Yahiya 4

Si Isa duk dende Samariyahin

1Manjari, takale meꞌ Pariseohin weꞌ mas ekka koꞌ aꞌa patindeg pu si Isa duk tapandi weꞌ ne amban meꞌ mapatindeg pu si Yahiyahin. 2(Saguwaꞌ iye matoꞌohin, dumaꞌin si Isa magpandi meꞌ aꞌahin saguwaꞌ meꞌ tindegnen hadja.) 3Pagkataꞌuhan weꞌ si Isa sabab meꞌ suwi-suwi inin, tahalaꞌ iye duk meꞌ tindegnen amban lahat Yahudiya balik pī si lahat Jalil. 4Subey siye pabutas amban lahat Samariya.

5Pagtekka siye si lahat Samariya, hap pī siye si dambuwaꞌ puweblo inēnan Sikar. Tapit puweblo inin si bulak pinangurung weꞌ si Yakub si anaknen Yusup awwalley. 6Laꞌi si antag miyaꞌan niyaꞌ kupung bakas hininang weꞌ si Yakub awwalley. Ningkoloꞌ si Isa si higad kupungin peggeꞌ pekkeng iye si paglengnganan. Lettu ne miyaꞌan ellewin. 7-8Meꞌ tindegnen gaꞌ laꞌi peggeꞌ laꞌi siye hap puweblo melli kinakande. Gaꞌ tiggel niyaꞌ tekka pī dende Samariya nginduk boheꞌ. Paꞌin si Isa si iye, “Dende, urungun ku boheꞌ inumku.” 9Nambung dendehin, paꞌinne, “Oy, bangsa Yahudi kew. Weꞌey kew māku boheꞌ si aku bu bangsa Samariya ku?” Missā dendehin kuweꞌ miyaꞌan peggeꞌ meꞌ Yahudihin gaꞌi hep bayaꞌ ngangguna meꞌ panyap meꞌ aꞌa Samariyahin. 10Nambung si Isa, paꞌinne, “Bang hadja kataꞌuhannu bang ine pangurung Tuhan si manusiyaꞌin duk bang sine ku, mamāku boheꞌ si kaꞌu kuweꞌitu inin, bugtuꞌ asal māku kew isab boheꞌ si aku duk paꞌinumte kew boheꞌ makapakellumin.” 11“Tuwan,” paꞌin dendehin, “antag kew ngeddoꞌ boheꞌ makapakellumin? Gaꞌ hatiꞌ niyaꞌ panginduknu duk lalem hep kupung inin. 12Kupung inin taꞌamban si kami weꞌ papuꞌten bi si Yakub. Siye magtewtey-anakin duk sampay meꞌ hayepden, tuꞌu si kupung inin panginumanden. Weꞌ labi kapatutnun amban kapatut si Yakubin?” 13Nambung si Isa, paꞌinne, “Kēmon manginum boheꞌ kupung inin, lekkakan du balik. 14Saguwaꞌ sine-sine makaꞌinum boheꞌ pamaꞌinumku iyehin, gaꞌi ne teꞌed lekkakan balik. Peggeꞌ boheꞌ pamaꞌinumku iyehin manjari kuweꞌ buwal neyibuwa diyalem ateyne, ngurungan iye boheꞌ makapakellum iye salama-lama.” 15“Tuwan,” paꞌin dendehin, “urungun ku boheꞌ pinaꞌinnu inin inumku, duk ne ku gaꞌi lekkakan balik duk gaꞌi ne ku subey magpituhan nginduk boheꞌ.”

16“Pī kew eddoꞌun ellanun,” paꞌin si Isa, “bu boꞌohun pitu.” 17“Gaꞌ niyaꞌ ellaku,” sambung dendehin. Paꞌin si Isa si iye, “Toꞌo pinaꞌinnu iyan. Gaꞌ niyaꞌ ellanu. 18Peggeꞌ minlime kew bakas magella saguwaꞌ saweꞌnu magdambuwaꞌ kuweꞌituhin dumaꞌin ellanu. Toꞌo pinaꞌinnun.” 19Paꞌin dendehin pu si Isa, “Tuwan, bahu kataꞌuhanku weꞌ kaꞌu inin nabi hatiꞌ. 20Meꞌ kapapuꞌan kami bangsa Samariyahin,” paꞌinne, “tuꞌu si punu inin lugal panambahayangande Tuhanin. Saguwaꞌ kaꞌam meꞌ Yahudihin, paꞌinbi weꞌ subey laꞌi si Awrusalam panambahayangante bi Tuhanin.” 21Paꞌin si Isa si iye, “Dende, kahagadun pinaꞌinku inin. Niyaꞌ du iyan waktu si pasōngan, bang meꞌ aꞌahin nambahayang si Samate bi Tuhanin, dumaꞌin tuꞌu si punu inin atawa laꞌi si Awrusalam. 22Kaꞌam meꞌ bangsa Samariyahin, magsambahayang kaꞌam saguwaꞌ awam kaꞌam bang ine sinambahayangbin. Kami meꞌ Yahudihin, kataꞌuhan kami bang sine sinambahayang kamihin, peggeꞌ manimbul meꞌ manusiyaꞌin paguwaꞌ hep amban bangsa Yahudi. 23Saguwaꞌ tekka du waktuhin duk kuweꞌitu ne hep, weꞌ meꞌ aꞌa manambahayang sabennalin, sambahayangde du Samate bi Tuhanin amban dem ateyde duk asal toꞌo panambahayangden. Kuweꞌ iyan kinabayaꞌan Samate bi Tuhanin panambahayang si iyehin.” 24Paꞌin si Isa pe, “Tuhanin poꞌon niyawa, lagiꞌ niyawa du iye, dumaꞌin du iye kuweꞌ manusiyaꞌ taga baran. Duk sasuku manambahayang si iyehin subey sambahayangde iye amban dem ateyde duk subey toꞌo panambahayangde si iyehin.” 25Paꞌin dendehin pu si Isa, “Asal kataꞌuhanku niyaꞌ du pitu si pasōngan magsultan si kite bi, iye Almasihin. Pagtekka iye pitu, pahātihanne du si kami kēmon-kēmonin.” 26Paꞌin si Isa, “Aku ne hep, iye mamissā si kaꞌu inin.”

27Bahu ubus bissāne inin, tekka ne meꞌ tindeg si Isahin. Ulaliꞌ siye peggeꞌ kitede niyaꞌ dende saweꞌne magbissā-bissā. Saguwaꞌ gaꞌ siye nilew dendehin bang ine akanen, atawa nilew si Isa bang weꞌey iye magbissā-bissā duk dende miyaꞌan. 28Manjari inambanan weꞌ dendehin komboꞌne pangisi-ngisihanne boheꞌin duk balik iye pī si puweblo. Pagtekkane laꞌi, missā iye si meꞌ aꞌa malaꞌihin. 29Paꞌinne, “Dayiꞌ be kaꞌam nuhut aku. Payamanun bi, niyaꞌ aꞌa ngakahan aku kēmon bakas tahinangku ilabeyin. Dumaꞌin enteꞌ iye Almasihin?” 30Manjari paluwas meꞌ aꞌa miyaꞌan amban puweblo duk lumengngan siye pī mayaman si Isa.

31Paglumikut ne dendehin hap puweblo, binuyuꞌ-buyuꞌ si Isa weꞌ meꞌ tindegnen dinaꞌak mangan. Paꞌinde, “Tuwan, mangan kew.” 32Saguwaꞌ sambungan si Isa siye, paꞌinne, “Niyaꞌ du kinakanku gaꞌi kataꞌuhanbi.” 33Hangkan meꞌ tindegnen magtilew-tinilew, paꞌinde, “Niyaꞌ enteꞌ bakas moꞌohan iye kinakan?” 34Paꞌin si Isa si siye, “Iye makaꞌesso akuhin, bang tahinangku kinabayaꞌan Tuhanin, iye mamapitu akuhin, duk subey ubusanku hinang pinahinangne si akuhin. 35Dumaꞌin ke niyaꞌ eliꞌanbi, paꞌinbi, ‘Ampat bulan pe meke pagani?’ Saguwaꞌ akahante kaꞌam,” paꞌin si Isa, “taꞌabut ne paganihin. Pantewun bi be meꞌ aꞌa mapitu iyan. Bang ibatan paleyin, tahak ne siye duk sarang ne pinagani. Hātinen sōng ne siye kahagad si aku. 36Meꞌ aꞌa magtipun siyehin binoꞌo si aku, tinumbasan du hāp. Duk meꞌ aꞌa tinipunden inurungan umul du salama-lama. Hangkan saliꞌ-saliꞌ kēgan magtanemin duk magtipunin. 37Toꞌo eliꞌan inin, paꞌinde, ‘Sakadangan magtanemin, seddili mamaganihin.’ 38Daꞌakte kaꞌam magani gaꞌ pagluꞌuganbin. Seddili magluꞌugin saguwaꞌ makahampit kaꞌam amban pagluꞌuganden.”

39Manjari ekka meꞌ aꞌa Samariya amban puweblo Sikarin kahagad pu si Isa sabab pinaꞌin dendehin. Paꞌinne hep, “Inakahan ku weꞌ ne kēmon bakas tahinangku ilabeyin.” 40Hangkan pagtekka meꞌ aꞌa Samariyahin laꞌi pu si Isa, inohotan iye weꞌ de laꞌi dahuꞌ si siye patennaꞌ. Duk patennaꞌ si Isa laꞌi duwem bahangi. 41Sasang laꞌi pe iye, ekka pe meꞌ aꞌa kahagad pu si Isa sabab panoloꞌne si siyehin. 42Paꞌinde si dendehin, “Kuweꞌitu kahagad ne kami pu si Isa, dumaꞌin ne sabab inakanu si kamihin, saguwaꞌ peggeꞌ asal di kami ne makakale meꞌ panoloꞌnen, duk kataꞌuhan kami weꞌ sabennal iye manimbul meꞌ manusiyaꞌ si dunyahin.”

Si Isa makoleꞌ anak bagellal sultanin

43Pagpuwas duwem bahangi laꞌi, tahalaꞌ si Isa duk meꞌ tindegnen amban Sikar hap pī si lahat Jalil. 44Bakas tabissā si Isa hep, paꞌinne, “Basta nabi, gaꞌi pagaddatan weꞌ meꞌ aꞌa lahatnen.” 45Pagtekka disi Isa laꞌi si lahat Jalil, sinampang siye weꞌ meꞌ aꞌahin peggeꞌ bakas siye laꞌi si Awrusalam baytu Kādjaꞌan Pangessebanin duk bakas takitede kēmon hininang si Isa malaꞌihin.

46Manjari balik si Isa pī si Kana, laꞌi si lahat Jalil. Laꞌi hep si Kana bakas pinamanjari boheꞌ ubas weꞌ ne boheꞌin. Manjari sumābu isab laꞌi dambuwaꞌ bagellal sultanin. Saki anakne lellahin laꞌi si puweblo Kapernaum. 47Pagkale bagellal inin weꞌ tekka ne si Isa laꞌi si lahat Jalil amban lahat Yahudiya, magtawus iye pī pu si Isa. Binuyuꞌ-buyuꞌ weꞌ ne si Isa binoꞌo pī hap Kapernaum makoleꞌ anaknen, peggeꞌ sōng ne matey. 48Paꞌin si Isa si iye, “Bang kaꞌam gaꞌi makakite meꞌ tandaꞌ duk meꞌ hinangan makaꞌulaliꞌ, gaꞌi kaꞌam kahagad.” 49Paꞌin bagellalin si iye, “Andūꞌ, Tuwan, nuhut ne kew aku pādpād gaꞌ pe matey anakkun.” 50“Hap lumaꞌ ne kew,” paꞌin si Isa. “Koleꞌ du anaknun.” Kinahagad weꞌ aꞌahin pinaꞌin si Isahin duk hap lumaꞌ ne iye. 51Sasangne pe si lān hap lumaꞌin, pasampang si iye meꞌ daraꞌakannen duk inakahan iye weꞌ de, paꞌinde, “Koleꞌ ne anaknun.” 52Tinilew siye weꞌ ne bang lisag piye kakoleꞌnen duk paꞌinde, “Diꞌilew lisag dambuwaꞌ kohapin, gaꞌ ne iye maglemmun.” 53Manjari taꞌesseb sama nakanakin weꞌ iye ne teꞌed miyaꞌan ora pagpaꞌin si Isa si iyehin, “Anaknun koleꞌ du.” Hangkan kahagad ne iye pu si Isa duk sampay kēmon saweꞌne dambuwaꞌ lumaꞌin kahagad du isab. 54Kaduwe inin ne tandaꞌ makaꞌulaliꞌ hininang si Isa si lahat Jalilin, pabalikne si Jalil amban Yahudiyahin.

Valgt i Øjeblikket:

Yahiya 4: yakV

Markering

Del

Kopiér