Hinangan 2
2
Pinapitu weꞌ Tuhanin Niyawa Sutsihin
1Pagtekka ellew ēnande Pentekostes, magtipun meꞌ tindeg si Isahin kēmon si dambuwaꞌ lumaꞌ. 2Bessuwang niyaꞌ megeddu amban langit kuweꞌ begeddu baliyu basag. Duk paꞌasek begeddu miyaꞌan magdem lumaꞌ pagtingkoloꞌanden. 3Manjari niyaꞌ takitede kuweꞌ kayat ebbut magkanat-kanat, duk pabettad pī si siye dangan-dangan. 4Manjari kēmon siye paꞌasekan weꞌ Niyawa Sutsihin duk nagnaꞌ siye missā bayuꞌ-bayuꞌan bissā bangsa seddili. Kapamissā siye kuweꞌ miyaꞌan weꞌ balakat pinangurung si siye weꞌ Niyawa Tuhan mapaꞌasek si siyehin.
5Masa miyaꞌan niyaꞌ laꞌi si Awrusalam meꞌ Yahudi amban meꞌ kalahat-lahatan si dunya. Meꞌ aꞌa be-āgama teꞌed siye. 6Pagkalede paghidjul diyalem lumaꞌ pagtipunan meꞌ tindeg si Isa miyaꞌan, banes teꞌed siye pī patipun. Ulaliꞌ teꞌed siye, peggeꞌ takalede meꞌ tindeg si Isahin missā kuweꞌ bissāhanden dangan-dangan. 7Bengngangan siye duk ulaliꞌ teꞌed, hangkan paꞌinde, “Ine inin? Meꞌ aꞌa amban Jalil hep meꞌ mamissā inin. 8Weꞌey teꞌ siye takalete bi makabissā bissāhanten bi dangan-dangan? 9Kite bi matuꞌu inin amban kalahat-lahatan tuꞌu si dunya. Niyaꞌ ne amban lahat Partiya, amban Midda, amban Elam; niyaꞌ ne amban Mesopotamiya, amban Yahudiya, amban Kappadoke, amban Pontus, duk amban Asiya. 10Niyaꞌ isab kite bi amban Pirigiya, amban Pampiliya, amban Misil, duk amban meꞌ kalahatan laꞌi si Libiya tapit si lahat Kirene; niyaꞌ kite bi amban Roma. 11Sinduwe kite bi inin meꞌ bangsa Yahudi duk sinduwe isab dumaꞌin Yahudi saguwaꞌ patuhut ne si āgama Yahudi. Duk niyaꞌ isab kite bi amban lahat Kerete duk amban lahat Arab. Bu kēmon kite bi takalete bi siye missā si bissāhanten bi sabab meꞌ hinangan mahadje hininang Tuhanin.” 12Ulaliꞌ teꞌed siye duk gaꞌi siye magkataꞌu-taꞌu hangkan magtilew-tinilew ne paꞌin siye, paꞌinde, “Ine enteꞌ hātine inin?” 13Saguwaꞌ niyaꞌ sinduwe, hinangde hadja dagey meꞌ tindeg si Isahin. Paꞌinde, “Iyuꞌ meꞌ aꞌa iyan maglangohan.”
Magmahalayak si Petros
14Saguwaꞌ nengge si Petros magtuhut duk saweꞌne sampūꞌ duk dambuwaꞌin duk missā iye pinapales, paꞌinne, “Meꞌ pagkasiku Yahudi duk kēmon kaꞌam maglahat si Awrusalamin. Pakale kaꞌam pahāp-hāp duk pahātihante kaꞌam bang ine maꞌumantag inin. 15Kannalbi meꞌ aꞌa inin lango, bu dumaꞌin, peggeꞌ lisag siyam pe hadja salung. 16Saguwaꞌ takitebi kuweꞌitu inin,” paꞌinne, “bakas pinaꞌal weꞌ Nabi Joel duk kuweꞌitu tuman ne. Paꞌinne,
17‘Iye inin hinangku si ellew dambuli,’ paꞌin Tuhanin. ‘Papiyuku Niyawakun si kēmon manusiyaꞌ. Duk meꞌ tubuꞌbin lella-dende magpalataꞌ du lapalkun. Meꞌ lellabi matumbuꞌin niyaꞌ pabagalaku si siye duk meꞌ lellabi mabahiꞌin niyaꞌ pataginepku si siye. 18Aweꞌ,’ paꞌin Tuhanin, ‘bisan si meꞌ daraꞌakankun lella-dende, papiyuku du Niyawakun si meꞌ ellew īꞌ duk magpalataꞌ du siye lapalkun. 19Duk magpakite du ku meꞌ makaꞌulaliꞌ diyataꞌ langit, duk meꞌ tandaꞌ tuꞌu si dunya: lahaꞌ duk ebbut duk umbu subuk. 20Mata ellewin,’ paꞌinne, ‘ngalindem du, duk bulanin ngapeyat kuweꞌ lahaꞌ, bang sōng tekka ne ellew mahadje duk makaꞌulaliꞌin, ellew pangahukumku meꞌ manusiyaꞌin. 21Duk sine-sine manabbut ēnkun makiꞌaseꞌ si aku,’ paꞌin Tuhanin, ‘timbul du iye.’ ”
22Paꞌin si Petros pe, “Meꞌ pagkasiku aꞌa Israꞌil, pakalehun bi binissāku inin. Si Isa, aꞌa Nasaretin, kataꞌuhan weꞌ asal sabennal iye pinapitu weꞌ Tuhanin peggeꞌ inurungan balakat iye weꞌ Tuhanin, hangkan iye makahinang meꞌ hinangan balakatan duk meꞌ hinangan makaꞌulaliꞌ duk meꞌ tandaꞌ. Inin asal kataꞌuhanbi peggeꞌ tahinangne inin tuꞌu diyalemanbi. 23Tuhanin andang kataꞌuhanne duk amban bayaꞌne weꞌ si Isa inin sinōngan pī si antananbi duk inin sakapne pu si Isahin. Duk dinaꞌak weꞌ bi si meꞌ aꞌa dusehan ilansang si Isa diyataꞌ olom duk pinapatey. 24Saguwaꞌ pinakellum iye balik weꞌ Tuhanin. Pinaluhaya iye amban katiksaꞌanne kamateynen, peggeꞌ asal gaꞌi kapagbayaꞌ si iye kamateyin. 25Tasulat hep weꞌ si Daꞌud sabab Isa Almasi, paꞌinne,
‘Luwal talessaku Panuhutankun si bihingku. Tuꞌu iye si bihingku hangkan gaꞌi ku suse. 26Hangkan hep kēgan ateykun duk lapalanku kēgkun. Duk bisan matey barankun, niyaꞌ du ase-aseku. 27Peggeꞌ gaꞌi du ku ambanannu si lahat meꞌ pateyin. Gaꞌi du pasagadannu barankun mabuhukan. Aku inin daraꞌakannu masutsihin. 28Pinanoloꞌan ku weꞌ nu meꞌ lān tudju umul salama-lamahin. Basta luꞌu ku si antagnu, kēgan ku manamal.’
29“Na, meꞌ kapungtinaꞌihanku,” paꞌin si Petros, “akahante kaꞌam papastiꞌ sabab papuꞌten bi, Sultan Daꞌud ley. Matey du iye duk kinubul, duk kubulnen tiyaꞌ pe tuꞌu si kite bi sampay maꞌin. 30Peggeꞌ nabi iye, kataꞌuhanne weꞌ bakas nanggup Tuhanin si iye duk napa pe weꞌ si waktu sinōng niyaꞌ dangan meꞌ tubuꞌnen magsultan du kuweꞌ iyehin. 31Kataꞌuhan andang weꞌ si Daꞌud bang ine matekka si sinōngin, hangkan missā iye sabab kaꞌellum Almasi balik amban kamateynen. Paꞌinne weꞌ gaꞌ du Almasi inambanan laꞌi si palaꞌihan meꞌ pateyin, duk gaꞌ du barannen buhuk. 32Si Isa inin bakas pinakellum hep balik weꞌ Tuhanin duk kami kēmon, kasaksiꞌan kami weꞌ inin bennal. 33Pinahadje teꞌed si Isa weꞌ Tuhanin laꞌi si kanawananne, lugal tamanan mabangsahanin. Duk sa pananggup Tuhanin, tapangurung ne si iye weꞌ Samanen Niyawa Sutsihin. Manjari pinapitu weꞌ ne Niyawa Sutsi inin si kami meꞌ tindegnen. Duk meꞌ takitebi duk takalebi kuweꞌitu inin, hinangan Niyawa Sutsi bakas pinapitune si kamihin. 34Na, dumaꞌin si Daꞌud mapaꞌangkat si surgaꞌin, saguwaꞌ tabissāne inin, paꞌinne pe,
‘Missā Tuhanin si Panuhutankun, paꞌinne: Dayiꞌ kew ningkoloꞌ kew tuꞌu si kanawananku, tuꞌu si paningkoloꞌan mabangsahanin, 35duk bettadku du meꞌ bantanun diyawaꞌ pat bettisnu.’
36“Hangkan hep,” paꞌin si Petros, “subey teꞌed kataꞌuhan meꞌ bangsa Israꞌilin kēmon, weꞌ si Isa, bakas ilansangbi diyataꞌ olomin, bakas ginellal ne weꞌ Tuhanin Panuhutan duk Almasi, hātinen, pineneꞌ weꞌ Tuhanin magbayaꞌ.”
37Pagkale meꞌ aꞌahin inin, sasew teꞌed ateyden. Paꞌinde pu si Petros duk si meꞌ kawakilan sinduwehin, “Meꞌ kapungtinaꞌihan, ine subey hininang kamihin?” 38Paꞌin si Petros si siye, “Pagsusunanun bi duk lebbahanun bi ne meꞌ dusebin, gaꞌi ne hininang-hinang balik. Duk subey kaꞌam dangan-dangan pinandi, tandaꞌ weꞌ sandel ne kaꞌam pu si Isa, supaya ampun Tuhanin meꞌ dusebin. Duk pangurung Tuhanin du si kaꞌam Niyawa Sutsihin, lasa-lasahanne si kaꞌamin. 39Peggeꞌ inin hep sanggup Tuhanin si kaꞌam meꞌ Yahudihin duk si meꞌ tubuꞌbin, duk sampay si kēmon isab si meꞌ lahat matalahin, sasuku dinaꞌak weꞌ Panuhutanten bi Tuhanin nuhut iye.”
40Ekka pe bissā si Petros si siye duk binuyuꞌ-buyuꞌ siye weꞌ ne, paꞌinne, “Tabangun bi dibin duk kaꞌam gaꞌi ilegga kuweꞌ meꞌ aꞌa malaꞌat kuweꞌitu inin.” 41Ekka kahagad si binissā si Petros miyaꞌan duk pinandi siye, tandaꞌ weꞌ sandel ne siye pu si Isa. Ellew miyaꞌan, kulang-labi tellu ngibu aꞌa mapatamba si meꞌ masandel pu si Isahin. 42Sinna teꞌed siye tinoloꞌan weꞌ meꞌ aꞌa kawakilan weꞌ si Isahin duk magdambuwaꞌ dem atey siye kēmon. Patuhut siye si meꞌ masandelin magkakanan pan pangessebande kamatey si Isahin, duk patuhut isab siye ngampun-ngampun si Tuhan.
Bahan-bahan meꞌ masandel pu si Isahin
43Ekka meꞌ hinangan balakatan duk meꞌ hinangan makaꞌulaliꞌ tahinang weꞌ meꞌ aꞌa kawakilan si Isahin, hangkan tinalew teꞌed meꞌ aꞌahin si Tuhan. 44Kēmon masandel pu si Isahin magtuhut-tuhut, duk ine-ine niyaꞌ si siye, magurung-inurung siye bang niyaꞌ kasukalan. 45Pinabellihan weꞌ de meꞌ alataꞌden duk meꞌ panyapde sinduwehin duk binahagiꞌ-bahagiꞌ sīnin panabangde sukal dangan-danganin. 46Kahabaꞌ ellew magsābu-sābu siye laꞌi dem langgal hadjehin. Magtuhut siye magkakanan si meꞌ kalumaꞌande. Magkēg siye mamanganin duk sayuꞌ siye magurung-inurung. 47Luwal pinudji weꞌ de Tuhanin duk pagaddatan siye weꞌ meꞌ aꞌahin kēmon. Duk kahabaꞌ ellew niyaꞌ meꞌ aꞌa baꞌahu sandel pu si Isa, pinatamba si siye weꞌ Tuhanin.
Valgt i Øjeblikket:
Hinangan 2: yakV
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators, Inc. All rights reserved.