Yahiya 2

Pagkawin laꞌi si Kanahin

1Pagpuwas duwem bahangi kemuwe pagbissā si Isa duk Natanaelin, niyaꞌ magkawin laꞌi si kalumaꞌan Kana, laꞌi si lahat Jalil. Saꞌi si Isahin laꞌi si pagkawinan. 2Si Isa duk meꞌ tindegnen tabatik isab pī. 3Manjari laꞌi si pagkawinan, ininumden boheꞌ ubas bu ubus ne weꞌ meꞌ aꞌahin ininum. Paꞌin saꞌi si Isahin si iye, “Ubus ne boheꞌ ubas ininumden.” 4Paꞌin si Isa si saꞌinen, “Daꞌa kew magsuse sabab iyan. Aku saꞌ taꞌu si iyan. Gaꞌ pe taꞌabut waktu pamakiteku balakatkun.” 5Manjari paꞌin saꞌinen si meꞌ daraꞌakan si lumaꞌ miyaꞌan, “Ine-ine pangandaꞌakan si Isa kaꞌam, hinangun bi.”

6Niyaꞌ laꞌi ennem poga batu pangisihan boheꞌ pangosoꞌan meꞌ Yahudihin, nuhut addatde pagsutsihin. Dambuwaꞌ poga isihan meꞌ lime mital. 7Paꞌin si Isa si meꞌ daraꞌakanin, “Pennoꞌanun bi meꞌ poga iyan duk boheꞌ.” Pinennoꞌan ne weꞌ de, sampay sōng buꞌus. 8Manjari daꞌak si Isa siye, paꞌinne, “Nginduk ne kaꞌam amban meꞌ poga iyan bu boꞌohun bi pī si mangantan pagkādjaꞌan inin.” Binoꞌo ne weꞌ de pī si mangantan pagkādjaꞌanin, 9duk kininaman weꞌ ne boheꞌ mamanjari boheꞌ ubasin. Gaꞌ kataꞌuhanne bang amban boheꞌ ubas miyaꞌan, saguwaꞌ meꞌ daraꞌakan bakas manginduk boheꞌin kataꞌuhande. Manjari magtawus ilinganan weꞌ ne pangantin lellahin. 10Paꞌinne si iye, “Iye addatin bang magtāgad, pamaꞌinum dehellu ininum mahāpin. Manjari bang ekka ne taꞌinum meꞌ aꞌahin, meke ne pamaꞌinum ininum manggaꞌi mahāpin. Saguwaꞌ kaꞌu, taꞌennaꞌnu pe sampay kuweꞌitu ininum mahāpin.”

11Iye inin hinangan makaꞌulaliꞌ tagnaꞌ hininang si Isahin. Hininang inin weꞌ ne laꞌi si Kana, si lahat Jalil. Pinakitehan weꞌ ne balakatnen, manjari kahagad meꞌ tindegnen si iye. 12Pagubus inin, padurul disi Isa hap pī si puweblo Kapernaum. Saweꞌne magtuhutin saꞌinen, meꞌ pungtinaꞌinen, duk meꞌ tindegnen. Laꞌi siye patennaꞌ bang piyem bahangi.

Pī si Isa si langgal hadjehin

(Mateo 21:12-13; Markus 11:15-17; Lukas 19:45-46)

13Tapit ne pagkādjaꞌan meꞌ bangsa Israꞌilin ēnande Pangesseban. Hangkan pataked si Isa duk meꞌ tindegnen hap Awrusalam, lahat pagkādjaꞌanin. 14Pagtekkade laꞌi, padiyalem siye dem langgal hadjehin. Iye takite si Isahin dem langgal miyaꞌan, meꞌ aꞌa magdagang sapiꞌ duk meꞌ bili-bili duk meꞌ assang para pagkuluban. Duk takitene isab meꞌ aꞌa magtingkoloꞌ si bihing lamisahanden magsambiꞌ-sambiꞌ sīn. 15Pagkite si Isa siye laꞌi, ngeddoꞌ iye lubid hinangne lalagut bu pinaluwas siye kēmon weꞌ ne amban dem langgalin, sampay meꞌ bili-biliden duk meꞌ sapiꞌden. Ilintuwadan isab weꞌ ne meꞌ lamisahan meꞌ aꞌa magsambiꞌ-sambiꞌ sīnin duk kinanat weꞌ ne sīnden. 16Duk paꞌinne si meꞌ aꞌa magdagang assangin, “Paluwasun bi meꞌ daganganbi iyan amban dem langgal inin! Daꞌa hinangun bi tabuꞌan langgal inin, peggeꞌ inin lumaꞌ Samaku, Tuhanin.” 17Pagkite meꞌ tindeg si Isahin hininangne inin, taꞌessebde weꞌ tasulat dem kitab, pinaꞌin laꞌi, “Ellegku si lumaꞌnun, o Tuhan, kuweꞌ ebbut dem ateyku makapagkaꞌat aku.” 18Manjari tinilew si Isa weꞌ meꞌ nakuraꞌ meꞌ Yahudihin, paꞌinde, “Ine kapatutnu ngahinang meꞌ hininangnu miyaꞌan? Pakitehanun kami hinangan makaꞌulaliꞌ tandaꞌ kapatutnun.” 19Sambungan si Isa siye, paꞌinne, “Larakun bi langgal inin, duk patenggeku balik dem tellu ellew.” 20“Uy,” paꞌin meꞌ nakuraꞌin, “langgal inin, ampatpūꞌ duk ennem tahun pangahinang inin. Tapatenggenu balik dem tellu ellew hadja?” 21Saguwaꞌ hāti langgal pinaꞌin si Isahin, dumaꞌin langgal miyaꞌan, saguwaꞌ barannen. 22Hangkan pagellum ne balik si Isa amban kamateynen, taꞌesseb meꞌ tindegnen weꞌ bakas bissāne inin. Duk kinahagad ne weꞌ de tasulat dem kitabin duk bakas binissā si Isahin.

Kataꞌuhan si Isa pikilan duk diyalem atey manusiyaꞌin

23Palaꞌi si Isa si Awrusalamin, baytu Kādjaꞌan Pangessebanin, ekka kahagad si iye pagkitede meꞌ hinangan makaꞌulaliꞌ hininangnen. 24Saguwaꞌ si Isa gaꞌ ngandel si siye, peggeꞌ kataꞌuhanne pikilan duk diyalem atey manusiyaꞌin kēmon. 25Bisan iye gaꞌi inakahan, kataꞌuhanne du bang ine dem atey manusiyaꞌin.

Valgt i Øjeblikket:

Yahiya 2: yakV

Markering

Del

Kopiér