Hinangan 1
1
Si Lukas nulat pu Teopilus
1Sulat inin amban si Lukas pu si Teopilus.
Tuwan Teopilus, si sulatku tagnaꞌin, inaka weꞌ ku si kaꞌu kēmon hininang duk pamanoloꞌ si Isahin kemuwe tagnaꞌ paghinangnen 2ngeregseꞌ ellew pamaꞌangkat iye hap surgaꞌin. Gaꞌ pe iye paꞌangkat, sinessaꞌan weꞌ ne meꞌ aꞌa tapeneꞌne duk kawakilanne magmahalayak aka-aka mahāpin. Meꞌ sessaꞌne miyaꞌan amban Niyawa Sutsihin. 3Puwas kamateynen, dem ampatpūꞌ bahangi daran hep si Isa paguwaꞌ si meꞌ aꞌa kawakilannen. Ekka meꞌ tandaꞌ pinakitehan weꞌ ne weꞌ asal ellum iye. Takitede iye duk missā iye si siye sabab pagbayaꞌ Tuhanin. 4Mintedde sābude magtipunin, sinessaꞌan siye weꞌ ne, paꞌinne, “Daꞌa dahuꞌ kaꞌam tahalaꞌ amban Awrusalam. Agadun bi dahuꞌ meꞌ pananggup Samakun, iye bakas pinaꞌinku si kaꞌamin. 5Si Yahiya, boheꞌ hep pamandine meꞌ aꞌahin. Saguwaꞌ kaꞌam, pamandi si kaꞌamin seddili. Palabey piyem bahangi binnaꞌan, pinapiyu du si kaꞌam Niyawa Sutsihin.”
Pinaꞌangkat si Isa hap surgaꞌ
6Dambuwaꞌ ellew, sābu si Isa magtipun duk meꞌ aꞌa kawakilannen, tinilew iye weꞌ de, paꞌinde, “Tuwan, paluhayanu ne ke kuweꞌitu bangsa kami Israꞌilin duk pabaliknu ne pagsultananin si kami?” 7Nambung iye, paꞌinne, “Gaꞌi subey kataꞌuhanbi sabab meꞌ iyan. Samakun hadja magbayaꞌin si meꞌ maꞌumantag si dunyahin duk bang sumiyan paꞌantagne. 8Saguwaꞌ inurungan du kaꞌam iyan balakat pagtekka ne si kaꞌam Niyawa Sutsihin. Duk kaꞌam ne magaka-aka sabab akuhin laꞌi si Awrusalam, si tibuꞌukan lahat Yahudiya, si lahat Samariya, duk sampay si kaꞌampat pidjū alam inin.” 9Pagubus inin bissāne, paꞌangkat iye hap surgaꞌ sābude mamayam-mayaman iyehin. Manjari kaꞌelligan iye weꞌ inalak duk gaꞌ ne iye takitede.
10Sābude pe mamayam-mayaman iyehin paꞌangkatne padiyataꞌ langitin, bessuwang niyaꞌ lella duwangan nengge si bihingde magsemmek poteꞌ. 11Paꞌin duwanganin si siye, “O meꞌ aꞌa Jalil! Weꞌey kaꞌam tuꞌu magtengge mayam padiyataꞌ langit? Si Isa bakas ineddoꞌ amban kaꞌam binoꞌo hap surgaꞌin, balik du pitu kuweꞌ pangitebi iye paꞌangkatne hap surgaꞌ miyaꞌan.”
Meneꞌ siye dangan pinagantiꞌ pu si Judas
12Manjari tahalaꞌ ne siye amban kūd Jaitun balik hap Awrusalam, tapit da kilumetro talahannen. 13Pagtekkade laꞌi si Awrusalam, nalus siye manaꞌik pī si bilik patennaꞌanden. Siye miyaꞌan disi Petros, si Yahiya, si Yakub, si Andariyas, si Pilip, si Tomas, si Bartolome, si Mateo, si Yakub anak si Alpahin, si Simon inēnan Pangangatuhin, duk si Judas isab anak si Yakub (Yakub seddilihin). 14Luwal siye magtipun-tipun kēmon ngampun si Tuhan. Patuhut isab si siye meꞌ kadendehanin, sampay si Mariyam saꞌi si Isahin, duk meꞌ pungtinaꞌi si Isa lellahin.
15Gaꞌ tiggel puwas miyaꞌan, magtipun meꞌ tindeg si Isahin, niyaꞌ siye kulang-labi da hatus duk duwempūꞌ. Manjari nengge si Petros si tengngaꞌde missā. 16“Meꞌ kapungtinaꞌihanku,” paꞌinne, “subey tinumanan lapal Niyawa Sutsi pinasulatne pu si Daꞌud ley. Lapal miyaꞌan sabab si Judas ley, panduꞌ meꞌ aꞌa maniggew si Isahin. 17Si Judas ley bakas dambuwaꞌ hep saweꞌte bi duk bakas isab iye kawakilan weꞌ si Isa maghinang kuweꞌ hinangte bi inin.”
18(Libang helling, Tuwan Teopilus, pamelli bulak hep weꞌ si Judas sīn panangdan iye si hinanganne malaꞌat pamuddine si Isahin. Pagtabelline bulak miyaꞌan, laboꞌ iye laꞌi duk matey iye. Teddak bettengnen duk paguwaꞌ tinaꞌinen. 19Duk bawag si kēmon aꞌa mapatennaꞌ si Awrusalamin sabab si Judas inin. Hangkan inēnan weꞌ de bulak miyaꞌan si bissāde Yahudi, Akeldama. Hātinen, “Bulak Lahaꞌ.”)
20Paꞌin si Petros pe, “Niyaꞌ ayat tasulat si kitab Jabur, pinaꞌin,
‘Subey ne patennaꞌannen tinayikutan. Duk subey ne gaꞌ niyaꞌ patennaꞌ laꞌi.’
Duk niyaꞌ isab seddili tasulat pinaꞌin,
‘Subey niyaꞌ seddili pinagantiꞌ si bakas hinangnen.’
21-22“Hangkan hep,” paꞌin si Petros, “subey niyaꞌ ginellal seddili pinatuhut si kite bi naksiꞌ weꞌ si Isa, Panuhutanten bi, ellum ne balik. Subey iye aꞌa bakas tumuhut si kite bi masa paglengngante bi duk si Isahin, tinagnaꞌan amban pagpandi si Yahiyahin ngeregseꞌ ellew pamaꞌangkat pu si Isa hap surgaꞌin.”
23Manjari duwe ēn tinaꞌatde pameneꞌanden. Dambuwaꞌin si Yusup, inēnan du isab Barsabbas, (inēnan isab Justus) duk dambuwaꞌin si Mattiyas. 24Manjari māku-māku disi Petros si Tuhan, paꞌinde, “O Tuhan, kaꞌu mangataꞌuhan atey manusiyaꞌin. Toloꞌanun kami bang sine pineneꞌnun tuꞌu si duwangan inin, 25supaya tahinangne hinang pinasukuꞌnu si meꞌ aꞌa kawakilannun. Hinang inin inambanan hep weꞌ si Judas duk pī iye si lugal matalep si iyehin.” 26Ubus miyaꞌan, magpuwaꞌan siye duk ēn Mattiyasin tapuwaꞌin. Hangkan pinatamba iye si meꞌ aꞌa kawakilan si Isa sampūꞌ duk dambuwaꞌin.
Valgt i Øjeblikket:
Hinangan 1: yakV
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators, Inc. All rights reserved.