Lk 23
23
Li Jesus chiru laj Pilaat
(Mt 27,1-2, 11-14; Mk 15,1-5; Jn 18,28-38)
1Toja' naq ke'xaqliik li xk'ihaleb' a'an, ke'xk'am li Jesus chiru laj Pilaat, 2ke'ok chi xjitb'al ut ke'xye:
—Xqataw chaq a'in chi xpo'b'aleb' xch'ool li qatenamit. Nokooxq'us chi xk'eeb'al li toj re li awab'ej ut naxyehatq naq a'an li Kriist Rey.
3Kixpatz' ut laj Pilaat re:
—Ma laa'at li xreyeb' laj Judiiy?
Kixsume:
—Yaal li xaye: laa'inin.
4Toja' naq kixye laj Pilaat reheb' li xb'eenil aj tij ut eb' li tenamit:
—Laa'in maajun maak nintaw rik'in li winq a'in.
5A'ut eb' a'an kaw chik ke'xye:
—Naxpo' xch'ooleb' li tenamit, yo chi xtzolb'aleb' sa' chixjunil Judea: xtikib' chaq Galilea ut xk'ulunk toj arin.
6Naq kirab'i a'in laj Pilaat, kixpatz' ma aj Galilea li winq a'an; 7ut naq kixnaw naq li Jesus chalenaq chaq b'arwi' nataqlank laj Herodes, kixtaqla rik'in, xb'aan naq sa'eb' li kutan a'an wank ajwi' laj Herodes Jerusalén.
Li Jesus chiru laj Herodes
8Naq laj Herodes kiril ru li Jesus, k'ajo' naq kisaho'k sa' xch'ool: chalen chaq junxil naxrahi rilb'al ru, xb'aan naq narab'i li nayeemank chirix ut naraj raj rilb'al chi xb'aanunkil junaq xnimal eetalil. 9Ut kixpatz'i rik'in k'iila aatin, a'ut li Jesus tik ink'a' kixsume. 10Wankeb' aran li xb'eenil aj tij ut eb' laj tz'iib', kaw yookeb' chi xjitb'al. 11Ab'anan laj Herodes naq ak xtz'eqtaana ut xreetz'u li Jesus, rochb'eeneb' laj puub' li wankeb' rik'in, kixk'e jun xchaq'alil ru aq'ej chirix ut kixtaqla wi' chik rik'in laj Pilaat. 12Sa' li kutan a'an ke'xk'am rib' sa' amiiwil laj Herodes ut laj Pilaat, xb'aan naq junxil xik' neke'ril chaq rib'.
Li Jesus kik'ame'k wi' chik chiru laj Pilaat
(Mt 27,15-26; Mk 15,6-15; Jn 18,39—19,16)
13Toja' naq laj Pilaat kixb'oqeb' li xb'eenil aj tij, eb' laj k'amol b'e ut eb' li tenamit, 14ut kixye reheb':
—Xek'am chaq chiwu li winq a'in jo' aj po'ol xch'ooleb' li tenamit; a'ut laa'in xinpatz'i cheru laa'ex ut ink'a' xintaw junaq xmaak li nekejit wi'. 15Chi moko laj Herodes, xb'aan naq xq'ajsi chaq qik'in. Ch'olch'o naq maak'a' xb'aanu li xk'ulub' wi' kamk. 16Jo'kan naq tink'e chi rahob'tesiik ut twach'ab'.#23,16 Li raqal 17: Rajlal chihab' sa' li ninq'e tento taarach'ab' reheb' junaq li wank sa' tz'alam, moko tz'aqal xcha'al ta li Evangelio, a'an b'an yal xtiqb'al aj chik li raqal 16 (cf. Mt 27,15).
18Chixjunileb' li k'iila tenamit, chi junaj xyaab' xkuxeb', ke'xjap re chi xyeeb'al:
—Isi a'an chiqu ut ach'ab' qe laj Barrabás! chankeb'.
19Laj Barrabás kik'eemank sa' tz'alam xb'aan jun li mululij ib' kiwank sa' li tenamit jo' ajwi' xb'aan jun kamsink kixb'aanu.
20Ki'ok wi' chik laj Pilaat chi raatinankileb', taaraj raj rach'ab'ankil li Jesus; 21a'ut eb' a'an japjookeb' re chi xyeeb'al:
—K'e chiru krus, k'e chiru krus!
22Sa' rox sut kixye reheb':
—K'a' put ru li ink'a' us xb'aanu a'in? Ink'a' xintaw junaq xmaak li xk'ulub' wi' kamk. Jo'kan naq tink'e chi rahob'tesiik ut twach'ab'.
23A'ut eb' a'an yalyookeb' xq'e chi xpatz'b'al chi kaw xyaab'eb' xkux naq chik'ehe'q chiru krus, ut li xyaab' xkuxeb' yo chi numtaak.
24Toja' naq laj Pilaat kiraqok aatin sa' xb'een naq chi'uxmanq li b'arwan yookeb' chi xtz'aamankil. 25Ut kirach'ab' li winq yookeb' chi xpatz'b'al, a' li kik'ehe'k sa' tz'alam xb'aan jun li mululij ib' ut jun kamsink, ut kixq'axtesi li Jesus sa' ruq'eb' re naq te'xb'aanu li te'raj.
Sa' xb'ehel li Kalbario
(Mt 27,31-32; Mk 15,21-23; Jn 19,16-17)
26Naq yookeb' chi xk'amb'al li Jesus, ke'xchap jun li winq, aj Simón xk'ab'a', Sirene xtenamit. A'an yo chi chalk sa' xk'aleb'aal, ut ke'xk'e chixpaqo li krus re tixk'am chirix li Jesus.
27Naab'aleb' li tenamit te'taaqenq re li Jesus ut naab'aleb' li ixq neke'xten re li xch'ooleb' ut neke'huyhutk chi yaab'ak chirix.
28Ab'an li Jesus kixsutq'isi rib' chi rilb'aleb' ut kixye:
—Ex rixqilal Jerusalén, mexyaab'ak chiwix, yaab'anqex b'an cherix laa'ex ut chirix leeralal eek'ajol. 29Xb'aan naq, chek'e reetal, te'chalq kutan taayeemanq wi': «Us xaq reheb' li xma'al ixq ut eb' li ink'a' ke'alank, ut eb' li ink'a' ke'tu'resink!». 30Toja' naq eb' li tenamit te'xtikib' xyeeb'al reheb' li tzuul: «T'anenqex chaq sa' qab'een»; ut reheb' li ninqi b'ool: «Chooheemuqaq!».#23,30 Os 10,8; Ap 6,16. 31Xb'aan naq wi neke'xb'aanu a'in rik'in li rax che', k'aru taak'ulmanq rik'in li chaqi?#23,31 Li tenamit Jerusalén a'an chanchan junaq che' xchaqik chi maak'a' li ru; jo'kan naq tento tixtoj rix li xmaak (cf. 19,41-44).
32Ke'xk'am ajwi' wiib'eb' chik aj maak re te'kamsiiq rochb'een li Jesus.
Rokik li Jesus chiru krus
(Mt 27,35-44; Mk 15,24-32; Jn 19,17-24)
33Naq ke'wulak sa' li na'ajej xB'aqel-xjolom-kamenaq xk'ab'a', ke'xchirib' li Jesus chiru krus rochb'eeneb' laj maak: jun sa' xnim uq' ut jun sa' xtz'e uq'. 34Ut li Jesus kixye: “At inYuwa', chakuyeb' xmaak xb'aan naq ink'a' neke'xnaw k'aru yookeb' chi xb'aanunkil”.#23,34 Cf. Is 53,12; Hch 7,60; 1 Ko 2,8.
Ut eb' laj puub' ke'xjek'i li raq' chirib'ileb' rib' chi b'uulinb'il rix.
35Xaqxookeb' aran li tenamit chi ilok. Ut eb' li xb'eenil li tenamit yookeb' chi reetz'unkil, neke'xye:
—Jalanatq chik kixkoleb'; chixkolaq rib' xjunes, wi a'an li Kriist re li Yos, li Sik'b'il chaq ru.
36Jo'kaneb' ajwi' laj puub', yookeb' chi reetz'unkil. Ke'nach'ok chi xyeechi'inkil vinaagr 37ut ke'xye re:
—Wi laa'at li xreyeb' laj Judiiy, kol aawib'!
38Wank ajwi' sa' xb'een li Jesus jun li eetalil tz'iib'anb'il chi jo'ka'in: “A'an a'in li xReyeb' laj Judiiy”.
39Jun reheb' laj maak t'uyt'u chiru krus yo chi xhob'b'al li Jesus:
—Ma maawa'at tab'i' li Kriist? Kol aawib' ut choohaakol ajwi' laa'o, chan re.
40Ut kiq'use'k xb'aan li jun chik:
—Chi moko li Yos nakaxiwa ru, us ta juntaq'eet li rahilal yookat chi xk'ulb'al aawochb'een? 41Laa'o yaal naq qak'ulub' xk'ulb'al a'an xb'aan naq xq'ajkamunkil li qab'aanuhom, a'ut a'in maak'a' k'aru li ink'a' ta us xb'aanu.
42Ut kixye:
—At Jesus, chinjultiko'q aawe naq tolat-elq rik'in xnimal aawankilal.
43Kixye li Jesus re:
—Relik chi yaal ninye aawe naq hoon ajwi' wanqat wik'in sa' linloq'laj na'aj.
Xkamik li Jesus
(Mt 27,45-56; Mk 15,33-41; Jn 19,25-37)
44Ak wa'leb' tana naq kimoy ru li saq'e ut ki'aak'ab'o'k sa' xb'een chixjunil li ruuchich'och' toj sa' oxib' honal. 45Li xt'ikrul li rochoch li Yos kiq'iche'k sa' xyi 46ut li Jesus kixjap re chi kaw:
—At inYuwa', sa' laawuq' tinq'axtesi linmusiq', chan.#23,46 Sal 31,6; Hch 7,59.
Ut naq kixye a'in, ki'elk xch'ool.
47Naq kiril a'in li xjolomileb' laj puub', kixnima xloq'al li Yos:
—Relik chi yaal naq li winq a'in tiik xch'ool, chan.
48Ut chixjunileb' li tenamit li ke'wulak aran chi ilok, naq ke'xk'e reetal li k'aru xk'ulmank, ke'q'ajk sa' rochocheb', yookeb' chi xtenb'al re eb' li xch'ool.
49Chixjunileb' li neke'nawok ru li Jesus ut eb' li ixq li ke'taaqenk re chalen chaq Galilea, najt xaqxookeb' chaq chi rilb'al chixjunil a'in.
Kimuqe'k li Jesus
(Mt 27,57-61; Mk 15,42-47; Jn 19,38-42)
50-51Kiwank jun li winq, aj José xk'ab'a', xkomoneb' laj k'amol b'e, chaab'il ut tiik xch'ool. A'an aj Arimatea, jun tenamit sa' xteepal Judea. Naroyb'eni li xnimajwal awab'ejihom li Yos ut ink'a' kixk'ul xch'ool li b'arwan ke'xk'uub' ut ke'xb'aanu eb' laj k'amol b'e.
52Kiwulak rik'in laj Pilaat ut koxpatz' li xtz'ejwal li Jesus. 53Kixkub'si chaq chiru krus, kixb'at sa' t'ikr ut koxk'e sa' jun muqleb'aal hopb'il sa' pek, b'arwi' toj maajun muqb'il. 54Yo li Kawunk#23,54 A'an li kawunk re li sábado. ut ak tiklaak re li sábado.
55Eb' li ixq li ke'taaqenk chaq re li Jesus toj Galilea, koheb' chirix laj José ut ke'ril li muqleb'aal ut chanru naq kik'ehe'k li xtz'ejwal li Jesus aran.
56Chirix chik a'an ke'q'ajk, koxe'xkawresi sununkil b'an ut miir, ut ke'hilank sa' li sábado, jo' chanru naxye li xChaq'rab' laj Moisés.
Dewis Presennol:
Lk 23: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.