MATIUS 17
17
Pekaliu layen Yesus
(Un te neng Markus 9.2-13; Lukas 9.28-36)
1Nem tau ʹo ina Yesus alaʹ Peterus, Yakup, ngan Yaya iaʹ cenganak Yakup, penco tai ie ngkin ida tai tengen le kusun ca mudung iaʹ mpau. 2Dalau re naʹat Yesus, tai pekaliu ne diseʹ layen ne, ngan dema ne seʹ penyilung nge koʹ baʹan seʹ mata tau are. Ngan sapai ie tai puteʹ koʹ baʹan seʹ serema tau are. 3Dalau ina sulo re telu diaʹ bayaʹ katuk ke taʹan Ilia ngan Musa pisiu ngan Yesus. 4Un dau Peterus neng Yesus: “Amai, tiga ne ilu ngelineʹ kini. Buk koʹ ubaʹ, akeʹ uyan telu re lepau. Ca ukoʹ Amai, ca ukoʹ Musa, ngan ca laʹa ukoʹ Ilia.”
5Dalau Peterus pisiu pekina, idi kenai ca abun iaʹ dema ngelingau ida. Penco un dau ca isiu cen dalau abun ina: “Ini ne iaʹ atek Anak keʹ iaʹ pengemalaʹ keʹ, iaʹ sihoʹ neng pengubaʹ keʹ. Ngeringa ne dau ue.”
6Dalau re diaʹ bayaʹ katuk Yesus kenahan dau isiu ina, penco re pengkup pa silung nte abeʹ kaʹ tanaʹ, moʹ de bisau laleʹ. 7Sulo kenai Yesus ngkang ida, un dau ue: “Beteʹ ne, ayen ncem bisau.” 8Kenai re beteʹ, kun nte naʹat abeʹ ne un aheʹ ngan Yesus pit ia tengen le.
9Dalau kenai re puno cen mudung ina, un dau Yesus cuk ida: “Ayen ncem peletoʹ ke badaʹ a me aheʹ aheʹ pe, seʹ puyan iaʹ ikem lepa taʹan idai, pa kenai Anak Sio ini beteʹ cen patai ʹo.”
10Un dau diaʹ bayaʹ katuk Yesus lemutu ia: “Moʹ inu diaʹ guru Katuk Adet Musa kuma ha Ilia iaʹ kenai luhaʹ ading ʹo?”
11Un dau Yesus mipa ida: “Lan te, Ilia iaʹ ading nai, ngan ia iaʹ petenup ketoʹ naʹan inu. 12Akeʹ badaʹ mikem, lepa ne Ilia nai, ngan abeʹ dulu un nyituk ia. Un sepuʹo bang seʹ de uyan pengubaʹ kimet de tengen le neng ia. Koʹ baʹan puyan nte taro ia are, pekina lete ida ke taro neng Anak Sio ini ʹo.”
13Ina le tai diaʹ bayaʹ katuk ke tisen ban Yesus pisiu ngan nte neng puyan Yaya Guru Batis.
Yesus paget ca anak iaʹ bali nelasek
(Un te neng Markus 9.14-29; Lukas 9.37-43a)
14Tegoʹ nai re ngeliwet palaʹ kelunan kadoʹ dina, sulo kenai ca laki palaʹ Yesus ngan sutlep kaʹ tena ia. 15Un dau ue: “Amai, lesau ne anak keʹ ading, moʹ o sepen. Baran laleʹ le seʹ e ngan sepen ne ne. Tahaʹ palai ia laboʹ kaʹ luten ngan kaʹ sungai pe. 16Lepa ne akeʹ tai ngkin ia palaʹ diaʹ bayaʹ katuk koʹ. Mpi re senteng ke paget ia.”
17Un dau Yesus mipa: “E kelunan diaʹ abeʹ un pengelan, ngan salaʹ kimet. Kudaʹ majan nceʹ ke ngelineʹ ngan ncem tupe? Ngan kudaʹ majan nceʹ ke pedenaʹ ngan ncem? Nai ne ngkin anak ina kini palaʹ akeʹ.” 18Sulo Yesus cuk bali ina tai kelap, penco kenai bali ina kawang cen ia. Dalau ina lete kenai anak ina maget.
19Lepa ina nai diaʹ bayaʹ katuk Yesus palaʹ ia dalau ue tengen le, ngan un dau re lemutu ia: “Moʹ inu meʹ abeʹ un senteng ke pekarap bali ina?”
20Un dau Yesus mipa ida: “Moʹ pengelan ncem tepa. Nawai tiga le. Buk pengelan ncem un koʹ bioʹ ca luang ampeʹ are, senteng ngkem kuma ha neng mudung ini: ‘Paso ne cen ini, tai kina.’ Atek ketai lete mudung ina paso. Mele inu inu pe, senteng ngkem ke uyan ne. [ 21Un sepuʹo bali koʹ baʹan ini are, bang puyan lemameʹ ngan puyan lemalan abeʹ un uman iaʹ senteng ke pekarap ia.]”
Yesus badaʹ laʹa neng puyan ne ke matai ʹo
(Un te neng Markus 9.30-32; Lukas 9.43b-45)
22Tegoʹ ketai diaʹ bayaʹ katuk ke pempun mung kaʹ tanaʹ Galilia, un dau Yesus pisiu ngan nte: “Abeʹ e majan laʹa Anak Sio ini dulu ke mencai ie palaʹ kelunan diaʹ ke lematai ia. 23Un sepuʹo neng iaʹ ketelu tau ue, ia kenai beteʹ numpak mudip laʹa.”
Dalau ina bihe laleʹ ne seʹ diaʹ bayaʹ katuk ke.
Nyuaʹ pupu Umaʹ Palan Allah
24Tegoʹ ketai sabeʹ Yesus ngan diaʹ bayaʹ katuk ke kaʹ lepoʹ Kapernaum, sulo kenai diaʹ alaʹ pupu Umaʹ Palan Allah dina palaʹ Peterus ngan lemutu ia. Un dau re: “Kumpin, un te guru hem naʹ pupu Umaʹ Palan Allah?”
25Un dau Peterus mipa ida: “Un lete.” Dalau tai Peterus kaʹ amin, kena ha ke pisiu, Yesus iaʹ ading pisiu ia, un dau ue: “Simun, kumpin kaʹ kimet coʹ? Aheʹ iaʹ ke naʹ pupu me diaʹ paren neng usun tanaʹ ini? Anak lepoʹ o mo, buk are dulu diaʹ salut de mo?”
26Un dau Peterus: “Dulu diaʹ salut de.”
Un dau Yesus: “Buk ke pekina, anak lepoʹ abeʹ de naʹ pupu ina. 27Naʹ pia pekina, ayen le uyan sakit kimet me kelunan dini. Tai ne ikoʹ lemesi kaʹ leteng te. Neng paʹ atuk iaʹ ading ading ikoʹ alaʹ lemesi ina, un ca liʹap ligit kidi iaʹ senteng man tua ke naʹ pupu Umaʹ Palan Allah ina. Alaʹ ne ligit ina, ngan naʹ a suaʹ pupu tua.”
Dewis Presennol:
MATIUS 17: KNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kenyah New Testament © Bible Society of Malaysia, 1984.