creta nsea Arabia. Ná leꞌa itea beuna ndoꞌón ndadiꞌizh bexa baꞌ be ta siꞌil ndun Dios kadga diꞌizh ten dubga beuna.
12Weꞌe leꞌa bexa wa lá iniꞌí xteꞌe gun bexa tant ndanseana bexa, cha unabdiꞌizh bexa ndoꞌ be ltsaꞌa xa, ndab bexa:
—¿Xtaꞌanxága ta ndee zhaga?
13Ná ncho bexa ndun usalad ndab:
—Bexa baꞌ ga tant nsudna.
Pedr mbidiꞌizh ndoꞌ be men kwaꞌad
14Weꞌe leꞌa Pedr cha usoꞌ, no stibdub bexa wa. Cha ugeꞌ ndab xa:
—Bego nak beuna xa judio no iteata bego na ndencho Jerusalén ndee, biꞌín bega ta ndee, blaꞌach bega xtaꞌan gáp naꞌ. 15Leꞌa besa ndee naꞌanpa nsudna lak ndanbeꞌe bega, leꞌa nat pen gor nkea ugeꞌa tempran. 16Ná leꞌa ta ndee nak lak ta ndab Joel polta sakndoꞌ Dios, 17ndab Dios:
Leꞌa gal be wizh lult leꞌa naꞌ uzhebpa usa
Espíritu ten naꞌ ndoꞌ itea be men.
Leꞌa be xinbgiꞌi bega no be xingots bega gudiꞌizh sakndoꞌ naꞌ.
Leꞌa bexa ben ncho lat bega iniꞌí be ta ulu naꞌ.
Leꞌa bexa gox ucheꞌa ladna be ta usa naꞌ.
18Gal be wizh wa leꞌa naꞌ uzhebpa usa Espíritu ten naꞌ
ndoꞌ be xabgiꞌi no ndoꞌ be xagots, bexa ndun tiꞌin ten naꞌ,
cha gudiꞌizh bexa sakndoꞌ naꞌ.
19Leꞌa naꞌ ulu sian be taꞌa yanseana be men,
be ta gibeꞌa no be ta ndoꞌ gizhliyo;
iniꞌí bexa ten, no bealꞌ, no xkaw zhen.
20Leꞌa wizh lá usuta xeꞌa;
leꞌa mbeꞌe inaꞌ cuent ten.
Leꞌa tsoꞌo wa gal wizh uzhebpa wen ten Dios Xa Nibeꞌe.
21Leꞌa tal ton ukwaꞌan Dios Xa Nibeꞌe,
leꞌa xa wa gap gealnaban.
22Cha no ndab Pedr:
—Blaꞌach bego men Israel ta gáp naꞌ ndee. Leꞌa bego uniꞌíka leꞌa Jesús xa gezh Nazaret juers ten Dios mbin sian be uyon no sian be ta ngwanseana be men. Leꞌa ta wa mluꞌu leꞌa Dios leꞌaka mtuꞌub xa. 23No myak cuent xa ndoꞌ yaꞌa bego lakka uniꞌí Dios tiemp polta. Leꞌa bego usen xa, cha myun bega cuent xa ndoꞌ yaꞌa be men ugap, cha mbit bexa wa xa ndoꞌ cruz. 24Ná leꞌa Dios mxiste xa, mban xa ndoꞌ gealgut, leꞌa gealgut lá ngun gan ndoꞌ xa. 25Leꞌa polta leꞌa David ndab cuent ten Jesús:
Leꞌa naꞌ idub tiemp mnaꞌ Dios Xa Nibeꞌe wa wats naꞌ.
Naꞌan xtaꞌan gasea naꞌ, leꞌa xa wa nsoꞌ wats naꞌ.
26Ta weꞌe uzheꞌeb nten ladna ladoꞌo naꞌ
no nten lad naꞌ ndadiꞌizh naꞌ.
No uníka naꞌ leꞌa Dios ulaꞌach naꞌ.
27Leꞌa go lá ulaꞌa naꞌ yan naꞌ lat bexa ngut.
No ni lá ulaꞌa ga gazhaꞌa las naꞌ, leꞌa naꞌ nak xa mti go.
28Mluu ga nes ten ga ndoꞌ naꞌ, sa ncho gealnaban.
No uzheꞌeb nten lad naꞌ geal isoꞌ naꞌ wats ga.
29’Bego nak beuna xa Israel, leꞌa beuna uniꞌí leꞌa David uyoꞌo polta wa ngut no mgaꞌach. No leꞌa baꞌa ten xa bi nde sa ndee nat. 30Leꞌa xa wa dub xa ndadiꞌizh sakndoꞌ Dios, no uniꞌíka xa leꞌa Dios ndab ndoꞌ xa leꞌa xa nak Cristo wa ta ugeaka ilen lat be xin David, cha inibeꞌe xa lak unibeꞌe David. 31Leꞌa gor biseata yoo‑yá, leꞌa David ndab leꞌa Cristo iban ndoꞌ gealgut. Ndab xa leꞌa Dios lá ulaꞌa Cristo yaꞌan lat bexa ngut no ni lá ulaꞌa Dios gazhaꞌa las Cristo. 32Leꞌa itea besa ndee uniꞌíndoꞌ leꞌa Dios mxiste Jesús ndoꞌ gealgut. 33Leꞌa Dios cha myoꞌo Jesús gibeꞌa sa usob xa wats Dios lad gaꞌal. Leꞌa Tad Dios cha msaꞌa juers ndoꞌ Jesús msaꞌa xa Espíritu ten Dios ndoꞌ besa ndee, lakka ndab Jesús gun xa. Leꞌa Espíritu wa leꞌa ndun ta naꞌ bega no ta ndoꞌón bega wizh nat. 34Leꞌa David naꞌanpa leꞌa ikea gibeꞌa, parea leꞌa David ndab:
Leꞌa Dios Xa Nibeꞌe ndab ndoꞌ Xa Nibeꞌe ten naꞌ:
“Usob wats naꞌ lad gaꞌal ndee,
35gast gal gor ute naꞌ bexa ndaklono lu xan ndats lu.”
36’Nat blaꞌach itea bego xa Israel ta ugeakapa gáp naꞌ: leꞌa Jesús xa li mkeꞌa bega ndoꞌ cruz wa, leꞌa xa wa leꞌaka Dios msoꞌ nak Cristo Xa Nibeꞌe.
37Leꞌa gor na mbiꞌín be men ta wa, cha kweaꞌ myoꞌo ladna bexa, cha unabdiꞌizh bexa ndoꞌ Pedr nsea ndoꞌ be ltsaꞌa xa, ndab bexa:
—Bego nak beuna xa Israel, ¿xteꞌe nsabndoꞌ gun besa nat?
38Leꞌa Pedr cha ukaꞌab ndab:
—Blaꞌa bego be ta ugap nak bego no italeaꞌ kadga dub bega gak bega xmen Jesucristo, ndontsa utsuꞌu Dios be ke ten bega no usaꞌa xa Espíritu ten xa ndoꞌ bega. 39Li gunno Dios bexa na nbezh Dios gak bexa xmen xa: leꞌa ta wa bego, no be xin bega, no itea bexa sit ndencho.
40No sianta be diꞌizh mbidiꞌizh Pedr, no mtenxeꞌa xa bexa wa, ndab xa:
—¡Lá gakta bega lak nak be men ugap ncho nat, ndontsa naꞌanpa utsaksi Dios bega!
41Weꞌe leꞌa ncho bexa mbingea ladna ta li mbidiꞌizh Pedr wa, cha utaleaꞌ bexa. Leꞌa wizh wa pa schon mil men uyote lat bexa nak xmen Jesús. 42Leꞌa bexa wa ntsid lak nluu be apostol wa, no uzhebpa wen nak bexa ndoꞌ be ltsaꞌa bexa. No nzhealbe bexa ndaw bexa, nsea ndadiꞌizhno bexa Dios.
Xteꞌe ngok bexa mbingea ladna Jesús
43Leꞌa itea be men ndanseana gor uniꞌí bexa be uyon ndun be apostol, be ta msaꞌa Dios gun bexa. 44Leꞌa iteanak bexa na mbingea ladna Jesús wa dubtsa nak. No itea be taꞌa ndap bexa wa, leꞌa ta wa iteanakka bexa ten. 45Ncho bexa mdoꞌo be yo ten na no be taꞌa ndap bexa, cha ntseꞌa bexa med wa ndoꞌ be ltsaꞌa xa bi lak nkiꞌin bexa‑yá. 46Iteanak wizh nzhealbe bexa tale ten niꞌi ten Dios, no be ta lid bexa junt ndaw bexa, nten ladna bexa no utsin nak bexa. 47No nsaꞌa tseꞌe bexa xno ndoꞌ Dios, no leꞌa itea be men nsak ladna lak nak bexa. Leꞌa Dios leꞌa ndun kad wizh mas nsayak kwaꞌad bexa wa, ngoꞌo Dios bexa ndoꞌ be ke ten bexa.
Valgt i Øjeblikket:
Hechos 2: zpt
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2015, Wycliffe Bible Translators, Inc. All rights reserved.