Cakacaka 3
3
Sa Vakabulai na Tamata Lokiloki
1Ena dua na siga e rau a lako cake ki na Valenisoro o Pita kei Joni ni rauta na tolu na kaloko ena yakavi, na gauna ni masumasu. 2Ena matamata ni Valenisoro e vakatokai na Matamata o Lagilagi, sa dau kau voli yani kina ena veisiga e dua na tamata sa lokiloki mai na kete i tinana me dau la'ki kere i lavo vei ira era curu ki na Valenisoro. 3Ni sa raici rau o Pita kei Joni o koya ni rau sa vakarau curu yani, sa mani kerea kina me rau bau solia vua e dua na ka. 4Erau sa qai vakaraici koya matua, ka sa qai kaya vua o Pita, “Raici keirau mai!” 5A sa vakaraici rau o koya, ni sa namaka me na rawata mai vei rau e dua na ka. 6Ia sa qai kaya vua o Pita, “E sega sara ga ni dua na i lavo e tu vei au, ia au na solia ga vei iko na ka e tu vei au: ena yaca i Jisu Karisito na kai Nasareci, au sa vakaroti iko mo tu cake ka lako!” 7Sa qai taura na ligana i matau ka tubera cake, ka sa vakaukauwataki sara mai na yavana kei na nona qurulasawa. 8Sa qai lade cake, ka tucake, ka vakatekivu lako wavoki. Sa curu vata sara kei rau ki na Valenisoro, a sa lako voli ka ladelade, ka vakacaucautaka na Kalou. 9Era sa raici koya na lewe vuqa ni sa veilakoyaki voli ka vakacaucautaka tiko na Kalou. 10Era sa qai kila ni sai koya ga oqo ka dau kere i lavo tiko ena Matamata o Lagilagi mai na Valenisoro. A sa curumi ira na rere kei na qoroqoro ena vuku ni ka sa yaco vua.
Na Vunau nei Pita ena Valenisoro
11Ni sa sobeti rau tikoga o Pita kei Joni na tamata o ya ena varada ka vakatokai na Varada i Solomoni era sa qoroqoro na tamata kecega ka ra cici sara vei iratou. 12Ia ni sa raici ira o Pita, sa qai kaya vei ira, “Oi kemuni na Isireli, na cava o ni kurabuitaka kina na ka oqo, se cava o ni vakaraici keirau matua kina? O ni nanuma beka ni keirau cakava me lako rawa na tamata oqo ena neirau kaukauwa ga se ena neirau dodonu? 13Na Kalou i Epara-ama, kei Aisake, kei Jekope, na nodra Kalou na noda qase, sa vakalagilagi Jisu na nona tamata Dauveiqaravi. O koya o ni a solia yani, ka cakitaka ena mata i Pailato ena nona a sa lewa me sereki koya.#Lako 3.15 14A tamata yalo savasava ka dodonu o koya, ia o ni a qai cakitaki koya, ka kerea ga e dua na daulaba me soli vei kemuni.#Maciu 27.15-23; Mari 15.6-14; Luke 23.13-23; Joni 19.12-15 15O ni a qai vakamatea na Vunibula, ia sa vakaturi koya cake tale mai na mate na Kalou, ka keitou sa kena i vakadinadina oi keitou oqo. 16Ni sai koya na kaukauwa e tiko ena yacana ka sa vakavuna me vakaukauwataki kina na tamata lokiloki oqo. Na veika o ni sa raica ka rogoca sa vakayacori mai na kena vakabauti na yacana; ni sa rawata o koya na bula mai na vakabauti Jisu, me vaka o ni sa vakadinadinataka.
17“Ia oqo, kemuni na wekaqu, au kila ni veika o ni a cakava vata kei ira na nomuni i liuliu vei Jisu sa vu mai na nomuni sega ni kila. 18Ia a sa vakatakila tu e liu na Kalou ena gusudra kecega na parofita ni na sota kaya na veika rarawa na nona Mesaia; ka sa vakayacora sara o koya me yaco dina vakaoqo. 19Mo ni veivutuni kina, ka saumaki mai vua na Kalou, me rawa ni vosota o koya na nomuni i valavala ca. Kevaka o ni vakayacora oqo, 20ena qai yaco mai na gauna ni veivakaukauwataki mai vua na Turaga; ka na talai Jisu mai, o koya na Mesaia sa digitaka oti tu o koya me nomuni. 21Ia sa dodonu me na tiko mada ga mai lomalagi o koya me yacova na gauna sa na vakavoutaki kina na veika kece, me vaka sa vosa oti kina na Kalou ena gusudra na nona parofita yalo savasava ena gauna makawa sara. 22Ni a kaya o Mosese, ‘Ena vakatubura mai vei kemuni na Turaga na Kalou e dua na nomuni parofita, me vakataki au. Mo ni na vakarogoci koya ena ka kecega ena tukuna vei kemuni.#Vrua 18.15,18 (LXX) 23O koya ga sa sega ni talairawarawa vua na parofita o ya ena tawasei tani mai vua na Kalou ka vakarusai.’#Vrua 18.19 24O ira kece talega na parofita era sa vosa oti, mai vei Samuela kei ira era veitarataravi mai, era sa tukuna oti tu na gauna oqo. 25Oi kemuni na luvedra na parofita, ka sai kemuni ka a baleti kemuni na veiyalayalati sa cakava na Kalou kei ira na nomuni qase, ni sa kaya vakaoqo vei Epara-ama, ‘Ena kalougata na veimataqali kecega e vuravura ena vuku ni nomu kawa.’#Vteki 22.18 26A sa digitaka kina na Kalou na nona Dauveiqaravi ka sa talai koya taumada yani vei kemuni, me vakalougatataki kemuni ena nona vakayacora mo ni vuki tani yadudua mai na nomuni i valavala ca.”
Dewis Presennol:
Cakacaka 3: FNVDC12
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Fijian New Version including Deuterocanonical Books © Bible Society of the South Pacific, 2012.