Yuh 6

Zuŋta Yesu ta skwa zay ta mnduha dəmbuʼ hutaf

Mat 14:13-21, Mak 6:30-44, Luk 9:10-17

1Tahula tsaya, ka sliʼaftá *Yesu ka laghwi ta sana ɓla tsa ghwa Galili ta hgə lu ka Tiberyad ya guli. 2Ka sliʼaftá dəmga rutut mista ni nghər həŋ ta mazəmzəm, ka mbamba gwal kul ɗughwanaku. 3Ka ŋlaghatá Yesu ta ghwá ka nzagata hada kawadaga nda duhwalha ni. 4Tsaw ndusa fitika skala *Pak ta nzakway ka skala la *Yahuda. 5Kəʼa ka Yesu klaŋtá ghəŋ ka nghadapta ná, rutututa dəmga ta lagha da tsi. Kaʼa mantsa: « Ga dzaʼa skwakta mu ta buradi ŋa zunustá na ndəghata mnduha na? » ka Yesu nda Filip. 6Ŋa tsakwasla gwaɗa da tsi kəl tsi ka mnanata mantsa, kabga nda sna tsatsi ta skwi dzaʼa tsi magay. 7Ka Filip nda tsi mantsa: « Dər tseda vagha mnduha his dərmək#6:7 Ngha ta Mata 20:2. ta maga slna klaf lu ŋa dzawaktá buradi nda tsi ná, slaghu a dər ŋa valaŋtá həŋ kiʼa kiʼa wu, » kaʼa nda tsi. 8Ka sani mataba duhwalha ni ta nzakway ka Andre zwaŋama ni ma Simuŋ *Piyer nda tsi mantsa: 9« Mamu sana zwaŋ hadna nda buradi hutaf nda tsulhwa zwana klipi his da tsi, tsaw ŋa slafta ka wu mataba ndəghata mnduha manda na na? » kaʼa. 10Ka Yesu mantsa: « Mnanawa mna ta həŋ ka nza nzata həŋ nda nza nza, » kaʼa. Tsaw mamu ɗyatá kuzuŋ ksif ma tsa vli ya, ka nzanzaftá mnduha ta maga dəmbuʼ hutaf tida. 11Ka hlaftá Yesu ta tsa buradiha ya, ka rfanaghatá tsi ta Lazglafta ta ghəŋa ni, ka daganaftá tsi ta tsa mnduha ta nzaku ya. Ka daganaftá tsi ta tsa klipiha ya ta həŋ guli manda ya ta kum həŋ. 12Manda babaghawta mnduha, « Tskafwa paɗakwa ni yaha da badzuta, » ka Yesu nda duhwalha ni. 13Ka tskaftá həŋ, ka ndaghanaftá həŋ ta ghwanak ghwaŋpəɗ his nda pɗakwa tsa buradi hutaf ya, tahula babaghawta taŋ demdem. 14« Nana mndu na vərɗa anabi dzaʼa sagha ta ghəŋa haɗik mnə lu kay ya, » ka tsa mnduha ta nghaŋtá mazəmzəm maga Yesu ya.

15Tsatsafta Yesu kazlay: Dzaʼa sagha sa lu da ksafta nda mbraku ŋa nzakwa ni ka mgham kəʼa, ka kɗiŋta Yesu ta ŋləglaghata ta ghwá.

Mbaɗay Yesu ta mbaɗa ta imi

Mat 14:22-33; Mak 6:45-52

16Magatá hawu, ka sliʼagatá duhwalha ni ta wa drəf. 17Ka sliʼadamtá həŋ da kwambalu ŋa tsughwaɗa drəf ŋa dzaʼa da luwa Kafarnahum. Nda ghada kuzatá vli, ta vradagha a *Yesu slanaghatá həŋ wa. 18Tata ndru həŋ, ka sliʼavaftá falak dagala katakata, ka kapatsaʼuwaku drəf. 19Swadap swa duhwalha Yesu ta kwambalu ta maga meli hutaf ka mkuʼ a tsi, ka nghaŋtá həŋ ta Yesu ta mbaɗa ta drəf ta ndusadaghata ta vata kwambalu, ka ksaftá zləŋ ta həŋ. 20« Iʼi ya tane! Ma zləŋ kuni ta zləŋ! » ka Yesu nda həŋ. 21Si ta kumay həŋ ta klamta da kwambalu sizlay, gi nda ɓhadaghata kwambalu da tsa vli ta dzaʼa həŋ ya.

Zbay dəmga ta Yesu

22Ga mahtsima ni, ka havaktá tsa mnduha ta nzaku ta wa drəf ya kazlay: Turtuktuk kwambalu si ta lagha da tsa vli ya kəʼa. Graf gra həŋ guli kazlay: Lam a *Yesu kawadaga nda duhwalha ni dida wu kəʼa. Nda ghəŋa taŋ laghwa duhwalha ni. 23Ma va tsa fitik ya, ka sliʼaftá sana kwambaluha ma luwa Tiberiya, ka ɓhadaghatá həŋ ndusa nda tsa vli kəl Mgham Yesu ka rfanaghatá Lazglafta ta ghəŋa buradi, ka zutá mnduha ya kay. 24Nghay mnduha ná, haɗ Yesu hada wu, haɗ duhwalha ni hada guli wu, ka sliʼadamtá həŋ da tsa kwambalu ya ka laghu da luwa Kafarnahum da zba Yesu.

Yesu ná, ɗafa hafu ya

25Ka ɓhadaghatá həŋ ka zbə həŋ, ka slanaghatá həŋ ta wa sana ɓla tsa drəf ya. « Maləma ɗa! Yawu saghwa ka da hadna kay? » ka həŋ nda tsi. 26Ka *Yesu nda həŋ mantsa: « Kahwathwata ka yu ta mnaghunata, ta zbə kabga vəl nghaŋta ghuni ta mazəmzəm a kuni ta iʼi wa. Ta zbə kabga zuta ghuni ta buradi, ka baghaftá kuni, kuni ta iʼi. 27Ma ksə kuni ta slna ŋa skwa zay dzaʼa ɓadzuta. Ŋavawa ŋa ka maga slna ŋa skwa zay ta nzəɗavata dzaʼa vlaghunatá hafu ŋa kɗekedzeŋ. Tsa skwa zay ya ná, *Zwaŋa mndu dzaʼa vlaghunata, kabga ta tsatsi thafta Da ta ŋizla vlaŋta ni ta mbraku, » kaʼa nda həŋ. 28Ka həŋ nda tsi mantsa: « Nahgani dzaʼa aŋni magay ŋa kɗiŋtá magatá slna Lazglafta na? » ka həŋ. 29Ka Yesu nda həŋ mantsa: « Zlghafta ghuni ta mndu ya ghunaga tsi, na slna ya ta kzlə Lazglafta ta maganata ghuni, » kaʼa. 30Ka həŋ mantsa: « Mndərga wati mazəmzəm laviŋ ka ta magaŋnata ŋa nghaŋta ŋni, kada zlghafta ŋni ta kagha na? Wati slna dzaʼa ka magata na? 31Zu za dzidzíha ŋni ta *Manna ma mtak. Manda ya nda vinda na: “vlaga vla ta buradi daga ta luwa#6:31 Ngha ta Sabi 16:13-15, 31. ŋa taŋ, ŋa zay taŋ,” » ka həŋ nda tsi. 32Ka Yesu nda həŋ mantsa: « Kahwathwata ka yu ta mnaghunata, Musa a ta vlaghunatá buradi ta saha ta luwa wa, Da ɗa ta vlatá buradi ta saha ta luwa. 33Tsa Buradi vlaga Lazglafta ya ná, tsa ta saha ta luwa ta vla hafu ŋa mnduha ta ghəŋa haɗik yeya, » kaʼa nda həŋ. 34Ka həŋ mantsa: « Mghama ɗa! gɗa gɗa ta vlaŋnatá mndərga tsa buradi ya, » ka həŋ.

35Ka Yesu nda həŋ mantsa: « Iʼi buradi ta vla hafu. Ka sagha sa mndu da iʼi, walglaŋta a maya ta kuzlaŋta wa. Ka zlghaf zlgha mndu ta iʼi, walglaŋta a ndala ta kuzlaŋta wa. 36Wya mnaghuna mna yu, nda ngha kuni ta iʼi, ka kwalaghutá kuni ta zlghaftá iʼi. 37Inda gwal vliha Da, dzaʼa sagha sa həŋ da iʼi. Haɗ iʼi guli dzaʼa zlaŋtá mndu ya ta sagha da iʼi mabli wa. 38Sa a iʼi ta luwa ŋa maga skwi ta kum yu wa. Sasa iʼi ŋa maga skwi ta kum mndu ta ghunigihata. 39Skwi ta kum mndu ta ghunigihata ná, kwala ɗa kul zlanaghutá inda gwal vliha tsi, ŋa sliʼaganapta ɗa ta həŋ baɗu kɗakwa ghəŋa haɗik. 40Wya skwi ta kum Da ɗa, dər wati ma mndu ta nghaŋtá zwaŋ ka zlghaftá tsi, nda mutsa hafa ni ŋa kɗekedzeŋ. Dzaʼa sliʼaganapsliʼa yu baɗu kɗakwa ghəŋa haɗik, » kaʼa.

41Ka ruruŋwaku la *Yahuda ta ghəŋa ni, kabga mnay ni kazlay: Iʼi buradi ta saha daga ta luwa kəʼa. 42« Tsatsi a Yesu zwaŋa Yusufu kay wu ra? Tsatsi a na snaŋ amu ta i da ni nda ma ni na ra? Ta ghəŋa wu ta mna tsi kazlay: Sa daga ta luwa yu kəʼa ɓa? » ka həŋ. 43Ka Yesu nda həŋ mantsa: « Zlanawa zla ta ruruŋwaku mataba ghuni, 44haɗ mndu dzaʼa laviŋtá sagha da iʼi, ka ghunagagha a Da ta ghunigihata da iʼi wa. Iʼi, dzaʼa sliʼaganapsliʼa yu ta tsa mndu ya baɗu kɗakwa ghəŋa haɗik. 45Wya skwi vindaf la anabi: “Dzaʼa taghanaf tagha Lazglafta#6:45 Ngha ta Isaya 54:13. ta skwiha ta həŋ.” Dər wa ta snay, ka zlghaftá tsa skwi ta tagh Lazglafta ya, dzaʼa sagha sa tsa mndu ya da iʼi. 46Va a tsaya ta mnay kazlay: Nda ngha tsa mndu ya ta Da nda ira ni kəʼa wu, ba mndu ta saha da Lazglafta yeya nda ngha ta Da nda ira ni. 47Kahwathwata ka yu ta mnaghunata, mndu ta zlghaftá iʼi, nda mutsa hafa ni ŋa kɗekedzeŋ. 48Iʼi buradi ta vla hafu. 49Zu za dzidzíha ghuni ta manna ma mtak, kulam nda tsa, rwu rwa inda taŋ. 50Wana buradi ta saha daga ta luwa hadna. Mndu ta zay, mtəta a wa. 51Iʼi buradi ta vla hafu ta saha daga ta luwa. Kata zay mndu ta tsa buradi ya, dzaʼa nzaku tsa mndu ya nda hafu ŋa kɗekedzeŋ. Tsa buradi ta vlə yu ya ná, sluʼuvgha ɗa ya. Dzaʼa vlay yu, kada nzakwa mnduha ta ghəŋa haɗik nda hafu, » ka Yesu nda həŋ.

52Ka həŋ mantsa: « Waká na mndu na dzaʼa vlamatá sluʼuvgha ni ŋa zay na? » ka la Yahuda zlghanaftá ta ghəŋa ni. 53Ka Yesu nda həŋ mantsa: « Kahwathwata ka yu ta mnaghunata, ka za a kuni ta sluʼuvgha Zwaŋa mndu, sa a kuni ta usa ni wu katsi, haɗ hafu ɗekɗek ma kaghuni wa. 54Mndu ta za sluʼuvgha ɗa, ta sa usa ɗa, mamu hafu ŋa kɗekedzeŋ ma tsa mndu ya. Dzaʼa sliʼaganapsliʼa yu ta tsa mndu ya baɗu kɗakwa ghəŋa haɗik. 55Vərɗa skwa zay ná, sluʼuvgha ɗa ya. Vərɗa skwa say guli ná, usa ɗa ya. 56Mndu ta za sluʼuvgha ɗa, ta sa usa ɗa ná, ma iʼi ta nzamta tsa mndu ya, ma tsa mndu ya nzamta iʼi guli. 57Tsa Da ta ghunigihata ya ná, nda hafu mida. Nda tsatsi ta nzakwa iʼi nda hafu. Mantsa ya guli ka ta zay mndu ta iʼi, dzaʼa nza nza nda hafu. 58Wana buradi ta saha daga ta luwa hadna. Nza a manda ŋa dzidzíha ghuni ta zutá manna ka rwutá həŋ ya wa. Mndu ta za na buradi na ná, dzaʼa nza nza nda hafu ŋa kɗekedzeŋ, » ka Yesu nda həŋ. 59Ta tagh tsi ta skwi ma həga tagha skwa la Yahuda ma Kafarnahum, mna Yesu ta tsa gwaɗa ya.

Zlanavata sanlaha ma duhwalha ni ta Yesu

60Ka sanlaha mataba duhwalha ni snaŋər həŋ ta tsa gwaɗa ya mantsa: « Ɗukɗukwa na gwaɗa na, wa dzaʼa laviŋtá snay na? » ka həŋ. 61Ɗaslafta *Yesu ma vgha ni kazlay: Ta ruruŋwaku duhwalha ni ta ghəŋa tsa tagha skwi ya kəʼa, « nda ŋəra ŋuɗufa kaghuni guli ra? 62A ka tsa nghaŋ kuni ta *Zwaŋa mndu ta ŋlu da vli si hada tsi ghalya, waká ŋuɗufa ghuni dzaʼa magay tama? 63Sulkuma Lazglafta ta vla hafu, haɗ sana skwi laviŋ mnda səla ta magata wa. Na gwaɗa mnaghuna yu na ná, Sulkum nda hafu ya. 64Tsaw mataba ghuni ná, mamu sanlaha kul zlghafta ɗekɗek, » ka Yesu nda həŋ. Tsaw nda sna Yesu daga zlrafta ni ta gwal kul zlghafta ɗekɗek, nda mndu ya dzaʼa skwapta tani. 65Ka Yesu sganaghata mantsa: « Tsaya kəl yu ka mnay ŋa ghuni kazlay: Haɗ mndu dzaʼa laviŋtá sagha da iʼi, ka ghunak a Da wu kəʼa ya, » kaʼa.

66Tahula mnata Yesu ta tsa gwaɗa ya, nda ndəgha sanlaha ma duhwalha ni ta vraghuta, ka kwal kul dzaʼagəlta mista ni. 67Ka Yesu mantsa: « Ki kaghuni, sliʼa a kaghuni guli ra? » kaʼa nda tsa gwal ghwaŋpəɗ his ya. 68Ka Simuŋ *Piyer mantsa: « Mghama ɗa! Da wa ta dzaʼa ŋni? Ya wana mamu gwaɗa hafu ŋa kɗekedzeŋ da kagha. 69Zlghaf zlgha ŋni, nda sna ŋni guli kazlay: *Kristi mndu nda ghuɓa ta saha daga da Lazglafta kagha kəʼa, » kaʼa nda tsi. 70Ka Yesu mantsa: « Iʼi a ta ɗagaptá na kaghuni ghwaŋpəɗ his na ra? Nziya nza tsi ná, ka halaway ya turtuk mataba ghuni, » kaʼa nda həŋ. 71Ta ghəŋa Zudas Iskaryut zwaŋa Simuŋ ta mna tsi ta tsaya kabga tsatsi mndu dzaʼa skwapta, dər má tekw tsatsi mataba tsa gwal ghwaŋpəɗ his ya.

Valgt i Øjeblikket:

Yuh 6: xed

Markering

Del

Kopiér