Yuh 2

Kla makwa ma Kana

1Ta mahkəna fitik, ka slatá skala kla makwa ma luwa Kana ta haɗika Galili. Tsaw lagha la ma ni ma *Yesu da tsa vla skala kla makwa ya. 2Hgadagha hga lu ta i Yesu nda duhwalha ni guli da tsa vla skala kla makwa ya. 3Ka kɗutá ima inabi. Ka ma ni nda Yesu mantsa: « Nda kɗa ima inabi da həŋ, » kaʼa. 4« Nahgani ŋa gha nda iʼi katək ní a ma! Ta maga a fitika ɗa wu, » ka Yesu nda tsi. 5« Ka maga kuni ta inda skwi dzaʼa mnaghunata tsi, » ka ma ni ma Yesu nda kwalvaha. 6Tsaw ma tsa vli ya, mamu wudaha tsatsaf lu nda palaha ta za litər tghas mbsak tghas mbsak sanlaha, dərmək nda hisambsak hisambsak sanlaha, ta kəl la *Yahuda ka ghuɓa səlaha taŋ. 7« Ndaghanafwa ndagha ta ya wudaha ya nda imi, » ka Yesu nda həŋ. Ka ndaghanaftá həŋ teʼteʼ. 8« Ndana tama, taŋwatá ta mndu ta wa skwa zay, » ka Yesu nda həŋ, kataŋtá həŋ. 9Tapanata tsa mndu ta wa skwa zay ya ta tsa imi mbəɗanaf lu ka ima inabi ya ná, zɗakwa skwi a va tsa wu, sna a guli ka sagha ga tsa ima inabi ya wa. Ta ghəŋa tsa gwal ta zakamtá tsa imi yeya nda sna. Ka hgaŋtá tsi ta zəʼala makwa. 10Kaʼa nda tsi mantsa: « Tiŋəl ima inabi ya zɗa ta dgə lu ŋa mnduha, kada vla ya leghlegha tahula baghuta taŋ ná, ka laghwa kagha ɗifanatá ya zɗa, ka zlra klagapta ndana? » kaʼa nda tsi. 11Tsaya taŋtaŋa mazəmzəm maga Yesu ma luwa Kana ta haɗika Galili. Mantsa ya maraŋta tsi ta glakwa ni. Ka faftá duhwalha ni ta ghəŋ tida. 12Tahula tsa, ka sliʼaftá tsi ka lagha da luwa Kafarnahum kawadaga nda i ma ni nda zwana ma ni, nda duhwalha ni tani, ka zatá həŋ ta fitik tsəɓakw hada.

Ghzlay Yesu ta gwal ta dzawa skwi ma həga Lazglafta

Mat 21:12-13, Mak 11:15-17, Luk 19:45-46

13Ndusadaghata fitika skalay la *Yahuda ta *Pak, ka lafi *Yesu da Ursalima. 14Ɓhadaghata ni, ka lam tsi da daɓa həga Lazglafta ka slanaghatá tsi ta mnduha ta dzawa slaha nda tuwakha, nda ghərbuʼha, nda gwal mbaɗa tsedi ta nzaku ta vata tabəla taŋ hada. 15Ka klaftá tsi ta tɓaŋ ŋa krupi, ka ghəzlagaptá tsi ta mnduha demdem ma tsa daɓa həga Lazglafta ya, nda tuwakha tani, nda slaha tani. Ka wutsidiŋtá tsi ta tseda gwal mbəɗu, ka zlambidiŋtá tabəla taŋ. 16« Hliŋwa na skwiha na hadna, ma niŋ kuni ta həga Da ɗa ka həga mbəɗa dzvu, » kaʼa nda gwal dzawa ghərbuʼha. 17Ka havaktá duhwalha ni ta skwi ya nda vinda ma gwaɗa Lazglafta tazlay: « Ɗvaf ɗva#2:17 Ngha ta Zabura 69:10. yu ta həga gha, manda vu ta dra tsi ta iʼi, » kaʼa ya 18« Mndərga wati ma mazəmzəm dzaʼa ka magata, ŋa maraŋtá skwi kəl ka ka maga mndəra skwi manda na na? » ka la Yahuda zlraftá gwaɗa nda tsi. 19« Tasiŋwatasa ta na həga Lazglafta na, dzaʼa bəglaf ba yu ma fitik hkən, » ka Yesu nda həŋ. 20« Ta skwi vaku fwaɗ mbsak mkuʼ mida za lu ta ba na həga Lazglafta na ná, ma fitik hkən dzaʼa bafta yu ri wa kəʼa? » ka la Yahuda nda tsi. 21Tsaw tsa həga ta gwaɗ Yesu ya ná, ta gwaɗ ta ghəŋa ghəŋa ni tsatsi. 22Tsaya kəl duhwalha ni tahula sliʼagaptani ma mtaku, ka havaktá skwi ya mna tsi. Ka zlghaftá həŋ ta skwi ya nda vinda ma gwaɗa Lazglafta, nda gwaɗa Yesu ta mnata tani.

Nda sna Yesu ta skwi ma ŋuɗufa mnduha

23Ma fitika nzakwa *Yesu ma Ursalima ta skala *Pak, nda ndəgha gwal ta zlghafta nghər həŋ ta mazəmzəmha ta mag tsi. 24Lam a tsaya da fəlma Yesu wu, kabga nda sna ta həŋ tsiɗiɗ. 25Psa a ta mnanata mndu ta gwaɗa ta ghəŋa nzakwa sana mndu wu, kabga nda sna tsatsi ta skwi ma ŋuɗufa mndu.

Valgt i Øjeblikket:

Yuh 2: xed

Markering

Del

Kopiér