Mateyu 4
4
Kurumanga Nokoli Setenene Yesusi Kondi Torumu Semanemo
(4:1-11)
1Yesusi ˻no liltimu kinia Pulu Yemonga Minimu yu-kinia omba molopale nirimumuni,˼ Minimu yuni ‘˻Kurumanga nokoli˼ depelemone yu kondi topili.’ nimba Yesusi kolea ku lielina memba purumu. 2Akuna Yesusi oli se koro talo mele kere-langi naa noli we molopa perimu kinia yu gelene kolopa molorumu.
3Kanu-kinia kondi toli ˻kuru Setene˼ omba yundu nimbale: “Nu Pulu Yemonga Malo liemu i kouma ‘Pellawa kaloli au liepili.’ ni.” nirimu.
4Aku-na-kolo yuni pundu topa nimbale: “Pulu Yemonga bokumuni nimbale:
‘Kere-langimane mindi
yomboma konde mololi ulu-pulumu naa silimú.
Pulu Yemone ungu nilimúma pali
pilku liku seko molonge kinia konde mololi ulu-pulumu lingí.’
nimba molemo.” nirimu.
5Kanu-kinia depelemone Yesusi lipa kolea-awili Jerusalleme, akumundu ‘kolea-awili kake seli’ nílimu, akuna memba pumba Pulu Yemo popo toko kaloringi ulka-tembelena memba, paa ola imuna pumba anjipale nirimumuni, 6yundu nimbale: “Nu Pulu Yemonga Malo liemu nu lipa tapondomba kene po ningu mania pu.” ˻nirimu.˼ “Pulu Yemonga bokumuni nimbale:
‘Pulu Yemone yunga angellomane
‘Nu ongo nokangi.’ nimbá.
Onone nu ‘Kou sene kepe naa topili.’ ningu
nu ononga kimane okoko lingí.’
nimba molemo kanumu. Aku sipa nirimu kene pilkuli aku siku sei.” nirimu.
7Yesusini yundu nimbale: “Pulu Yemonga yombomando ungu se pea nimba molemóla. Akumu i-sipa:
‘Pulu Yemo ononga Ye-Awilimuni “Sembó.” nilimú mele
‘Sika nilimúnje molo kolo tolemonje kanamili.’
ningu onone yu manda manjiku naa sangi.’
nimba molemóla kanumu.” nirimu.
8Kelepa depelemone yu lipa mulu se paa olandopa lierimuna ola memba pumba anjipale, yu ma-koleama pali kinia koleamanga méle peangama pea lipa ora sipa 9yundu nimbale: “Nu nanga kumbikerena komorongo toko pondoko mania molko na popo toko nanga imbi ambolko paka tondonu liemu i nu kanokono ma-koleana lemó mélema pali nu simbú.” nirimu.
10Kanu-kinia Yesusini yundu nimbale: “Setene, nu anju pa! Pulu Yemonga bokumuni nimbale:
‘Pulu Yemo ononga Ye-Awilimu manjiku popo toko
imbi ambolko paka tondoko,
yunga kongonoma manjiku sendeko molangi.’
nimba molemo kanumu.” nirimu.
11Kanu-kinia depelemo Yesusi yu mundupa kelepa yu purumu. Purumu kinia mulu-koleana angelloma ongo Yesusi nokoringi.
Yesusini Kolea Gallilli Disiriki Pulu Polopa Yomboma Ungu Nimba Sirimu Semanemo
(4:12-17)
12Kanu-kinia ˻No Lindeli˼ Jono ka siku ka-ulkana panjeringi kinia pilipale Yesusi kelepa kolea Gallilli disirikindu yando omba 13Nasarete taonona ombale nirimumuni, pe aku taonomo mundupa kelepa Kapeniame taono, nomu Gallilli kelona lierimu, akuna pumba ‘Kiniá i koleamo nanga kamu molombo koleamo liepili.’ nimba akuna molorumu. Kapeniame ye Sepullano kinia Napatallaitolone kalko liltingili yomboma u moloringi koleana lierimu. 14˻Kapeniame taonona pumba molorumumunga˼ koronga-u Pulu Yemone ungu-umbu tondorumuma pilipa yomboma nimba sirimu ye Aisayane ulu se pe wendo ombá u nirimu mele kamu wendo orumu. Aisayane nimbale:
15“Sepullanone kalopa liltimu yomboma
pelemele koleamo kinia,
Napatallaini kalopa liltimu yomboma
pelemele koleamo kinia,
nomuna pulimú aulkamo no Jodane nekendo
lemó koleamo kinia,
kolea Gallilli wikindu yombo-lupa awisili
molemele koleamo kinia,
aku koleamanga molemele yomboma
˻paa simbulu tolina molemele˼.
16Kanu yombo paa simbulu tolina molemelema
pa tondolo paa awili-sepa seli se kanoringi.
Kololi ulu-pulumu aki topa simbulu tondolemo
koleana pelemele yombomanga koleana pa sendekemo.”
nirimu.
Yesusini Pulu Yemo Ye Nokoli Kingimu Molopa Mélema Nokombamonga Semane, Peangamo Topa Sipa, Kuru Torumu Yomboma Sepa Peanga Sirimu Semanema
4:17–9:34
17˻Kapeniame omba molorumu˼ kanu walemonga Yesusini yomboma pulu polopa unguma nimba sipa nimbale: “Pulu Yemo ye nokoli kingimu molopa nokomba walemo nondopa wendo ombá sekemo kene ˻‘Pulu Yemo yuni nokomba yombomanga talapena sukundu molamili.’ ningu˼ ulu-pulu-kiri selemelema munduku kelko konopu topele taa.” nirimu.
Yesusini Ye Kisendo “Na Lombili Waa.” Nirimu Semanemo
(4:18-22)
18Yesusi nomu Gallilli kelona andopale genungulu talo kanorumu, akutolo Saimono kinia genu Enderutolo oma lili wale se nomuna toko munduku moloringili kanorumu. Pe Saimononga imbi se Pita niringila. Oma liltingili akumu olonga kou-kongono seringili kanumu. 19Aku siku seko moloringili kanopa nimbale: “Na lombili wangili. Oma lingilindu oma lili wale se liku nona mania mundulimbili kinia omama walena omba pelemo mele, pe ‘nanga kongonomo sengelendo nanga ungumu pilku ningu siliku andongele kinia yomboma nanga talapena sukundu ongo molangi.’ nimbu ‘Olo na lombili wale.’ nikiru.” nirimu. 20Aku nirimu kinia pilkuli popenge seko olonga oma lili walema munduku kelko Yesusi lombili puringili.
21Kanu-kinia yu kanga-kolte wiltu pumbale genungulu talo lupa kanorumu, akutolo Seperi malo Jemisi kinia Jemisi genu Jonotolo, lapa Seperi kinia ononga nona andoli sipina sukundu oma lili walema toko tandoko moloringi kanopale olo mangilipale “Na lombili wale.” nirimu. 22Aku nirimu kinia pilkuli olonga lapa Seperi kinia nona andoli sipimu popenge seko munduku kelko Yesusi yu lombili puringili.
Yesusini Kolea Gallilli Disiriki Ungumu Nimba Silipa Andopa Yombo Kuru Torumu Awisili Sepa Peanga Sirimu Semanemo
(4:23-25)
23Kanu-kinia Yesusi kolea Gallilli disiriki sukundu koleamanga pali andopa, yomboma maku toko Pulu Yemonga ungumu pilieringi ulkamanga yomboma ungu-mane sipa, Pulu Yemo nondopa ye nokoli kingimu molopa nokomba mele semane peangamo topa sipa, yombo kuru lupa-lupa torumuma kinia kangina ulu awisili serimuma sepa peanga sirimu.
24Yuni serimu mele semanemo kolea Siria poropinji koleamanga pali anju anju purumu pilkuli ononga yombo kuru lupa-lupa torumu yomboma kinia, mindili lupa-lupa nongo moloringi yomboma kinia, yombomanga konopumanga kuru molko amboloringi yomboma kinia, amu toringi yomboma kinia, kimbu ki kukorumu yomboma ˻pali˼, yu molorumuna mengo oringi kinia yuni ono sepa peanga sirimu. 25Yombo paa awisili yu lombili puringi. Kolea Gallilli disiriki yomboma kinia, ‘Kolea-Awili Rureponga Talo’ niringi kolea yomboma kinia, kolea Judia disiriki lierimu kolea-awili Jerusalleme yomboma kinia, kolea Judia sukundu lierimu we-koleamanga moloringi yomboma kinia, no Jodane nekendo koleamanga yomboma kinia, paa awisili yu lombili puringi.
Valgt i Øjeblikket:
Mateyu 4: ubuA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 1998, Wycliffe Bible Translators, Inc. All rights reserved.
