Yahiya 3

Si Isa duk Nikodemus

1Manjari inin, niyaꞌ dambuwaꞌ nakuraꞌ meꞌ Yahudihin, ēnnen si Nikodemus. Dambuwaꞌ iye Pariseo. 2Dambuwaꞌ sangem pī iye pu si Isa duk paꞌinne, “Tuwan, kataꞌuhan kami weꞌ kaꞌu dambuwaꞌ guru dinaꞌak weꞌ Tuhanin pitu. Peggeꞌ gaꞌi tahinangnu meꞌ hinangan makaꞌulaliꞌ hininangnun bang gaꞌ kew kaꞌurungan balakat weꞌ Tuhanin.” 3Nambung si Isa, paꞌinne, “Sabennal akahante kew, bang aꞌahin gaꞌi inanakan balik, gaꞌi takitene pagbayaꞌan Tuhanin.” 4Paꞌin Nikodemus, “Saꞌingge aꞌahin inanakan balik bang bahiꞌ ne iye? Gaꞌi iye umasek balik pī dem betteng saꞌinen bu inanakan balik.” 5Nambung si Isa, paꞌinne, “Sabennal akahante kew, bang aꞌahin gaꞌi inanakan amban boheꞌ duk amban Niyawa Tuhanin, gaꞌi iye umasek dem pagbayaꞌan Tuhanin. 6Inanakan weꞌ manusiyaꞌin, manusiyaꞌ du. Saguwaꞌ bang aꞌahin inanakan balik amban Niyawa Tuhanin, tahinang iye anak Tuhanin. 7Daꞌa kew ulaliꞌ peggeꞌ paꞌinku si kaꞌu weꞌ subey kaꞌam kēmon inanakan balik,” paꞌin si Isa. 8“Dalilnen baliyuhin. Baliyuhin nihup tungan-tungan kabayaꞌanne. Gaꞌi kataꞌuhan bang amban baliyuhin atawa bang tungan, saguwaꞌ takalenu begeddunen. Sa miyaꞌan du isab bang aꞌahin inanakan amban Niyawa Tuhanin, gaꞌi kataꞌuhan bang saꞌingge saguwaꞌ toꞌo.” 9“Saꞌingge kajarine inin?” paꞌin Nikodemus. 10Nambung si Isa, paꞌinne, “Gaꞌi ke inin tahātinu bu guru bantu kew tuꞌu si bangsate Israꞌil? 11Sabennal akahante kew, kami iye inaka kamihin kinataꞌuhan kamihin, duk iye sinaksiꞌan kamihin meꞌ bakas takite kamihin. Saguwaꞌ gaꞌi kahagadbi panaksiꞌ kamihin. 12Saꞌingge pakahagadbi panoloꞌku sabab surgaꞌin, bang bisan panoloꞌku sabab dunyahin gaꞌi kahagadbi? 13Gaꞌ niyaꞌ bakas tapī si surgaꞌ luwal aku, Anak Manusiyaꞌin. Duwaꞌi ku pitu amban surgaꞌ. 14Si Musa awwalley, masa palaꞌine si lahat makagindew-gindewin magtuhut duk meꞌ bangsa Israꞌilin, ngahinang iye bantuk sawe amban tumbaga duk pinaꞌangkat duk binowet weꞌ ne diyataꞌ olom, supaya bang payaman meꞌ aꞌa bakas tatigtukin sawe miyaꞌan, kawuliꞌan siye. Damikkiyan aku, Anak Manusiyaꞌin, subey ku isab pinaꞌangkat diyataꞌ olom duk pinapatey, 15supaya kēmon masandel si akuhin ellum salama-lama laꞌi si panaꞌanan Tuhanin.” Iye inin bissā si Isa pu Nikodemusin. 16Kinalasahan teꞌed weꞌ Tuhanin manusiyaꞌin, hangkan sinōngan weꞌ ne Anakne dambuwaꞌ-buwaꞌin pinapatey, supaya kēmon masandel si Anaknen gaꞌi pasapeꞌ amban Tuhan saguwaꞌ ellum siye salama-lama laꞌi si panaꞌanan Tuhanin. 17Pinapitu weꞌ Tuhanin Anaknen si dunya dumaꞌin ngalaboꞌan manusiyaꞌin hukuman, saguwaꞌ muwasan duseden.

18Sine-sine sandel si Anak Tuhanin gaꞌi tewwaꞌ hukuman Tuhanin. Manggaꞌi masandelin, tewwaꞌ hukuman Tuhanin ne, peggeꞌ gaꞌ iye sandel pu si Isa, Anak Tuhan dambuwaꞌ-buwaꞌin. 19Iye inin jānnen hangkan siye tewwaꞌ hukuman Tuhanin, peggeꞌ tiyaꞌ ne pitu si Isa si dunya ngadantaꞌan pikilan manusiyaꞌin, saguwaꞌ gaꞌi manusiyaꞌin mabayaꞌ si dantaꞌin. Kabayaꞌande lindemin peggeꞌ meꞌ hinanganden laꞌat. 20Kēmon maghinang malaꞌatin bunsi teꞌed si dantaꞌin duk gaꞌi iye patapit si dantaꞌin, peggeꞌ gaꞌi iye bayaꞌ weꞌ takite meꞌ hinanganne malaꞌatin. 21Saguwaꞌ kēmon maghinang mabentelin pī dem dantaꞌ supaya pastiꞌ takite weꞌ meꞌ hinangannen nuhut pangandaꞌakan Tuhanin.

Si Isa duk Yahiya

22Pagubus inin, hap pī si Isa duk meꞌ tindegnen si meꞌ kalahatan si Yahudiya. Tiggel-tiggel siye laꞌi duk magpandi siye meꞌ aꞌa laꞌi. 23-24Gaꞌ pe miyaꞌan si Yahiya takalabusu. Magpandi meꞌ aꞌa isab Yahiya laꞌi si lahat Anon peggeꞌ ekka boheꞌ laꞌi. Lahat Anon inin tapit si lahat Salim. Ekka meꞌ aꞌa magpīhan si iye duk pinandi siye weꞌ ne. 25Manjari meꞌ tindeg Yahiyahin magsuꞌal duk dambuwaꞌ Yahudi sabab addat pagsutsihin. 26Hap pī meꞌ tindeg Yahiya miyaꞌan si iye duk paꞌinde si iye, “Tuwan, taꞌessebnu ke aꞌa saweꞌnu magtuhut laꞌi si lipag boheꞌ Jordanin, iye bakas inakanun? Na kuweꞌitu magpandi meꞌ aꞌa ne iye, duk ekka teꞌed aꞌa hap pī si iye.” 27Nambung Yahiya, paꞌinne, “Gaꞌ niyaꞌ kapatut aꞌa bang dumaꞌin pangurung Tuhan si iye. 28Kaꞌam iyan magsaksiꞌan aku weꞌ bakas tapaꞌinku weꞌ dumaꞌin ku Almasihin. Pinapitu ku hadja dehellu amban iye, magpanyap para si iye. 29Bang upama niyaꞌ magkawin, pangantin lellahin dapuꞌ andahin. Saguwaꞌ bagaynen nengge-nengge laꞌi duk pakale-kale. Sinna iye pagtakalene missā pangantin lellahin. Kami duk si Isa kuweꞌ siye miyaꞌan du isab,” paꞌin Yahiya. “Kēgan ne ku manamal. 30Subey iye pasōng pinahadje saguwaꞌ aku subey ne padiyawaꞌ-diyawaꞌ,” paꞌin Yahiya.

Mapitu amban surgaꞌin

31Mapitu amban surgaꞌin langkew amban kēmon. Aꞌa amban dunyahin, luwal hadja sabab dunya binissānen peggeꞌ aꞌa dunya iye. Saguwaꞌ mapitu amban surgaꞌin langkew amban kēmon. 32Meꞌ panoloꞌnen meꞌ bakas takitene duk takalene laꞌi si surgaꞌin, saguwaꞌ gaꞌ niyaꞌ kahagad si panoloꞌnen. 33Bang niyaꞌ kahagad si panoloꞌnen, magbennal iye sabab inin weꞌ kēmon pinaꞌin Tuhanin asal bennal. 34Almasi pinapitu weꞌ Tuhanin, duk iye binissānen, lapal Tuhanin, peggeꞌ pangurung si iye Niyawa Tuhanin, Niyawa Tuhanin gaꞌ teꞌed niyaꞌ kulang pu Almasi. 35Malasa teꞌed Tuhanin si Anaknen duk inurungan iye weꞌ ne kapatut si kēmon-kēmonin. 36Sine-sine sandel si Anak Tuhanin ellum salama-lama. Saguwaꞌ manggaꞌi masandel duk manuhut si Anak Tuhanin, gaꞌ niyaꞌ umulne salama-lama. Bisan miyaꞌan, pateteg si iye mulkaꞌ Tuhanin salama-lama.

Valgt i Øjeblikket:

Yahiya 3: yakV

Markering

Del

Kopiér