Salm 33:10-22
Salm 33:10-22 Beibl Cymraeg Newydd Diwygiedig 2004 (BCND)
Gwna'r ARGLWYDD gyngor y cenhedloedd yn ddim, a difetha gynlluniau pobloedd. Ond saif cyngor yr ARGLWYDD am byth, a'i gynlluniau dros yr holl genedlaethau. Gwyn ei byd y genedl y mae'r ARGLWYDD yn Dduw iddi, y bobl a ddewisodd yn eiddo iddo'i hun. Y mae'r ARGLWYDD yn edrych i lawr o'r nefoedd, ac yn gweld pawb oll; o'r lle y triga y mae'n gwylio holl drigolion y ddaear. Ef sy'n llunio meddwl pob un ohonynt, y mae'n deall popeth a wnânt. Nid gan fyddin gref y gwaredir brenin, ac nid â nerth mawr yr achubir rhyfelwr. Ofer ymddiried mewn march am waredigaeth; er ei holl gryfder ni all roi ymwared. Y mae llygaid yr ARGLWYDD ar y rhai a'i hofna, ar y rhai sy'n disgwyl wrth ei ffyddlondeb, i'w gwaredu rhag marwolaeth a'u cadw'n fyw yng nghanol newyn. Yr ydym yn disgwyl am yr ARGLWYDD; ef yw ein cymorth a'n tarian. Y mae ein calon yn llawenychu ynddo am inni ymddiried yn ei enw sanctaidd. O ARGLWYDD, dangos dy ffyddlondeb tuag atom, fel yr ydym wedi gobeithio ynot.
Salm 33:10-22 Beibl William Morgan - Argraffiad 1955 (BWM)
Yr ARGLWYDD sydd yn diddymu cyngor y cenhedloedd: y mae efe yn diddymu amcanion pobloedd. Cyngor yr ARGLWYDD a saif yn dragywydd; meddyliau ei galon o genhedlaeth i genhedlaeth. Gwyn ei byd y genedl y mae yr ARGLWYDD yn DDUW iddi; a’r bobl a ddetholodd efe yn etifeddiaeth iddo ei hun. Yr ARGLWYDD sydd yn edrych i lawr o’r nefoedd: y mae yn gweled holl feibion dynion. O breswyl ei drigfa yr edrych efe ar holl drigolion y ddaear. Efe a gydluniodd eu calon hwynt: efe a ddeall eu holl weithredoedd. Ni waredir brenin gan liaws llu: ni ddianc cadarn trwy ei fawr gryfder. Peth ofer yw march i ymwared: ac nid achub efe neb trwy ei fawr gryfder. Wele, y mae llygad yr ARGLWYDD ar y rhai a’i hofnant ef, sef ar y rhai a obeithiant yn ei drugaredd ef; I waredu eu henaid rhag angau, ac i’w cadw yn fyw yn amser newyn. Ein henaid sydd yn disgwyl am yr ARGLWYDD: efe yw ein porth a’n tarian. Canys ynddo ef y llawenycha ein calon, oherwydd i ni obeithio yn ei enw sanctaidd ef. Bydded dy drugaredd, ARGLWYDD, arnom ni, megis yr ydym yn ymddiried ynot.