MATIUS 14
14
Puyan ban patai Yaya Guru Batis
(Un te neng Markus 6.14-29; Lukas 9.7-9)
1Dalau ina te Herudis, iaʹ paren tanaʹ Galilia, kenahan dau denga neng puyan Yesus. 2Un dau Herudis palaʹ diaʹ pengelataʹ neng upis ne: “Iaʹ lan ne Yaya Guru Batis ini, nai ie numpak mudip ne ini. Ina ukoʹ o senteng uyan puyan nyingan dini.”
3Lan lete Herudis ina ne iaʹ lepa cuk dulu mapo Yaya ngan lemeka ia, penco meput ia kaʹ dalem amin sepin. Herudis cuk dulu pekina ban tuman Herudias iaʹ leto Pilipus cenganak ke. 4Lemuto Yaya ngenca Herudis, kuma ha: “Abeʹ un teneng ngkoʹ ke pepeto ngan leto ina.” 5Herudis pekimet ubaʹ ke lematai Yaya. Abeʹ e makang moʹ o takut dulu diaʹ kadoʹ, moʹ de kuma Yaya ina ca pegawa Tuhan.
6Tegoʹ dulu nawai tau bulan Herudis nai pempet, dalau ina tai anak leto Herudias kancet neng juma mpun dulu, ngan pebangen tawai Herudis. 7Sulo ho pisiu ngan anak ina kuma ha: “Akeʹ pesantet dau ngan ncoʹ, mele inu iaʹ pengenyat coʹ, akeʹ ke naʹ lete mikoʹ.”
8Moʹ ueʹ e lemejen ia, sulo anak leto ina kuma ha: “Naʹ ne ulu Yaya Guru Batis makeʹ, neng usun ca daya naʹkini lete.”
9Dalau ina meba laleʹ kaʹ tawai Herudis, moʹ lepa ne ia patek dau ngan anak leto ina neng juma kelunan kadoʹ are, ina ukoʹ o cuk dulu naʹ mia bayaʹ dau pengenyat te. 10Pekina ne puyan Herudis cuk dulu ngulep batuk Yaya dalem amin sepin. 11Sulo tai re ngkin ulu Yaya neng usun ca daya kaʹ dalem amin ina are, ngan naʹ a me anak leto ina. Penco ketai anak leto ina ngkin ne me ueʹ e. 12Lepa ina kenai diaʹ bayaʹ katuk Yaya, alaʹ patai ie, sulo tai re masek ia kaʹ liang. Uʹo ina penco tai re badaʹ puyan ina palaʹ Yesus.
Yesus lemakan lema ibu kelunan
(Un te neng Markus 6.30-44; Lukas 9.10-17; Yaya 6.1-14)
13Tegoʹ Yesus kenahan dau denga ina, sulo ho mecin cen ukoʹ o kina neng ca laut, penco tai ie tengen le kukoʹ iaʹ lenga. Un sepuʹo tisen dulu diaʹ kadoʹ, penco tai re mecin lepoʹ de, ngan tai bayaʹ Yesus cen janan lepat. 14Dalau kenai Yesus pejakaʹ cen alut ina, penco ho taʹan kenai ca mpun kelunan kadoʹ. Bioʹ kaʹ pengelesau ue pekimet ida, sulo ho paget diaʹ sakit neng ahang ida.
15Tai tahup ina, nai kun diaʹ bayaʹ katuk Yesus palaʹ ia. Un dau re: “Tai ie tahup ne ini, ngan ukoʹ le kini pe lenga le. Tiga hoʹ cuk kelunan kadoʹ dina tai uleʹ ne, mele inu pe ida tai ngalang lepoʹ diaʹ iʹut dina, ngan tai lemeli penguman mida tengen.”
16Un dau Yesus mipa ida: “Inu iaʹ baʹin nte ketai kelap. Tiga hem tengen lemakan ida.”
17Un dau re mipa ia: “Bang iaʹ ameʹ un, lema re luʹung ruti paun, ngan dua re usa sihai atuk.”
18Un dau Yesus neng ida: “Nai ne ngkin ne makeʹ kini ading.” 19Uʹo ina kun ne cuk kelunan kadoʹ dina madung kaʹ udu metun dina. Sulo ho alaʹ lema luʹung ruti paun ngan sihai atuk dua dina are. Kun ne nekadaʹ kaʹ langit ngan nyuaʹ tiga saheʹ e me Tuhan Allah. Lepa ina kun ne mepeʹ ruti ngan atuk dina, penco naʹ a me diaʹ bayaʹ katuk ke, ngan ida penco patu ue me kelunan kadoʹ dina laʹa. 20Mung nte uman pa beso tekaʹ re. Lepa re uman, tai kun diaʹ bayaʹ katuk Yesus nemo laʹa ruti ngan atuk dina, sangan puloʹ dua ingen kuʹun ban laʹa re. 21Toʹ ban kadoʹ laki diaʹ uman ruti ngan atuk dina un kihoʹ kihoʹ lema ibu usa, tengen pe anak ngan leto.
Yesus masat kempau sungai
(Un te neng Markus 6.45-52; Yaya 6.16-21)
22Lepa ina Yesus cuk diaʹ bayaʹ katuk ke tai kalut, ngan tai pelawat ading neng ia kaʹ dipa leteng ina, jinan ne cuk kelunan kadoʹ dina tai uleʹ. 23Uʹo lepa ha cuk kelunan kadoʹ dina tai uleʹ, sulo tai ie tengen le pukat ca mudung kukoʹ o ke lemameʹ. Tai tahup ina, bang Yesus tengen le ngelineʹ kina. 24Dalau tai alut idai abeʹ kaʹ beluaʹ leteng te, muʹo keligeng ne alut de kuʹun luyak, moʹ bahiu kasa nyelalang ida. 25Dalau tekuʹuk iap, nai Yesus palaʹ ida, masat kempau sungai. 26Dalau diaʹ bayaʹ katuk ke taʹan ia masat kempau sungai, takut kaʹ de ngan bisau. Un dau re lemikaʹ: “Ca bali ina,” kun nte.
27Ngan nyelarai dau Yesus pisiu ida: “Denaʹ ne tawai hem ading. Akeʹ ini. Ayen ncem takut.”
28Penco dau Peterus: “Ahaʹ Tuhan, buk ke lan ne ikoʹ, cuk ne akeʹ masat kempau sungai nai palaʹ ikoʹ.”
29Un dau Yesus mipa: “Nai ne, bau ke.” Sulo Peterus mecin cen alut ina, ngan tai masat kempau sungai palaʹ Yesus. 30Kun Peterus taʹan seʹ bahiu kasa, bisau ne tekaʹ a, nyahin ketai ia lenca. Sulo ho lemikaʹ: “Tuhan, pudip keʹ ading.”
31Penco Yesus mencai ujoʹ o ngan alaʹ ia. Un dau ue neng Peterus: “Adeʹ tepa ban pengelan ncoʹ. Moʹ inu hoʹ iʹut tawai?”
32Tai re dua pejakaʹ kaʹ alut ina, penco tai bahiu ina pekenaʹ. 33Un diaʹ bayaʹ katuk Yesus dina penco re nyelama ia. Un dau re: “Atek lan lete ikoʹ iaʹ Anak Allah.”
Yesus paget kelunan sakit kaʹ lepoʹ Genesarit
(Un te neng Markus 6.53-56)
34Tai re pelawat leteng ina, tai abeʹ kaʹ lepoʹ Genesarit. 35Kina dulu nyituk Yesus, sulo re mengin mung diaʹ sakit teliling lepoʹ ina, ngan ngkin ida palaʹ Yesus. 36Ngan ngelapen dau re nyat apan Yesus pedayo kelunan sakit dina ngkang sada sapai ie iaʹ dadoʹ ina. Ngan mung nte diaʹ ngkang sapai ie penco maget.
Dewis Presennol:
MATIUS 14: KNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kenyah New Testament © Bible Society of Malaysia, 1984.