Genesis 5
5
An mga Kapagarakian ni Adan
(1 Cro. 1:1-4)
1Iyo ini an mga kapagarakian ni Adan. (Kan lalangon nin Dios an katawohan, ginibo niya sindang arog sa saiya. 2Linalang niya sindang lalaki asin babae, benendisyonan, dangan nginaranan, “Katawohan.”) 3Kan syento treynta na an edad ni Adan, nagkaigwa siya nin aking lalaki na arog saiya. Nginaranan niya ining Set. 4Dangan nabuhay pa si Adan sa laog nin otso syentos na taon asin nagkaigwa pa nin ibang aking lalaki saka babae 5bago siya nagadan sa edad na nwebe syentos treyntang taon.
6Kan syento singko na an edad ni Set, nagkaigwa siya nin aking lalaki na iyo si Enos. 7Dangan nabuhay pa si Set sa laog nin otso syentos syeteng taon asin nagkaigwa pa nin ibang mga aki 8bago siya nagadan sa edad na nwebe syentos doseng taon.
9Kan nubentang taon na an edad ni Enos, nagkaigwa siya nin aking lalaki na iyo si Kenan. 10Dangan nabuhay pa siya sa laog nin otso syentos kinseng taon asin nagkaigwa pa nin ibang mga aki 11bago siya nagadan sa edad na nwebe syentos singkong taon.
12Kan setenta na an edad ni Kenan, nagkaigwa siya nin aking lalaki na iyo si Mahalalel. 13Dangan nabuhay pa siya sa laog nin otso syentos kwarentang taon asin nagkaigwa pa nin ibang mga aki 14bago siya nagadan sa edad na nwebe syentos dyes na taon.
15Kan sesenta y singko na an edad ni Mahalalel, nagkaigwa siya nin aking lalaki na iyo si Jared. 16Dangan nabuhay pa siya nin otso syentos treyntang taon asin nagkaigwa pa nin ibang mga aki 17bago nagadan sa edad na otso syentos nubenta y singkong taon.
18Kan syento sesenta y dos na an edad ni Jared, nagkaigwa siya nin aking lalaki na iyo si Enoc. 19Dangan nabuhay pa siya sa laog nin otso syentos na taon asin nagkaigwa pa nin ibang mga aki 20bago nagadan sa edad na nwebe syentos sesenta y dos na taon.
21Kan sesenta y singko na an edad ni Enoc, nagkaigwa siya nin aking lalaki na iyo si Metusela. 22Dangan nabuhay pa siya nin tres syentos na taon sa kaibahan nin Dios asin nagkaigwa pa nin ibang mga aki. 23Nabuhay siya sagkod sa edad na tres syentos sesenta y singkong taon. 24Naglakaw si Enoc sa kaibahan nin Dios dangan nawara siya, huli ta kinua siya nin Dios.
25Kan syento otsenta y syeteng taon na an edad ni Metusela, nagkaigwa siya nin aking lalaki na iyo si Lamec. 26Dangan nabuhay pa siya nin syete syentos otsenta y dos na taon asin nagkaigwa pa nin ibang mga aki 27bago nagadan sa edad na nwebe syentos sesenta y nwebeng taon.
28Kan syento otsenta y dos na an edad ni Lamec, nagkaigwa siya nin sarong aking lalaki. 29Nagsabi siya, “Hale sa dagang isinumpa nin Kagurangnan, an aking ini madara sato nin kaginhawahan sa gabos nyatong kapagalan”; kaya Noe#5:29 NOE: Sa pandangog, an ngaran na ini nakakaarog sa Hebreyong tataramon na kaginhawahan o karangahan. an inginaran niya sa aki. 30Nabuhay pa si Lamec sa laog nin kinyentos nubenta y singkong taon asin nagkaigwa pa nin ibang aki. 31Nagadan siya sa edad na syete syentos setenta y syeteng taon.
32Kinyentos na an edad ni Noe kan siya nagkaigwa nin tolong aking lalaki, si Sem, si Ham asin si Jafet.
Dewis Presennol:
Genesis 5: MBBBIK92
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Marahay na Bareta Biblia © Philippine Bible Society, 1992.