Eseia 54:14-17
Eseia 54:14-17 Beibl Cymraeg Newydd Diwygiedig 2004 (BCND)
a byddi wedi dy sylfaenu ar gyfiawnder; byddi'n bell oddi wrth orthrymder, heb ofn arnat, ac oddi wrth ddychryn, na ddaw'n agos atat. Os bydd rhai yn ymosod arnat, nid oddi wrthyf fi y daw hyn; bydd pwy bynnag sy'n ymosod arnat yn cwympo o'th achos. Edrych, myfi a greodd y gof, sy'n chwythu'r marwor yn dân, ac yn llunio arf at ei waith; myfi hefyd a greodd y dinistrydd i ddistrywio. Ond ni lwydda unrhyw arf a luniwyd yn dy erbyn; gwrthbrofir pob tafod a'th gyhudda mewn barn. Dyma etifeddiaeth gweision yr ARGLWYDD, ac oddi wrthyf fi y daw eu goruchafiaeth,” medd yr ARGLWYDD.
Eseia 54:14-17 beibl.net 2015, 2024 (BNET)
Byddi wedi dy sylfaenu ar gyfiawnder, a fyddi di ddim yn cael dy orthrymu. Fydd dim rhaid i ti fod ag ofn, a fydd dychryn ddim yn dod yn agos atat ti. Os bydd rhywun eisiau ymladd hefo ti, nid fi fydd tu ôl i hynny: bydd pwy bynnag sydd eisiau ymladd hefo ti yn syrthio, am mai ti wyt ti. Os fi wnaeth greu’r gof sy’n chwythu’r tân marwor gyda’i fegin, i wneud offer ar gyfer ei waith; fi hefyd sy’n creu’r dinistriwr i ddinistrio. Ond fydd yr arfau sydd wedi’u llunio i dy daro di ddim yn llwyddo, a bydd y rhai sy’n codi i dystio yn dy erbyn yn cael eu condemnio. Dyna ydy etifeddiaeth gweision yr ARGLWYDD, a’r hyn dw i wedi’i wneud iddyn nhw.” –yr ARGLWYDD sy’n dweud hyn.
Eseia 54:14-17 Beibl William Morgan - Argraffiad 1955 (BWM)
Mewn cyfiawnder y’th sicrheir: byddi bell oddi wrth orthrymder, canys nid ofni; ac oddi wrth ddychryn, canys ni nesâ atat. Wele, gan ymgasglu hwy a ymgasglant, ond nid ohonof fi: pwy bynnag ohonot ti a ymgasglo i’th erbyn, efe a syrth. Wele, myfi a greais y gof, yr hwn a chwyth y marwor yn tân, ac a ddefnyddia arf i’w waith; myfi hefyd a greais y dinistrydd i ddistrywio. Ni lwydda un offeryn a lunier i’th erbyn; a thi a wnei yn euog bob tafod a gyfodo i’th erbyn mewn barn. Dyma etifeddiaeth gweision yr ARGLWYDD, a’u cyfiawnder hwy sydd oddi wrthyf fi, medd yr ARGLWYDD.