Ujuni 3
3
Adam na Ewa badookana du uwoorta wi Eden
1Upula ubi wo unkguuradaanuŋ ţi ŋko ŋi uţeeh bŧi ŋi Naşibaţi Nawat Kabuka apaşuŋ. Uji na ñaaţ : « Kë Naşibaţi aji nawut kade nin pko ploŋ ţi mnko mi uwoorta ? »
2Kë ñaaţ aŧeema aji : « Ŋhinan kade mnko mi uwoorta. 3Kë bko banwooŋ ţi pŧoof pi uwoorta, Naşibaţi aji ŋkeţ woli ŋban ba, këme ade ba. »
4Kë upula uŧeema aji : « Nin ! Naankkeţ ! 5Naşibaţi ame kë unuur wi nakdeeŋ bko mënţ, këş ki nan kahaabëşa naşë nawo ji a#3.5 Nawo ji a : Baloŋ baji başibaţi., name bnuura na buţaan. »
6Ñaaţ awin kë bko baka plil pde, anuura ţi këş, abot awo bko banjaaŋ bawul uşal unŧuŋa. Amar wal mënţ pko ploŋ ţi bko mënţ ade, akak awul ayinul, anwooŋ na a, kë adee. 7Wal mënţ kë këş kaşë haabëşa na baka kë bame hënkuŋ kë bawo byişu. Bajej itoh yi bko bi bajaaŋ bado bfig aşiir awunna ŋleef.
8Na utaakal, uyook ulil ukob, kë Naşibaţi Nawat Kabuka aşë pën ptar ihoţ, ñiinţ na ñaaţ baŧiinka aşë mena ţi mnko mi uwoorta. 9Naşibaţi Nawat Kabuka adu ñiinţ aji : « Iwo ţuŋ ba ? »
10Kë aŧeema aji : « Dŧiink kë ikpoş ţi uwoorta kë nlënki ţiki dwo byişu, aya amena. » 11Kë akak aji na a : « In aţupiiŋ aji iwo byişu ? Ikeer ade bko bi nneenaniiŋ pde ! »
12Kë ñiinţ aji na a : « Ñaaţ i iţuuŋ kë añogën amaruŋ pko ţi bko buŋ awulën, kë ndee ! » 13Kë Naşibaţi Nawat Kabuka aşë ji na ñaaţ : « We wi idoluŋ hënk ? » Kë aŧeem aji : « Upula uguurnuŋ, kë nde ba. » 14Kë Naşibaţi Nawat Kabuka aşë ji na upula : « Jibi idoluŋ uko mënţ,
Ikfëpaniiŋ ţi ŋnŧaam ŋi katoh bŧi
na ŋko ŋi uţeeh bŧi.
Ido kapoşna kayiŋ kabot kade mboş
ŋnuur bŧi ŋi ubida wi nu.
15Dţu bşoorad ţi iwi na ñaaţ,
ţi pntaali pi nu na pi nul.
Baluŋ kanantlu bkow,
kë iwi, iluŋ katib baka ţi pşoñ. »
16Naşibaţi Nawat Kabuka akak aji na ñaaţ :
« Dluŋ kaţu'u ţi unoor uweek woli ibuk,
iluŋ kahaj woli ibuk.
Uŋal wi nu uluŋ kado kawuuku du ayinu
ado kaţu'u pdo uko wi aŋaluŋ. »
17Naşibaţi Nawat Kabuka aji na ñiinţ :
« Jibi iŧiinkuŋ uţup wi aharu,
ade bko bi mbiiŋ aneenanu pde,
iţu mboş manfëpana !
Ido kaji khaj maakan kaba kahinan kapënan ţi ma uko ude
ŋnuur bŧi ŋi ubida wi nu.
18Mboş mando kawulu iyiw,
ibot ido kade ŋdeey ŋi uţeeh.
19Ujënk wi nu
wi wi ikluŋ kado kadeena
te wal wi ikluŋ kakak du mboş mi ipënnuŋ
ţiki iwo ufuuş
akuţ aluŋ kakak du ufuuş. »
20Adam, ñiinţ, aţu aharul katim ki « Ewa#3.20 Ewa : Ţi uhebërë uwooŋ Najeb. » ţiki awooŋ anin bañaaŋ bŧi.
21Naşibaţi Nawat Kabuka ado Adam na aharul imişa yi injan awoharan baka. 22Wi wi aşaaŋ aji : « Hënkuŋ ñaaŋ akak ji nja, kame bnuura na buţaan ! Awutan hënkuŋ katar kañen, kamar kak ţi bko bi ubida kakaana ubida wi mnţo ! » 23Kë Naşibaţi Nawat Kabuka aşë dooka ţi uwoorta wi Eden ado kajaar mboş mi bapënanaanuluŋ. 24Wi adookuluŋ aşë ţu ŋwanjuŧ ŋi bajaaŋ bado kerubim kë ŋakyeŋ du umbaŋ wi umayar unuur wi uwoorta, na kakej ki bdoo kankdoluŋ ji kabëntabën, kayeŋna bgah byaani du bko bi ubida.
Valgt i Øjeblikket:
Ujuni 3: knf
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2014, Wycliffe Bible Translators, Inc. in cooperation with Le Groupe CIM-TBM, Senegal